Mlk 12
12
Jɔmbɔ ja bakambi babe ba bibeli
(Mat 21.33-46; Luk 20.9-19)
1Lonkinɛ, Yesu aanjisa mbekya banto weemanu. Alɔndi: «Bonto ɔmɔɔ aoni ebeli e Misabibu*. Alilingi la likula, atimi liphuku aliko la mamola Misabibu, ophiki lilɔmbɛ ja liko ya bachungi aliko la nkenga Misabibu*. Ochikeli bakambi ba mbɔɔngɛla la ochwe e wooni ba bɔɔ. 2Weeleko ba mbuka, ongo oso ebeli, otomi bokambi ɔmɔɔ ele bango bakambi aliko la mbɔwɔya bende Misabibu*. 3Kinaki, bango bakambi baokemeli la baophomi la mbowuucha bakasa phololo. 4Laango otomi onkinɛ bokambi, ongo onkinɛ, baophomi ɔɔtɛ la mbo weelolela. 5Ongo ɔmɛlɛ ebeli otomi lonkinɛ onkinɛ bonto, ongo, baojaki. La aatomeli lonkinɛ bankinɛ ike ŋango ako: baaphomi bamɔɔ la bajaki bankinɛ.
6«Ongo omɛlɛ ebeli, otikali la bɔna ɔmɔɔ otoo aiki ngoli ende. Aotomi e kantunda, aliko okanisa nte, bakondo okucha.
7«Kinaki, bango bakambi ba wɛɛni, bake nɔnjana asamba bako: ‹Ɔnɛ kole mpɛnɛ! Toojake aliko bɔmpɛnɛ bakondo yala baso!› 8Baokemeli ongo bɔna, baojaki la baphupholi bojo bande anja la ebeli.
9«Laango, nke ɛkɛɛ ɔmɛlɛ ebeli? Akonoandaka mbwa jaka bakambi lalikuli la mphaka ebeli waankinɛ.
10«Asɔmi nyo kɛmɛlɛ bongo bosao e Lɔɔsi Lɔɛlɔ:
«Libwe linɛ ja phupholami laaphiki.
Limbotulwa libwe ja lokani la lulu.
11Bɔkɔta ka kɛisa bongo bosao.
La jako likende ja sebalala#12.11 Ɔsɔmɛ Sabuli 118.22-23.»
12Bango Bɛkɔta Beayuda* baonaki bolengo ba nkemela Yesu. Aliko, baeyaki nte alɔndaki bongo bomanu aliko la bako. Kinaki, baiki la wɔɔma ba boloi. Baochiki la bachwe.
Ndipa kodi ele Kaisaliya
(Mat 22.15-22; Luk 20.20-26)
13Bango Bɛkɔta Beayuda*, batomi ele Yesu ba Falisayɔ bamɔɔ la banto bamɔɔ boleka ba Elɔde. Aliko la mbo waambela lilonga wiingo bɛlɔnda ndako.
14Bɛkɔta Beayuda* baandi mbo wuumbola: «Weekisi, tombo eya nte ɔlɔndaka sɔlɔ apha la bɔɔma la bitakanya bankinɛ. La phalende biima bianto, kinaki, ataekya sɔlɔ ɔ lɔkɛndɔ latalange Kanamombe*. Lonkinɛ Otosimele: Isaliya yaso yalanga ndipa kodi ele Bɔkɔta ba Kaisaliya*? Taɔnɔla mbwilipa ao jɛ?»
15Kinaki, Yesu aeyi nte bandaisha bakani baɔ ba sɔlɔ; aasimeli: «Aliko laanke omo mambela nyo lilonga? Ombela nyo lemi likuti limɔɔ, aliko mbɔlɔɛni.» 16Bawɛɛlisa lɔmɔɔ, la Yesu abaumboli: «Ɛnɛ yiima la lɔnɛ lokombo lole anɛ o linɛ likuti bile benani?» Bauchisa: «Be Bɔkɔta Kaisaliya».
17Laango Yesu aasimeli: «Ɔya nyo Bɔkɔta Kaisaliya bile bende, la Kanamombe bile be Kanamombe.» La bake nsebalala aliko la mbucheya ya Yesu.
Mumbola aliko la ntondwa
(Mat 22.23-33; Luk 20.27-40)
18Pa, Basandukayɔ bamɔɔ baandi ele Yesu. Banɛ batalɔndaka nte babwe phaɔsɔna ntondwa lonkinɛ. Bawuumboli: 19«Weekisi, Musa aandiki wiisaliya* yaso nte: ‹Iya bonto ombo bwa koo mbota bɔna, kasana waankunɛ ande aɔsɛ ongo wainto ochikali aliko la mbotela boolo ande bana.› 20Laango, kaiki nde baotwa esambaele. Botango asɔngi la abwe koo mbota bɔna. 21Amamana lande aosangoli bobwele la abwe koo mbota bana la ongo wainto; la aisato ŋango ako. 22La bako lalikuli esambaele babwe koo mbota la ongo wainto. Pa bako lalikuli mbwa, la wainto abwe ŋango ako. 23Wiina ba tondwaka, ongo wainto ayala anani? Aliko, bako lalikuli esambaele baiki nde ba ome yande»!
24Yesu aasimeli: «Ombwi ilimba nyo! Aliko phaeye nyo Lɔɔsi Lɔɛlɔ la nkulu ya Kanamombe. 25Ango atondwaki babwe, ba mpame la bainto phaasɔnganaki, kinaki, bakondo yalaka phoke biphongo e loola. 26Lonkinɛ, aliko la ntondwa yaabwe, nyo koo nsɔma jɛ libuku ja Musa, aliko la boliko ba towaki iya la koo nongola. Kanamombe aosimeli Musa nte: ‹Nende Kanamombe ka Ibulaimu la Kanamombe ka Isaka la Kanamombe ka Yakɔbɔ#12.26 Mpasa 3.2,6›». 27Yesu ɔlɔndi lonkinɛ: «Kanamombe apha Kanamombe ka aso mbwa, kinaki, olende Kanamombe kaaso luiko! Ko nɔnda, atailimbe nyo»!
Isaliya inɛnɛ
(Mat 22.34-40; Luk 10.25-28)
28Weekisi ɔmɔɔ ba Isaliya* abaoki bata amoyana la Yesu. Wɛɛni nte Yesu auchisa bɔlɔti ele bango Basandukayɔ*. Oosukameli la awuumboli: «Isaliya nke iyalaka inɛnɛ aliko la inkinɛ?» 29Yesu owuuchisa: «Ɛna Isaliya* ile inɛnɛ: ‹Oka, Isilaeli! Bɔkɔta Kanamombe aso oyalaka Kanamombe* ɔmɔɔ o too.› 30Aɔsɔna nanga Kanamombe* abɛ la lisolo jabɛ lalikuli, la limanya jabɛ lalikuli la nkulu yabɛ lalikuli.#12.30 Ɔsɔmɛ: Kumbukumbu 6. 4-5 31La isaliya ya iphee nko inɛ: ‹Yalaka atalange amamani la wɛɛ phoke wɛɛmɛlɛ.› Koo inkinɛ isaliya inɛnɛ aliko la ingo iphee#12.31 Ɔsɔmɛ: Balawi 19.18.».
32La ongo Weeksi ba Isaliya* ɔlɔndi la Yesu: «Bɔlɔti, weekisi! Ŋango bɔlɔndi wɛɛ kolende sɔlɔ. Kanamombe* olende ɔmɔɔ o too, la koo onkinɛ Kanamombe* phoke ndako. 33Kila onto aɔsɔna nanga Kanamombe, la lisolo jande lalikuli, la limanya jande lalikuli la nkulu yande lalikuli. La aɔsɔna nanga amamani lande phoke nɛmɛlɛ. Ingo ilende bɔlɔti ndeka mpato* lalikuli e mbɔya Kanamombe* la ntumba nyama». 34Yesu aɛni nte ongo weekisi auchisa la limanya, aosimeli: «Apha bɔɔ la ekeleka e Kanamombe*.» Pa ango, koo onto a kekeli lonkinɛ mbo wuumbola Yesu bosao.
Kilisito la Daudi
(Mat 22.41-46; Luk 20.41-44)
35Laango Yesu aiki ataekya e lulu la Kanamombe*, aumboli: «Namuna nke Baekisi ba Isaliya* batalɔndɛ nte Kilisito* olende bɔna a Daudi? 36Aliko, Daudi nɛmɛlɛ aɛnyami la Lɔkɛngɛ Lɔɛlɔ, ɔlɔndi:
«Bɔkɔta Kanamombe alɔndi la Bɔkɔta aso:
Aka lokoyale e loome lami.
Nende ango lakondo kicha bitamba bɛbɛ entina be baina baɛ#12.36 Ɔsɔmɛ: Sabuli 110. 1.».
37«Daudi nɛmɛlɛ alɔndaki nte Kilisito* olende Bɔkɔta ande. Namuna nke Kilisito* aɔsɔna njala lonkinɛ bɔna a Daudi»?
Yesu atalake banto lilako aliko la Baekisi ba Isaliya
(Mat 23.1-36; Luk 20.45-47)
La boloi bɔnɛnɛ baanto babookaki la libɛla. 38Yesu alɔndi e mbekya yande: «Ayekaka nyo! La Baekisi ba Isaliya* bango balangaka nkɛnda la nkajo ntale! La nanga mbɛbɛyama ya okuchu atiya ba beloi, 39Lonkinɛ, balangaka njala wiijee beotamboka e Basaŋanelo*, lonkinɛ kaama ka libɛla balangaka njala wiijee beokuchu. 40Bakumolaka ele bebwele bikambwa lalikuli bile la bako, la kako nkango, batakɛɛ malɔmbi batale, aliko la mbeyama. Aliko la ingo, Kanamombe akondo asambisaka».
Mpato e Obwele
(Luk 21.1-4)
41Ango Yesu aiki atayale weeli la Sanduku e mpato*, aɛnaki ŋango banto bailaki mpato weengo Sanduku. Baso nombo ike bailaki bakuti ike otema ba Sanduku. 42Bobwele ɔmɔɔ boola, aiyisa la mbila bakuti baphee ba mongo otema ba engo Sanduku, ingo ile phayaɔsɔna nsomba ekambwa.
43Laango Yesu aeleli baeiki* bande la mbwasimela: «Mbokosimela nyo sɔlɔ: ɔnɛ obwele boola ndako kombopasha ike ele Kanamombe ndeka bankinɛ banto.» 44Aliko, bankinɛ lalikuli bapasisha ele Kanamombe totikalaki ta bakuti baɔ. Kinaki ndako, o boola bande apasisha lalikuli biiki ndako la beko aliko la luiko lande.
Currently Selected:
Mlk 12: oml
Highlight
Share
Compare
Copy
Want to have your highlights saved across all your devices? Sign up or sign in
2025 Forum Communautairre des Traducteurs de la bible et Alphabetisation
