Mlk 11
11
Mingela ya Yesu e Yɛlusalɛma
(Mat 21.1-11; Luk 19.28-40; Yoa 12.12-19)
1Ango asukami Yesu la Baeki* bande sukɛlɛ la wooni ba Yɛlusalɛma, baiye sukɛlɛ la bɛsɛngɛ be Bɛtɛfage la Bɛtaniya, sukɛlɛ la bɔɔkɔ ba Miseituni. Yesu otomi otamboka ba phee ba Baeki* bande. 2Aasimeli: «Chwaka nyo ɔɔsɛngɛ bole engo otamboka lanyo. Ango, aiya nyo akondo tana nyo bɔna a punda ombo lɛmama, ɔnɛ atayalelama la onto. Lɛmɔla nyo ndako, la ombela nyo lemi. 3Iya onto akuumbolake nyo, aliko laanke ɔmbɔ kɛɛ nyo ŋango, simela nyo ndako: ‹Bɔkɔta kombo weelela, kinaki, akondo wuuchaka kako nkaanɛ›».
4Bango Baeki* bachwe la batani ongo bɔna a mpunda ombo lɛmama mpamba la mboka. Baanjisa mbɔɔlɛmɔla, 5banto bamɔɔ baiki ango ba baumboli: «Haɔɔ! Nke etakɛɛ nyo? Aliko laanke ɛmbɔ lɛmɔla nyo ɛnɛ mpunda?» 6Baeki* ba bauchisa bingo bilɔndi Yɛsu, la bako baasanjisa bachu.
7Baeki* bawɛɛlisa Yesu mpunda; bakichisa bisɛnda bɛɔ eliko la mpunda, la Yesu asɛlɛli eliko lande. 8Banto ike baanjisa bisɛnda bɛɔ e mboka, la bankinɛ bakichaki bitaphe beete bitenaki bako wiibeli. 9Bango bachwaki otamboka la Yesu, la bango baandaki ɔkɔngɔ baokomaki:
«Osana#11.9 Ɔsana: O Kiebalaniya ko nɔnda ''Otokakole nkaanɛ''. Ɔsɔmɛ: Sabuli 86.2; Yɛlɛmiya 31.7 !
Akuchame ɔnɛ ataande e lokombo la Bɔkɔta*!#11.9 Ɔsɔmɛ Sabuli 118.25-26.
10La Kanamombe* aachwele bochwako eekeleka e nkɛso Daudi etaande.
Kanamombe* akuchame e loola»!
11Pa ango, Yesu wiingeli e Yɛlusalɛma. La mingela e lulu la Kanamombe*, pa nsila nenda lalikuli, aliko ango kaiki nde koke likɔlɔ. Ochwe e Bɛtaniya la Baeki* bande joomu la baphee.
Yesu ombo kɔmɛla bote
(Mat 21.18-19)
12Wiina onkinɛ, Yesu la Baeki* bande aimaki bako e Bɛtaniya Yesu aoki botala. 13Aɛni bɔɔ bote bɔmɔɔ ba mutini, la ochwe nenda iya atana biuma. Kinaki, ango aiki ndako sukɛlɛ la ongo bote otani ntiti ntoo. Aliko kotaika eleko ende e mbota biuma. 14Laango Yesu akɔmɛli bongo bote la nɔnda: «Manja lɛlɔ, koo onto alɛɛ lonkinɛ jɛ biuma bɛbɛ!» La baeki bawookaki.
Yesu ombwita basombisi e lulu la Kanamombe
(Mat 21.12-17; Luk 19.45-48; Yoa 2.13-22)
15Yesu la Baeki* bande pa mingela e Yɛlusalɛma. Yesu aingeli e lulu la Kanamombe*. Aiti banɛ ba sɔmbyaki la bango ba sombaki otema ba lulu la Kanamombe*. Okukumisa mesa ya baengoli ba besanga, la bijee ya baso nsɔmbya bilenga. 16La koo ntika bonto aembɛ ekambwa e lulu la Kanamombe*.
17Lonkinɛ, Yesu aanjisa mbo baekya ŋaanɛ: Lɔɔsi Lɔɛlɔ lɔ lɔndaka nte:
«Lulu lami lakondo elelamaka lulu la nɔmba o waanto lalikuli#11.17 Ɔsɔmɛ Isaya 56.7. Nyo ombotulola nyo bokombe baakumoli. . Kinaki nyo, ambosilaka nyo ntulola lulu la mbisama la baiyi#11.17 Ɔsɔmɛ Yɛlɛmiya 7. 11»!
18Pa ango, Bɛkɔta be baeta atei* la baekisi ba Isaliya* baoki bingo la baonaki bolengo ba mona mboojakya Yesu. Kinaki, baiki la wɔɔma lande, aliko banto ike basebalalaki o mbekya yande. 19Ango aiki kako likɔlɔ, Yesu la Baeki* bande bapasi woongo ɔsɛngɛ.
Lokani la Maɔmbi
(Mat 21.20-22)
20La mpendu kɛmɛlɛ, Yesu la Baeki* bande, o mbeta e mboka, baɛni bongo bote ba mutini bomooma nende weejo. 21Laango, Pɛtɛlɛ okanyisa bingo Yesu akɔmɛli bongo bote la mboosimela: «Weekisi, lenda! Bote bo mutini bokɔmɛli wɛɛ bo mooma lalikuli».
22Laango Yesu ɔlɔndi la Baeki* bande: «Yala nyo la lokani ele Kanamombe*! 23Mbokosimela nyo sɔlɔ, bonto aɔsɔna nɔnda la okondi: ‹Phikwa la wiyoke o wango.› La iya apha la mashaka e lisolo jande, kinaki, aimeyake nte bilɔndi ndako biiyaki, bikondo wiyelaka. 24Aliko laingo, mbokosimela nyo: ango atalɔmbɛ nyo ele Kanamombe*, aliko la ɛkambwa ɛmɔɔ, imeya nyo nte ombosila nyo keba, la ango akondo ɔyama.
25«La ango ayala nyo atalɔmbe Kanamombe*, la ole nyo la bosao la onto ɔmɔɔ, sokola nyo obi. Lonkinɛ nte isɛ nyo, ole e loola akosokolele nyo bobe bokɛisa nyo. 26[La iya phosokoleli nyo bankinɛ, isɛ nyo ole e loola phaɔsɔna nkosokolela nyo lonkinɛ bobe bongo bokɛisa nyo»].
Ende emwima nkulu ya Yesu?
(Mat 21.23-27; Luk 20.1-8)
27Yesu la Baeki* bande baiyisa lonkinɛ o wooni ba Yɛlusalɛma. Ango Yesu aiki atakɛndɛ e lulu la Kanamombe*, Bɛkɔta be Bakɛndi la Baekisi ba Isaliya* la Bekongo Beayuda* baosukameli. 28Bawuumboli: «E nkulu nke itakɛɛ wɛɛ binɛ bikambwa? Nani akɔyisa luusa la nkɛɛ?» 29Yesu obauchisa: «Lami laona kuumbola nyo ekambwa ɛmɔɔ, iya ombucheyake nyo. Laango, la kondo kosimela nyo o nkulu nke yatakee lemi binɛ bikambwa. 30Luusa la ubatiso ba Yɔani baimi nde ele Kanamombe* ao o wanto? Ombucheya nyo».
31Bango Bekongo baingeli yuungu bako amɛlɛ. Basimelani: «Iya tobuucheyake nte Kanamombe* ka wɔɔyisa luusa, akondo tuumbola: ‹Aliko laanke nyo, koo mbo wiimeya?› 32La iya tobuucheyake nte banto ba wɔɔyisa luusa, banto bakondo toomalela.» Bango Bɛkɔta balɔndi ŋango aliko baiki batalawa banto, aliko banto lalikuli, baiki bataeye nte Yɔani aiki nde sɔlɔ wɛɛni*. 33Laango, bauchisa Yesu: «Iso phata eye.» La Yesu abauchisa: «Lemi, phalata kosimɛla nyo e nkulu nke yatakee lemi bingo lalikuli».
Currently Selected:
Mlk 11: oml
Highlight
Share
Compare
Copy
Want to have your highlights saved across all your devices? Sign up or sign in
2025 Forum Communautairre des Traducteurs de la bible et Alphabetisation
