San Mateo 4
4
Nitzel xraj wet ku'on umak Qajaw Jesús
(Mr 1:12-13; Lc 4:1-13)
1Tik'ri, ri Tyoxlaj Uxlab'xel xutaq b'i Jesús chpam jun lyar che xa chqi'j ulew, rech xtaqch'ix che mak rmal nitzel Satanás. Per ni Jesús xtzaq taj chpam umak.
2Kawnaq (40) ij rich'il kawnaq (40) a'ab' xu'on Jesús chla'. Runjel jumpa ij xu'on chla', ot su kri' xutijo, mas ma'tan tik'ri xpi mas numik che.
3Ni nitzel xqib' ruk', xub'ij che:
—We qtzij che at atuK'jol Dios, chb'ij che nk'aj ab'aji' che kujal kaxlenwa, —xche che.
4Ni Jesús xuk'ul uwuch utzij, xub'ij che:
—Kin'an taj mal tz'ib'tal kan chpam Tyox Wuj che kub'ij:
“Nk'aj mnaq xaw taj kwa kiktijo che kiyik'se' rmal.
Soq kiyik'se' rmal runjel jumpa tzij kub'ij Dios”, kcha'. (Dt 8:3)
Jala xub'ij Jesús che.
5Tik'ri', nitzel xuk'am b'i Jesús chpam tyoxlaj tinmit Jerusalén, xuresaj b'i pujlom nimlaj rchoch Dios, xub'ij che:
6—We qtzij che at atuK'jol Dios, chik'qa b'i awib' chuchlew. We jala ka'ano, ot k'ax kariqo, mal tz'ib'tal chpam Tyox Wuj che kub'ij:
“Dios kyutaq loq nk'aj u'ángel rech katkichjij.
Ke, katikyak b'i ruk' k'ab'
rech kach'ay t awqan chjuch ab'aj”, kcha'. (Sal 91:11-12)
—Jala xub'ij nitzel che.
7Ni Jesús xutzlij ub'ixik, xub'ij che:
—Jala taj kin'ano, mal tz'ib'tal chpam Tyox Wuj che kub'ij:
“Xaq mataqch'ij Awjaw Dios”, kcha'. (Dt 6:16)
Jala xub'ij Jesús che.
8Tik'ri nitzel xuk'am b'i Jesús puwi jun nimlaj jyub'. Chla' xuk'ut chjuch runjel jumpa tinmit o chuchlew, rich'il jumpa ub'oymal uwuchlew olik. 9Xub'ij che:
—Runjel wari' kinya chawe we katixke' chinwuch, kanmirsaj n'ij, —xche che.
10Ni Jesús xuk'ul uwuch utzij, xub'ij che:
—Katel chinwuch, itzel Satanás. Kin'an taj, mal tz'ib'tal chpam Tyox Wuj che kub'ij:
“Kanmirsaj u'ij Awjaw Dios.
Xaq xaw Re kakoj u'ij”, kcha'. (Dt 6:13)
Jala xub'ij Jesús che.
11Tik'ri xel b'i nitzel chjuch Jesús, xuya kanoq. Iy'o taq ángel xiyo'pan ruk' Jesús, rech xikto'o.
Ri Jesús xumaj ub'ixik utzij Dios
(Mr 1:14-15; Lc 4:14-15)
12Echi' xuta rson Jesús che kjom chik u Wan pkarsa, xitzlij chla' Galilea. 13Xel b'i chpam tinmit Nazaret, x'e chpam tinmit Capernaúm che o chuchi' nu'ab' mar, chla' chunqaj keb' lyar che Zabulón rich'il Neftalí kb'ix chke. 14Sutaq xu'on Jesús, mer jala peche utz'ib'am kan najb'il utzij Dios ujer che Isaías ub'i'. Re utz'ib'am kanoq:
15«Chitatb'ej wari', iwunjel ixjumpa ix'o chpam tinmit Zabulón, rich'il ixjumpa ix'o chpam tinmit Neftalí,
chla' jachi ixk'wi ix chuchi' mar, soq ch'qap che ja' Jordán,
chla' Galilea kuk' nk'aj iyaj Israel taj.
16Nk'aj mnaq che iy'o chpam qu'm,
xkil jun nimlaj saq,
jarewa saq kitluw pkijlom mnaq che iy'o chpam kmak». (Is 9:1-2)
Jala utz'ib'am kan u Isaías.
17Tik'ri k'ut xok Jesús che ub'ixik utzij Dios, xub'ij: «Chik'xa ichomnik chpam iwanma' mal ya mer kuriq ij che kumaj utzlaj atb'altzij rech Dios pijlom, xa nqaj chik k'wi chiwe», xcha'.
Ri Jesús xyusk'ij kjeb' (4) ajchpal kar rech kiyitrij chrij
(Mr 1:16-20; Lc 5:1-11; Jn 1:35-42)
18Echi' kitjin Jesús kwa'kat chuchi' jun u'ab' mar Galilea ub'i', xyuril keb' achjab' i'al chikuch mal xa jun kqaw, jun Simón ub'i', per soq kikb'ij Lu' mnaq che, nun chik Trix ub'i'. Ke kiyitjin che uk'eqik jun ktaraya chpam ja', mal xa iyajchpal kar. 19Ena xub'ij Jesús chke:
—Kixjosaj wuk' kixok wuk' chpam uchak Dios. Kink'ut chiwuch su ki'an che ktzukxik mnaq rech kiyok ruk' Dios, peche ki'an che kchapik nk'aj kar, —xche chke.
20Ena chanim xikya kan nk'aj ktaraya, xib'e ruk'.
21Echi' xib'in pnoq b'i chik, ri Jesús xyuril keb' chik achjab' che soq i'al chikuch, jun Santiago#4:21 U Santiago soq kb'ix Jacobo che. ub'i', nun chik Wan ub'i'. Ke jare ralk'al u Zebedeo. Jnam iy'o ruk' kqaw chpam jun barco, kiyitjinik kikyijb'a nk'aj ktaraya. Ri Jesús xyusk'ij pnoq keb' achjab'. 22Ke chanim xikya kan un barco, soq xikya kan kqaw, che o chpam, tik'ri xiyitrij b'i chrij Jesús.
Ik'ilaj taq mnaq xyutjoj Jesús che utzij Dios
(Lc 6:17-19)
23Ri Jesús xb'in ptaq tinmit runjel jumpa o pukwent Galilea, xyutjoj mnaq chpam nk'aj rchoch Dios. Xub'ij utzlaj taq rson chrij utzlaj atb'altzij rech Dios. Soq xyuknaj kunjel jumpa mnaq iy'o chla' che xa iyab', xuresaj runjel jumpa k'ax o chke. 24Kunjel jumpa mnaq pukwent Siria, xikta rson sutaq kitjin Jesús che u'anik. Ena xikk'am b'i ruk' kunjel jumpa mnaq che xa iyab', jaljoj uwuch yab'il o chke nk'aj mnaq xikk'am b'i ruk'. Iy'o nk'aj, k'axlaj taq yab'il o chke, iy'o nk'aj chik o itzel taq espíritu chke, soq iy'o nk'aj chik kuya rax kmik chke, y soq iy'o nk'aj chik che xa skirnaq ch'qap che kib'qil. Jarela yab'il o chke nk'aj mnaq, kunjel xyuknaj Jesús. 25Jwert ik'i nk'aj mnaq itrin chrij Jesús. Iy'o iyaj Galilea, iy'o iyaj Decápolis, iy'o iyaj Jerusalén, soq iy'o iyaj Judea, y soq iy'o nk'aj chik kipi ch'qap che un ja' Jordán. Kunjel ke itrin chrij Jesús.
Currently Selected:
San Mateo 4: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
