Ntendo NTONGEELA AKWE
NTONGEELA AKWE
Mbugulu a Ntendo niya Itʉmi ɨganʉe Ahʉɨɨli ang'wa Yesʉ naɨandɨɨye kʉ Yelusalemu nɨitɨ naɨenee kʉ Yʉdea nɨ Samalia nʉkapika nkɨka ngɨza, anga ʉ Yesʉ Kilisito naɨʉtambʉɨe amanyisigwa akwe naɨwakɨlɨ kʉholwa walongole kigʉlʉ. Mʉlango nʉwa 1:8. Mbugulu ɨyɨ ɨandɨkilwe nʉ Lʉka nɨmʉandɨka mbugulu a Nkani Nza anga nɨyandɨkilwe nʉ Lʉka. Lʉka ʉyʉ aɨmʉkilɨki, nʉyo aɨʉkendegee lʉkʉlʉ ɨzewɨkɨsa kʉɨka impola nʉkʉandɨka makani ɨhi kʉ ʉkendegeeli. Mʉandɨkɨlwa nʉwa mbugulu yɨhi izi ni ibɨɨlɨ, niya Nkani Nza nɨ mbugulu a Ntendo niya Itʉmi ingɨ Mʉyunani nʉwitangwa ‘Teopilo.’ Ingɨ ihumɨkile imbugulu izi aɨandɨkɨwe antʉ nɨamʉhʉɨɨe ʉ Kilisito, nɨakumʉkile kɨna Ayunani nɨ Ayahudi. Mʉlango nʉwa 1.1. Ihumɨkile ɨmbugulu a Ntendo niya Itʉmi ɨandɨkilwe mʉ myaka a makʉmi mʉtandatʉ kʉpikɨɨla makʉmi mʉtandatʉ na ɨnnɨ kʉpumɨɨla nʉwatugʉlwa ʉ Yesʉ Kilisito, kʉnsoko ɨmbugulu ɨyɨ ɨkondile ʉ Paʉlo aɨwakɨlɨ kʉlekelwa mʉkadulumu. Lʉka aɨwendile mʉhɨnzo palʉng'wɨ nʉ Mitʉmi Paʉlo, itɨgwa ihumɨkile aɨwandɨkile mbugulʉ ɨyɨ mʉ kɨsalɨ ka Antiokia. Mbugulu a Ntendo ingɨ ʉlongoleki nʉwa mbugulu a Nkani Nza anga nɨyandɨkilwe nʉ Lʉka, kandɨɨye kʉganʉla kʉlongola kigʉlʉ kʉng'wa Yesʉ. Isɨgo lang'wa Lʉka kʉandɨka mbugulu ɨyɨ lɨlongolekile kʉtula lɨlo lɨɨlo naɨ ʉlɨkete naɨ ʉkʉandɨka imbugulu a Nkani Nza. Aʉloilwe ʉ Teopilo, nɨ Ahʉɨɨli ang'wa Yesʉ ɨdʉ naɨ alongolekile kizʉla alije ɨkʉlʉ kʉʉlʉ a nkani nɨakʉmanyisigwa, kʉlʉlo aɨʉandɨlile kʉʉkendegeeli ʉlikalo lang'wa Yesʉ nʉkenela kʉ Ʉkilisito. Mbugulu ɨyɨ na Ntendo niya Itʉmi kɨkʉʉpa ʉsese mpyani a Ahʉɨɨli ang'wa Yesʉ ang'wandyo naɨɨlɨ, nɨitɨ antʉ naɨikae likalo nʉla kʉmʉhʉɨɨla ʉ Yesʉ. Mpyani a itʉmi ɨkʉʉlagɨɨla ʉsese niitakɨwe kʉʉsania ʉhumi nʉwa Ng'wahʉ Ng'welʉ kenelya Nkani Nza kʉ antʉ angɨɨza.
Namolɨ
Nɨka ng'wandyo Ng'wahʉ Ng'welʉ ʉkʉazɨɨla amanyisigwa ang'wa Yesʉ nɨ Ahʉɨɨli ang'wa Yesʉ naɨongeelekile. Mʉlango nʉwa 1:1-8-1
Sʉnga Ahʉɨɨli ang'wa Yesʉ ɨkakɨɨla mʉmatungo anzala nʉ lwago, nɨ Ahʉɨɨli ang'wa Yesʉ ɨkongeeleka kʉkɨla imɨmbɨ niya Yelusalemu. Mʉlango nʉwa 8:2-12-23.
Naɨakɨla nanso Paʉlo wɨkalongola mʉhɨnzo wakwe nʉwa ng'wandyo nʉwa kutanantya Nkani Ninza. Mʉlango nʉwa 12:24-14-28.
Sʉnga ianza lɨkatankana kʉ Yelusalemu nʉ kʉlamʉla inkani kɨɨ ni nkʉlʉ niyitakɨwe kʉ ahʉɨɨlɨ nɨapya. Mʉlango nʉwa 15:1-35.
Nɨ kɨtyatɨɨe Paʉlo ʉkʉlongola mʉhɨnzo wakwe nʉwa kabɨɨlɨ kutanantya Nani Nza. Mʉlango nʉwa 15:36-18-22.
Naɨakɨla nanso Paʉlo wɨkalongola mʉhɨnzo wakwe nʉwa kataatʉ nʉwa Nkani Nza. Mʉlango nʉwa 18:23-20-38.
Panyambele Paʉlo ʉkʉambɨlwa kʉ Yelusalemu. Mʉlango nʉwa 21-26.
Ʉmaɨɨlyo Paʉlo wɨkatalwa kʉ Lʉmi. Mʉlango nʉwa 27-28.
Currently Selected:
Ntendo NTONGEELA AKWE: IBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Isanzu @The Word for The World International and Isanzu Language translation. All rights reserved