Mariko 10
10
Aka Yesu yeechesia khukokhulekhana khwomusaatsa nomukhasiwe
(Mat. 19.1-12; Lk. 16.18)
1Narulayo, niyoola mungongo tsiebuYahudi nende injelekha weYorodani; abemikanda nibakhung'aana khandi ewa yali; naye nabeechesia khandi, shinga olwa eshiimashie shiali. 2AbaFarisayo bandi nibeetsa ewa yali nibamureeba, bari Nomusilo omundu okhwilusia omukhasiwe noho? Nibamuteema bario. 3Naye nakalusia, nabareeba ari Musa yamulaka arie? 4Nibasunga mbu Musa yakhufuchiilila okhuhandiika ibarwa yobukabukhani nokhumwilusia. 5Ne Yesu nababoolela, ari Khulwa obutinyu bwemioyo chieenywe yamuhandiichila lilako elo. 6Nebutswa okhurula khukhuchaaka khwobulongwi, Nyasaye yabalonga omusaatsa nende omukhasi. 7Ne niko akachila omusaatsa alalekhanga samwana nende nyina, nahambana nomukhasiwe; 8nabo bombi balaba omubili mulala; shibalaba babili khandi ta, habula omubili mulala. 9Kho mana aba Nyasaye yahambasia halala, omundu namundu aleshe okhukabukhasia. 10Ne nibali munzu abeechi abo bamureeba khandi khwikhuwa elo. 11Naye nabasunjila mbu Omundu yesi owilusia omukhasiwe nateeshia oundi, aheya namwonoonela; 12kata omukhasi naba narula khumusaatsawe nateeshela oundi, yesi aheya.
Yesu yasabila abaana abatiiti ikhabi
(Mat. 19.13-15; Lk. 18.15-17)
13Bali nibamuleerela abaana abatiiti mbu abatiilekhwo; abeechibe nibabakondeshela. 14Ne olwa Yesu yalola ario, nasinyikha, nabasunjila ari Leshe abaana abatiiti beetse khumubili wanje; murabakaania ta; okhuba obwami bwaNyasaye nobwabafwana shinga abo. 15Emusunjila toto, mbu Omundu yesi ourafuchiilila obwami bwaNyasaye shinga omwana omutuutu ta, shialeenjilakhwomwo nahatuutu tawe. 16Nabachinga mumakhonoke, nabasabila ikhabi, nabareetsangakhwo amakhono.
Omusooliili omuyinda
(Mat. 19.16-30; Lk. 18.18-30)
17Olwa yali nali khunjila natsiitsanga, omundu undi yamutsiila tsimbilo namusikamila, namureeba ari Omwechesia omulayi, nekhole endie mbu mana enaamilwe obulamu bwobumeli? 18Yesu namukalusia ari Kho unanga mbu omulayi mbushiina? Abulaho ouli omulayi habula mulala, niye Nyasaye. 19Omanyile amalako, mbu Oreera ta, Oraheya ta, Oreeba ta, Orachiikha ta, Orakaatia ta, Heelesia so nende mawo oluyali. 20Naye namusunjila mbu Omwechesia, ako kosi engakholanga okhurula nindi omwana. 21Haho Yesu yamuhenga namuheela, namusunjila ari Oleemile likhuwa elala; mbu tsia okusie ebia oli ninabio biosi, oheelesie abamanani, mana olaba nelibiikho mwikulu; mana witse, unondekhwo. 22Khwikhuwa elo yakhuunia mumoni, niyeenyokha nabeeleele; shichila yali omwene mikunda emikali.
23Mana Yesu nahenga eyi nende eyi, nasunjila abeechibe, ari Nobutinyu muno abali nobuyinda okhwinjila mubwami bwaNyasaye! 24Abeechi nabo nibachenya khulwa amakhuwake. Ne Yesu yakalusia khandi, nabasunjila ari Abaana banje, nobutinyu muno abeesiikanga obuyinda okhwinjila mubwami bwaNyasaye! 25Neshiangu ingamia okhubira munduhu yoluchela, okhushila owobuyinda okhwinjila mubwami bwaNyasaye. 26Nabo nibahuka okhushila, nibamureeba bari Kho niwina owakhanyala okhuhonibwa? 27Yesu nabahenga, nasunga mbu Khubandu shilinyalikha tawe; ne shikali kario khuNyasaye ta; shichila amakhuwa kosi kanyalikhanga khuNyasaye. 28Naye Petero nachaaka okhumusunjila, ari Lola, ifwe khwalekha biosi, nikhukhulondakhwo. 29Yesu nasunga mbu Emuboolela toto, mbu abulaho owalekha inzu, kata abasiani babwe, kata bambootsonyene kata nyina, kata samwana, kata abaana, kata emikunda, khulwanje khandi khulwa Injiili, 30oburanyoola ebindi okhuula eshikhumi, bulaano mundaalo tsino, tsinzu, nende abasiani babwe, nabambootsonyene, nabanyina, nabaana, nemikunda, halala nokhusakanibwa; nomundaalo etsiitsa, obulamu bwobumeli. 31Ne abanji abalinji abambeli baliba abeinyuma; abeinyuma nibaba abambeli.
Yesu yaboola akokhufwakhwe olwakhataru
(Mat. 20.17-19; Lk. 18.31-34)
32Bali nibali khunjila nibatikulukhanga okhutsia eYerusalemu; ne Yesu yali niyeemiile imbeli wabwe; nabo nibachenya; oburii nibubahamba abali nibamulondangakhwo. Ne yabukula abo Ekhumi-nababili khandi, nachaaka okhubaboolela amakhuwa akali nikeetsa okhumwikholakhwo, 33ari Lole, khutikulukha nikhutsia eYerusalemu; ne Omwana wOinundu alahaanwa mumakhono kabakhulundu babakuhani nende abahandiichi; nabo balamukhalachila eshiina eshiokhwirwa, nibamuhaana mumakhono kAbamahanga; 34ne balamunyokhoosia, nibamunyilikhakhwo amare, nibamunywekha tsikhoba, nende okhumwira; nolunyuma lwetsindaalo tsitaru alalamukha khandi.
Yakobo naYohana basaba likhuwa
(Mat. 20.20-28)
35Mana Yakobo nende Yohana, abaana baZebedayo, nibasita ahambi aha yali nibamusunjila bari Omwechesia, khwenya mbu okhukholele shiosi eshia khwitsa okhukhusaba. 36Nabareeba mbu Eshia mwenya emukholele nishiina? 37Nibamusunjila bari Ofuchiilile mbu khwikhale, mulala khumukhonokwo musaatsa, oundi khumukhono mukhasi, muluyalilwo. 38Ne Yesu yabasunjila ari Mukorilwe eshia musaba shinga olwa shili. Munyala okhunywakhwo khushikombe eshia enyweelakhwo isie? Kata okhubatisibwa nende obubatisii obwa embatisibwa ninabwo isie? 39Nibamukalusia, bari Khunyala. Yesu nabasunjila ari Eshikombe eshia enyweeIangakhwo, nineenywe mulanyweelakhwo; khandi obubatisii obwa embatisibwa, nineenywe mulabatisibwa; 40nebutswa akokhwikhala khumukhono kwanje musaatsa kata khumukhono mukhasi shikali akanje okhuhaana ta; ne nakabeenabo aba kakasilibwa. 41Nabo ekhumi, olwa bahulilakhwo, bachaaka okhusinyishila akaYakobo nende Yohana. 42Ne Yesu nabalanga ewa yali, nabasunjila ari Mumanyile shinga abo abakulikhwa mbu abaruchi bAbamahanga olwa babaamihanga, khandi abakhongo babwe shinga olwa babarukanga. 43Ne shikali kario mwinywe ta; nebutswa owenya okhuba omukhongo mwinywe, abe ye omukhalabani weenywe; 44naye owenya okhuba owambeli mwinywe, abe ye omusumba wabosi. 45Okhuba toto mwene Omwana wOmundu shiyayeetsa okhukhalabanilwa tawe, habula okhukhalabana, nokhuhaana obulamubwe bube eshinunulo khulwa abanji.
Omubofu Baritimayo yanyalilwa okhulola
(Mat. 20.29-34; Lk. 18.35-43)
46Niboola eYeriko; nolwa yali narulanga eYeriko halala nende abeechibe nende omukanda omukali, omwana waTimayo, mbu Baritimayo, omubofu omusabi, yali niyeekhaale khundulo weinjila. 47Nolwa yahulila mbu ni Yesu omuNazareti, yachaaka okhulanjisia, ari Yesu, omwana waDaudi, umbeele tsimbabasi. 48Abandu abanji nibamuloshela, mbu aholeele; naye nameeta bumeeta okhulanjisia, ari Iwe omwana waDaudi, umbeele tsimbabasi. 49Yesu niyeemaho, nasunga mbu Mumulanje. Nibamulanga omubofu, nibamusunjila bari Lema omwoyo; sinjila, akhulanganga. 50Kho niyaabala inguboye, niyaaluulukha, nabuukha natsia ewa Yesu yali. 51Yesu namureeba mbu Nishiina eshia wenya ekhukholele? Omubofu namusunjila ari Omwami wanje, mbu enyalilwe okhulola. 52Yesu namusunjila mbu Otsie butsia; obusuubilibwo bukhuhoniye. Ne habwene nahabwene nachaaka okhulola, nalonda munyumawe khunjila.
Currently Selected:
Mariko 10: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
