2 Abakorinzo 11
11
Paulo, nabarume abakaatii
1Shiakhuha nimwakhanyala okhundisimilisilia mubusilusilu bwanje hatiiti! Chame mundisimilisilie. 2Okhuba endiililwe imbalikha khulweenywe, mbu imbalikha eya Nyasaye achama; shichila ndamukhweesilia omusaatsa mulala yenyene, mbu emuhaane khuKristo shinga omukhaana omushisila. 3Ne eriitsanga mbu haundi, shinga inzokha olwa yamukaatia Hawa mubuchesichesi bwayo, haundi amayililisio keenywe nako kakhanyala okhwonoonibwa; murule khushiilongoole nobweleleshe ebili khuKristo. 4Shichila oyo owitsa naba namwilwatsila Yesu undi owa ifwe khurayeelwatsa ta; kata inywe nimuba nimuheebwa roho undi owa muraheebwa olwambeli ta, kata injiili yindi eya murafuchiilila olwambeli ta; mumwisimilisilinjia bulayi. 5Nasi enduutsi mbu shineema khubarume abo abashila obukhulundu, nahatuutu ta. 6Nebutswa kata olwa ndakhaba nindali omusitsa mukhuboola tawe, ne shingorwa mukobumanyi ta; mbula mukosi khukabakaliile abandu bosi khulweenywe.
7Nohomba, isie ndoonoona nindeetiltiyla omwene mbu inywe muchinguushe, olwa ndamwilwatsila injiili yaNyasaye sila omurungo? 8Ndali shinga ouyaaya tsikanisa tsindi olwa ndabukula omushaara, mbu emukhalabanile inywe; 9ne olwa ndali halala nineenywe, nindamba, shindasitohela omundu yesi ta; okhuba olwa abaana beefwe beetsa nibarulile eMakedonia, banyala eshichelo shiosi shiobutambi bwanje; mana mukosi ndeelinda bulayi endeshe okhumusitohela; khandi ndaleelindanga endio. 10Shinga obwatieeli bwaKristo olwa buli mwisie, abulaho mumbali tsieAkhaya oulanzikalila obureeyitsiala endio ta. 11Ne mbushiina? Shichila shimuheelanga ta? Nyasaye wamanya shinga olwa emuheelanga.
12Ne eshia ekholanga, nishio eshia ndalakholanga, mbu khubeenabo abakhaabanga obwiyangu embakhalache obwiyangu bwene, mbu mukeenako aka beeyitsoomilia, banyooleshe nibali shingana ifwe. 13Okhuba abeimbia eyo nabarume abakaatii; nabakholi ababatsa, abeefwaninjia shinga abarume baKristo. 14Ne ako shikakhuhuchisia ta; mbula, kata Setani yeefwaninjia shinga malaika wobulafu. 15Kho shilili likhuwa likhongo abakhalabanibe nabo nibaba nibeefwaninjia shinga abakhalabani bobulunjishi ta; nebutswa obumaliilishi bwabwe buliba shinga ebikhole biabwe olwa bili.
Obusandi bwaPaulo khulwa oburumebwe.
16Emboola khandi mbu omundu yesi aleshe okhumbaarakhwo mbu endi omusilu, ta; ne kata nimuba nimupaara murio, mu'fuchiilile shinga omusilu, mbu siesi ndiyitsialekhwo. 17Kano aka emboola shingaboola khulwa Omwami ta, habula shinga mubusilusilu, mukhwiyitsiala okhubula oburii. 18Olwa abanji beeyitsialila mumela yomubili, siesi ndiyitsiale. 19Shichila mwisimilisilinjia abasilu nokhuchama, olwa abeene muli abachesi. 20Okhuba mwisimilisinjia kata olwa omundu amukhola abasumba, kata okhumulia bulia, kata okhumuhamba imbambe, kata okhwikhulumamia, kata okhumupaama khuluseeya. 21Emboola akokhwileka, shinga olwa khubula amaani.
Ne mwikhuwa liosi elia oundi alolosiliamwo itswoni (emboola mubusilu), mbu siesi endi neitswoni. 22Bo nabaHeburania noho? Siesi endi endio. NabaIsiraeli? Siesi endio. Nabolwibulo lwaAburahamu? Siesi endio. 23Nabakhalabani baKristo? (Emboola shinga oulaluushe) mbu embashila; muminyakhano echishilaasia, mutsicheela etsishilaasia, mumakhupache akabira eshichelo; mukhufwa khandi akhanji. 24Khandi kharaano abaYahudi ba'khupa ebiboko amakhumi kataru nashienda. 25Khataru ndanywekhwa tsisaala; lulala ndalaswa namachina; khataru eliaro lieeyinikha munyanza nindimwo; ndali mumatsi kolusiba eshilo tulu neshiteere tulu; 26munjendo khandi akhanji; mumatinyu kemialo, mumatinyu kabanuuli, mumatinyu akarula khuboluyia lwanje, mumatinyu akarula khuBamahanga, mumatinyu akomwitookho, mumatinyu akomushitsiimi, mumatinyu akomunyanza, mumatinyu akomubaana beefwe abobukaatii; 27muminyakhano nende amasila, mukhuba meeso khandi akhanji, mukhulumwa inzala nokhuliibwa obuloho, mukhuhonga inzala khandi akhanji, mubushindu nende eshihechenye.
28Ne halala nende ako kosi akelwanyi, kabeetsangaho akeenako aka'sitohelanga khatsotselo, mbu okhuhendela tsikanisa tsiosi. 29Ali heena outofula, nasi nindatofuhala ta? Ali heena owisichirasibwa, omwoyo kwanje nikurayia ta? 30Nimba nikhoyile okhwiyitsiala, ndakheeyitsialila ako akali halubeka Iwokhubula amaani khwanje. 31Nyasaye, Samwana Omwami Yesu, owitsoomibwa ebisoni nebisoni, amanyile mbu shimbeeha ta. 32MuDamasiko, omukafuna owareebwaho nende omuruchi Areta yalinda litookho liabaDamasiko mbu yahambe; 33nasi ndeesilibwa mwitirisha khulukoba mushimwelo, nindihonokokha endio mumukhonokwe.
Currently Selected:
2 Abakorinzo 11: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975