Mariko 1

Obwilwatsi bwaYohana Omubatisii

(Mat. 3.1-12; Lk. 3.1-9,15-17; Yoh. 1.19-28)

1Obuchaachilo bwelnjiili yamakhuwa kaYesu Kristo omwana waNyasaye 2bwali shinga olwa kahandiikwa mushitabu shiomunabii Isaya,

mbu Lola, erumanga omurume wanje imbeliwo;

naye alakasia injilayo;

3omwoyo kwoyo oulanjisia mushitsiimi,

mbu Mukasie injila yOmwami,

mukololosie emihandachie.

4Nabwo nibwo Yohana Omubatisii niyeelwatsanga mushitsiimi akobubatisibwi bwokhwikalukhasia khulwa obuleshelwi bwebionoono. 5Abomushibala shiosi shiebuYahudi nabeYerusalemu bosi nibarula nibamwitsila, naye nababatisia mumwalo kwaYorodani, nibeeyama ebionoono biabwe. 6Yohana yali nachendelanga ingubo yobwoya bweingamia, nali nende olukhoba mushishienje, naliitsanga tsisiche nende obuushi obwomushitsiimi. 7Niyeelwatsanga, ari Oushila isie amaani yeetsanga munyuma wanje; shingwanile okhwinama okhuboholola olukhoba Iwebilaarobie ta. 8Isie emubatisiye nende amatsi, ne omwenoyo alamubatisia nende Roho Omutakatifu.

Obubatisibwi bwaYesu

(Mat. 3.13-17; Lk. 3.21-22)

9Mundaalo etsio Yesu yeetsa narula eNazareti muGalilaya, nabatisibwa muYorodani nende Yohana. 10Olwa yali natikulukhanga okhurula mumatsi, habwenaho yalola likulu niliatikha, naye Roho shinga lihuusi niyeekha namuyeelakhwo. 11Omwoyo nikurula mwikulu nikuboola kuri Niwe Omwana wanje omuheelwa. Mwiwe nimwo omwa enjamisilibungwa muno.

Okhuteemwa khwaYesu

(Mat. 4.1-11; Lk. 4.1-13)

12Habwenaho Roho yamuluunyia namuyila mushitsiimi; 13nabayo mushitsiimi tsindaalo amakhumi kane nateemungwa nende Setani, naba halala nende tsisolo tsinabulimo, abamalaika nibamukhalabanila.

Obukhalabani bwaYesu bwachaachila eGalilaya

(Mat. 4.12-17; Lk. 4.14-15)

14Olunyuma Iwokhutiilwa khwaYohana, Yesu yatsia eGalilaya niyeelwatsanga Amakhuwa Amalayi kaNyasaye, 15nasunga ari Induukho yulile, Obwami bwaNyasaye busitile ahambi. Mwikalukhasie nimusuubilila Iniili.

Yesu yalanga abanaabi bane

(Mat. 4.18-22; Lk. 5.1-11)

16Kho olwa yali nabiranga khulukuku lweInyanza yaGalilaya, yalola Simoni nende Anderea omwana wabwe Simoni nibafuuba olukhanda munyanza, okhuba bali abanaabi. 17Yesu nababiila ari Mwitse, munondekhwo; ndalamukhola abanaabi babandu. 18Habwene nahabwene balekha tsikhanda tsiabwe, nibamulondakhwo. 19Nolwa yali natsiililiilekhwo hatiiti, yalola Yakobo waZebedayo nende Yohana omwana wabwe, bosi nibali muliaro nibakasinjia tsikhanda tsiabwe. 20Habwenaho nabalanga; nabo nibalekha Zebedayo sabwe muliaro nende abakholi, nibarulaho nibalonda munyumawe.

Omundu waroho weshifwabwi

(Lk. 4.31-37)

21Haho niboola eKaperinaumu, mana khunyanga yaSabato niyeenjila musinagogi niyeechesia. 22Abandu nibahumanila okhwechesiakhwe, shichila yabeechesia shinga omwene makhuwa, narabeechesia shinga abahandiichi ta. 23Olwenolwo musinagogi yabwe yalimwo omundu owa roho weshifwabwi yali muye. Naye nayiiba, ari 24Obeele orie nineefwe iwe Yesu omuNazareti? Witsile okhukhutibia noho? Ekhumanyile shinga olwa oli, mbu Omutakatifu waNyasaye. 25Naye Yesu namukaania, ari Holeela tsi! Omurulemwo! 26Roho weshifwabwi oyo namubahasia, nayiiba nomwoyo omukhongo, namurulamwo. 27Bosi nibaliibwa ling'ang'a, nibareebana abeene nabeene, bari Lino nelikhuwa shi? Kata buno nobwechesii shiina obuyia? Okhuba alaka kata abaroho beshifwabwi nobunyali, nabo nibamuhulila! 28Shialwangu ifumaye niyitswana hosi hosi mumbali tsiosi tsieGalilaya etsiarondokhanaho.

Yesu yahonia nyakhufialanyene Petero

(Mat. 8.14-15; Lk. 4.38-39)

29Nibakharula musinagogi niboola enanzu waSimoni nende Anderea, halala nende Yakobo naYohana. 30Ne nyakhufialanyene Simoni yali nakonile nalwala omurengo; kho nibamuboolela Yesu shinga olwa ali. 31Naye natsia ewa yali, namutiila omukhono, namubuusia; omurengo nikumulekha, naye nabakhalabanila.

Yesu yahonia abanji khubwile

(Mat. 8.16-17; Lk. 4.40-41)

32Khubwile, eliuba niliakhayeela, baleera abalwale bosi ewa yali, nabo aba amadimoni kali mubo. 33Abomwitookho omwo bosi bali nibakhung'aaniile hamuliango. 34Naye nahonia abanji abali abateshele abobulwale obwahukhaane, narusia amadimoni amanji; ne shiyafuchiilila amadimoni okhuboolakhwo likhuwa ta, okhuba kamumanya.

Yesu yachaaka oluchendo lwobwilwatsi

(Lk. 4.42-44)

35Kho yahachila mumabwibwi, obukwe nibushili okhusheba, narula natsia aha abandu babula, nasaayayo. 36Naye Simoni nabashie nibamulondakhwo. 37Olwa bamunyoola, bamusunjila bari Bosi bakhwenyanga. 38Naye nakalusia mbu Chende khutsie haundi mumataala akarondokhaane hano, mbu ndilwatse ebweneyo khandi; niko akachila ninzitsa. 39Natsia niyeelwatsa musinagogi tsiabwe tsiosi muGalilaya mwosi, narusia amadimoni.

Yesu yasiiya owobuchele

(Mat. 8.1-4; Lk. 5.12-16)

40Owobuchele undi yamwitsila namusaaya, nasikama imbeliwe, nasunga ari Noba nochama onyala okhu'siiya. 41Yatiilwa eshisa, nanyiila omukhono, namutiilakhwo, naboola mbu Enjamile; osiiyishe. 42Habwene nahabwene obuchele nibumurulakhwo, naye nasiiyikha. 43Ne Yesu yamukaania butinyu, namuseebula bwangu, 44namusunjila mbu Oramuboolelakhwo omundu yesi likhuwa ta. Ne tsia, wilolosie imbeli womukuhani, ne khumakhuwa akokhusiiywakhwo, ohaane shieneshio eshia Musa yalaka, shibe oburumbusi khubo. 45Omundu oyo natsia niyeelwatsa ebulafu, natswania Likhuwa hosi hosi okhuula olwa Yesu aranyala okhwinjila mwitaala liosi habulafu ta, nebutswa yeekhala elwanyi ewa abandu babula. Abandu nibamutsiila okhurula tsimbeka tsiosi.

Currently Selected:

Mariko 1: OUV

Highlight

Compare

Copy