ᒨᓯᓯ ᓯᑕᒪᖏᑦ 13
13
ᑎᓕᔭᐅᔪᑦ ᓄᓇᒧᑦ ᑬᓇᓂᒧᑦ ᐃᔨᕋᕐᑐᕐᓗᑎᒃ ᕿᒥᕐᕈᐊᕆᐊᕐᑐᖅᑯᓪᓗᒋᑦ
1ᐊᑕᓂᖅ ᒨᓯᓯᒧᑦ ᐅᖃᕐᐳᖅ ᐃᒤᓕᓪᓗᓂ, 2“ᑎᓕᓯᓚᐅᕆᑦ ᐊᖑᑎᓂᒃ ᐃᔨᕋᕐᑐᕐᓗᑎᒃ ᕿᒥᕐᕈᓂᐊᕐᑐᓂᒃ ᓄᓇᒥᒃ ᑬᓇᓂᒥᒃ, ᐃᓴᕆᐊᓕᒥᐅᓄᑦ ᑐᓂᓂᐊᕐᑕᓐᓄᑦ; ᑭᖑᕚᖑᖃᑎᒌᑦ ᐊᑐᓂᑦ ᐊᖓᔪᖅᑳᖏᓐᓂᑦ ᓯᕗᓕᕐᑎᐅᔪᓂᒃ ᐊᑕᐅᓯᕐᒥᒃ ᓂᕈᐊᕐᓗᑎᑦ.” 3ᑍᒤᒻᒪᑦ ᒨᓯᓯ ᑎᓕᓯᓚᐅᕐᐳᖅ ᐃᓄᖃᖏᑦᑐᒥᑦ ᐸᕌᓐᒥᒃ ᐊᑎᓕᖕᒥᑦ ᐱᓪᓗᑎᒃ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ, ᑎᓕᔭᐅᔪᓕᒫᓪᓗ ᐃᓴᕆᐊᓕᒥᐅᑦ ᓯᕗᓕᕐᑎᒋᕔᑦ. 4ᐅᑯᐊᖑᓚᐅᕐᐳᑦ: ᕉᐱᓂᐅᑉ ᑭᖑᕚᖏᓐᓂᑦ, ᓵᒧᐊ ᔭᑯᕆᐅᑉ ᐃᕐᓂᖓ; 5ᓯᒥᐅᓂᐅᑉ ᑭᖑᕚᖏᓐᓂᑦ, ᓴᐹᑦ ᕼᐅᕆᐅᑉ ᐃᕐᓂᖓ; 6ᔫᑕᐅᑉ ᑭᖑᕚᖏᓐᓂᑦ, ᑬᓚᐱ, ᔨᐳᓂᐊᐅᑉ ᐃᕐᓂᖓ; 7ᐃᓴᑳᕆᐅᑉ ᑭᖑᕚᖏᓐᓂᑦ, ᐃᒐᐅᓪ ᔫᓯᐱᐅᑉ ᐃᕐᓂᖓ; 8ᐃᕗᕅᒥᐅᑉ ᑭᖑᕚᖏᓐᓂᑦ, ᕼᐆᓯᐊ ᓈᓂᐅᑉ ᐃᕐᓂᖓ; 9ᐱᓐᔭᒥᓂᐅᑉ ᑭᖑᕚᖏᓐᓂᑦ, ᐸᓪᑎ ᕌᕗᑉ ᐃᕐᓂᖓ; 10ᓯᐳᓗᓂᐅᑉ ᑭᖑᕚᖏᓐᓂᑦ, ᒐᑍᓕ ᓲᑎᐅᑉ ᐃᕐᓂᖓ; 11ᔫᓯᐱᐅᑉ ᑭᖑᕚᖏᓐᓂᑦ, ᑕᕝᕙ ᒫᓇᓯᐅᑉ ᑭᖑᕚᖏᓐᓂᑦ, ᒑᑎ ᓲᓯᐅᑉ ᐃᕐᓂᖓ; 12ᑖᓐ ᑭᖑᕚᖏᓐᓂᑦ, ᐊᒥᐃᐅᓪ ᒋᒪᓕᐅᑉ ᐃᕐᓂᖓ; 13ᐋᓱᕆᐅᑉ ᑭᖑᕚᖏᓐᓂᑦ, ᓯᑐᕆ ᒤᑰᑉ ᐃᕐᓂᖓ; 14ᓈᑉᑕᓕᐅᑉ ᑭᖑᕚᖏᓐᓂᑦ, ᓈᐰ ᕘᑉᓯᐅᑉ ᐃᕐᓂᖓ; 15ᒑᑎᐅᑉ ᑭᖑᕚᖏᓐᓂᑦ, ᒋᐅᐃᐅᓪ ᒫᑭᐅᑉ ᐃᕐᓂᖓ. 16ᑖᒃᑯᐊ ᑕᕝᕙ ᐊᖑᑎᑦ ᐊᑎᖏᑦ ᒨᓯᓯᐅᑉ ᑎᓕᓚᐅᕐᑕᖏᑦ ᐃᔨᕋᕐᑐᕐᓗᑎᒃ ᓄᓇᒥᒃ ᕿᒥᕐᕈᔭᕐᑐᖁᓪᓗᒋᑦ. ᒨᓯᓯᐅᓪᓗ ᕼᐆᓯᐊ ᓈᓂᐅᑉ ᐃᕐᓂᖓ ᐊᑎᕐᑖᕐᑎᑉᐹ ᔮᓱᐊᒥᒃ.
17ᑕᕝᕙ ᒨᓯᓯᐅᑉ ᑎᓕᕔᑦ ᐃᔨᕋᕐᑐᕐᓗᑎᒃ ᓄᓇᒥᒃ ᑬᓇᓂᒥᒃ ᕿᒥᕐᕈᔭᕐᑐᖁᓪᓗᒋᑦ, ᐅᖃᐅᑎᓪᓗᒋᓪᓗ, “ᒪᐅᓈᕐᓗᓯ ᓯᕿᓂᐅᑉ ᓇᓛᓂᑦ ᓂᒋᑉᒥᑦ ᖃᖅᑲᓄᑦ ᐂᓕᕆᕐᓯ, 18ᕿᒥᕐᕈᒋᑦᓯ ᓄᓇ ᖃᓄᐃᑦᑑᖕᒪᖔᑦ: ᐃᓄᐃᓪᓗ ᑖᕙᓂ ᓄᓇᖃᕐᑐᑦ ᓴᓐᖏᔫᖕᒪᖔᑕ ᓴᓐᖐᑦᑑᖕᒪᖔᑕᓘᓐᓂᑦ ᐅᓄᖏᒻᒪᖔᑕᓘᓐᓃᑦ ᐅᓄᕐᒪᖔᑕᓘᓐᓃᑦ; 19ᓄᓇ ᓄᓇᒋᔭᖓᑦ ᐱᐅᖕᒪᖔᑦ ᐱᐅᖏᒻᒪᖔᓪᓘᓐᓃᑦ; ᐃᒡᓗᒐᓴᒡᔪᐊᖁᑎᖏᓪᓗ ᑕᖕᒫᕐᓯᒪᕕᐅᔮᕐᒪᖔᑕᓘᓐᓃᑦ ᓴᐴᓗᑕᖃᕐᒪᖔᑕᓘᓐᓃᑦ; 20ᓄᓇ ᐱᕈᕐᕕᐅᑦᓯᐊᕐᒪᖔᑦ ᐱᕈᕐᕕᐅᑦᓯᐊᖏᒻᒪᖔᑕᓘᓐᓃᑦ; ᑲᑎᓐᖓᔪᕐᔪᐊᓂᒃ ᓇᐹᕐᑐᖃᕐᒪᖔᑦ ᓇᐹᕐᑐᖃᖏᒻᒪᖔᓪᓘᓐᓃᑦ, ᓯᕘᕋᖏᓪᓗᓯ ᕾᑦᓯᔪᒫᕐᐳᓯ ᓄᓇᐅᑉ ᐱᕈᕐᑐᖏᓐᓂᒃ.” ᓇᓪᓕᐅᑎᓚᐅᕐᐳᓪᓗ ᑍᑦᓱᒪᓂ ᓯᕗᓪᓖᑦ ᕔᓂᒃᓮᑦ ᐱᕈᕇᑦᓯᐊᕐᕕᖓᑦ.
21ᐂᓚᐅᕐᐳᑦ ᐃᔨᕋᕐᑐᕐᓗᑎᒃ ᓄᓇ ᕿᒥᕐᕈᔭᕐᑐᕐᓗᒍ ᐃᓄᖃᖏᑦᑐᒥᑦ ᔨᓐᒥᒃ ᐊᑎᓕᖕᒥᑦ ᐱᒋᐊᕐᓗᑎᒃ ᕅᕼᐊᐱ ᑎᑭᓪᓗᒍ, ᕼᐊᒫᑎ ᐃᑎᕐᑕᕐᕕᐅᑉ ᖃᓂᑕᖓᓂ. 22ᐂᓚᐅᕐᐳᑦ ᓯᕿᓂᐅᑉ ᓇᓛᓂᑦ ᓂᒋᑉᒥᑦ ᕼᐃᑉᐳᕌᓂ ᑎᑭᓪᓗᒍ; ᐊᕼᐂᒪᓐ, ᓯᓮᓗ, ᑕᓪᒤᓗ ᐊᓇᑭᐅᑉ ᑭᖑᕚᖏᑦ ᑍᑲᓃᓚᐅᕐᐳᑦ. (ᕼᐃᐸᕋᓐ ᓴᓇᔭᐅᓚᐅᕐᑐᖅ ᔪᐊᓂ ᐄᑦᔨᑉᑎᒦᑦᑐᖅ ᐊᕐᕌᒍᑦ 7ᐃᑦ ᓴᓇᔭᐅᓚᖅᑳᕐᑎᓐᓇᒍ.) 23ᓇᕐᓴᒧᑦ ᐊᑎᓕᖕᒧᑦ ᐃᔅᑯᓪᒥᒃ ᑎᑭᓐᓇᒥᒃ, ᓇᐹᕐᑑᑉ ᐊᕙᓚᖓᔪᖓᓂᒃ ᓇᑲᑦᓯᕗᑦ ᐸᐅᕐᖓᓂᒃ ᐊᑕᐅᓯᐅᓕᖅᑲᖓᔪᓂᒃ ᕔᓂᒃᓴᓂᒃ ᑲᑎᓐᖓᔪᓂᒃ; ᒪᕐᕉᓪᓗᑎᒃ ᐊᒡᔭᕐᓯᓕᕐᐳᒃ ᕿᔪᖕᒧᑦ ᐊᑭᕋᕐᓗᒍ. 24ᓄᓇ ᑖᓐᓇ ᐊᑎᖃᕐᐳᖅ ᐃᔅᑯᓪ#13:24 ᐃᔅᑯᓪ ᑐᑭᓕᒃ ᐸᐅᕐᖓᓂᒃ ᑲᑎᓐᖓᔪᓂᒃ ᑕᕝᕙᓂ ᐊᖑᑎᑦ ᐃᓴᕆᐊᓕᒥᐅᑦ ᕔᓂᒃᓴᓂᒃ ᑲᑎᓐᖓᔪᓂᒃ ᓇᑲᑦᓯᓚᐅᕐᒪᑕ ᓇᐹᕐᑐᒥᑦ.
25ᐅᑎᓚᐅᕐᐳᓪᓗ ᐃᔨᕋᕐᑐᕐᓗᑎᒃ ᓄᓇᒥᒃ ᕿᒥᕐᕈᔭᕐᑐᕐᓯᒪᓚᐅᕐᓗᑎᒃ ᐅᓪᓗᓂᒃ 40ᓂᒃ. 26ᐊᐅᓪᓚᕋᒥᒃ ᒨᓯᓯᒧᑦ ᐂᕉᓂᒧᓪᓗ ᐃᓴᕆᐊᓕᒥᐅᓄᑦ ᐅᑎᕐᐳᑦ, ᑲᑎᓯᒦᑦᑐᓄᑦ ᐃᓄᖃᖏᑦᑐᒥ ᐸᕌᓐᒥ; ᐅᓂᒃᑳᕐᓗᑎᒡᓗ ᐃᓄᖃᑎᒌᒡᔪᐊᓄᑦ, ᓄᓇᐅᓪᓗ ᐸᐅᕐᖓᖏᓐᓂᒃ ᑕᑯᑎᓪᓗᒋᑦ. 27ᑖᒃᑯᓄᖓ ᐅᓂᒃᑳᕐᐳᑦ ᐅᖃᕐᓗᑎᒃ: “ᓄᓇᒧᑦ ᐂᓚᐅᕐᐳᒍᑦ ᐅᕙᑦᑎᓐᓂᒃ ᑎᓕᓯᕝᕕᒋᓚᐅᕐᑕᑦᓯᓐᓄᑦ ᐱᕈᕐᑐᖃᑦᓯᐊᕐᑐᒧᑦ ᐊᔪᕐᓴᕐᓇᖏᑦᑐᒧᓪᓗ, ᐅᕝᕙᓗ ᐸᐅᕐᒊᑦ ᓄᓇᒥ ᐱᕈᕐᑐᑦ. 28ᑭᓯᐊᓂᓕ ᐃᓄᐃᑦ ᑖᕙᓂ ᓄᓇᖃᕐᑐᑦ ᓴᓐᖏᔪᐊᓘᕗᑦ; ᓄᓇᓕᒡᔪᐊᖏᓪᓗ ᐊᕙᓗᕐᔪᐊᖃᕐᐳᑦ ᓴᐴᓗᑕᖃᕐᓗᑎᒃ ᐊᖏᔪᕐᔪᐊᖑᓪᓗᑎᒡᓗ; ᐊᒻᒪᓗ ᑕᑯᓚᐅᕐᐳᒍᑦ ᐊᓇᑭᐅᑉ ᑭᖑᕚᖏᓐᓂᒃ ᑕᐅᕙᓂ. 29ᐊᒪᓕᑬᑎᑦ ᓄᓇᖃᕐᐳᑦ ᓯᕿᓂᐅᑉ ᓇᓛᓂ ᓂᒋᑉᒥ; ᕼᐃᑍᑎᑦ, ᔨᐳᓮᑎᑦ, ᐊᒧᕅᑎᓪᓗ ᓄᓇᖃᕐᐳᑦ ᖃᖅᑲᓂ; ᑬᓇᓂᒥᐅᑦ ᓄᓇᖃᕐᐳᑦ ᐃᒪᐅᑉ ᓯᓈᓂ ᑰᓪᓗ ᔪᐊᕐᑕᓂᐅᑉ ᓯᓈᓂ.”
30ᑬᓚᐱᐅᑉ ᐃᓄᐃᑦ ᓂᐸᖏᖁᕔᑦ ᒨᓯᓯᐅᑉ ᓵᖓᓂ, ᐅᖃᕐᓗᓂᓗ, “ᐊᑏ ᒫᓐᓇ ᑖᕗᖓ ᐂᓕᕐᑕ ᐱᑖᕆᔭᕐᑐᓕᕐᓗᒍ, ᐊᔪᖏᓐᓇᑦᑕ ᓵᓚᒋᔪᓐᓇᑦᓯᐊᕋᑦᑎᒍ.”
31ᐊᖑᑎᓪᓕ ᐊᐅᓪᓚᕐᓯᒪᖃᑎᒋᓚᐅᕐᑕᖏᑦ ᑕᐅᕗᖓ ᐅᖃᕐᐳᑦ, “ᑍᒃᑯᐊ ᐅᓇᑕᕆᐊᕐᑐᕈᓐᓇᓐᖏᑕᕗᑦ ᐊᔪᓗᐊᕋᕐᑕ, ᐅᕙᑦᑎᓐᓂᑦ ᓴᓐᖏᓂᕐᓴᐅᖕᒪᑕ.” 32ᑖᒃᑯᐊᓗ ᐅᓂᒃᑳᕐᐳᑦ ᐱᐅᖏᓐᓂᕅᓪᓗᑎᒃ ᐃᓴᕆᐊᓕᒥᐅᓄᑦ ᓄᓇᒥᒃ ᐃᔨᕋᕐᑐᕐᓗᑎᒃ ᕿᒥᕐᕈᔭᕐᑐᓚᐅᕐᑕᒥᖕᓂᒃ ᐅᖃᕐᓗᑎᒃ, “ᓄᓇ ᐃᔨᕋᕐᑐᕐᓗᑕ ᕿᒥᕐᕈᔭᕐᑐᓚᐅᕐᑕᕗᑦ ᓱᒃᑯᔨᐊᖃᕐᐳᑦ ᐃᓄᖕᓂᒃ ᑖᕙᓂ ᓄᓇᖃᕐᑐᓂᒃ; ᐃᓄᐃᑦ ᑖᕙᓂ ᑕᑯᔭᓕᒫᕗᑦ ᐊᖏᔫᑎᐊᓘᕗᑦ. 33#ᒨᓯᓯ ᓯᕗᓪᓖᑦ 6:4.ᑖᕙᓂ ᑕᑯᓚᐅᕐᐳᒍᑦ ᐃᓄᒃᐸᓂᒃ (ᐊᓇᑭᐅᑉ ᑭᖑᕚᖏᑦ ᐃᓄᒃᐸᓂᑦ ᐱᓯᒪᖕᒪᑕ); ᐅᕙᒍᓪᓕ ᖁᐱᕐᕈᑎᑐᑦ ᐱᒡᓕᕐᑕᐅᔮᕐᑐᑎᑐᑦ ᑍᒤᓚᐅᕐᐳᒍᑦ ᑕᐅᑐᒃᑕᑦᑎᒍᑦ, ᑍᒫᒃᑕᐅᖅ ᑍᒃᑯᓇᓐᖓᑦ ᑕᐅᑐᒃᑕᐅᓪᓗᑕ.”
Currently Selected:
ᒨᓯᓯ ᓯᑕᒪᖏᑦ 13: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.