Abaroma 12
12
Omusango okuli mwoyo
1Niko akachila, baana beefwe, nimusaaya khulwa tsimbabasi tsiaNyasaye mbu mwihaane emibili chieenywe chibe omusango okuli mwoyo, omutakatifu, okwa Nyasaye anyala okhuchama; shichila nibwo obukhalabani bweenywe obweshiroho. 2Ne murakwisibwa khukhufwana khweshialo shino ta; ne mbu mukalukhasibwe khulwa emioyo emiyia echia muheebwa, mbu mukateeme nimukamanyila elala aka Nyasaye yeenya, niko akali amalayi, akachamisinjia, akali amalamba habwene.
3Shichila khulwa obukoosia obwa ndaheebwa emboolela buli mundu yesi mwinywe mbu aleshe okhupaaranga akokhwichinjimisia; ne mbu apaarenje noburechelefu, shinga Nyasaye olwa yakabila buli mundu inengo yobusuubili. 4Okhuba shinga olwa khuli nebiungo ebinji mumubili mulala, ne ebiungo ebio biosi shibikholanga omulimo mulala ta, 5neefu fwesi khurio, kata olwa khuli abanji, khuli omubili mulala muKristo, nikhuli ebiungo, buli mundu khuwashie. 6Ne olwa khuli nemikabo echiahukhaane, obukoosia obwa khwaheebwa shinga olwa buli; nibuba nibuli obunabii, khulakulenje obusuubili bweefwe shinga olwa buli; 7kata obukhalabani, khurekhwo emioyo khubukhalabani bweefwe; oyo owechesinjia, khukhwechesiakhwe; 8oyo ouchesiyinjia khubuchesiyiibwe; ouhaananga ahaane namakhono amasiro; ourukanga, aruche nobulumilifu; oukholanga aketsimbabasi, akholenje nobusangaafu.
Obuchesiyii khubikhole bieshiKristayo
9Obuheeli bube bwobwatieeli. Sile amabii; muhande khumalayi. 10Mukhuheela abaana beefwe, muheelanenje abeene nabeene; mumakhuwa koluyali, buli mundu yeemisie owashie; 11mukeshinani, muratofuhala tawe; mube nobulumilifu muroho tsieenywe; kholelenje Omwami shinga abasumbabe; 12mubunaayi bweenywe musangaalenje; mwisimilisie mumasila; mulumililenje mukhusaaya; 13musanjilanenje nende abatakatifu mubutambi bwabwe; mubeetsenje abaangu okhwinjisia abacheni. 14Mubasabile ikhabi abamusandia; sabe ikhabi, nimuralaka ebilaka munwa ta. 15Mwikhoyelenje halala nende abo abeekhoya; mulililenje halala nende abo abalila amasika. 16Mufuchilisaninjie abeene nabeene. Mureechinjimisia ta, ne muwinjanenje nende abamanani. Muleshe okhwipaara shinga olwa muli abachesi. 17Muramurunga omundu yesi obubii khulwa obubii ta. Yitsulilenje akachamwa nabandu bosi. 18Nikaba nikanyalikha, halubeka Iweenywe mumenyenje nomulembe nabandu bosi. 19Abaheelwa banje, mureemalilanga abeene eshikwoli ta, ne muheelesie Oburima obwo obwiyangu; shichila kahandiikwa kari Omwami yasunga mbu Okhumala eshikwoli nokhwanje, nasi ndilirunga. 20Ne omusukuwo naba nali inzala, omuhe eshiokhulia; naba nali nobuloho, omuhe eshiokhunywa; shichila olwa okhola orio, omubumba amaanda komulilo khumurwekwe. 21Orahulwa nobubii ta, nebutswa ohulenje obubii nende obulayi.
Currently Selected:
Abaroma 12: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
