Matsayo 21

Yesu yeenjila mu Yerusalemu nomwikhoyo

(Mk. 11.1-11; Lk. 19.28-40; Yoh. 12.12-19)

1Olwa bali niboolile ahambi nende Yerusalemu, niboola eBetsefage, hashikulu shiEmitseituni mana Yesu yaruma abeechi babili 2nababoolela mbu Mutsie mwitaala elihengaane nineenywe; habwenaho mulanyoola isishili niyiboyilwe nende eshimoosi halala ninayo; mubiboholole, mubindeerele. 3Ne omundu naba namusunjila likhuwa liosi, kho muboole mbu Omwami abienya; ne alabikooba bwangu. 4Ne kano keekholile mbu mana amakhuwa koosibwe akaboolwa nende omunabii, mbu

5Muboolele omukhaana waSayuni, muri Lola, Omuruchiwo yeetsanga ewa oli,

omuholo, naniinile khusishili,

khandi khushimoosi, omwana weisishili.

6Abeechi nibatsia, nibakhola shinga Yesu olwa yali nababiilile, 7nibaleera isishili nende eshimoosi, nibabirakhwo ebiifwalo biabwe; naye naniinakhwo. 8Abashila obunji mumukanda nibaala tsingubo tsiabwe khunjila, abandi nibaremula tsisaka tsiemisaala nibatsiala khunjila. 9Nemikanda echiamwimilila, nende echiamulonda, balanjisia, bari Hosana khumwana waDaudi; owitsa muliira liOmwami yeetsoomibwe; Hosana ikulu mwikulu.

10Nolwa yali niyeenjiile muYerusalemu, litookho liosi niliiyakukha, liri Uno niye wina? 11Abemikanda nibakalusia mbu Uno niye omunabii, mbu Yesu, ourulile eNazareti muGalilaya.

Yesu yeenjila muhekalu

(Mk. 11.15-19; Lk. 19.45-48; Yoh. 2.13-22)

12Mana Yesu niyeenjila muhekalu yaNyasaye, nabarusia bosi abakusinjia nende okhukula ebindu muhekalu, nafumamia tsimeesa tsiabafunji bamapeesa, nende ebifumbi biabakusii bamahuusi; 13nababoolela ari Kahandiikwa, mbu Inzu yanje yakhalangwe mbu inzu eyokhusaayilamwo; ne inywe muchikholanga imbinga yabanuuli.

14Mana ababofu nabalema nibamwitsila muhekalu; naye nabahonia. 15Ne olwa abakhulundu babakuhani nende abahandiichi balola ebiamakana ebia yakholanga, nende abayia abali nibalanjisinjia muhekalu, bari Hosana khuMwana waDaudi, nibasinyikha, 16nibamusunjila bari Shiohulilanga aka bano baboola? Yesu nabakalusia ari Ee, embulilanga; ne murashiasooma mbu Okhurula muminwa chiabaana abatoro nende abashinuuna wayeekasiliye omwene obwitsoomii, ta? 17Mana nabalekha, narula mwitookho, natsia eBetsania, nakonayo.

Yesu yalaka omukhuyu eshilaka munwa

(Mk. 11.12-14,20-26)

18Nibushia mukamba olwa yali nakalukhanga mwitookho, inzala niyimuluma. 19Nalola omukhuyu khundulo weinjila, natsia ewa kwali, naranyoolakhwo eshindu ta, habula amasaafu konyene; nakuboolela ari Ebiamo bileshe okhunyoolekhakhwo khwiwe okhurula olwa leelo kata inziayo ta. Habwene nahabwene omukhuyu nikuniala. 20Ne olwa abeechi balola, bachenya, bari Omukhuyu okwo kubeele kurie kho nikuniala bwangu kuri nanwa? 21Yesu nakalusia, nabasunjila ari Emuboolela toto mbu nimuba nimuli nobusuubili, nimurakana kania ta, shimulakhola akakholilwe khumukhuyu konyene ta, ne kata nimuboolela eshikulu shino, mbu Wichinje, wisukune munyanza, kaleekhola Ieario. 22Ne biosi ebia mulasaba nimulaama, nimusuubiile, mulabinyoola.

Yesu yareebwa khukobunyali obwa yaheebwa

(Mk. 11.27-33; Lk. 20.1-8)

23Ne olwa yali niyeenjiile muhekalu, abakhuIundu babakuhani nende abakofu babandu nibeetsa olwa yali niyeechesinjia, nibareeba bari Nobunyali shiina obuchilanga nokhola amakhuwa kano? Khandi niwina owakhuheelesia obunyali buno? 24Yesu nabakalusia, naboola ari Nasi emureeba inywe likhuwa elala, ne nimuba nimumboolela lienelo, kho nasi nemuboolele mbu nobunyali shiina obuchilanga nikhola amakhuwa kano; 25mbu obubatisii bwaYohana, bwarula heena? Mwikulu, nohomba mubandu? Nabo nibaboolelana abeene nabeene, bari Nikhuba nikhusunga mbu Bwarula mwikulu, alakhureeba mbu Kho mbushiina nimuramusuubilila ta? 26Ne nikhuba nikhusunga mbu Bwarula mubandu, khuriile emikanda; shichila bosi balolanga mbu Yohana nomunabii. 27Nibakalusia Yesu, nibaboola bari Shikhumanyile ta. Naye yesi nabasunjila mbu Kata siesi shimuboolela mbu nobunyali shiina obuchilanga nikhola amakhuwa kano tawe.

Oluchelo lwabasiani babili

28Ne muluutsi murie? Omusaatsa undi yali nende abaana babili. Yatsia khuwambeli, namubiila ari Mwana wanje, leelo tsia okhole mumukunda kwemitsabibu. 29Naye nakalusia nakhaya, ari Shinzia ta; ne olunyumakhwo niyeekalukhasia, natsia. 30Mana natsia khuwakhabili, namubiila yesi ario. Naye nakalusia, naboola ari Endiho, omwami; ne naratsia ta. 31Kho khubo babili, niwina owakhola aka samwana yeenya? Nibakalusia, bari Mbula, owambeli. Yesu nabasunjila ari Emuboolela toto mbu abasololi bobushuru nende abatamba beenjilanga mubwami bwa Nyasaye imbeli weenywe. 32Shichila Yohana yamwitsila munjila yobulunjishi, ne shimwamusuubilila ta; ne abasololi bobushuru nende abatamba bamusuubilila; neenyu, olwa mwalola murio, kata shimwamala mweekalukhasie olunyumakhwo nende okhumusuubilila tawe.

Oluchelo lwabalimili bemitsabibu

(Mk. 12.1-12; Lk. 20.9-19)

33Hulile oluchelolundi; mbu Yaliho omundu omwenengo owaraaka omukunda kwemitsabibu, nakubotokhasiakhwo olukaka, nayabamwo ingulu yeidivai, niyoombakha omunaara, nakuhosia abalimili, natsia mushialo shindi. 34Ne olwa induukho yebiamo yali ahambi, yaruma abasumbabe khubalimili abo okhunyoola ebiamobie. 35Abalimili abo nibatiila abasuumbabe, nibanywekha mulala khubo, oundi nibamwira, oundi nibalasa namachina. 36Khandi naruma abasumba bandi, abashila abambeli, nibabakholela bario khandi. 37Ne olunyumakhwo yabarumila omwanawe, naboola mbu Balamuria omwana wanje. 38Nebutswa abalimili abo olwa balola omwanawe, basungana abeene bari Uno niye owobulaame; chende khumwire, khubukule obulaamebwe. 39Nibamutiila, nibamuyinia mumukunda kwemitsabibu, nibamwira. 40Kho mana, olwa omwami omwene mukunda yakheetse, yakhabakholele shiina abalimili abo? 41Nibamukalusia bari Mbula, yakhabamalilana obubii abandu ababii abo, nahosia abalimili bandi omukunda okwo, abalamukalusilinjia ebiamo munduukho tsiabio. 42Yesu nabasunjila ari Shimwasoomakhwo mumahandiiko, mbu

Lichina elia aboombashi baloba,

lienelo liakholwa elikhulundu eliomukoona;

lino liarula ewOmwami,

niliba eliamakana mumoni tsieefwe?

43Niko akachila nimuboolela mbu Obwami bwaNyasaye bulamubukulwakhwo nibuheebwa lihanga eliamanga ebiamo biabwo. 44Ne oukwa khwichina lino alarabukha ebitonye ebitonye; ne omundu yesi owa lilakwakhwo, lilamutubulila elala.

45Ne olwa abakhulundu babakuhani nende abaFarisayo bahulila tsinjelotsie, balola shinga olwa yali nasunganga khubo. 46Ne olwa bakhaabanga okhumuhamba, bariitsanga emikanda, shichila balolanga mbu nomunabii.

Currently Selected:

Matsayo 21: OUV

Highlight

Compare

Copy