ᒨᓯᓯ ᓯᑕᒪᖏᑦ 9
9
ᖄᖏᕐᑕᐅᕕᒃᓯᐅᕐᓂᐅᑉ ᓇᓪᓕᐅᑎᓂᖓᑕ ᐂᑉᐸᖓ
1 #
ᒨᓯᓯ ᐂᑉᐸᖏᑦ 12:1-13. ᐊᑕᓂᐅᓪᓗ ᒨᓯᓯ ᐅᖃᕐᕕᒋᓚᐅᕐᐹ ᐃᓄᖃᖏᑦᑐᒥ ᓮᓁᒥ, ᑕᖅᑭᐅᑉ ᓯᕗᓪᓕᕐᐹᖓᓂ ᐊᕐᕌᒍᑉ ᐂᑉᐸᖓᓂ ᓄᓇᒥᑦ ᐄᑦᔨᑉᑎᒥᑦ ᐊᐅᓪᓚᓚᐅᕐᓂᖓᑦᑕ ᑭᖑᕐᖓᓂ, ᐃᒫ ᐅᖃᕐᓗᓂ: 2“ᐃᓴᕆᐊᓕᐅᑉ ᕿᑐᕐᖓᖏᑦ ᓇᓪᓕᐅᓐᓂᕐᓯᐅᖃᑦᑕᕆᐊᖃᕐᐳᑦ ᓇᓪᓕᐅᑎᔭᕌᖓᑦ. 3ᐅᓪᓗᐃᑦ 14ᖓᓂ ᑕᖅᑭᒥ ᑕᕝᕙᓂ, ᐅᓪᓛᒃᑯᑦ ᖃᐅᒻᒪᓕᕐᑎᓪᓗᒍ, ᓇᓪᓕᐅᓐᓂᕐᓯᐅᓂᐊᕐᐳᓯ, ᐱᐅᓯᓕᒫᖏᑦ ᑐᒃᓯᐊᕐᓂᖏᓪᓗ ᒪᓕᒋᐊᖃᕐᐸᓯ.” 4ᑍᒫᒃ ᒨᓯᓯᐅᑉ ᐃᓴᕆᐊᓕᐅᑉ ᕿᑐᕐᖓᖏᑦ ᐅᖃᐅᑎᓚᐅᕐᐰᑦ ᖄᖏᕐᑕᐅᕕᒃᓯᐅᒻᒥᒃ ᓇᓪᓕᐅᓐᓂᕐᓯᐅᖁᓪᓗᒋᑦ. 5ᓇᓪᓕᐅᓐᓂᕐᓯᐅᓚᐅᕐᐳᓪᓗ ᐅᓪᓗᐃᑦ 14ᖓᓂ ᑕᖅᑮᑦ ᓯᕗᓪᓕᕐᐹᖓᓂᒃ, ᐅᓪᓛᒃᑯᑦ ᖃᐅᒻᒪᓕᕐᑎᓪᓗᒍ ᐃᓄᖃᖏᑦᑐᒥ ᓮᓁᒥ; ᐊᑕᓂᐅᑉ ᐱᖁᔨᓂᖓ ᒨᓯᓯᒃᑯᑦ ᒪᓕᒡᓗᒍ, ᐃᓴᕆᐊᓕᐅᑉ ᕿᑐᕐᖓᖏᑦ ᑍᒤᓕᐅᓚᐅᕐᐳᑦ.
6ᐱᑕᖃᓚᐅᕆᕗᕐᓕ ᐊᖑᑎᓂᒃ ᓴᓗᒤᓕᓯᒪᔪᓂᒃ ᐃᓄᕕᓂᕐᓂᒃ ᐊᒃᑐᕐᓯᓯᒪᓂᕐᒧᑦ, ᑖᒃᑯᐊ ᐅᓪᓗᒥ ᑍᑦᓱᒪᓂ ᖄᖏᕐᑕᐅᕕᒃᓯᐅᒻᒥᒃ ᓇᓪᓕᐅᓐᓂᕐᓯᐅᖃᑕᐅᔪᓐᓇᖏᓐᓇᒥᒃ; ᐅᓪᓗᒥ ᑍᑦᓱᒪᓂ ᑖᒃᑯᐊ ᒨᓯᓯᒧᑦ ᐂᕉᓂᒧᓪᓗ ᐂᓚᐅᕐᐳᑦ. 7ᑖᒃᑯᐊᓗ ᐊᖑᑎᑦ ᐅᖃᕐᓗᑎᒃ, “ᓴᓗᒤᓕᓚᐅᕋᑦᑕ ᐃᓄᕕᓂᕐᒥᒃ ᐊᒃᑐᕐᓯᓂᑦᑎᒍᑦ ᓱᖕᒪᑦ ᐊᑕᓂᕐᒧᑦ ᑐᓂᕐᕈᑕᐅᔭᕆᐊᖃᕐᑐᒥᒃ ᑐᓂᓯᖁᔭᐅᓐᖏᓚᒍᑦ ᑐᓂᕐᕈᓯᕕᒃᓴᖅ ᓇᓪᓕᐅᑎᒃᐸᑦ ᐃᓴᕆᐊᓕᐅᑉ ᕿᑐᕐᖓᖏᑦ ᐃᓚᒋᓗᒋᑦ?”
8ᒨᓯᓯᐅᓪᓗ ᐅᖃᐅᑎᕔᑦ, “ᕿᑲᓚᐅᕆᑦᓯ, ᑐᓴᕋᓱᖕᓂᐊᕋᒪ ᖃᓄᖅ ᐊᑕᓂᖅ ᐃᓕᑦᓯᓐᓂᒃ ᐱᖁᔨᖕᒪᖔᑦ.”
9ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, ᐅᖃᕐᓗᓂ, 10“ᐃᓴᕆᐊᓕᐅᑉ ᕿᑐᕐᖓᖏᑦ ᐅᖃᐅᑎᒃᑭᑦ: ‘ᓇᓕᕐᓯ ᑭᖑᕚᓯᓘᓐᓃᑦ ᓴᓗᒤᓕᑎᑕᐅᓯᒪᒃᐸᑦ ᑐᖁᖓᔪᒥᒃ ᐊᒃᑐᕐᓯᓯᒪᓂᕐᒧᑦ, ᐅᖓᓯᒃᑐᒦᑉᐸᓪᓘᓐᓃᑦ ᐊᐅᓪᓚᕐᓯᒪᓗᓂ, ᓱᓕ ᓇᓪᓕᐅᓐᓂᕐᓯᐅᕈᓐᓇᕐᐳᖅ ᐊᑕᓂᐅᑉ ᖄᖏᕐᑕᐅᕕᒃᓯᐅᕐᕕᖓᓂᒃ. 11ᐅᓪᓗᐃᑦ 14ᖓᓂ ᑕᖅᑭᐅᑉ ᐂᑉᐸᖓᓂ, ᐅᓪᓛᑯᑦ ᖃᐅᒻᒪᓕᕐᑎᓪᓗᒍ, ᓇᓪᓕᐅᓐᓂᕐᓯᐅᕆᐊᖃᕐᐳᑦ ᓂᕆᔭᕆᐊᖃᕐᐳᑦ ᖄᖏᕐᑕᐅᕕᒃᓯᐅᒻᒥᒃ ᓂᐊᖂᔭᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᐃᓚᖃᕐᓗᓂ, ᓂᕿᒧᓪᓗ ᐃᓚᐅᕈᑎᓂᒃ ᖃᓯᓕᓇᕐᑐᓂᒃ ᐃᓚᖃᕐᓗᓂ. 12#ᒨᓯᓯ ᐂᑉᐸᖏᑦ 12:46; ᔪᐊᓇᓯ 19:36.ᐅᓪᓛᒧᑦ ᐊᒥᐊᒃᑯᖏᑦᓯᐊᕐᓗᓯ, ᓴᐅᓂᖓᓂᒡᓘᓐᓃᑦ ᓇᑲᑦᓯᔭᕆᐊᖃᓐᖏᓚᓯ. ᖄᖏᕐᑕᐅᕕᐅᑉ ᒪᓕᒐᖏᑦ ᒪᓕᑦᓯᐊᕐᓗᒋᑦ ᓇᓪᓕᐅᓐᓂᕐᓯᐅᕆᐊᖃᕐᐳᓯ. 13ᐊᖑᓪᓕ ᓴᓗᒤᓕᓯᒪᖏᑦᑐᖅ ᐊᐅᓪᓚᕐᓯᒪᓇᓂᓗ, ᖄᖏᕐᑕᐅᕕᖕᒥᒃ ᓇᓪᓕᐅᓐᓂᕐᓯᐅᖏᑦᑐᖅ, ᑖᓐᓇ ᐃᓅᖃᑎᒌᒡᔪᐊᓂᑦ ᐃᓅᖃᑎᒥᓂᑦ ᐃᓚᒋᔭᐅᔪᓐᓃᕆᐊᖃᕐᐳᖅ, ᐊᑕᓂᕐᒧᑦ ᑐᓂᕐᕈᓯᕆᐊᕐᑐᓚᐅᖏᒻᒪᑦ ᑐᓂᕐᕈᓯᕆᐊᕐᑐᕐᕕᒃ ᓇᓪᓕᐅᑎᓯᒪᑎᓪᓗᒍ; ᑖᓐᓇ ᐊᖑᑦ ᐊᔪᕐᓂᕐᒥᓂᒃ ᐊᒡᔭᕐᓯᓂᐊᕐᐳᖅ.
14“‘ᐃᓅᖃᑎᒋᓐᖏᑕᓯᓕ ᐃᓂᖃᕐᑐᖅ ᐊᑯᓐᓇᑦᓯᓐᓂ, ᐊᑕᓂᐅᑉ ᖄᖏᕐᑕᐅᕕᒃᓯᐅᑎᖓᓂᒃ ᓇᓪᓕᐅᓐᓂᕐᓯᐅᕈᒪᒃᐸᑦ, ᓇᓪᓕᐅᓐᓂᕐᓯᐅᕈᓐᓇᕐᐳᖅ ᖄᖏᕐᑕᐅᕕᐅᑉ ᐱᐅᓯᖏᑦ ᒪᓕᒡᓗᒋᑦ ᑐᒃᓯᐊᕐᓂᒃᑯᓪᓗ ᐱᐅᓯᖏᑦ ᒪᓕᒡᓗᒋᑦ; ᐊᑕᐅᓯᕐᒥᒃ ᒪᓕᒐᖃᕆᐊᖃᕐᐳᓯ, ᓂᐅᕐᕈᐊᓄᓪᓗ ᓄᓇᖃᕐᑐᑐᖃᕐᓄᓪᓗ.’”
ᓄᕗᔭ ᐊᒻᒪᓗ ᐃᑯᒪ
15ᐅᓪᓗᒥ ᑐᐱᕐᔪᐊᑉ ᓇᑉᐸᕐᑕᐅᕕᖓᓂ, ᓄᕗᔭᐅᑉ ᑐᐱᕐᔪᐊᖅ ᐅᓕᓚᐅᕐᐹ, ᑐᐱᖅ ᐊᖏᕈᑎᑕᓕᒃ; ᐅᓐᓄᖕᒥᑦ ᐅᓪᓛᒧᑦ ᑎᑭᓪᓗᒍ ᑐᐱᕐᔪᐊᑉ ᖁᓛᓃᓚᐅᕐᐳᖅ ᑕᐅᑦᑐᖃᕐᓗᓂ ᐃᑯᒪᑎᑐᑦ. 16ᑍᒤᖏᓐᓇᓚᐅᕐᐳᖅ: ᐅᓪᓗᒃᑯᑦ ᓄᕗᔭᐅᑉ ᐅᓕᒃᓯᒪᓚᐅᕐᐹ, ᐃᑯᒪᑐᓪᓗ ᑕᐅᑦᑐᖃᓚᐅᕐᐳᖅ ᐅᓐᓄᐊᒃᑯᑦ. 17ᑍᒪᓐᖓᓪᓗ ᓄᕗᔭ ᖁᒻᒧᐊᓕᕌᖓᑦ ᐃᓴᕆᐊᓕᐅᑉ ᕿᑐᕐᖓᖏᑦ ᐃᖏᕐᕋᔭᕆᐊᖃᓚᐅᕐᐳᑦ; ᓄᕗᔭᓗ ᓄᖅᑲᕌᖓᑦ ᑕᕝᕙᓂ ᐃᓴᕆᐊᓕᐅᑉ ᕿᑐᕐᖓᖏᑦ ᑐᐱᕆᐊᖃᖃᑦᑕᓚᐅᕐᐳᑦ. 18ᐊᑕᓂᐅᑉ ᐱᖁᔨᓂᖓᒍᑦ ᐃᓴᕆᐊᓕᐅᑉ ᕿᑐᕐᖓᖏᑦ ᐃᖏᕐᕋᖃᑦᑕᓚᐅᕐᐳᑦ, ᐊᑕᓂᐅᓪᓗ ᐱᖁᔨᓂᖓᒍᑦ ᑕᖕᒫᕐᐸᒃᓗᑎᒃ; ᓄᕗᔭ ᑐᐱᕐᔪᐊᑉ ᖁᓛᓃᑎᓪᓗᒍ ᐃᓴᕆᐊᓕᐅᑉ ᕿᑐᕐᖓᖏᑦ ᓄᖅᑲᖓᖃᑦᑕᓚᐅᕐᐳᑦ. 19ᓄᕗᔭᓗ ᐊᑯᓂ ᑐᐱᕐᔪᐊᑉ ᖁᓛᓃᑎᓪᓗᒍ, ᐃᓴᕆᐊᓕᐅᑉ ᕿᑐᕐᖓᖏᑦ ᐊᑕᓂᐅᑉ ᐱᖁᔭᖓᓂᒃ ᓈᓚᓚᐅᕐᐳᑦ ᓄᖅᑲᖓᓪᓗᑎᒃ. 20ᐃᒤᓚᐅᕐᐳᖅ, ᐅᓪᓗᓂᒃ ᐅᓄᕐᑐᓂᒃ ᓄᕗᔭ ᑐᐱᕐᔪᐊᑉ ᖁᓛᓃᑦᓴᕌᖓᑦ; ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ ᑕᖕᒫᕐᓯᒪᖃᑦᑕᓚᐅᕐᐳᑦ, ᐊᑕᓂᐅᓪᓗ ᐱᖁᔨᓂᖓ ᒪᓕᒡᓗᒍ ᐃᖏᕐᕋᖃᑦᑕᓚᐅᕆᓪᓗᑎᒃ. 21ᐊᒻᒪᓗᑦᑕᐅᖅ, ᓄᕗᔭ ᓄᖅᑲᖓᑎᓪᓗᒍ ᐅᓐᓄᖕᒥᑦ ᐅᓪᓛᒧᑦ; ᓄᕗᔭ ᖁᒻᒧᐊᓕᕌᖓᑦ ᐃᖏᕐᕋᓯᖃᑦᑕᓚᐅᕐᐳᑦ ᐅᓪᓗᒃᑯᓪᓘᓐᓃᑦ ᐅᓐᓄᐊᒃᑯᓪᓘᓐᓃᑦ, ᓄᕗᔭ ᑍᒪᓐᖓᑦ ᖁᒻᒧᐊᓕᕌᖓᑦ ᐃᖏᕐᕋᔭᕆᐊᖃᖃᕐᑕᓚᐅᕐᐳᑦ. 22ᐅᓪᓘᒃ ᒪᕐᕉᒃᐸᑎᒡᓘᓐᓃᑦ, ᑕᖅᑭᓕᒫᕐᓘᓐᓃᑦ, ᐊᕐᕌᒍᓕᒫᕐᓘᓐᓃᑦ ᓄᕗᔭ ᑐᐱᕐᔪᐊᑉ ᖁᓛᓃᑉᐸᑦ ᐃᓴᕆᐊᓕᐅᑉ ᕿᑐᕐᖓᖏᑦ ᑕᖕᒫᕐᓯᒪᕙᓚᐅᕐᐳᑦ ᐃᖏᕐᕋᓇᑎᒡᓗ; ᖁᒻᒧᐊᒑᖓᓪᓕ ᐃᖏᕐᕋᖃᕐᑕᓚᐅᕐᐳᑦ. 23ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ ᑕᖕᒫᕐᓯᒪᖃᑦᑕᓚᐅᕐᐳᑦ, ᐊᑕᓂᐅᓪᓗ ᐱᖁᔨᓂᖓ ᒪᓕᒡᓗᒍ ᐃᖏᕐᕋᖃᑦᑕᕐᓗᑎᒃ; ᐊᑕᓂᐅᑉ ᐱᖁᔨᓂᖓ ᓈᓚᓚᐅᕐᐹᑦ, ᐊᑕᓂᖅ ᐱᖁᔨᖃᑦᑕᓚᐅᕐᒪᑦ ᒨᓯᓯᑯᑦ.
Currently Selected:
ᒨᓯᓯ ᓯᑕᒪᖏᑦ 9: EAIB
Highlight
Copy
Compare
Share
Want to have your highlights saved across all your devices? Sign up or sign in
Eastern Arctic Inuktitut Bible © Canadian Bible Society, 2012, 2021-2023.