Matsayo 26

Abeemilisi babandu basanjila Yesu

(Mk. 14.1-2; Yoh. 11.45-53)

1Haho olwa Yesu yali namalile okhuboola amakhuwa ako kosi, yasunjila abeechibe ari 2Mumanyile mbu olunyuma lwetsindaalo tsibili Pasaka yakhabeho, ne Omwana wOmundu yeetsa okhuhaanwa mbu abambwe. 3Mana abakhulundu babakuhani nende abakofu babandu nibakhung'aanila halala halwanyi wOmukuhani Omukhulundu, owalangwa mbu Kayafa, 4nibasanjila halala okhukasia shinga olwa bamuhamba Yesu mubuchesichesi nibamwira. 5Ne basunga bari Khuleshe okhukhola mundaalo tsielisabo; indiri yakhabuukha mubandu.

Yesu yabashilwa amafura eBetsania

(Mk. 14.3-9; Yoh. 12.1-8)

6Ne olwa Yesu yali nali eBetsania, munzu yaSimoni owobuchele, 7omukhasi undi namwitsila nali nende ichupa yamafura kobukusi obutinyu muno, nakatsukha khumurwekwe olwa yali niyeekhaale naliitsanga. 8Ne olwa abeechi balola bario, basinyikha, bari Kasasiibwe butswa kario mbushi? 9Shichila amafura kano kakhakusiibwe obukusi obunji, nabwo nibukabilwa abamanani. 10Ne Yesu yalola ario, nabareeba mbu Mumunyasinjia omukhasi oyo mbushi? Okhuba yakholeele omulimo omulayi. 11Okhuba abamanani mubeetsanga ninabo tsindaalo tsiosi; ne isie shimuli ninasi tsindaalo tsiosi ta. 12Shichila olwa atsushiiliile omubili kwanje amafura kano, akholile okhungasilia okhuyabilwa khwanje. 13Emusunjila toto, mbu buli hosi aha Amakhuwa Amalayi kano kaleelwatsungwa mushialo shiosi, akeenako aka omukhasi uno akholile nako kalarumbulungwa, kabe eshiitsuliloshie.

Yuda yafuchilila okhukhoba Yesu

(Mk. 14.10-11; Lk. 22.3-6)

14Mana mulala khwIkhumi-nababili abo, owalangwa mbu Yuda Isikariote, yatsia ewabakhulundu babakuhani, 15nareeba ari Nishiina eshia mwakhanyala okhumba, mana ndalamuhaana mumakhono keenywe? Nabo nibamuchelela tsifeetsa amakhumi kataru. 16Nokhurula habwenaho yakhaaba obwiyangu okhumuhaana mumakhono kwabwe.

Yesu yalia Ipasaka halala nabeechibe

(Mk. 14.12-21; Lk. 22.7-14,21-23; Yoh. 13.21-30)

17Haho khunyanga yambeli yemikaate echibulamwo amamela, abeechi abo nibamutsiila Yesu, nibamureeba bari Hali heena aha wenya khukhukasilie aha noliile Pasaka? 18Naye naboola mbu Mutsie mwitookho, ewomundu wane, nimumusunjila muri Omwechesia aboola mbu lnduukho yanje yili okhuula; nasi enzitsa okhukholela Pasaka munzuyo halala nende abeechi banje. 19Abeechi abo nibakhola shinga Yesu olwa yali nababiilile; nibakasia Pasaka.

20Nolwa bwoola mungoloobe, yali niyeekhaale naliitsanga halala nende abeechi abo ekhumi-nababili; 21nolwa bali nibaliitsanga yaboola mbu Emuboolela toto mbu mulala khwinywe yeetsa okhukhoba. 22Nibabeelela muno, nibachaaka okhumureeba buli mulala, bari Omwami, nisie noho? 23Nakalusia, nasunga ari Outonjile omukhonokwe ninasi halala mulukaye, omwenoyo yeetsa okhukhoba. 24Omwana wOmundu yeenyokha shinga olwa kamuhandiichilwa; ne wowe khumundu oyo oumukhoba Omwana wOmundu Omundu oyo alabula okhwibulwa ta, khane bwakhabeele obulayi khuye. 25Naye Yuda, owamukhoba, yakalusia nareeba mbu Nisie, Rabi? Naye namusunjila ari Nolwa oboolile.

Okhusimikha khweLisabo liOmwami

(Mk. 14.22-26; Lk. 22.15-20; 1 Kor. 11.23-26)

26Nolwa bali nibaliitsanga Yesu yabukula omukaate nakusabila ikhabi, nakusonyola, nabaheelesia abeechi abo, nasunga ari Bukule, mulie; kuno nomubili kwanje. 27Nabukula eshikombe, nakhupa mbu Orio, nabaheelesia, nasunga ari Nywekhwo mwesi; 28okhuba kano namabanga kanje akeIndakano, akeebeenela abandu abanji khulwa okhuleshelwa khwebionoono. 29Ne emuboolela mbu okhurula olwa leelo shindalanywakhwo khubiamo bino biemitsabibu ta, okhuula khunyanga yilia olwa ndalanywakhwo obuyia nineenywe halala mubwami bwaPapa.

Yesu yaboola khale aka Petero okhumwambakhana

(Mk. 14.27-31; Lk. 22.31-34; Yoh. 13.36-38)

30Nolwa bali nibamalile okhwimba olwimbo, barula nibatsia ebunashikulu shiEmitseituni. 31Mana Yesu nababoolela, ari Inywe mwesi namwisichirasibwe khulwanje eshilo shino; shichila kahandiikwa mbu Ndalamukhupa omwayi, nako amakondi akomwitulilie kalasalaana. 32Ne olwa ndakhabe nimalile okhulamusibwa, ndakhamuranjilile okhutsia eGalilaya. 33Naye Petero yakalusia namusunjila ari Bosi nibaba nibeesichirasibwa khwiwe, nasi shindaleesichirasibwa ta. 34Yesu namusunjila ari Ekhuboolela toto, mbu eshilo shino, itaywa niyirashialakula ta, olandiyambakhana khataru. 35Petero namuboolela ari Kata nimba nikhoyile okhufwa ninawe, nasi shinekhwiyambakhanekhwo ta. Khandi nilwo olwa abeechi bosi baboola.

Yesu yasabila eGetsesemane

(Mk. 14.32-42; Lk. 22.39-46)

36Mana Yesu niyoola ninabo halala habundu ahalangwa mbu Getsesemane, nasunjila abeechibe ari Mwikhale hano, nishitsia halia okhusaaya. 37Natsia nende Petero nende abaana abo babili baZebedayo, nachaaka okhuba neshibeela mumwoyo, nasitohelwa okhushila. 38Mana nabasunjila ari Omwoyo kwanje kuli neshibeela eshinji; shienya okhunzira; mulinde hano, nimuba meeso halala ninasi. 39Natsiakhwo imbeli hatiiti, niyeekhupa hasi mafumama nasaaya, naboola mbu E Papa, nikaba nikanyalikha, eshikombe shino shimbirekhwo; nebutswa karaba aka enzenya isie ta, habula aka iwe wenya.

40Nabeetsela abeechi abo, nabanyoola nibali mundoolo, nasunjila Petero ari Mbula, shimwakhanyalile okhuba meeso ninasi isaa ndala ta? 41Mube meeso, nimusaaya mbu muleshe okhwinjila mukhuteemwa; omwoyo nomwangu okhwiyama, ne omubili nomutofu.

42Khandi natsia olwakhabili, nasaaya, naboola ari E Papa, shino nishiba nishiranyala okhubira, nimba nindashinywa ta, kho aka wenya keekhole. 43Niyeetsa khandi nabanyoola nibali mundoolo, shichila tsimoni tsiabwe tsiali nitsisitoohe. 44Khandi nabalekha ario, natsia, nasaaya olwakhataru, naboola khandi amakhuwa amalala akeenako.

45Mana niyeetsela abeechi abo, nabasunjila mbu Kho mushikona bukona nimuhuluukha, noho? Iole, eshise bulaano shili okhuula, naye Omwana wOmundu akhobilwe mumakhono kaboonooni. 46Buushe, khutsie; lole, ali ahambi ou'khoba.

Yesu yakhobwa, nahambwa

(Mk. 14.43-50; Lk. 22.47-53; Yoh. 18.2-11)

47Ne olwa yali nashisunga, lola, Yuda niyeetsa, mulala khwIkhumi-nababili abo, nali nende omukanda omukhongo kwabetsinganga nende tsindabushi, abarula khubakhulundu babakuhani nende abakofu babandu. 48Ne omwenoyo owamukhoba yabamanyia eshilolelo, nasunga mbu Owa nenzunzuune, neniye; mumuhambe. 49Habwenaho niyeetsa ewa Yesu yali, nasunga mbu Mulembe, Rabi; namutsunzuuna muno. 50Yesu nasunga mbu Owashianje, khola elia witsile okhukhola. Mana nibeetsa, nibamukwakhwo Yesu, nihamutiila.

51Ne lola, oundi khubali nende Yesu yayila omukhono natsomola olukangalwe nakhupa omusumba womukuhani omukhulundu namurema eshirwi. 52Mana Yesu namusunjila ari Kalusia olukangalwo aha lubeetsanga; shichila bosi abachinga olukanga balifwa khulwa olukanga. 53Kata okaala mbu shinyala okhusaaya Papa, naye kata bulaano buno alarumila abamalaika abashila amahe ekhumi nakabili? 54Nebutswa amahandiiko kakhoosibwa karie, mbu nolwa kakhoyile okhwikhola? 55Habwenaho Yesu yasunjila abemikanda ari Murulile nende tsinganga netsindabushi okhundiila, shinga abeetsela omunuuli? Ndeekhalanga nineenywe halala muhekalu khatsotselo, ninzechesinjia, nimurambamba ta. 56Ne kano kosi keekhola mbu mana amahandiiko kabanabii koosibwe. Mana abeechi bosi nibamulekha nibeelukha.

Okhuyaasibwa khwa Yesu

(Mk. 14.66-72; Lk. 22.54-55,63-71; Yoh. 18.12-14,19-24)

57Nabo abali nibamutiilile Yesu nibamuyila ewaKayafa Omukuhani Omukhulundu, ewa abahandiichi nende abakofu bali nibakhung'aaniile halala. 58Ne Petero yali ehalekhwo namulondangakhwo, okhuula mulwanyi IwOmukuhani Omukhulundu, niyeenjilamwo, niyeekhala halala nende abakhalabani, mbu alole akeshihesi.

59Abakhulundu babakuhani nende abeshiina bosi nibakhaaba oburumbusi bwobubeeyi khuYesu mbu bamwire; 60ne shibabunyoola ta, kata abarumbusi bobubeeyi abanji olwa beetsa. Ne olunyumakhwo babili nibeetsa, 61nibaboola bari Omundu uno yasunga mbu Enyala okhulikulula ihekalu yaNyasaye ninjiumbashila khundaalo tsitaru. 62Mana Omukuhani Omukhulundu nasinjila namureeba ari Shiokalusia likhuwa ta? Namakhuwa shiina aka bano barumbulanga khwiwe? 63Naye Yesu naholeela butswa. Omukuhani Omukhulundu namusunjila mbu Ekhutsubia, muliira liaNyasaye oubeetsangaho mwoyo, okhuboolele noba noli iwe Kristo watsana, Omwana waNyasaye. 64Yesu namukalusia ari Nolwa oboolile iwe; nebutswa emusunjila, mbu olunyuma mulalola Omwana wOmundu niyeekhaale khumukhono musaatsa kwObunyali obwo, niyeetsanga khumaleesi akomwikulu. 65Mana Omukuhani Omukhulundu narandula ebiifwalobie, naboola mbu Aboolile akobwichelasi nende Nyasaye; khushikhaaba abaloli bandi mbushi? Lole, bulaano muhuliile obwichelasi bwene; 66muluutsi murie? Nibakalusia, nibaboola mbu Akwanile okhufwa.

67Mana nibachaaka okhumunyilikhakhwo amare mumoni, nibamuupa ebifuusi, abandi nibamupaama tsikhofi, 68nibasunga bari Okhulakulile, iwe Kristo; oukhuupile niwina?

Petero yamwambakhana Yesu

(Mk. 14.66-72; Lk. 22.56-62; Yoh. 18.15-18,25-27)

69Naye Petero yali niyeekhaale elwanyi, mulwanyi; omukhaana undi natsia ewa yali, nasunga mbu Wesi wabeele nende Yesu omuGalilaya oyo. 70Naye niyeeyambakhana imbeli wabo bosi, ari Shimanyile aka osunganga ta. 71Ne olwa yali narulile natsiile hashilibwa, omukhaana undi namulola, nabasunjila abali nibaliho, ari Omusaatsa uno yesi yabeele halala nende Yesu omuNazareti. 72Naye niyeeyambakhana khandi, nende eshiitsubo, ari Shimumanyile omundu oyo ta. 73Nolunyumakhwo abo abali nibasinjiileho nibeetsa nibasunjila Petero bari Toto mwene, wesi shiochweya okhuba mulala khubo ta; shichila okhuboolakhwo khukhubuulanga. 74Mana nachaaka okhwifuuha niyeetsuba, ari Shimumanyile omundu oyo ta. Habwenaho itaywa niyilakula. 75Mana Petero niyeetsulila likhuwa elia Yesu yali namusunjiile, mbu Itaywa niyirashialakula ta, naundiyambakhane okhuula khataru. Narula nalila bululu.

Currently Selected:

Matsayo 26: OUV

Highlight

Compare

Copy