Genesis 27
27
Yakobo yakhola obukaatii mbu Isaka amusabile ikhabi
1Olwa Isaka yali nakofuule, tsimonitsie natsio nitsimaliihe, naranyala okhulola eshindu tawe, yalanga Esau omwanawe omukhulundu, namuboolela ari Omwana wanje; naye nafuchila ari Endiho. 2Nasunga mbu Lola, isie bulaano engofuule; shimanyile inyanga yokhufwa khwanje ta. 3Kho bulaano chama obukule ebimanulwabio, mbu imotia nende obuyingo, otsie mushitsiimi, uyiimileyo inyama eyomuluyiitsi, 4mana ungasilie ebiliibwa bieshiuya eshilayi, shinga olwa enzenyanga, undeerele endie; mana omwoyo kwanje kukhusabile ikhabi nishili okhufwa.
5Ne Rebeka yahulila Isaka naboolelanga Esau omwanawe. Kho Esau natsia mushitsiimi okhuyiima inyama eyomuluyiitsi mbu aleere. 6Rebeka namuboolela Yakobo omwanawe mbu Lola, embuliile so naboolelanga Esau omwana weenywe, ari 7Undeerele inyama eyomuluyiitsi, ungasilie ebiliibwa bieshiuya eshilayi, endie mana ekhusabile ikhabi imbeli wOMWAMI nishili okhufwa. 8Kho bulaano, mwana wanje, hulila okhuboola khwanje mumakhuwa aka ekhulaka. 9Otsie bulaano mubiayo, unyendeleyo ebimeeme ebilayi bibili ebiomumbusi; nasi ndslabikasilia so ebiliibwa bieshiuya eshilayi, shinga olwa yeenya; 10nawe olayilila so, alie, mbu mana akhusabile ikhabi nashili okhufwa. 11Yakobo naboolela Rebeka nyina ari Lola, omwana weefwe Esau nomundu wamaswa amanji, nasi endi omurelele. 12Haundi papa yakhahabasiakhwo, ne ndakhaba mumonitsie shinga omukaatii, ne ndakheechemela okhufwolwa mushilenje shiokhusabilwa ikhabi. 13Nyinamwana namuboolela mbu Okhufwolwakhwo khube khwisie, omwana wanje; hulila okhuboola khwanje butswa, otsie obinyendele. 14Mana natsia nabienda, namuleerela nyina; nyinamwana naye nakasia ebiliibwa bieshiuya, shinga olwa samwana yeenyanga. 15Rebeka nabukula ebiifwalo ebilayi biaEsau, omwanawe omukhulundu, ebia yali nali ninabio munzuye, namufwala Yakobo omwanawe omushe; 16namufwalakhwo amaseelo kebimeeme biomumbusi khumikhonochie, nende khwikosi eliali lirelele; 17mana naheelesia Yakobo omwanawe mumukhonokwe ebiliibwa ebio bieshiuya eshilayi halala nende obusuma, ebia yali nakasiye.
18Naye natsia ewa samwana yali, nasunga mbu Papa; naye nafuchila mbu Endiho; niwe wina, omwana wanje? 19Yakobo namuboolela samwana ari Nisie Esau omwanawo owambeli; kho emalile okhukhola shinga olwa undachile; nochama, buukha wikhale olie khunyama yanje yoluyiitsi, mbu omwoyokwo mana ku'sabile ikhabi. 20Isaka namureeba omwanawe mbu Kabeele karie, nochinyoola bwangu ori nanwa, omwana wanje? Naye naboola ari Okhuba OMWAMI Nyasayewo yangasiliye. 21Isaka namuboolela Yakobo mbu Osite ahambi, ekhuhabasiekhwo, omwana wanje, emanye noba noli iwe omwana wanje Esau toto, nohomba ta. 22Mana Yakobo nasitakhwo ahambi nende Isaka samwana; naye namuhabasiakhwo, naboola ari Omwoyo kwene nomwoyo kwaYakobo, ne amakhono namakhono kaEsau. 23Naramwahukhasia ta, okhuba amakhonoke kali nende amaswa, shinga amakhono kaEsau omwana wabwe; kho namusabila ikhabi. 24Nareeba mbu Niwe omwana wanje Esau toto? Naye naboola ari Nisie. 25Naye naboola mbu Usitilie ahambi, nasi endie khunyama yoluyiitsi yomwana wanje, mbu omwoyo kwanje kukhusabile ikhabi. Nasitia ahambi, mana nalia; namuleerela nende idivai, nanywa. 26Isaka samwana namuboolela mbu Sita ahambi bulaano, unzunzuunekhwo, omwana wanje. 27Nasita ahambi, namutsunzuuna; naye nahulila okhuhunya khwebiifwalobie, namusabila ikhabi, naboola ari
Lola, eshiuya shiomwana wanje shili shinga eshiuya shiomukunda okwa OMWAMI yaheelesiye ibaraka;
28Nyasaye akhuheelesie khubieliime lielikulu,
khandi nende khubunulu bweshibala,
nende obunji bweimele nende idivai.
29Tsimbia tsiabandu tsikhukhalabanile,
amahanga nako nikakhwinamila;
obe iwe omukhulundu khubaana beenywe,
ne abaana bamawo nabo bakhwinamile;
omundu yesi oukhulaama eshilaamo shiobubii,
naye aba niyeenjiile mushilaamo shiobubii;
khandi omundu yesi oukhusabila ikhabi,
yesi abe neikhabi ario.
30Ne olwa Isaka yali niyakhamala okhumusabila Yakobo ikhabi, Yakobo naye nashirula imbeli waIsaka samwana, habwenaho Esau omwana wabwe niyeenjila narula muluyiitsi. 31Naye yesi nakhola ebiliibwa bieshiuya, namuleerela samwana; namuboolela samwana ari Papa nabuushe, alie khunyama yoluyiitsi yomwanawe, mbu mana omwoyokwo ku'sabile ikhabi. 32Isaka samwana namureeba ari Niwe wina? Naye naboola mbu Nisie omwanawo Esau, omwanawo owambeli. 33Mana Isaka natechela muno, nasunga mbu Ne abeele wina oubukuule inyama yoluyiitsi niyandeerela? Nasi emalile okhulia, olwa obeele noshili okhwitsa; mana emusabiile ikhabi; khandi toto mwene, alanyoola ikhabi. 34Olwa Esau yahulila amakhuwa kasamwana, yalila nakhupa esimbungu tsindulu muno, naboolela samwana ari Usabile isie ikhabi, Papa, ninasi siesi. 35Naye nasunga mbu Omwana weenywe yeetsile nobukaatii, ubukuule ikhabiyo. 36Nasunga ari Naye shiyalanjilwa khubwene mbu Yakobo? Okhuba yabukuule obwikhalo bwanjekhandi khabili; yabukula obukhulundu bwanje bwobwibule; khandi bulaano abukuule nende ikhabi yanje. Nareeba mbu Ne shiundesheelekhwo ikhabi nasi ta? 37Isaka nakalusia naboolela Esau ari Lola, emukholile okhuba omukhulunduwo, nende abasiani babwe bosi emuheelesiye mbu babe abakholibe; khandi emutinyisiye nende imele neidivai; kho bulaano nekhukholele shiina iwe, mwana wanje? 38Esau nareeba samwana mbu Oli nende ikhabi ndala yonyene, Papa? Usabilekhwo isie ikhabi, Papa, ninasi siesi.
39Isaka samwana nakalusia namuboolela ari Lola, eshimenyoshio shilaba ehale nende ebiobunulu bweshibala,
khandi khuliime liomwikulu elirula hekulu;
40olamenyelanga khulwa olukangalwo, khandi olimukholelanga omwana weenywe;
nolunyumakhwo niwihanululamwo,
olifunaka likokololie mwikosilio.
Isaka yamuruma Yakobo eHarani
41Ne Esau yamukiyanga Yakobo, khulwa ikhabi yatsana eya samwana yamusabila; mana Esau napaara mumwoyokwe ari Tsindaalo tsiamasika kapapa tsili ahambi; nilwo olwa ndilimwira Yakobo omwana weefwe. 42Ne Rebeka yatoonyelwa amakhuwa kaEsau omwanawe omukhulundu; naye narumana nalanga Yakobo omwanawe omushe, namuboolela mbu Lola, omwana weenywe Esau alikhuhutsulushilakhwo; yarakhwo omwoyo mbu alikhwira. 43Ne bulaano, mwana wanje, hulila okhuboola khwanje; mbu rula, otsie eHarani ewomusiani weefwe Labani; 44omenyeyo ninaye tsindaalo nduutu, okhuula obululu bwomwana weenywe buliyeela 45okhuula olwa oburima bwomwana weenywe buliyeela okhukhurulakhwo, niyeebilila lienelo elia wamukholeele; kho mana ndilirumana okhukhwendayo mbu oruleyo; nishiina eshiakhachila nifwilwa mwesi babili khunyanga ndala?
46Mana Rebeka namuboolela Isaka ari Omwoyo kwanje kuchoonyangal po khulwa abakhaana baHetsi; Yakobo naba naleera omukhasi khubakhaana baHetsi shinga bano, abomubakhaana beshialo shino, kho obulamu bwanje bungaasila shiina?
Currently Selected:
Genesis 27: OUV
Highlight
Share
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
