Luug 1
1
Luyandag
1Tyofil muud wu lugum#1:1 Gufwanas ande Bis 1.1,
Baad bavul bameg mu gusonog paan ya maamb maalig mukab labiis. 2Badwaal musam nga pil yibadulees, gul baad ban badeel gu miis mya babeen yandag luyandag, baa bayiig bisad bya ndag ya Nzaam. 3Lwalun, me se, yimamanawuful piim a piim mu man omooz maalig yandag luyandag se masongos piim, muud wu lugum Tyofil, mu gusonog mumbad anze paan yi, pil yiyalabanaan. 4Yakamisal mumbad nga wuyabeen masooŋ ma malooŋ maseen.
Gapuuŋ gayabas gubudug gwa Yowaan Mbodog
5Mudaaŋ lagal Elod todol wa Yudeyaa, gwagal ande ngaaŋ a Nzaam mos wubabilaag Zagaliy; gagal mu gimvug gi bangaaŋ a Nzaam ba Abya#1:5 Yudeya: Luug gausooŋ ha gimvug gi bansi yi Bayuda. Abya: dala 1Kol 24:7-18.. Mugaaz ande, Luzebed gagal mu gigaand gya Alon. 6Abaa bool bagal bapiim gu miis mya Nzaam ande gulemveg piim a piim mupil yalomoog mansig amooz ma Mfum. 7Gaanz loo bagal ande mwaan, mumbad Luzebed gagal mugob. Ibun abaa bool bagal bayiig banun.
8Giluum gimos, Zagaliy gasalaag bisal byande nga ngaaŋ a Nzaam, mumbad gwagal giluum gi gimvug gyande mu gusal. 9Nga bwagal gigalal gi bangaaŋ a Nzaam, bamusool mu nzil a zeeg mumbad guwiŋin ha gihan gya nsig gya Mfum mu gufuuf bil#1:9 Gud 30.7-8.. 10Mudaaŋ lubaledaag magab ma bil, gibug agyooz gyasamaag hanze. 11Ibun Gapuuŋ gamos ga Mfum gadugeen Zagaliy, gamad mu goog lu gidaad la mees ma gimeeŋ mabasalaneeg mu guleed bil#1:11 Dala Gud 30:1-6; 1Bat 7:48.. 12Daaŋ Zagaliy gamudeel, boom bumugam, gabwi gisagasag. 13Gaanz gapuuŋ gamulees: «Loo guwug boom, Zagaliy, pamb lo, Nzaam wawug bisaam byanze: lwalun mugaaz anze, Luzebed, gabud mwaan wa bagal, wu muwa zin Yowaan. 14Mwaan mween galeed gyees gyanze, wadeel gyees gyavul mumbad ande, ibun baad bavul badeel gyees mumbad gubudug gwande. 15Mumbad gagal gisad munen gutwaal a Mfum. Loo gafed nwa viin ada man mambaan makab#1:15 Gufwanas Gud 6:3.. Gagal wanga yuul ande Muhuuŋ Agelel gutwaal gubudug gwande. 16Gafudul baad bavul ba Isalel gul Mfum Nzaam abaa#1:16 Gufwanas Mal 2.6.. 17Gawiy nga ngeenz a Nzaam, mu Muhuuŋ ande mu ngol yi munsuun paan Eliya, mumbad gufudul ngwagaan mukab lu badaad ande baan ba baa, mumbad baad ba midwe bwiid bafudug mu nzil ya kyeleg#1:17 Mal 3.23.24.; ande guyilig baad mumbad a Mfum.» 18Gaanz Zagaliy galees gapuuŋ ndaa: «Kipil yafed yaab ndaa mileen ma mukyeleg? Mumbad nguleen munun, mugaaz ame se waduul mbud.» 19Ibun gapuuŋ gamufuduleen ndaa: «Nguleen Ngabilyel#1:19 Dal mu Dan 8:16; 9.21; Lug 1.26., yayigumad gutwaal a Nzaam mumbad gumusaleen; gamatum mu gugulees ande guguyabas Nsaaŋ ya piim. 20Bumago gugwigil mu mandag mame; mu maamb magasalam mu daanŋ lamaa, gyagin wagidig gihul dii giluum gya gusalam paan yi.»
21Mudaaŋ lun, gibug gya baad bazigaag Zagaliy hanze, bayidig mu gudeel ndaa wasugununu mukab lu gihan gya nsig. 22Gaanz daaŋ lugaduug, loo gadeel pil yigubawagas, ibun baad badeel ndaa: gamadeel gideel miis ha gihan gya nsig. Pamb loo, gayandag gubalees mu biliim, gasaal gihul.
23Daaŋ lugaman gisad gyande gya nzo Nzaam, gafudug gu nzo nde. 24Gungoy afidaaŋ, Luzebed mugaaz ande, gaseen zuum, gawuswaam bangoon badaan. Gansunaag ndaa: 25«Dala giim gimasal Mfum mumbad ame: yagal ande nson gutwaal a baad ba me, mumbad loo yagal ande mwaan. Gaanz daaŋ lu, Mfum wangwibigi, watogol nsoon gu miis mya baad abooz.»
Gapuuŋ gamos gayabas lubudug la Yees
26Mu ngoon a saamban, Nzaam gadum gapuuŋ Ngabilyel#1:26 Dal 1.19 ande gu mbaanz yimos ya Galiley, zin la bul Nazaled, 27gul mwaan wa pin mos wagal pwesa pwees#1:27 pweesa pwees: mwaan mukaad wa pin wago guyaab gele lud labagal., ndoy wa muud wubabilaag Yozef, gagal mu gigaand gya Davil; zin la mwaan pin lagal Maliy. 28Gapuuŋ gawiŋin mu nzo Maliy, gamulees ndaa: «Deel gyees! Mfum gaka gudal mu liis la piim, gileen ande nze.» 29Daaŋ lugawug paan yin, Maliy gabwi gisagasag; gagiwufulaag lusonguleen la mbod mween. 30Ibun gapuuŋ gamulees ndaa: « Maliy, loo guwug boom, mumbad Nzaam wugusaleen mapiim. 31Waseen zuum, wabud mwaan bagal; wumuwa zin Yees. 32Gagal muud munen , bamubiil Mwaan a Nzaam wa gu Tal. Mfum Nzaam gamuwa gid gi gimfum gi gikaan Davil, 33gayaal zum la Yagob mvu ande mvu , gimfum gyande loo gyagal ande nsug#1:33 Gufwanas Sam wa yool 7.12,13,16; Ez 9.6; Dan 7..» 34Maliy galees gapuuŋ ndaa: «Kipil myagasalam, mumbad yago guyaab gele lud la bagal?» 35Gapuuŋ gamufuduleen: «Muhuuŋ Agelel gadya atal nze, ngol ya Nzaam yigufug nga givul. Lwalun mwaan wabudug bamubiil saand, mwaan a Nzaam. 36Paaŋ a nze Luzebed, gil se ande zuum, gabud mwaan bagal ada gileen munun; nde wubadeyeeg ndaa mugob, daaŋ lu, gil ande zuum lu bangoon basaamban. 37Pamb lo, gul Nzaam amyooz bumisalamaga#1:37 Gufwanas Guy 18:14..» 38Ibun Maliy gansuun ndaa: «Nguleen gisad gya Mfum; amyooz misalam nga pil yimadey.» Ibun gapuuŋ gaween.
Maliy gaween mu gudal Luzebed
39Mu biluum byalab, Maliy gagam nzil ibun gaween nswaal gu bul bumos, mu gizyuŋ gimisel mya Yudeya. 40Gawiŋin mu nzo Zagaliy ibun gawe Luzebed mbod. 41Daaŋ Luzebed gawug mbod yi Maliy, mwaan wagal mu zum lande ganigaan. Luzebed gayuul ande Muhuuŋ Agelel 42ibun gawagal mu ndag yangol ndaa: «Nzaam wugusagamana mukab lu bakaad abooz. Wasagaman se mwaan wabud! 43Ngul naa, mumbad ngwa Mfum ame gawiy gu nzo me? 44Daaŋ luyimawug mbod anze, mwaan magal mu zum lame gamanigaan ande gyees. 45Gyees gul mukaad wumagumeen ndaa, Mfum galungus laaz lugamuyabas!»
Muguuŋ wu Maliy
46Ibun Maliy gansuun ndaa#1:46 Gufwanas bidin 46-55 ande Sam wa teeg 2.1-10.:
«Mu mooy ame awooz yimagumus bunen bwa Mfum,
47ibun mooy ame wayuul ande gyees
mumbad a Nzaam, Muhulus ame.
48Mumbad wadal gugoon gu lugum lu mukaad, gisad gyande#1:48 Gufwanas ande Sam wa teeg 1.11.
Lwalun, yandag noon, baad abooz bambiil mukaad wa gyees.
49Mumbad Nzaam wangol ayooz wansaleen mapaan mamanen;
zin lande luleen saand,
50Daaŋ alooz gil Nzaam wa kyeen
gul baad bamuzidisaga.
51Gasal bisal bibinen mu ngol a goog lande;
Gapaz baad bayuul ande lulend,
52Gadyees lugum lu batodol ha bid bya baa bi gimfum
ibun ganyaman baad bago lulend mu ndooŋ ya teeg#1:52 Gufwanas Yob 5.11; 12.19..
53Gayulus biim byavul gul baad bagal nzal,
ibun gafudul bamvwaam myoog myabwaas.
54Wasalas baad ba Isalel, gisad gyande,
loo gamabil mu gusongos mapiim mande
55gul Abalaham ande bagagan bande biluum abyooz, nga pil yigasiil gul bakaag babiis ba gyan biluum abyooz.»
56Maliy gasaal ande Luzebed gidees gi bangoon badad, gungoy gafudug gu nzo nde.
Gubudug gwa Yowaan Mbodog
57Biluum bigubud Luzebed byaluŋ, gabud mwaan bagal. 58Bandoy ande bapaaŋ bande ba gigaand bawug ndaa Mfum wumusaleen mambod, badeel gyees ande nde. 59Biluum ginaan gungoy gubudug, baween mu gugyeles mwaan#1:59 Dala Lev 12:3. mukaand; bazoloog gumulug zin lu gidaan, Zagaliy. 60Gaanz ngwaan gansuun ndaa: «Loo, zin lande Yowaan.» 61Bamule es ndaa: «Loo muud mu zum lanze wayaal zin lu!» 62Ibun, bawuful gida mwaan mu biliim, kii zin gamazol mu guwa mwaan a nde. 63Zagaliy galoom galubay, ibun gasonog ndaa: «Zin lande Yowaan.» Abooz bayidig. 64Mumbal imos, Zagaliy gawagal lyaag, gayandag guwa Nzaam lugum mu ndag ya ngol. 65Ibun, bandoy abooz ba mumbiim bayandag guwug boom. Mu gizyuŋ agyooz gimisel mya Yudeya, bayandag mu guda maamb man. 66Baad abooz bawug paan mween, bayandag guyindil ande gugiwuful gu mudim ndaa: «Gwa mwaan mween wu naa gagal?» Pamb lo ngol ya Mfum yagal ande nde.
Muguuŋ wa Zagaliy
67Zagaliy, gida mwaan, gayuul ande Muhuuŋ Agelel, gayandag gudendel nga munsuun paan ndaa:
68«Mfum gaseen lugum, Nzaam wa Isalel,
wawiy mumbad gugangal baad bande.
69Wududuseen mu gusongos mapiim mande,
mukab lu bagagan ba todol Davil, gisad gyande.
70Walungus laaz lande, lun lu gayabas yandag tam mu nzil yi bansuun paan bande ba saand ndaa:
71“Gaduhulus gu myoog mi bamben babiis ande gul ban badudunaga.”
72Gasongos mapiim mande gul bakaag babiis ba gyaan
loo gabil, luwagaan lande la saand.
73Wudulunguseen mungey wugagyel gul kaag abiis Abalaham#1:73 Dala mu Luy 22:16-17.,
74ndaa gadudogol gu myoog mi bamben
mumbad dugo guwug boom mu gumusaleen,
75Mumbad dugal mu busaand ande bakyeleg gutwaal a nde
biluum abyooz bi luziiŋ la biis.
76Ibun nze, mwaan ame, bagubiil munsuun paan wa Wun Malig Yul,
pamb lo waween gutwaal mumbad guyiligeen Mfum nzil#1:76 Gufwanas mu Mal 3:1. ,
77ande gulees baad bande ndaa Mfum galuhulus
ande gululolol masum.
78Nzaam a biis gileen wa kyeen ande wu luzol;
gadu ngeŋseen nseem yagu tal nga mooz a keel ,
79mumbad gungeŋes baad bal mu piib ande gunsin givul gi lufwa,
se mumbad gududwalas mu nzil ya ngeemb#1:79 Gufwanas Yez 9:1..»
80Mwaan gagulaag mu nzil muhuuŋ, se gawiyaag ngol. Ga ziiŋaag mu maan mawum dii giluum gi gagisongos gul baad ba Isalel.
Currently Selected:
Luug 1: noq
Highlight
Copy
Compare
Share
Want to have your highlights saved across all your devices? Sign up or sign in
2025 The Seed Company in coordination with Association Congolaise de Traductions de la Bible
