Habakuku 3
3
Isaala yaHabakuku
1Isaala yaHabakuku omunabii; mbu olutselelo.
2E OMWAMI, ndahuliile akeifumayo;
E OMWAMI, ebikholebio biriisinjia;
obikhole khandi hakari wemiyika,
mumiyika chieefwe obilolosie ebulafu;
ne muburima, witsulilenje tsimbabasi.
3Nyasaye arula eTemani;
Omutakatifu arula mushikulu shiaParani.
Oluyalilwe lufuunikha likulu,
nashio eshialo shiitsuulemwo obwitsoomibwibwe.
4Okhwakhakhwe khwingana shinga obulafu;
emikhoosi chirula mumbafutsie;
yaho niho aha obunyalibwe bwibisanga.
5Oluumbe lumuranjililanga;
omurengo kumulonda emukongo.
6Asinjila, eshialo nishirenga;
ahenga, amahanga nikatechela;
mana tsingulu tsiobumeli nitsisalaana,
ebikulu ebirahwaho ta nibiinama;
injilaye neyakhale.
7Enduutsi amaheema keKushani nikali mumatinyu,
tsingubo tsinzeleesia tsieMidiani nitsirenga.
8OMWAMI, wasinyishila emialo noho?
Watiililwa emialo oburima,
kata okhululila inyanza,
olwa wachendela khutsifarasitsio,
nokhumakaariko akobuhuli?
9Otsomolela elala obuyingobwo,
norakhwo ebisele khulutsaha;
warasia eshialo nemichela.
10Tsingulu tsikhulola, nitsitechela;
emikhula chiamatsi chiiyuula;
olusiba luchinga omwoyo niluchinguula amakhono ikulu.
11Eliuba nomwesi biema mushimenyo shiabio,
khulwa okhuhenukha khwebiselebio nibitsia,
nokhutsoha khwelifumolio ling'inang'inu.
12Omaalakana mushialo nobusinyishi,
notubanjila amahanga muburimabwo.
13Orulile okhuhonia abandubo,
khulwa obuhonia bwabamasihibo.
Warile omurwe kwomubii olukuma,
nomufuunuula okhurula khwirango okhuula khwikosi.
14Ofumiire nebiselebio omurwe kwabaseesiabo,
abeetsa shinga eshiimbalakusi okhusalaasia;
eshia beekhoyela, nokhumalilana abamanani mabiswi.
15Otubanjila inyanza netsifarasitsio,
mbu okhwirunda okhwo khwamatsi amanji.
16Embulila, omubili kwanje nikutechela;
omunwa kwanje kurenga khulwa omwoyo tsana;
obubolo bwinjila mumakumba kanje, injenda yanje niyitechela hasi wanje.
Enindanga inyanga yamasila nimboleelile,
eyitsa okhubakwila abandu abakhuseera.
17Okhuba kata omukhuyu nikuramulikha,
kata emitsabibu okhubakhwo nebiamo ta;
kata ebirula mumitseituni nibichweyekha,
emikunda nichiraama ebiliibwa ta;
kata ebiayo nibihwa mushitioli tsing'ombe nitsiraba mukhonje ta;
18khane ndaleekhoyela muMWAMI,
ndalasangaala muNyasaye wobuhonia bwanje.
19Yahweh Omwami niye amaani kanje;
akholanga ebilenje bianje biinga shinga ebieshitsusu,
niyanjesia habundu wanje aheechingu.
Khumureleesii wetsinyimbo; okhwimbilwa halala nobukhana bwetsinzaha.
Currently Selected:
Habakuku 3: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975