Luka 7
7
Yesu yahonia omukhalabani womukendurioni
(Mat. 8.5-13)
1Olwa yali namaliile amakhuwake mumarwi kabandu, yeenjila muKaperinaumu. 2Ne omusumba womuseesia undi, owa yaheela muno, yalwala, niyeenya okhufwa. 3Ne olwa yahulila khukaYesu, yaruma abakofu abomubaYahudi, okhumusaaya mbu yeetse amuhonie omusumbawe. 4Nabo olwa boola ewa Yesu yali bamusaaya muno, nibasunga bari Akwanile mbu omukholele orio; 5okhuba aheelanga lihanga lieefwe, khandi omwene yakhuumbashila isinagogi yeefwe. 6Mana Yesu natsia ninabo. Ne olwa yali nali ahambi nende inzu, omuseesia yaruma abeetsa bandi, namusunjila mbu Omwami, oranyakhana ta; okhuba isie shingwanile mbu witse winjile hasi weshilama shieinzu yanje ta; 7khulwako kata shinduutsi mbu engwanile okhukhwitsila iwe ta; ne sunga likhuwa mana omusumba wanje alahona. 8Shichila nasi siesi endi omundu owareebwa hasi wobutuchi, nasi endi nende abasikari abali hasi wanje; nimusunjila mulala mbu Tsia, naye atsiitsanga; noundi, mbu Yitsa, naye yeetsanga; kata nende omusumba wanje, mbu Khola lino, nalikholanga. 9Ne olwa Yesu yahulila amakhuwa ako, yachenya, nashiukhana naboolela abemikanda abali nibalondananga ninaye ari Emusunjila mbu eshili okhulolakhwo obusuubili obukhongo shinga buno tawe, kata muIsiraeli ta. 10Nabarume abo olwa bakalukha mgo, banyoola omusumba oyo nali omulamu.
Yesu yalamusilia omwana womukhasi omulekhwa eNaini
11Olunyumakhwo yatsia khwitaala elilangwa mbu Naini; abeechibe nibatsia ninaye, halala nende omukanda omukhongo. 12Ne olwa yoola ahambi khushilibwa shielitaala, lola, omufu undi yachingwa narusibwamwo; yali omwana omuteelwa wanyina, naye nomukhasi omulekhwa; khandi abandu abanji abomwitaala bali nibali ninaye. 13Ne olwa Omwami yamulola yamutiililwa eshisa, namusunjila ari Oralila ta. 14Mana nasita ahambi natiilakhwo khushitalatalilo, abashichinga nibeema. Naboola mbu Omusooliili iwe, ekhubiila mbu buukha. 15Noyo owali nafwile niyeekhala, nachaaka okhuboola. Namuhaana khunyina. 16Mana oburii nibubahamba bosi; nibamuheelesia Nyasaye oluyali, nibasunga bari Omunabii omukhongo wabuushile mwifwe; khandi bari Nyasaye yabacheniihe abandube. 17Ifuma yino niyitswana khuye mubuYahudi mwosi, nende mumbali tsiosi tsiebweneyo.
Abarume abarula khuYohana Omubatisii
(Mat. 11.2-19)
18Abeechi baYohana nibamuboolela akamakhuwa ako kosi. 19Mana Yohana nalanga babili abokhubeechibe, nabaruma ewOmwami, nareeba mbu Iwe niwe omwenoyo owitsa, nohomba khulindiilile oundi? 20Nabo olwa bali niboolile ewa yali, basunga bari Yohana Omubatisii akhurumile khwiwe, ari Iwe niwe omwenoyo owitsa, nohomba khulindiilile oundi? 21Mushise shieneshio yahonia abanji abobulwale, nende abanyakhananga mumibili chiabwe, nende ababaroho ababii; kata abanji abali ababofu, yabanyalila okhulola. 22Mana nakalusia nababoolela mbu Mulatsie mumuboolele Yohana amakhuwa aka muhuliile nende aka muluutsi; mbu ababofu banyalilungwa okhulola, abetsindieku bachendanga, abobuchele basiiylmgwa, abeekala amarwi bahulilanga, abafu balamusibungwa, abamanani nabo beelwatsilungwa Amakhuwa Amalayi. 23Ne noweikhabi omundu yesi oureesichirasibwa khwisie ta.
24Abarume baYohana olwa bali nibeenyooshe, yachaaka okhusunjila abemikanda khukaYohana, ari Nishiina eshia mwarula nimutsia mushitsiimi okhulola? Mbu olusi olureesibwa nomuyeka noho? 25Ne nishiina eshia mwarula nimutsia okhulola? Mbu omundu owifwalile tsingubo tsindorotoro? Mbula, abeefwala tsingubo tsioluyali nibamenya eshiami, babeetsanga mumataala kabaruchi. 26Ne nishiina eshia mwarula nimutsia okhulola? Mbu omunabii? Ee, khandi emuboolela mbu noushila omunabii muno. 27Uno nomwenoyo owa kahandiichilwakhwo mbu
Lola, erumanga omurume wanje imbeliwo,
naye alakasia injilayo imbeliwo.
28Emuboolela mbu mubeenabo aba abakhasi beebula, abulaho oushila Yohana; ne oyo ouli butswa omutuutu mubwami bwaNyasaye amushila.
29Abandu bosi, kata nende abasololi bobushuru, olwa bakahulila, bafuchiilila obulunjishi bwaNyasaye, okhuba bali nibabatisibwa obubatisii bwaYohana. 30Habula abaFarisayo nende abakhulundu bamalako, abeene bakhaya khubwabwe obwibaali bwaNyasaye, okhuba shibali nibabatisibwa ninaye ta.
31Kho nenjelasie abandu abolwibulo luno nende shiina? Kata bafwana barie? 32Bafwana shinga abaana abeekhaale haluyia, nibalanjilisania, nibasunga bari Khumuupiile lilele, nimurashina ta; khwikhuulile, nimuralila ta. 33Shichila Yohana Omubatisii yayeetsile naraliitsanga ebiliibwa kata okhunywa idivai ta, nimuboola muri Ali nende lidimoni. 34Omwana wOmundu naye yeetsile naliitsanga nende okhunywa, nimuboola muri Lole, nomulangu khandi omumeesi, omwitsa wabasololi bobushuru nende aboonooni! 35Ne obuchesi bumanyikhanga shinga olwa buli habwene khulwa abaana babwo bosi.
Yesu yali ebunango waSimoni omuFarisayo
36Mulala khubaFarisayo naye yamulanga mbu alie ewuwe. Kho niyeenjila munzu yomuFarisayo oyo, niyeekhala habiliibwa okhulia. 37Mana lola, ngwoyo omukhasi undi owomwitaala elo, omwonooni; ne olwa yamanya shinga olwa yeekhaale naliitsanga munzu yomuFarisayo tsana yatsiayo nende ichupa yamafura, 38nasinjila emukongowe, habilenje, nalilanga amasika, nachaaka okhunyisia ebilenjebie namasikake, nabieya nende liswi eliokhumurwekwe, natsur zuuna ebilenjebie, nabitsushiilila amafura ako. 39Ne olwa omuFarisayo owamulanga yalola, yasunga mumwoyokwe ari Omundu uno naba nali omunabii, yakhamanyile omukhasi uno oumutiilangakhwo shinga olwa ali, kata imelaye, mbu nomwonooni. 40Mana Yesu nakalusia, namusunjila mbu Simoni, liliho likhuwa elia enzenya okhukhusunjila. Naye ari, Khaboole, omwechesia. 41Ari, Omuhosii undi wamapeesa yali nende abeekobibe babili; mulala yali niyahola tsitinari ebikhumi biraano, oundi amakhumi karaano. 42Ne olwa bali nibabula nende eshia barunga, yabaleshela bombi. Oulashila okhumuheela khubo ali heena? 43Simoni nakalusia ari Isie ndakhapaara mbu omwenoyo owa yaleshela ebinji. Namusunjila ari Opaarile habwene. 44Mana nashiukhana ewa omukhasi tsana yali, namusuniila Simoni ari Olola omukhasi uno? Enzinjiile munzuwo, nawe norambeelesia amatsi khulwa ebiienje bianje ta; ne ye anyisiye ebilenje bianje namasikake, nabieya neliswilie. 45Shiunzunzuunilekhwo ta; ne ye, okhurula olwa enzinjiile muno, shialeshile okhutsunzuuna ebilenje bianje ta. 46Omurwe kwanje shiotsushiiliilekhwo amafura ta; ne ye atsushiiliile ebilenje bianje amafura. 47Niko akachila nikhusunjila mbu ebionoonobie, ebili ebinji, abilesheelwe; okhuba ali nobuheeli obunji; ne ouleshelwa ebituutu, abeetsanga nobuheeli obutuutu. 48Namusunjila omukhasi oyo ari Wakhamala okhuleshelwa ebionoonobio. 49Ne aba yeekhala ninabo habiliibwa bachaaka okhusunga mumioyo chiabwe, bari Niwina uno, kata ouleshelanga ebionoono? 50Namusunjila omukhasi oyo ari Obusuubilibwo bukhuhoniye; otsie nomulembe.
Currently Selected:
Luka 7: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
