Walumi 4
4
Mfano wa Ibulahimu
1Ivo chilonge choni kwambuli ya Ibulahimu tata yetu? Ivo kadahaze kuimanya mbuli ino ya kutogoligwa na Mulungu? 2Kama Ibulahimu kakala yatendigwe mtenda goya kwa usang'hanaji wake mkulu, ivo, kanacho chinhu cha kuigodela kwa Mulungu. 3Manake Mayandiko ga Mulungu golonga, “Ibulahimu kamtogola Mulungu, nayo Mulungu kamtogola kua mtendagoya.” 4Msang'hanaji kolihigwa chitumetume, na chitumetume chake sio nhunza ila chiyalondeka kulihigwa. 5Mbali munhu ija hatumanila sang'hano zake mwenyego, mbali komtogola Mulungu ija yowalekesela malozo waja wabananzi, baho, Mulungu koigesa nhogola ya munhu iyo, na kumtogola kua mtendagoya. 6Nayo Daudi kalonga mbuli iija kwambuli ya ganogile ga Mulungu ga munhu ija Mulungu yomtogola kua mtendagoya bila kugesa sang'hano zake.
7“Wamweda waja walekeseligwe malozo gao,
waja malozo gao gafutigwa.
8Kana deng'o kulu munhu ija Mndewa kogasemwa malozo gake.”
9Ivo ndeng'helo ino yailongile Daudi ni kwa waja wengile kumbi waiyeka, hebu na waja hawengile kumbi? Kwavija chimala kulonga, “Ibulahimu katogola, nayo Mulungu kamtogola kua munhu mtendagoya.” 10Ivo, Ibulahimu katogoligwa na Mulungu yang'hali kwingila kumbi, hebu viyengile kumbi? Katogoligwa yang'hali kwingila kumbi na sio viyengile kumbi. 11Ibulahimu kengila kumbi hamwande, na kwingila kumbi kumwake kukala na chilaguso chigangamize kua Mulungu kamtogola kua munhu mtenda goya kwambuli ya kutogola kwake kuyakalile nayo kabula hanakwingila kumbi. Kwaivo, Ibulahimu kawa tata wa waja wose hata kwa waja hawengile kumbi, mbali wamtogola Mulungu, watogoligwa kua watenda goya. 12Ibulahimu ivija ni tata wa waja wengile kumbi, mbali sio kwavija wengila kumbi, ila kwavija wowinza nzila iija ya kutogola ya tata yetu Ibulahimu iyawinzile yang'hali hanakwingila kumbi.
Laliko da Mulungu dobokeligwa kwa kutogola
13Mulungu kamlalika Ibulahimu na ulelo wake kua isi yose ihawile yao. Lagano ijo haditendile kwavija Ibulahimu kaigoga ndagizi, mbali kwavija kamtogola Mulungu, katogoligwa kua mtenda goya. 14Manake kama waja weng'higwe gago gayalalike Mulungu ni waja waitegeleze ndagizi waiyeka, baho, kutogola kwabule mana yoyose, na lagano da Mulungu si chinhu. 15Mulungu kogwa ludoko wanhu kama hawategeleza ndagizi yake, mbali kama habule ndagizi, habule malozo ga kuleka kuitegeleza ndagizi.
16Baho, laliko dino dotumanila kutogola, na ivo laliko dolawila kwa unovu wa Mulungu, ivija ni ukweli uiyeka kua laliko ijo kwambuli ya wose. Sio kwa waja weng'higwe ndagizi waiyeka, mbali na kwa waja womtogola Mulungu kama viyatendile Ibulahimu. Iyo ni tata yetu cheye chose. 17Kama Mayandiko ga Mulungu vigandikigwe, “Nikwika uwe tata wa wanhu wa isi zose.” Ibulahimu keng'higwa laliko ijo kulawa kwa Mulungu nayo kamtogola Mulungu ija yoweng'ha ugima waja wafile, na ija yolonga vinhu havikalile baho vilawile. 18Ibulahimu katogola na kutumanila Mulungu, hata kama ikala vidala kutumanila, mbali kagendelela kutogola, ivo kawa tata wa wanhu wengi kama Mayandiko ga Mulungu vigandikigwe,“Ulelo wako womema kama nhondo! 19Ibulahimu kakala mvele behi na milao mia moja, mbali kutogola kwake hakuhunguke hata kama kavimanya lukuli lwake lukala kama munhu yafile, ivija mwehe wake, Sala, kakala mgumba. 20Ibulahimu kagendelela kutogola dija laliko da Mulungu, kakala na ludabwa kwa kutogola kwake, kamfugamila Mulungu. 21Kavimanya kua Mulungu kodaha kumwing'ha gaja gose gayamlalike. 22Iyomana Mulungu kamtogola kua mtenda goya. 23Viilongigwa, “Mulungu kamtogola Ibulahimu,” hailongigwa kwambuli Ibulahimu yaiyeka, 24ila mbuli ino yetu cheye ivija waja chimtogola Mulungu yamzilibule Yesu, Mndewa wetu. 25Mulungu kamlava Yesu ili yakomigwe kwambuli ya malozo getu, kaidi kamzilibula ili chitogoligwe na Mulungu.
Currently Selected:
Walumi 4: KBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Kami @The Word for The World International and Kami Language translation. All rights reserved.
