Matsayo 5
5
Okhwilwatsa khwa Yesu khushikulu
1Nolwa yalola emikanda, yaniina khushikulu; nolwa yali niyeekhaale, abeechibe nibeetsa ewa yali; 2naye nachinga omunwa nabeechesia, naboola ari
3Nabeikhabi abamanani mumwoyo, shichila obwami obwomwikulu nobwabwe.
4Nabeikhabi abali neshibeela; shichila balalemibwa emioyo.
5Nabeikhabi abaholo; shichila balalaamilwa eshialo.
6Nabeikhabi abali neinzala nibaliibwa obuloho bwobuluniishi; shichila baleekusibwa.
7Nabeikhabi abetsimbabasi; shichila balabeelwa tsimbabasi.
8Nabeikhabi abemioyo emieleleshe; shichila balalola Nyasaye.
Akabeikhabi
(Lk. 6.20-23)
9Nabeikhabi abaleeranga omulembe; shichila balalangungwa mbu abaana baNyasaye.
10Nabeikhabi abasandilibwa obulunjishi; shichila obwami obwomwikulu nobwabwe.
11Muli abeikhabi inywe olwa bamunyeka, nibamusandia, nibamuchiikha amakhuwa amabii amanji, khulwanje. 12Mwikhoye, nimusangaala muno; shichila omukabo kwenywe nomunji mwikulu; okhuba niIwo olwa basandia abalakusi abamuranjilila.
Omuunyu nende obulafu
(Mk. 9.50; Lk. 14.34-35)
13Ninywe omuunyu kweshialo; ne omuunyu nikuba nikutsinziibe, kulalungwa nende shiina? Shikukaasila eshindu khandi ta, habula okhusukunwa elwanyi nikuseenwa namakulu kabandu.
14Ninywe obulafu bweshialo. Litaala elili khushikulu sl ilinyala okhubisikha ta. 15Kata abandu shibahambinjia itaha nibachifuunikha hasi mushimwelo ta, habula bachira khushichibi shiayo; niyibakhosilia bosi abali munzu. 16Kho obulafu bweenywe nabwo bwashenje burio imbeli wabandu, mbu balole ebikhole bieenywe ebilayi nibamuheelesia Seenywe ouli mwikulu oluyali.
Aka Yesu yeechesia khukAmalako
17Murakaala mbu ndeetsa okhutibial amalako kata abanabii tawe; shindayeetsa okhutibia tawe, habula okhuusia. 18Okhuba emuboolela toto mbu okhuula olwa likulu nende eshibala biliba nibihweele, kata inyukuta ndala kata akharoonyelesi khalala shikhalihwaho mumalako ta, okhuula olwa kosi kaliba nikoosibwa. 19Khulwako, omundu yesi outendeyia lilako kata elala elishila obutuutu mukano, niyeechesia abandu ario, omwenoyo alilangwa mbu omutuutu muno mubwami obwomwikulu; nebutswa omundu yesi oukakhola niyeechesia ario, omwenoyo alilangwa mbu omukhongo mubwami obwomwikulu. 20Shichila emusunjila mbu obulunjishi bweenywe nibuba niburashila obwabahandiichi nende abaFarisayo ta, shimuliinjila mubwami obwomwikulu nahatuutu tawe.
Aka Yesu yeechesia khukoburima
(Lk. 12.57-59)
21Mwahuliile shinga olwa kasunjilwa abakhale, mbu Oreera ta; khandi mbu omundu yesi owira akwanile okhuyaasibwa; 22nasi emusunjila mbu buli mundu yesi outiililwa owashie oburima akwanile okhuyaasibwa; khandi mbu omundu yesi ousunjila owashie mbu Oli omusilu, akwanile eshiina, ne omundu yesi ousunjila owashie mbu Oli eshiyingwa, akwanile Gehena yomulilo.
23Khulwako, noba noleera eshihaanwashio khushimalilo shuemisango, mana niwitsulilayo mbu owashio ali nende likhuwa khwiwe, 24lekhaho eshihaanwashio imbeli weshimalilo shiemisango, otsie butsia, osaasanibwe nende owashio mbeli, kho mana witse oleere eshihaanwashio.
25Fuchilisania bwangu nende oukhwinjilila itookho, nimushili ninaye khunjila; oukhwinjilila aleshe okhukhuhaana mumukhono kwomuyaasii, omuyaasii naye nakhuhaana mumukhono kwomusikari, nawe nosukunwa mumbohe. 26Ekhuboolela toto mbu shiolirulakhwomwo khandi ta, okhuula olwa oba nomalile okhurunga isende yene eyihelesia.
Aka Yesu yeechesia khukobuheyi
27Mwahuliile shinga olwa kasungwa mbu Oraheya ta; 28nasi emusunjila mbu buli mundu yesi ouhenjelesia omukhasi khulwa okhumwikomba, abeetsanga namalile okhuheya ninaye mumwoyokwe.
29Kata imoniyo isaatsa niyiba niyikhwisichirasinjia, ochitsomole, ochisukune ehale; shichila shiakhakhukaasila mbu eshiungoshio shiala shitibe, omubilikwo kwosi nikurasukunwa muGehena ta. 30Ne omukhonokwo musaatsa nikuba nikukhwisichirasinjia, okureme okusukune ehale; shichila shiakhakhukaasila mbu eshiungoshio shilala shitibe, omubilikwo kwosi nikuratsia mu Gehena ta.
Aka Yesu yeechesia khukokhulekhana khwomusaatsa nomukhasiwe
(Mat. 19.9; Mk. 10.11; Lk. 16.18)
31Khandi kasungwa mbu Omundu yesi owilisia omukhasiwe, amuheelesie lihandiiko liobukabukhani, 32nasi emusunjila mbu omundu yesi owilusia omukhasiwe, habula khulwa obuheyi, amukhola ario okhuba omuheyi; ne omundu yesi oumuteeshia olwa aba niyeelusiibwe ario, yesi aheya.
Aka Yesu yeechesia kukebiitsubo
33Khandi, mwahuliile shinga olwa kasunjilwa abakhale mbu Oreetsuba akobubeeyi ta, ne mbu wusilie Omwami akebiitsubobio; 34nasi emusunjila mbu mureetsubakhwo ta, kata khwikulu, shichila nilio eshifumbi shiaNyasaye; 35kata khushibala, shichila nishio eshia alambisinjiakhwo ebilenje; kata khuYerusalemu, shichila nilio litookho liOmuruchi omukhongo. 36Kata oreetsuba khumurwekwo ta, shichila shionyala okhukalula olwoya kata lulala lube olulafu kata olumali ta. 37Nebutswa amasungo keenwye kabeetsenje mbu Ee, Ee; khandi mbu Tawe, tawe; ne liosi elishila ako neliobumayaanu.
Aka Yesu yeechesia khukeshikwoli
(Lk. 6.29-30)
38Mwahuliile shinga olwa kasungwa mbu Imoni khumoni, khandi eliino khuliino; 39nasi emusunjila mbu oramuyinganinjia omundu omumayaanu ta; ne omundu yesi oukhupaama oluseya olwokhumukhono musaatsa, omushiukhasilie olundi nalwo. 40Kata omundu naba nakhwinjilila itookho nabukula inguboyo eyomukari, lekha ayile nelikotilio. 41Kata omundu yesi oukhuluunyia okhutsia imailo ndala, otsie ninaye khuyakhabili. 42Omuheelesie eshindu oyo oukhusaba; noramushiukhasilia ikhoono oyo owenya okhuhola khwiwe, eshindu ta.
Aka Yesu yeechesia khukokhuheelaabasuku
(Lk. 6.27-28,32-36)
43Mwahuliile shinga olwa kasungwa mbu Heelanga owashio, nomukiya ouli omusuku; 44nasi emusunjila mbu Heelenje abasuku beenywe, nimubasaayila abamusakania; 45mbu mana mube abaana baSeenywe ouli mwikulu; shichila abafwindilinjia eliubalie ababii nende abalayi, nabakwisilia ifula abalunjishi nende abarali abalunjishi ta. 46Okhuba nimuba nimubaheela abamuheelanga inywe, muli nomukabo shi? Kata abasololi bobushuru shibakholanga bario? 47Khandi nimuba nimushiesinjia abeebule bonyene, mubashila abandi nende shi? Kata abamahanga shibakholanga bario? 48Kho mana mukhoyile okhuba abalamba, shinga Seenywe ouli mwikulu olwa ali omulamba.
Currently Selected:
Matsayo 5: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
