San Mateo 5
5
Jarewa mnaq che kikriq na ri utzil
(Lc 6:20-23)
1Echi' xuril Jesús che jwert ik'i nk'aj mnaq itrin chrij, xel b'i pujlom jun jyub' y xikb'e' loq pujlom. Ni nk'aj udiscípulo xiqib' koq ruk'. 2Ri Jesús xumaj ktojxik che utzij Dios, xub'ij chke:
3«Utz ke chintaq kikna' chpam kanma' che rjawxik utzij Dios chke,
mal iy'o pu'ab' Dios. Re ku'on utzlaj atb'altzij pkijlom y kuya na nimlaj utzil pkijlom.
4Utz ke chintaq kiyo' rmal b'is,
mal kikriq na jun kub'sb'al kk'u'x.
5Utz ke chintaq ch'uch'uj kanma' y kkinmirsaj t kib',
mal kikkechb'ej na ri ulew che ub'im kan Dios che kuya na chke.#5:5 Ri ulew che ub'im kan Dios che kuya na chke. Jarewa kch'aw chrij su xub'ij u David chpam Salmos 37:11. Chi' o mow che Qajaw Jesucristo kuk'ut jun lyar ub'im kan Dios che o chla' chkaj, per xaq jnam tzij ruk' su xub'ij u David ujer chpam Salmos 37:11.
6Utz ke chintaq nk'aj mnaq che peche mow kinumik y peche mow kichqij kchi' che u'anik ri utzil,
mal kya'taj na chke su kkaj.
7Utz ke chintaq kel kk'u'x chke mnaq,
mal Dios soq kel na uk'u'x chke ke.
8Utz ke chintaq ch'ajch'oj kanma' chjuch Dios,
mal kikkil na uwuch Dios.
9Utz ke chintaq kik'an kchak che utzukxik jun utzil chikxo'l mnaq,
mal kb'ix na chke che jare ke iralk'al Dios.
10Utz ke chintaq k'an k'ax chke xa rmal che kik'ano su kraj Dios,
mal kikkechb'ej na ri utzlaj atb'altzij rech Dios.
11»Utz iwe ix echi' ti xa wmal in kixyo'ik, k'an k'ax chiwe, y kk'eq runjel uwuch tzijtal chiwij. 12Xa chixki'ktoq, chnojsax iwanma' che ki'ktem echi' jala k'an chiwe, mal kiriq na jun nim tojb'aliwe chla' chkaj. Chna'taj chiwe che nk'aj mnaq che kik'an k'ax chiwe, soq jala xik'an kti' kmam ke chke ajb'il utzij Dios ujer.
¿Su uptan atz'am rich'il saq?
(Mr 9:50; 4:21; Lc 14:34-35; 8:16)
13»Ix ixjala peche atz'am kixikje chikxo'l mnaq chi' chuchlew. Per we kitzyin t chik, ¿su mow kqa'an che rech kitzyin chik?#Mr 9:50; Lc 14:34,35. ¡Ot chuptan! Xa kitrix chub'i chutaq ulew y kitk'alb'ax kan kmal mnaq.
14»Ix ixjala peche jtzuk' chaj kitluw chikxo'l mnaq chi' chuchlew rech kuya saq chikxo'l. We o jun tinmit puwi jun jyub', kunjel mnaq kikkilo mal ot mow kuwaj rib'. 15Mowni o jun mnaq kutzij jtzuk' chaj tik'ri xa chuxe' jun kxon kuya wi. Otaj, xani nmister che chkaj kuya wi rech kuya saq chikxo'l jumpa mnaq iy'o pja. 16Soq jala china ix, chitluwsaj a' o iwuk' rech kikkil mnaq ri utzlaj taq chak ki'ano. Tik'ri kkinmirsaj u'ij iQaw Dios o chla' chkaj.
Ri Jesús xub'ij su utrimb'xik upxab' u Moisés
17»Xa mib'ij ix che npitnaq che usachik uwuch ri pxab' utz'ib'am kan u Moisés, soq xa mib'ij che npitnaq che uyojik sutaq kb'im kan nk'aj ujer ajb'il utzij Dios. Jare taj nchak npitnaq che, xani jare npitnaq che ub'ixik che nmister k'anik runjel jumpa wari'. 18Ruk' saqlaj tzij kimb'ij chiwe che, we mja ksachtaj uwuch kaj ulew, ot su kri' jun ub'u'ch tz'ib'nik, mowni o jun uxruk' utzij upxab' Dios, kesax che upxab' Dios, ast retal k'antaj na runjel sutaq kub'ij chpam pxab'. 19Chin jun che ku'on taj sutaq kub'ij chpam upxab' Dios (miskini' xa laj ch'in tz'ib'talik), y soq kub'ij chke nk'aj chik mnaq che nmister taj kik'ano, jarela xa laj ch'in reqle'n jun mnaq chpam utzlaj atb'altzij Dios. Per chin ku'ono sutaq kub'ij chpam upxab' Dios y kub'ij chke nk'aj chik mnaq che nmister kik'ano, jarela nim reqle'n jun mnaq chpam utzlaj atb'altzij rech Dios. 20In kimb'ij chiwe che we kixkun taj ki'an mas utz che ik'asnmal chjuch kk'asnmal nk'aj fariseo, y soq chjuch kk'asnmal nk'aj ajtojnel rech upxab' Dios, ot mow kixok chpam utzlaj atb'altzij rech Dios.
Ri Jesús xub'ij che ustaj we jun kpi riwal ruk' jun chik mnaq
(Lc 12:57-59)
21»Ix itom chik che xb'ix chke mnaq ujer: “Xa makamsaj jun chik mnaq,#Éx 20:13; Dt 5:17. mal chin jun kukamsaj jun chik mnaq, k'an na atb'altzij pujlom”. 22Per in kimb'ij chiwe che chin jun kpi riwal ruk' jun rachlal, k'an na atb'altzij pujlom. Chin jun che kuyo' jun rachlal, nimlaj atb'altzij k'an na pujlom kmal mnaq che nim atb'altzij o pik'ab'. Chin jun che kub'ij che jun rachlal che xa awaj, k'e pixb'alb'a a'.
23»Xa rmal, we katitjinik kaya asipnik chjuch Dios, tik'ri kna'taj chawe che o jun awachlal k'ax kuna'o su amak anom chjuch, 24chiy'a kan asipnik chla'. Nab'e kat'e ruk' nawachlal rech kata kuyb'al amak che, tik'ri k'ut katitzlij chik, kaya asipnik chjuch Dios.
25»We o jun mnaq anom jun k'ax che y re kraj katuk'am b'i p'atb'altzij, chta kuyb'al amak che chanim. Kichomaj iwib' ruk' ptaq b'e echi' mja kixo'pan ruk' un juez. Mal, we jala taj ka'ano, re katujach pu'ab' un juez, katujach na pik'ab' nk'aj policía, ni nk'aj policía katikkoj pkarsa. 26Ruk' saqlaj tzij kimb'ij chawe, we kat'e pkarsa, katel taj chla', ast retal katoj runjel jumpa rjil amulta.
Ri Jesús xub'ij che ustaj we jun achi kurij uwuch jun ixoq che rixqil taj
27»Ix itom chik che xb'ix ujer: “Xa ma'an amak ruk' jun ixoq we awixqil taj, soq jala at ixoq xa ma'an amak ruk' jun achi we awichjil taj”.#Éx 20:14; Dt 5:18. 28Per in kimb'ij chiwe che chin jun kuka'yej jun ixoq y kurij uwuch, ya xu'on umak ruk' chpam ranma'. 29We xa rmal nawuch rech a'b'im che ka'an amak, utz we kawesaj y katrij b'ik, mal jare mas utz che xa ch'in kesax che ab'qil, chjuch we runjel ab'qil kk'eq b'i p'a'. 30We xa rmal na'ab' rech a'b'im che ka'an amak, utz we karamo y katrij b'ik, mal jare mas utz che xa ch'in kesax che ab'qil, chjuch we runjel ab'qil kk'eq b'i p'a'.
Ri Jesús xub'ij che ustaj we jun achi kujach rixqil
(Mt 19:9; Mr 10:11-12; Lc 16:18)
31»Soq xb'ix ujer che chin jun kujach rixqil, nmister kuya jun wuj che, jachi tz'ib'tal wi che kijchom kib'.#Dt 24:1. 32Per in kimb'ij chiwe che chin jun kujach b'i rixqil, tik'ri k'ut ot umak rixqil unom ruk' jun chik achi, xa kutaqch'ij che mak we jala ku'on che. Soq jala' we o jun achi kik'le' ruk' jun ixoq che xa jchom b'i rmal un nab'e richjil, jarela ku'on jun nimlaj mak chjuch Dios.
Ri Jesús xub'ij che ustaj we jun kukoj ub'i' Dios ruk' utzij kub'ij
33»Soq itom chik che xb'ix chke mnaq ujer: “Jare nmister ki'ano su ib'im che Qajaw we xikoj ub'i' Qajaw ruk' itzij xib'ij”.#Lv 19:12; Nm 30:2; Dt 23:21. 34Per in kimb'ij chiwe che ot mow kijek' ub'i' Dios ruk' itzij kib'ij, soq mikoj ub'i' kaj ruk' itzij, mal jare uk'olb'al Dios. 35Mikoj ub'i' ulew ruk' itzij, mal jare utk'alb'al Dios; mikoj ub'i' tinmit Jerusalén ruk' itzij, mal jare utinmit nimlaj Qajaw Dios, che jare Re Tk'al pujlom runjel jumpa sutaq'ik olik. 36Soq mikoj ub'i' ijlom ruk' itzij, mal kixkun taj ki'an saq, seno ki'an eq che jun iwi'. 37Ix iwit'am sutaq kib'ij. We iwit'am che qtzij su kib'ij, chib'ij “qtzij”. We iwit'am che qtzij taj, chib'ij “qtzij taj”. Xaq xawi kib'ij. We xa kiya uwi' itzij, xa rech itzel.
Ri Jesús xub'ij che we o jun k'an k'ax che, ot mow ku'on uk'xel
(Lc 6:29-30)
38»Ix itom chik che xb'ix ujer: “Chin jun kuresaj uwuch jun chik, soq kesax na uwuch re; y chin jun kuresaj uwure jun chik, soq kesax na uwure re”.#Éx 21:24; Lv 24:20; Dt 19:21. 39Per in kimb'ij chiwe che ot mow ki'an ch'oj ruk' jun chik mnaq che ku'on k'ax chiwe. We o jun katuch'ay chaplaj rech a'b'im, xa chiy'a koq jupraj chik aplaj chjuch rech katuch'ay chik chla'. 40We o jun kraj katusk'ij p'atb'altzij y kraj kumaj nak'ton chawe, soq chiy'a che kuk'am b'i nachketa. 41We o jun kub'ij chawe che kak'am b'i jun reqa'n chjuch, y kub'ij chawe che jun kilómetro ab'e kab'inb'ej chuxe', chb'inb'ej keb' kilómetro chuxe', tik'ri kaya kan che. 42Pachinchke mnaq che o nmister che, chiy'a che su kuta chawe. We o jun o su kuta chawe pqajik, xa maxu'yej, chiy'a che su kuta chawe.
Ri Jesús xub'ij che nmister kal'oj we o jun awajch'oj
(Lc 6:27-28,32-36)
43»Ix itom chik che xb'ix ujer: “Chal'oj jun arjil atz'qat”,#Lv 19:18. y china k'ax che jun awajch'oj. 44Per in kimb'ij chiwe che nmister kil'oj jumpa mnaq che xa ixajch'oj kuk', y china ich'ab'al ruk' Dios pkijlom chintaq xa k'ax kixkkilo. 45Rech jala' k'alnik che puro ixralk'al iQaw Dios o chla' chkaj. Jare Re kutluwsaj ij pkijlom utzlaj taq mnaq, soq kutluwsaj pkijlom itzel taq mnaq; kuqasaj jab' pkijlom chintaq utz kik'ano, soq kuqasaj pkijlom chintaq xa ustaj kik'ano. 46We xaw kil'oj chintaq kixkil'oj ix, ¿su tojb'alre kich'ak ruk'? Otaj. ¿Le xa jala t k'ut kik'an nk'aj aj esal alkawal? Ke kkil'oj kib' chikuch. 47We xaw kiya rtzil kwuch iwachlal, ¿sut jun utz kixtjin che u'anik ruk'? Otaj. ¿Le xa jala t k'ut kik'an mnaq che kikjom t utzij Dios? Ke kikya rtzil kwuch chikuch. 48China b'a jun utzlaj n'oj, rech puro sk'um ki'an chpam ik'asnmal, jala peche ku'on iQaw nim u'ij chla' chkaj, Re puro sk'um.
Currently Selected:
San Mateo 5: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
