Hosea 10
10
1Isiraeli nomutsabibu omutendeemu okwamanga ebiamo biakwo.
Obunji bwebiamobie shinga olwa buli,
nolwa yeenjiyinjia ebimalilobie ario.
Obulayi bweshialoshie shinga olwa bwameetekha,
nolwa yameeta okhukasia tsisiilo tsisongookhu tsindayi ario.
2Omwoyo kwabwe nomukaatii;
balanyoolekha eshiina nishibafwiliile;
OMWAMI alakwisia ebimaiilo biabwe,
niyoonoonia tsisiilo tsiabwe tsisongookhu.
3Ne bulaano balasunga mbu Ifwe shikhuli nomuruchi,
okhuba shikhwaria OMWAMI ta;
ne omuruchi yakhakhukholela shi?
4Baboolanga amakhuwa namakhuwa;
bakhola tsindakano nibeetsuba akobubeeyi;
niko akachila obukhalachi bumela shinga omumela kwobufila mumikunda emilime.
5Abamenya eSamaria batechela khulwa eshimoosi shieBetsi-aweni;
okhuba abandu bayo balashiikhuula;
abakuhani bashio balalilila oluyali lwashio olwa bulaano luhweeleho.
6Eshiene shilachingwa shiyilwe eAshuru shibe eshihaanwa khumuruchi omukhongo;
Efuraimu aiahambibwa tsisoni,
khandi Isiraeli alafwimbilwa obukhayibwe omurwe.
7Omuruchi waSamaria alatiba shinga akhasaala khumatsi.
8Naho habundu aheechingu haAweni, eshionoono shiaIsiraeli,
halamululwa;
tsisasaari namarakalu bilamelela khubimalilo biabwe;
ne balasunjila tsingulu bari Khufwimbe,
nebikulu bari Khukwile.
9E Isiraeli, wonoonanga okhurula khundaalo tsiaGibea;
ne bashisinjiile bario.
Ne lihe shililabahamba kata eGibea?
10Ndaleetsa khubakhayi okhubakuuma;
amahanga kalaba nikakhung'aanile okhubayinga olwa balakuumwa khulwa obukhayi bwabwe bweshikhabili.
11Efuraimu neimoosi eyeechesibwa,
eyiheelanga okhuseena imele,
nasi ndabeelelela likosi liayo lilayi.
Ne ndalara likokolo khuEfuraimu;
Yuda alalima;
Yakobo alabuusa.
12Mwiraachile abeene obulunjishi;
chese ebiamo biobuheeli oburalilu;
fungule emikunda chieenywe echiakonela;
okhuba induukho yulile eyokhukhaaba OMWAMI,
okhuula olwa aleetsa okhumutsushiilila obuhonia shinga ifula.
13Mwalimile obumayaanu nimuchesa oburambatsanu;
mwaliile ebiamo biobubeeyi;
okhuba weesiika amakaariko,
nobunji bwabandubo abalulu.
14Khulwako indiri yilabuukha mubandubo,
tsingobatsio tsiosi nitsilikululwa,
shinga Shalimani olwa yalikulula Betsiarabeli khunyanga yelihe;
abanyina barulakwa hasi halala nabaana babwe, nibatubukha.
15Ne nolwa ndalamukholela inywe, abeinzu yaIsiraeli,
khulwa obubii bweenywe obunji;
mumbumbuyeka omuruchi waIsiraeli alakhalakwa pe.
Currently Selected:
Hosea 10: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975