Ebikhole 17
17
Indiri yeekholela eTsesalonika
1Ne olwa bali nibabirile muAmufipoli nende Apolonia, niboola eTsesalonika, ewa isinagogi yabaYahudi yali; 2ne Paulo, eshiimashie shinga olwa shiali, yeenjilamwo, mana muSabato tsitaru yakhupa imbakha ninabo khumakhuwa akomumahandiiko, 3nakeenoosia nende okhumanyia shinga olwa kali nikamukhoyeele Kristo oyo okhusaalila, khandi okhulamukha okhurula mukhufwa; ari Yesu uno, owa emurumbulila, niye Kristo watsana. 4Abandi khubo bamala nibasuubila, nibeeyunga khuPaulo nende Sila; nabokhubaYunani abeekayakayi abanji muno, nokhubakhasi abakhulundu abanjikhwo.
5Ne abaYahudi batiilwa imbalikha, nibalanga abandu bandi abamayaanu abokhushiiro, nibakhung'aasia omukanda, nibakoyaasia litookho; nibatsia enanzu waYasoni, nibateema okhubarusilia abandu. 6Ne olwa barabanyoola ta, bakhwesa Yasoni nende abandi abokhubaana beefwe nibabayila imbeli wabaami belitookho, nibayochela, bari Bano abafumamiye eshialo shiosi boolile nende yino; 7naye Yasoni yabeenjisiye; ne bano bosi bakholanga akayingania amalako kaKaisari, nibasunga mbu aliho omuruchi undi, mbu Yesu. 8Nikabahendia abemikanda nende abaami belitookho, olwa bahulila amakhuwa ako. 9Ne olwa bali nibabukuule omusingo khubanga Yasoni, babalekhuula.
Abarume nibali eBeroya
10Nonoho abaana beefwe babaruma Paulo naSila mushilo okhuula eBeroya; nabo olwa boolayo nibeenjila musinagogi yabaYahudi. 11Ne abeenabo bali abeshiilongoole okhushila abali muTsesalonika; okhuba bali abemioyo emiangu okhufuchiilila likhuwa, nibanoonelesinjia amahandiiko buli nyanga, okhumanya amakhuwa ako nikaba nikali kario, nohomba. 12Mana abanji khubo nibasuubila, khandi nende abakhasi abaYunani abali abakhaye toto, nende abasaatsa abaniikhwo.
13Ne olwa abaYahudi beTsesalonika baboolelwa shinga likhuwa liaNyasaye olwa lieelwatsungwa nende Paulo khandi eBeroya, nabo bosi niboolayo, nibatubuula emioyo chiabandu nibabakoyaasia. 14Kho habwene nahabwene abaana beefwe bamuruma Paulo mbu atsie okhuula khunyanza; ne Sila nende Timotseyo nibashitong'ayo. 15Ne abo abamukooba Paulo bamuusia eAtsene; ne nibalachilwe likhuwa khuSila nende Timotseyo, mbu bamwitsile bwangu, nibeenyokha.
Paulo nali eAtsene
16Haho olwa Paulo yali nashibalindilangayo eAtsene, omwoyokwe kwayia olwayalola litookho elo niliitsuulemwo ebifwanani ebiinamilungwa. 17Kho yakhupa imbakha musinagogi nende abaYahudi nabandu abeekayakayi, khandi muluvia buli nyanga nende abo abaakaananga ninaye ebweneyo. 18Nabandi khandi babaEpikurio nabaSitoike abobumanyilisii nibabukaana ninaye. Abandi nibasunga bari Omwibootsi uno akhaboola shi? Nabandi bari Yeengana ourumbula abanyasaye abacheni. Shichila yeelwatsanga akaYesu nende obulamushi.
19Nibamuhamba nibamuyila muAreopago, nibasunga bari Nochama, khumanye akameechesio amayia aka oboolanga shinga olwa kali? 20Okhuba oleeranga amakhuwa kandi amacheni mumarwi keefwe; kho khwenya okhumanya eshisina shiamakhuwa ako. 21Ne abaAtsene bosi, halala nabacheni abamenyangayo, shibali nobwiyangu bwelikhuwa lindi ta, habula okhuboola kata okhuhulila likhuwa iiosi liyiakha. 22Mana Paulo nasinjila hakari weAreopago, nasunga mbu Inywe abandu baAtsene, mumakhuwa kosi enduutsi mbu muli abandu abayililisinjiakhwo khumakhuwa keidini. 23Okhuba olwa embirilenje nindola bienebio ebia mwinamilanga enduutsi eshimalilo shiemisango shindi eshiahandiikwakhwo shiri KHUNYASAYE OURAMANYIKHA TA. Kho omwenoyo owa mwinamilanga mukhukorwa, neniye owa emurumbulilanga.
24Nyasaye oyo owakhola eshialo nende biosi ebilimwo, ye ouli Omwami welikulu nende eshialo, shiamenyanga muhekalu etsiumbakhwa namakhono ta; 25kata shiakhalabanilwa namakhono kabandu, shinga outamba eshindu, tawe; okhuba neniye ouheelesinjia bosi obulamu, nemiuya echia baheelanga, nende ebindu biosi; 26nokhurula mumulala yakhola buli lihanga liabandu mbu bamenye khushialo shiosi, namalile okhuraho tsinduukho etsialakwa nende tsinzakho tsiebimenyo biabwe; 27mbu bamukhaabe Nyasaye, nikaba mbu fwana bakhahabasiahabasia nibamunyoola, kata olwa arali ehale nende buli mulala khwifwe ta. 28Okhuba muye nimwo omwa khumenyanga, nikhuchenda, nikhubaho; shinga abandi kata abomubakasii betsinyimbo tsieenywe olwa baboola, mbu Okhuba fwesi khuli olwibulolwe. 29Kho olwa khuli khurio olwibulo lwaNyasaye, shikhukhoyile okhukaala mbu Obunyasaye bufwana shinga itsahaabu, kata ifeetsa, kata lichina, eshibaatsilwa obunina nobuchesi bwabandu, tawe. 30Ne ebise ebiokhukorwa, Nyasaye yabimaayia; habula bulaano alachilisinjia abandu mbu bosi, ababuli handu, bakhoyile okhwikalukhasia. 31Shichila amalile okhuraho induukho olwa alayaasia eshialo eshiina shiobulunjishi, khulwa omundu oyo owa yaahula; khandi yasuubisiye abandu bosi amakhuwa ako, olwa yamulamusia mukhufwa.
32Haho olwa bahulila akobulamushi bwabafu, abandi bamutsesheelela; nabandi nibasunga bari Khulakhuhulila olundi khandi khumakhuwa kano. 33Habwenaho Paulo narula mubo. 34Ne abandi beeyunga khuye, nibasuubila; mulala khubo yali Dionisio, omuAreopago, nende omukhasi oulangwa mbu Damari, nabandi khandi ninaho halala.
Currently Selected:
Ebikhole 17: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
