Ebikhole 4
4
Petero naYohana baleerwa imbeli weshiina
1Ne olwa bali nibasungananga nende abandu, abakuhani nende omuseesia owomuhekalu nende abaSadukayo nibabafutushila, 2nibasinyiishe muno shichila bali nibeechesinjia abandu, nibarumbula mumakhuwa kaYesu akobulamushi bwabafu. 3Nibabakwakhwo nibabara mumbohe okhuula mukamba; okhuba eshialo shiali nibwilile. 4Ne abanji khubo abahulila likhuwa elo nibasuubila; obunji bwabasaatsa nibuba shinga ebikhumila biraano.
5Mana mukamba abaruchi babwe nabakofu nabahandiichi bakhung'aanila eYerusalemu; 6ne baliho Anasi Omukuhani Omukhulundu, naKayafa, naYohana naAlekisanda, nende abo bosi abali abeekho bOmukuhani Omukhulundu. 7Ne olwa bali nibabasinjisiye hakari, babareeba bari Mukholile likhuwa lino khulwa obunyali shiina, kata muliira liawina? 8Mana Petero, niyeetsuule nende Roho Omutakatifu, nabasunjila ari Inywe abaruchi babandu nende abakofu, 9nikhuba nikhureebelesibwa leelo khumakhuwa keshikhole eshilayi eshikholeelwe omulwale, shinga omundu uno olwa ahoniibwe, 10mumanye mwesi, nende abandu baIsiraeli bosi, mbu muliira liaYesu Kristo weNazareti, owa mwabamba khumusalaba, nowa Nyasaye yalamusia mukhufwa, mumwenoyo omundu uno asinjiile hano imbeli weenywe nali omulamba. 11Neniye lichina elialekwa nineenywe aboombashi, eliakholwa elikhulundu eliomukoona. 12Ne obuhonia shibuli muwundi yesi ta; kata libulaho eliira lindi hasi welikulu elia abandu baheebwa, elia khukhoyile okhuhonilibwamwo.
13Haho olwa balola itswoni yaPetero nende Yohana, nibalola shinga olwa bali abarayeeka ta, abandu butswa, bahuka, nibeetsulila khubo shinga olwa balinji nende Yesu. 14Ne olwa balola omundu oyo owali nahoniibwe nasinjiile ninabo, bakhaywa okhulifukula. 15Ne olwa bali nibabalachile mbu barulekhwo mushiina, basungana abeene, 16bari Nakhubakholele khurie abandu bano? Okhuba toto mwene, kabamanyishiile bosi abamenyanga eYerusalemu mbu eshilolelo shieifuma shiikholeeshe khulwabwe; neefwe shikhunyala okhwambakhana ta. 17Ne mbu likhuwa lino lileshe okhumeeta okhutswana mubandu, khubasiomele mbu barasunjila omundu yesi muliira elo khandi tawe. 18Nibabalanga, nibabalachilisia oburasungakhwo kata okhwechesia muliira liaYesu ta.
19Nebutswa Petero nende Yohana nibakalusia nibabasunjila bari Nibuba nibuli bulayi imbeli waNyasaye okhumuhulila inywe okhushila Nyasaye, inywe abeene muchele; 20shichila ifwe shikhunyala okhulekha okhuboola khumakhuwa aka khwalola nende aka khwahulila ta.
21Nabo olwa bali nibameetile okhubasiomela bario, babalekhuula, nibaranyoolile eshifune eshiokhubakuuma ta, khulwa abandu; okhuba abandu bosi bamwitsoomia Nyasaye khulwako akakholekha. 22Shichila omundu oyo yali nashila emiyika amakhumi kane obuyindifubwe, owa eshilolelo eshio shiobuhonia shiakholwa khuye.
Abasuubili basaba itswoni
23Nabo olwa bali nibalekhuulilwe niboola ewa abashiabwe bali, nibabatoonyela kosi aka abakhulundu babakuhani nende abakofu bali nibabasunjiile. 24Nabo olwa bahulilakhwo nibachinjila Nyasaye eminwa nende omwoyo mulala, nibasunga bari E Nabongo, niwe owakhola likulu nende eshialo nende inyanza nende biosi ebilimwo; 25khandi wasunga muRoho Omutakatifu, mumunwa kwakuuka weefwe Daudi omukhalabaniwo, ori
Abamahanga beechinjimisia mbushiina,
tsimbia natsio nitsiyililisia akabutswa?
26Abaruchi beshialo beeyanza abeene,
abaami nabo nibeekhung'aasia halala,
okhufukula Omwami, khandi okhufukula Kristowe.
27Okhuba nitoto, mwitookho lino, Herode nende Pondio Pilato bombi, halala nende abamahanga nende tsimbia tsiaIsiraeli, beekhung'asia halala okhuyinga Omukhalabaniwo omutakatifu Yesu, owa watsushiilila amafura, 28okhukhola liosi liosi elia omukhonokwo netsiyemitsio biaraho khale mbu liikhole. 29Kho bulaano, Omwami, ohenje tsisiomi tsiabwe, nobafuchiilila abasumbabo okhurumbula likhuwalio nende itswoni yosi. 30Kololosia omukhonokwo okhuhonia; mbu ebilolelo nende amangalimwa bikholungwe muliira liOmukhalabaniwo Omutakatifu Yesu.
31Ne olwa bali nibamalile okhusaaya, munzu omwa bali nibakhung'aanilemwo nimutechela; nabo bosi nibeetsulamwo Roho Omutakatifu, nibarumbula likhuwa liaNyasaye nende itswoni.
Basanjilana khubiosi
32Nomukanda kwa abo abasuubila bali abomwoyo mulala nende roho ndala; kata yabulaho khubo owaboola mbu shiosi shiosi eshiokhubindubie neshishie khululwe ta; habula basanjilana khubiosi. 33Nabo abarume barumbula obuloli bwabwe khubulamushi bwOmwami Yesu namaani; obukoosia nibuba khubo bosi muno. 34Shichila yabulaho khubo owaleema eshindu shiosi; okhuba bosi abali abeene mikunda kata tsinzu babikusia, nibaleera obukusi bwebindu ebikusiibwe; 35nibabura hamakulu kabarume; mana omukabo kwakabilwa buli mundu, obutambi bwomundu yesi shinga olwa bwali.
36Naye Yusufu, owa abarume bakulikha mbu Baranaba (eshisina, nilikalulwa, mbu Omwana wobulemia), omuLawi, omundu wolubeela lwaKipiro, 37olwa yali nali nende omukunda, yakukusia nareela amapeesa, nakara hamakulu kabarume.
Currently Selected:
Ebikhole 4: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
