Luug 11
11
Yees ande bisaam
(Maday 6:9-13; 7:7-11)
1Giluum gimos, Yees gasamaag ha gihan gimos. Daaŋ lugamas, mos mukab lu balongog bande gamuwuful ndaa: « Mfum, dulooŋ mu gusaam pil Yowaan#11:1 Gulene Yowaan Mbodog galooŋ balongog bande.» 2Yees gabalees ndaa: «Daaŋ lulabala saam, ludey ndaa:
« “Daad,
boomon ndaa Baad abooz bayaab ndaa wul Nzaam saand;
Boomon ndaa gimfum gyanze giwiy.
3Duwe malya matulama mfun goonz giluum#11:3 mfun: mu gubalaman gwambaan gulu mumbadmbaz gina..
4Dulolol masum mabiis,
pamb lo biis se dulologo muud awooz wakadusal mbi.
Ibun loo gududwaal mu pugumun.” »
5Yees gabalees lyaag ndaa: «De mos mukab labeen gili ande ndug a nde, ibun gamaween gul nde mu gidul gya piib, gakamuloom ndaa: “Ndug ame, ndeef mapa madad; 6mumbad mos mukab lu bandug bame gil mu nzyedel, wawuduul gu nzo me ibun loo ngul ande giim gigumuwa.” 7De wun wul mukab la nzo wu mu fuduleen ndaa: “Loo gungyaŋas! Mbel da ngaŋa. Baan ande me dabidi; Loyafed madaag mumbad guguwa mapa.” 8Yabal lulees mukyeleg, ada loo gamadga mu gumuwa mapa mween, gaanz bugamadag nsil mu mudungus wande ibun gamuwa biim abyooz bigil abya mfun mumbad gili ndoy ande. 9Ibun Me, ya ulees ndaa: Luloom, buba luwaa; Lugaam; bu ladeel; lubedeg ambel; buba lugangal. 10Mumbad, muud awooz ulomogo bugasenege, wun wusagaga bugadelege, ibun wun mabedeeg gifug ba mu gangalanege. 11Naa mukab labeen, badaad, wagawa mwaan ande ngoŋon de bu gamuloom mbiiz#11:11 Masonog mambaan mabala yiig gungoy a Mwaan: mudoy, ganz nde gabala loom lupa dolo ngoŋon... Mad 7:9.? 12Dolo gakamuwa yambalal#11:12 yambalal: dala mu 10.19 ande bison bya gunsin. de wuloom kyee? 13Ibun, de been baad bambi, luyaab guwa baan babeen biim bya piim. Kipil Daad wul gu tal ga go guleed Muhuuŋ Agelel gul ban ba mu lomogo!»
Yees gayid mihuuŋ myambi
(Maday 12:22-30; Malgo 3:22-27)
14Giluum gimos, Yees gayidaag muhuuŋ a mbi wun wagidilaag muud gihul. Daaŋ muhuuŋ ambi gaduug, gihul gayandag guwagal, baad bagal mu gibug, bayandag guyidig. 15Gaanz bambaan mukab la baa bansuun ndaa: «Gabala yid mihuuŋ myambi mu ngol ya Belezebul#11:15 Belezebul: dala mu Mad 10.25 ande bison bya gunsin., mfum wu mihuuŋ myambi!» 16Bambaan mumbad gumeg Yees, bamulees ndaa: songos giliim gimos gya kuumb gyagu Yul gya balalees ndaa Nzaam amagu dumu. 17Gaanz Yees bugayabaag manuuŋ ma baa, gabalees ndaa: «Bimfum abyooz bin bi magabaan ande bya bala nwanasaan bu bya pansaan, manzo ma baa mabwaga mamos atal mambaan. 18De sadan mun guginwanas, kipill gimfum gyande gyafed gulab? Yimadey ndubun mumbad labalansuun ndaa, ya uyid mihuuŋ myambi mu ngol ya Belezebul. 19De me yabal yid mihuuŋ myambi mu ngol ya Belezebul, ibun balongog babeen bamiyidiga mu ngol ya naa? Gyagiin balongog babeen bagal bazuuz babeen . 20Gaanz de mil mu ngol ya Nzaam#11:20 mu ngol ya Nzaam: dala Gud 8.15 ande bison bya gunsin. ndaa me yabala yid mihuuŋ myambi. Gyagin gya balasongos ndaa Gimfum gya Nzaam gyawiy taam mukab labeen.
21«Daaŋ muud wangol gabala gyeb nzo yande ande mada, biim byande biswemege piim. 22Gaanz, de muud ambaan wanga mulig mu ngol mawiy munwanas, ibun gamamubeles, gamulugul binwaneen abyooz bigasilanage mudim, gungoy gawool biim byande abyooz waka bigab.
23«De muud wun loo gil nzil imos ande Me gil mben a Me; ibun wun ugonoog guvugus ande Me, gapazaga.»
Gufudug gu muhuuŋ wambi
(Maday 12:43-45)
24«De muhuuŋ a mviind waduug gul muud, gyenege guyuŋaan gu maan mawum mugasag gihan giguhululug. Gaanz de loo gadele, gagideyenege: “Gul piim mfudug gu nzo me, yin yiyasiis.” 25Daaŋ muhuuŋ ambi de bugafudugu, gamadeel nzo bagoomo, bayiyilig piim. 26Ibun gyenege, gamaseen lyaag mihuuŋ myambi nsambwaal myambaan myanga mulig mumbi; mifudugaga amyooz mimawiŋin, mimabwensen gun. Ibun, luziiŋ la muud wun lugumaga lambi gulig lun lugagal teeg.»
Gyees gya kyeleeg
27Daaŋ Yees lugawagal mamb ma, mukab lugilig gin mukaad mos gabog ndaa: «Gyees gul mukaad wugubud ande gugunwiis mabeel!» 28Gaanz Yees gafudul nda: «Gyees gul baad babal wug ndag ya Nzaam ande guyisaleen!»
Baad basag giliim gya kuumb
(Maday 12:38-42)
29Daaŋ baad bawiyaag bavul mumbiim a Yees, Yees gadey ndaa: «Baad badaaŋ lu, bal bambi; babala loom giliim! Gaanz loo gul ande giliim gyambaan gibabawa, delo gin gya Yoon. 30Yoon gagal giliim mumbad a baad ba Niniv#11:30 Yoon (gidin 29 ande 30): dala mu Yon 3.3-5.- Niniv: dala Mad 12.41 ande bison bya gunsin.. Mutind mos, Mwaan a muud gagal giliim mumbad a baad badaaŋ lu. 31Mu giluum gi lusambas, todol mukaad wa siid gamadag, nzil imos ande baad ba daaŋ lu, ibun ga bafuund pamb lo gaduug gibaal, gu nsug nsi, mumbad guwug ngaaŋ ya Salomo#11:31 Dala mu Bat ba teeg 10.1-10.; kisi loo ha gul ande muud wu malig Salomo. 32Mu giluum gi lusambas, Baad ba Niniv bamadag ande baad badaaŋ lu, ibun ba bagyeleen ndol mumbad babalaman midim mya baa daaŋ lubawug malooŋ ma Yoon#11:32 Dala mu Yon 3.5,8,10.; kisi loo daaŋ lu gul ande muud malig Yoon!»
Mwiind wa lud
(Maday 5:15; 6:22-23)
33«Loo gul ande muud wu lemesege mwiind mumbad gaka musweeg dolo gamasa gunsin gatin#11:33 Mu bison byambaan loo bil ande bangog dolo gusa gunsin gatin (dala mu Maday 5.15; Malgo 4.21). . Kisi lo bamusyagaga mu ngyeeŋ mumbad baad babala wiiŋin mu nzo badeel nseem. 34Miis myanze mili nga mwiind wa lud lanze. De miis myanze mili piim, lud lanze la mviimb lul mu nseem. Gaanz de bumyabele, lud lanze la mviimb se lawiiŋin mu piib. 35Lwalun, gebe! Mumbad nseem yil gul nze, yigo gugal piib. 36De lud lanze la mviimb lul mukab la nseem, se ada gidin gimos loo gil mu piib, lud lanze la mviimb layuul ande nseem nga pil yi gungeŋesege mwiind nseem ande.»
Yees gafund bafalize ande balooŋ ba nsig
(Maday 23:1-36; Malgo 12:38-40)
37Daaŋ Yees gamanas mugu wagal, Mufalize mos gabilis Yees mu gugulya gu nzo nde. Yees gawiiŋin mu nzo ibun ga bwensen a mees. 38Gaanz Mufalize gayidig daaŋ lu gadeel ndaa Yees loo gawulul myoog gutwaal gulya. 39Ibun Mfum gamulees ndaa: «Been Bafalize: luwululaga magoob ande maloŋ gunze, gaanz layuul mu gwiib ande mbi. 40Been baad lago nduuŋ! Wun wayilig nze, loo gayilig se lyaag kaba? 41Luleed gimuud gya been gya mukab nga gab gul Nzaam, ibun nga lagal banga geenzeg.
42«Kyeen gul been Bafalize! Luledaga mos la guum yi bandeemb, lu madungul ande lu banduund lu mitiind amyooz#11:42 dala mu Lev 27.30; Gul 14.22., gaanz ludelaga pamb mambod ande luzol la Nzaam. Kis lo gumalomog gubisa mu bisal, ande gudeel mfun ya paan yi yigufud gidin gya guum.
43«Kyeen gul been Bafalize! Luzologo gugal mu bid bya teeg, mukab la nzo yi bisaam yi Bayuda; ibun luzologo baad baluwe mbod yi lugum, ha bihan bigalaga baad bavul. 44Kyeen gul been! Lulu nga mazyaam mabamago gusa giliim, ibun baad bamanyadaga mu gilib!»
45Mos mukab lu balooŋ ba nsig galees Yees ndaa: «Looŋ, daaŋ labala dey ndubun, bwa bal dudugu!» 46Yees gafudul ndaa: «Been se balooŋ ba nsig, kyeen gul been se! Mumbad luwaga baad lem lavul, gaanz ben been lunigisaag ada muleem umos mumbad gubasalas. 47Kyeen gul been! Mumbad lu duŋaga mazyaam ma bansuun paan ban bakaag babeen ba gyaan bazwee! 48Min milabala sal myausooŋ gibaaŋ ndaa lagumeen paan yaasal bakaag babeen ba ngyaan, gyagiin beene labala duuŋeen mazyaam ma baa. 49Lwalun, Nzaam mu ngaaŋ ya Nde wadeye: “Yibadumeen bansuun paan ande batum; bazwa bamos, ibun banyogol bambaan.” 50Bwabun, mansil ma bansuun paan abooz, ma badyaag yandag gusalam gu gifud, ma daŋam atal midwe mya baad ba daaŋ lu, 51yandag mu mansil ma Abel dii gu mansil ma Zagaliy, wun wu bazwe mu muwaaŋ wa nzo Nzaam dogo mees ma gimeeŋ dii ha Gihan gya saand#11:51 Dala mu Guy 4.8; 2 Kolon 24.20-22.. Yabal lulees nsil mukyeleg: lem lu mambi lun alooz la gabwileen baad ba daaŋ lu.
52«Kyeen gul been balooŋ bansig! Mumbad ladogol nsab yi guyaab! Ben been loo lawiiŋin, ibun lapeges baad ban bagal ande nzal yi guwiiŋin.»
53Daaŋ Yees gaduug mu nzo yin, Bafalize ande balooŋ ba nsig bamuwugeen kab yavul ibun bamuyangas mu nzil yi gumuwuful byuuf bya pil ande pil, 54mu gumuzoom mumbad gumugam mu mandag mande mumbad ba mufuund.
Currently Selected:
Luug 11: noq
Highlight
Copy
Compare
Share
Want to have your highlights saved across all your devices? Sign up or sign in
2025 The Seed Company in coordination with Association Congolaise de Traductions de la Bible
