Mika 5
5
1Iwe omukhaana wetsing'anda,
oleekhung'aasia mung'anda;
khwikaliilwe;
bamukhupa omuyaasii waIsiraeli nolusaala, khuluseya.
Omuhonia alaruchila eBetelehemu
2Nebutswa iwe, Betelehemu Efuratsa,
ouli omutuutu mubilibwa biaYuda,
mwiwe omundu alindulilamwo ouliba omuruchi muIsiraeli;
owa eshinokoshie shirula khale muno,
okhurula khumusuule.
3Khulwako yeetsa okhubeebala okhuula khushise shia oyo oulumwa okhwibula alaba niyeebuule;
mana omusikalo kwabaana babwe kulakalushila abaana baIsiraeli.
4Alasinjila niyaaya ebiayobie mumaani kOMWAMI,
mubukhulundu bweliira liOMWAMI Nyasayewe;
balamenya shisale, okhuba bulaano alaba omukhongo okhuula khundulo tsieshialo.
5Ne kano kalaba omulembe olwa abaAshuru baleenjila mushialo shieefwe nibaseena khwiloba lieefwe,
mbu khulabuusia abaayi musaafu okhubaymga,
nabandu abakhulundu munaane.
6Nabo balaruka eshialo shiaAshuru nolukanga,
neshialo shiaNimirodi nolukanga olutsomoolwe;
balakhuhonia khubaAshuru olwa baleenjila mushialo shieefwe nibaseena hakari wetsinzakho tsieefwe.
7Omusikalo kwaYakobo kulabakhwo mumbia tsiabandu tsinyinji shinga eliime elirula khuMWAMI,
shinga ifula eyikwa khubunyasi;
ebirashindanga khulwa abandu kata okhulindiilila abaana babandu ta.
8Omusikalo kwaYakobo tsana kulabamwo mumahanga mubetsimbia tsinyinji,
shinga italanyi mutsisolo tsiomubulimo,
shinga italanyi imbuukha mubiayo biamakondi;
eyibira mubio, niyiseena buseena,
niyirandula ebitonye ebitonye, nabulaho omuhabini.
9Omukhonokwo kulachinguukha ikulu wabafukulibo,
nabo abasukubo balaakamibwa.
10OMWAMI aboola mbu Ne khunduukho eyo ndalaakamia tsifarasitsio hakariwo,
nisasia amakaariko;
11ndalaakamia amataala kosi akomushialoshio,
ningwisia tsingobatsio tsiosi;
12ndalaakamia akobufila kosi akali mumukhonokwo,
kata shiolabakhwo nabafumu khandi ta.
13Ndalaakamia ebifwananibio ebibaatse netsisiilotsio tsisongookhu etsili hakariwo;
kata shioleenamila emilimo chiamakhonoko khandi ta.
14Ndalasiula emiAsherachio hakariwo,
nimulula amataalako.
15Muburima bwanje nobululu bwanje ndalamala eshikwoli khumahanga akarahulilanga ta.
Currently Selected:
Mika 5: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975