2 Abakorinzo 3
3
Abakhalabani beIndakano Imbia
1Kho khukhachaachile khurio khandi okhwipaaka abeene noho? Nohomba khukhoyeele shinga abandi mbu khube netsibarwa tsiobupaachi khwinywe, kata etsirula khwinywe? 2Ne ninywe ibarwa yeefwe, eyahandiikwa mumioyo chieefwe, niyimanyishila abandu bosi, niyisoomwa ninabo; 3ne kamanyiishe ebulafu mbu muli ibarwa yaKristo, eya khwakasia ifwe, eyirahandiikwa nobwino ta, habula nende Roho waNyasaye oubeetsangaho mwoyo; khurubaho rwamachina ta, habula khurubaho rwemioyo chieinyama.
4Ne obusuubili buno khuli ninabwo imbeli waNyasaye khulwa Kristo; 5shikali mbu ifwe khubweefwe khuhela okhubala eshindu shiosi mbu shirula khwifwe, ta; ne obunyali bweefwe burula khuNyasaye; 6khandi niye owakhunyalila okhuba abakhalabani beindakano imbia, eyirali eyetsinyukuta etsiahandiikwa ta, habula eyaroho; okhuba tsinyukuta tsiiranga, ne roho yihaana obulamu. 7Ne obukhalabani bwobufu, obwetsinyukuta etsiasaarwa khumachina, nibuba nibweetsa muluyali, mbu abaana baIsiraeli oburanyala okhurangaala mumoni mwaMusa khulwa oluyali olwomumonimwe, olwali niluhweetsangaho, ta; 8obukhalabani bwaRoho shibulashila okhuba noluyali? 9Okhuba obukhalabani obukhukhalachila eshiina nibuba nibuli obwoluyali, obukhalabani obukhubasilia obulunjishi bushila muno okhuba obwoluyali. 10Okhuba toto mwene, obwenobwo obwakholwa obwoluyali, mwikhuwa lino shibwakholwa obwoluyali ta, khulwa oluyali Iwenolwo olwalushila. 11Okhuba obwenobwo obuhweetsangaho nibuba nibwali nende oluyali, obwenobwo oburahwaho ta bushila okhuba obwoluyali.
12Kho olwa khuli nobunaayi obufwana burio, khuboolanga katong'ane, 13nikhuraba shinga Musa, oweefuunikhanga olububi mumoni, mbu abaana baIsiraeli baleshe okhurangaala khubumaliilishi bwolwenolwo olwali niluhwaho, ta. 14Ne obuyililisii bwabwe bwali obusiro; okhuba kata okhuula olwa leelo luno, olwa lisoomo lieindakano yakhale lisoomungwa olububi tsana lutong'angaho nilurachinguulwa ta; ne olububi olwo lurusibungwaho muKristo. 15Ne okhuula olwa leelo, olwa akaMusa kasoomwa, olububi lubafuunikhanga emioyo chiabwe. 16Ne buli olwa omundu amushiukhanila Omwami, habwenaho olububi luyinibwaho. 17Ne Omwami niye Roho mwenoyo; khandi aha Roho wOmwami ali, habwenaho obulekhuule bubeetsangaho. 18Ne ifwe fwesi, olwa khufuunuulwa mumoni, nikhukalusinjia lihunjesi lioluyali lwaNyasaye shinga eshiilolelo, khukalukhasibungwa okhufwana khurio, okhurula khuluyali okhuula khuluyali lundi; ne ako karulanga khuMwami, niye Roho.
Currently Selected:
2 Abakorinzo 3: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975