Ebikhole 13
13
1Haho baliho eAndiokia, mukanisa eyebweneyo, abanabii nende abeechesia, mbabano, mbu Baranaba, nende Simeoni owalangwa mbu Nigeri, naLukio weKirene, naManaeni owoolelwa halala nende omuruchi Herode, nende Saulo. 2Ne olwa bali nibamukhalabanila Omwami, nende okhuhonga inzala, Roho Omutakatifu yaboola mbu Munzahulile Baranaba nende Saulo khulwa emilimo echia embalanjiile. 3Mana olwa bali nibahonjile inzala nibasaaya nibabarakhwo emikhono, babaseebula mbu batsie.
Abarume beelwatsila eKipiro
4Kho bo, nibarumwa bario nende Roho Omutakatifu, bakholomokha nibatsia eSeleukia; nokhurula yaho nibatsia muliaro okhuula eKipiro. 5Ne olwa bali nibali eSalami, barumbula ebulafu likhuwa liaNyasaye mutsisinagogi tsiabaYahudi; khandi bali nende Yohana nali omubeeli wabwe.
6Ne olwa bali nibalambuulile eshikhalachinga eshio shiosi okhuula ePafo, banyoola omundu undi omufumu, omunabii wobubeeyi, omuYahudi, owa eliira mbu BariYesu. 7Yali halala nende kafuna, Serugio Paulo, omundu omurechelefu. Omwenoyo yalanga Baranaba nende Saulo niyeenya okhuhulila likhuwa liaNyasaye. 8Nebutswa Elima, omufumu tsana, shichila eliiralie likalulwa lirio, yabakaya, niyeenya okhushiukhasia omwoyo kwakafuna oyo okhurula khubusuubili. 9Ne Saulo, khandi niye Paulo, niyeetsuule nende Roho Omutakatifu, yoomisia tsimoni okhumuhenga, 10nasunga mbu E iwe owitsuulemwo obukatii nende obumayaanu bwosi, omwana waSetani, omusuku wobulunjishi bwosi, shionyala okhulekha okhushiamia tsinjila tsinunji tsiOmwami? 11Bulaano, lola, omukhono kwOmwami kuli khwiwe; witsa okhukwa omubofu, noralolakhwo omubasu ta tsindaalokhwo. Nonoho yachaaka okhulola maweliweli, eshiilima nishimukwila; ne yachendanga nakhaaba oumutiila omukhono namwimilila. 12Mana kafuna oyo, olwa yalola akakholekha, yasuubila, nachenyela ameechesio kOmwami.
Paulo naBaranaba nibali eAndiokia muPisidia.
13Haho banga Paulo barula ePafo muliaro niboola ePeruga muPamufilia; mana Yohana yabalekha, nakalukha eYerusalemu. 14Ne bo babira muPeruga niboola eAndiokia muPisidia; nibeenjila musinagogi khuSabato, nibeekhala. 15Ne inyuma womusoomo kwamalako nende okwabanabii, abeemilisi beisinagogi baruma omundu okhubasunjila mbu Abaana beefwe, nimuba nimulikhwo nende likhuwa liosi liobuchesiyii, elia muleerela abandu bano, khaboole.
16Mana Paulo nasinjila, nabasirmila omukhono, naboola mbu AbaIsiraeli bashianje, nende inywe abamuria Nyasaye, mumbulile. 17Nyasaye wabandu bano Isiraeli yalobola abakuuka beefwe, niyeemekha abandu abo olwa bali nibamenyakhwo mushibala shiaMisiri, nabeemilila nomukhono kwobunyalibwe nabarusiamwo. 18Ne mushise shiemiyika amakhumi kane yabeesimilisilia mushitsiimi. 19Ne olwa yali namuluule amahanga musaafu mushibala shiaKanaani, yabaheelesia eshialo shiabwe shibe obulaame bwabwe emiyika shinga ebikhumi bine namakhumi karaano; 20nolunyuma lwamakhuwa ako yabaheelesia abayaasii okhuula khuSamweli omunabii.
21Ne olunyumakhwo basaba omuruchi; Nyasaye nabaheelesia Saulo waKishi, omundu woluyia lwaBenyamini, mushise shiemiyika amakhumi kane. 22Ne olwa yali namurusiyeho, yabuusia Daudi abe omuruchi wabwe; ne khumwenoyo yarumbula akobuloli, nasunga mbu Ndamunyoolile Daudi waYese, omundu owa omwoyokwe kuwinjana nende okwanje; naye alakhola aketsiyemi tsianje tsiosi. 23Mulwibulo Iwomundu uno Nyasaye yaleereele Isiraeli Omuhonia, niye Yesu, shinga olwa yasuubisia; 24olwa Yohana yali naranjiliile okhwilwatsila abandu bosi baIsiraeli obubatisii bwobwikalukhasii, ye nashili okhwitsa. 25Naye Yohana, olwa yali nali okhumalilisia oluchendolwe, yasunga ari Mukaala murie khwisie? Shindi nisie ye ta. Ne lole, aliho owitsa munyuma wanje, owa ndarakwanile okhuboholola ebilaaro ebiomubilenjebie tawe.
26Abaana beefwe, abaana boluyia lwaAburahamu, nende abo khwinywe abariitsanga Nyasaye, nifwe abarumilwa likhuwa liobuhonia buno. 27Okhuba abamenya eYerusalemu, nende abeemilisi babwe, olwa bamukorwa, nibaramanya okhuboola khwabanabii okhusoomungwa buli Sabato ta, bakhuusia olwa bamukhalachila eshiina. 28Ne kata olwa baranyoola eshifune shiosi shiokhumwira ta, kho basaba Pilato mbu yeerwe. 29Ne olwa bali niboosiye ako kosi akamuhandiichilwa, bamwakula khumusaala nibamwalisia mung'ani. 30Nebutswa Nyasaye yamulamusia mukhufwa; 31mana yalolwa tsindaalo tsinyinji nende abo abatikulukha ninaye okhurula eGalilaya okhuula eYerusalemu; ne nibo aba bulaano bali abarumbusibe imbeli wabandu.
32Neefu khumuleerela amakhuwa amalayi akobusuubisie obwa abakuuka abo basuubisibwa, 33shinga olwa Nyasaye yabuusilia obusuubisie bwenobwo khubaana aba khweebula, olwa yamulamusia Yesu; khandi kali shinga olwa kahandiikwa mutsabuli yakhabili, mbu
Niwe Omwana wanje, leelo luno ekhwibuule.
34Ne khumakhuwa katsana, shinga olwa yamulamusia mukhufwa, oburakalukha mukhubola ta, yasunga ari nanwa, mbu
Ndalakhuheelesia tsikhabi tsiaDaudi,
tsindakatifu tsiralilu.
35Okhuba yasunga khandi mutsabuli yindi, mbu
Shiolafuchiilila Omutakatifuwo yeenjile mukhubola tawe.
36Shichila Daudi, olwa yali namalile okhukhalabanila tsiyemi tsiaNyasaye mulubakalwe, yakona tsindoolo, niyaalisibwa halala nabakukanyene, niyeenjila mukhubola. 37Nebutswa oyo owa Nyasaye yalamusia mukhufwa shiyayeenjila mukhubola ta.
38Kho mumanye, baana beefwe, mbu mumundu uno mumanyisibwa ebulafu akobulesheIwi bwebionoono; 39khandi khululwe buli mundu ousuubila abasilibwakhwo obulunjishi mu ako kosi aka aranyala okhubasilibwakhwo obulunjishi khulwa amalako kaMusa tawe. 40Khulwako mwirecheshe, kaleshe okhumukwila akeenako aka abanabii baboola, mbu
41Henje, inywe abalechi, muhuche, nimuhwaho,
Okhuba ekhola omulimo mundaalo tsieenywe,
Omulimo okwa mulakhaya okhusuubila, kata olwa omundu amuboolelakhwo.
42Ne olwa bali nibarula, babasaaya mbu bababoolelekhwo amakhuwa ako khuSabato yakhabili. 43Ne olwa abomusinagogi basalaana, abanji abokhubaYahudi nende abokhubashiukhani abeekayakayi babalondakhwo Paulo nende Baranaba; nabo nibasungana ninabo, nibabatinyilisia mbu balumilile mubukoosia bwaNyasaye.
44Mana khuSabato yakhabili ahambi khubosi abomwitookho bakhung'aana okhuhulila likhuwa liaNyasaye. 45Ne olwa abaYahudi balola emikanda, imbalikha niyiitsula mubo, nibafukula amakhuwa akasungwa nende Paulo, nibanyeka. 46Nabo Paulo nende Baranaba nibaboola katong'ane neitswoni, bari Kabeele nikakhoyeele mbu likhuwa liaNyasaye limubooleelwe inywe mbeli. Olwa mulisindikhanga eyo, nimwichela abeene mbu shimukwaniile obulamu bwobumeli ta, lole khushiukhana nikhutsia khuBamahanga.
47Okhuba nindio Omwami yakhulachile, ari
Ndakhureeleho mbu obe obulafu khuBamahanga,
obeho khulwa obuhonia okhuula khushihesi shieshialo.
48Ne olwa Abamahanga bahulila ako, basangaala, nibaheelesia likhuwa liaNyasaye oluyali; nabo bosi abaahulwa khulwa obulamu bwobumeli nibasuubila.
49Likhuwa liaNyasaye nalio nilitswana mumbali etsio tsiosi. 50Ne abaYahudi batswanzwania abakhasi abeekayakayi aboluyali nende abasaatsa abakhulundu abomwitookho, omwo, nibayakula obusandii khuPaulo nende Baranaba, nibabarusia munzakho tsiabwe. 51Nabo nibateng'ulula olufu olwokhubilenje biabwe okhubafukula; niboola eIkonio. 52Abeechi nabo nibeetsulamwo okhwikhoya khandi nende Roho Omutakatifu.
Currently Selected:
Ebikhole 13: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
