Ebikhole 19
19
Paulo nali eEfeso
1Haho olwa Apolo yali nashili eKorinzo, Paulo yoola eEfeso, namalile okhubira mushialo shiemukulu, nanyoola abeechi bandi; 2nabareeba ari Mwanyoola Roho Omutakatifu olwa mwasuubila? Nabo bari Tawe; kata okhuhulila shikhwahulilakhwo mbu aliho Roho Omutakatifu tawe. 3Nabareeba ari Kho mwabatisibwa khububatisii shiina? Nibasunga bari Khububatisii bwaYohana. 4Paulo nasunga mbu Yohana yabatisinjia obubatisii bwobwikalukhasii, naboolela abandu mbu bamusuubilile omwenoyo owakheetse munyumawe, niye Yesu. 5Ne olwa bahulila bario, nibabatisibwa nibeenjisibwa muliira liOmwami Yesu. 6Ne olwa Paulo yali nabareelekhwo emikhono, Roho Omutakatifu yabeetsela; nibaboola netsinimi, nibalakula. 7Ne bosi bali abasaatsa shinga ekhumi nababili.
8Kho niyeenjila musinagogi, naboolanga katong'ane emiesi chitaru, nakhupanga imbakha nabanichilisinjia khumakhuwa kobwami bwaNyasaye. 9Ne abandi olwa boomia amakosi nibakhaya okhusuubila, nibaboola obubii khuNjila eyo imbeli wemikanda, yabarulakhwo, natsia nende abeechi, nakhupanga imbakha inyanga buli nyanga mwisoomelo liaTirano. 10Kano nikatsiililila kario emiyika chibili, okhuula bosi abamenya muAsia olwa bahulila likhuwa liOmwami, kata abaYahudi kata abaYunani. 11Ne Nyasaye yakhola akamakana amayia namakhono kaPaulo; 12mbu orutawulo nebitambaya biarusibwa khumubiliwe nibiyililwa abalwale, obulwale mana nibubalekha, abaroho ababii nibabarulamwo.
Abaana baSikewa
13Ne abandi abokhubaYahudi abayeeyeemi, abarusinjia abaroho, bateema okhurumbulila abeenabo abali nabaroho ababii eliira liOmwami Yesu, bari Emubiila khulwa eliira liaYesu owa Paulo yeelwatsanga. 14Ne baliho abasiani musaafu bomundu mbu Sikewa, omuYahudi, omukuhani omukhulundu, abakhola bario. 15Mana roho omubii naye nakalusia nabasunjila ari Yesu emumanyile, khandi Paulo emumanyile; ne inywe ninywe beena? 16Omundu oyo owalimwo roho omubii nabaruumilakhwo nabahula bosi, nabanyala, okhuula olwa beelukha nibarula munzu omwo nibali eshihechenye, nibasaaliile.
17Likhuwa elo nilimanyishila abandu bosi abamenya eEfeso, abaYahudi nende abaYunani; indenga niyibahamba bosi, eliira liOmwami Yesu niliitsoomibwa. 18Kata abanji khubo abali nibasuubiile nibeetsa nibeeyama, nibarumbula ebikhole biabwe. 19Kata abanjikhwo khubo abakholanga akobufumu bakhung'aasia ebitabu biabwe nibabisamba abandu bosi nibalola; nibabasia obukusi bwabio, nibanyoola nibuhela tsifeetsa ebikhumila amakhumi karaano. 20Nilwo olwa likhuwa liOmwami liakhula nilihula.
Obukoyaani bweekhola eEfeso
21Haho amakhuwa ako olwa kahwa, Paulo yarakhwo omwoyo okhutsia eYerusalemu olwa yakhaba nabirile muMakedonia nende Akhaya; ari Nimalile okhubayo ebweneyo, kakhoyeele mbu endolekhwo kata Roma yosi. 22Ne babili khubeenabo abamukhalabanilanga, nibo Timotseo nende Erasito, yabaruma eMakedonia, omwene natong'ayo ebuAsia eshisekhwo.
23Ne mundaalo etsio, obukoyaani bwabuukha obunji khumakhuwa keInjila eyo. 24Okhuba omundu undi oweliiralie mbu Demeterio, omwiraanyi weifeetsa, oweeraanyanga ifeetsa oruhekalu rwaAritemi, yali nabaleerelanga abafundi inganga inyinji. 25Yabakhung'aasia, halala nabakholi bandi bemilimo chienechio, nasunga ari Abasaatsa abashianje, mumanyile mbu obuyinda bweefwe burulanga mumilimo chino. 26Khandi muluutsi nimuhulila mbu shimuli muEfeso mwonyene ta, habula muAsia ahambi mwosi Paulo uno unichilisiye abandu abanji nabashiukhasia, naboolanga mbu ebikholwa namakhono shibili abanyasaye ta. 27Shikali butswa mbu emilimo chieefwe chino chinyala okhulekwa, ta; habula ihekalu yomunyasaye weshikhasi omukhuIundu Aritemi yinyala okhupaarwakhwo mbu shishili eshindu ta; kata yakhanyala okhuyinibwakhwo oluyalilwe lwosi, oyo owa Asia yosi nende abomubialo biosi pe beenamilanga. 28Ne olwa bahulila bario, batiilwa oburima, nibayiiba, bari Aritemi wabaEfeso nomukhongo.
29Litookho liosi niliitsulamwo obukoyaani; nabo nibeelukha tsimbilo nomwoyo mulala nibeenjila mwikhung'aanilo, nibamalile okhuhamba Gayo nende Arisitariko, abandu beMakedonia, abachendanga nende Paulo. 30Ne olwa Paulo yali niyeenya okhwinjila ewa abandu bali, abeechi shibamumoka ta. 31Nabandi abokhubakhuIundu baAsia, abali abeetsabe, bamukhupila omunwa nibamusaaya mbu aratsaalikha okhwinjila mwikhung'aanilo ta. 32Kho abandi balanjilisinjia bari, nabandi bari, okhuba omukhung'aano kwosi kwali nikukoyaanile; obunji bwabwe nibaramanyakhwo akachilile nibakhung'aana ta. 33Nibamurusia Alekisanda mumukanda, abaYahudi nibamusitia hambeli. Naye Alekisanda nabasimila omukhono, niyeenya okhwiteetsa imbeli wabandu. 34Nabo olwa bamanya mbu nomuYahudi, bosi bayiiba nomwoyo muIala, eshise shietsisaa tsibili, bari Aritemu wabaEfeso nomukhongo.
35Ne omuhandiichi welitookho olwa yali naholelesiye omukanda, yasunga ari Inywe abasaatsa beEfeso, ali heena ouramanyile ta shinga litookho liaEfeso olwa lili lilindi lieihekalu yaAritemi omukhongo, nende lieshieneshio eshiaakukha okhurula mwikulu? 36Ne olwa amakhuwa ako shikanyala okhukaanwa ta, mukhoyile okhwihootselesia nimurayungubala ta. 37Okhuba muleerile abandu bano hano, abarayeebakhwo ebiomuhekalu kata okhunyeka nyasaye weefwe oweshikhasi tawe. 38Kho Demeterio nabafundi aba ali ninabo nibaba nibali nende likhuwa khumundu yesi, ebiina biliho, khandi abakafuna baliho; kho beenjililane. 39Ne nimuba nimukhaaba akali khumakhuwa kandi, kalakasilibwa mumukhung'aano okubeetsangaho. 40Okhuba nitoto, khwakhanyala okhwinjililwa khumakhuwa keinduli yaleelo, eyibula eshifune; kata khwikhuwa elo shikhulanyala okhurumbula eshisina shiomukhung'aano kuno ta. 41Ne olwa yali naboolile ario, yaseebula omukhung'aano.
Currently Selected:
Ebikhole 19: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
