Luug 8
8
Bakaad balabaag Yees
1Gungoy, Yees gaweneeg mu mambaanz ande mu mabul mu gulooŋ ande guyabas Nsaaŋ ya piim yi Gimfum gya Nzaam. Balongog a baa guum ye bool baweneeg ande nde, 2ande ndaamb bakaad ban bagahulus mu mihuuŋ myambi ande bagazunus bikaas: Maliy, muud wa Magadal, wun wugaduus mihuuŋ nsambwaal myambi; 3Zyaan, mugaaz a Syuza muud wagebeeg biim bi Elod; Suzaan ande bakaad bambaan bavul, ban basalasaag Yees ande balongog bande mu biim bya baa been.
Gingan gi mugun
(Maday 13:1-9; Malgo 4:1-9)
4Gibug gya baad bavul, ande ban baduug mu mabul bauvugaan mumbiim a nde. Yees gabalees gingan gi: 5«Mugun mos gaween mu gugun mbeeŋ mu gilaaŋ gyande. Daaŋ lugamwaŋaag mbeeŋ, ndaamb yabwi mumbiim a nzil: bilig nzil bayinyadaag, ibun banon bagu tal bayili. 6Ndaamb yambaan yabwi mu maan ma midoy: daaŋ yaduug, yawum mumbad mazya loo magal. 7Yambaan yabwaag a kab lu midi mya ngaaŋ. Yamen ayooz nzil imos, ngaaŋ yi yibebes. 8Gaanz ndaamb yambaan yabwi mu maan ma piim; midi myamen, myade mbeeŋ; mudi mos gadaag mbeeŋ kaam.» Ibun Yees gayig ndaa: «Wun wul ande manswi maguwugeen, gawug!»
Mumbad a kii Yees Galoŋaag mu bingan
(Maday 13:10-17; Malgo 4:10-12)
9Balongog ba Yees bamuwuful tendeleen yi gingan gi. 10Gabafuduleen ndaa: «Beene layaba maamb ma ginsweeg ma Gimfum gya Nzaam; gaanz gul bambaan, yabal nsuun mu bingan mumbad
«“Ada buba baladal, loo bafed deel,
ada buba balawug, loo bafed bagas#8:10 Yez 6.9, badaaŋ mu gubalaman gwa tam mu gi geleg..” »
Yees gadendel gingan gi mugun
(Maday 13:18-23; Malgo 4:13-20)
11«Dala lusongoleen lu gingan gi: ken, yileen Ndag ya Nzaam. 12Ken yabwi mumbiim a nzil yili, baad bawugaga Ndag ya Nzaam, gaanz sadan giyaga gakayidogol mu midim mya baa mumbad bago gugwigil ande guhulug. 13Ken yabwi mu maan ma midooy yili, baad bawugaga Ndag ya Nzaam, bakayiyaamb ande gyees, gaanz bayiboomonaag ndaa yiduus misos, bagwigilaga mu fidaaŋ; de mimegem myawiyi, mbal imos bamayidun. 14Ken yabwaag atal a bingaaŋ, yili baad ban, gungoy guwug Ndag, bamiboomonogo mu kaleen ya baa, midungus mi luziiŋ lu biluum abyooz, gimvwaam ande byees bi gifud, byabiin bibagaaŋsaga nzil, ibun bago da mbeeŋ. -------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------- 15Kun yabwi mu maan mapiim, bili baad ba, bal ande midim mya pemb ande mya piim, bawugaga Ndag, ande guyigeb, mun guyigwaman, badaga mbeeŋ.»
Gingan gya mwiind
(Malgo 4:21-25)
16«Loo gul ande muud ulemesege mwiind gamafug gatin dolo gamasa gunsin a mbuuŋ. Gaanz basagaga ha gihan gya ngyeeŋ mumbad baad babala wiiŋin mu nzo badeel nseem ande#8:16 Mad 5.15; Lug 11.33.. 17Pamb lo, loo gul ande giim giswamaga bamago gugideel, se loo gul ande giim gi ginsweeg gyago guyabanaan dolo giduug mu peenz. 18Ibun, gebeen mu pil yabeen yiguwug! Pamb lo, gul muud wul ande giim, buba muyig lyaag. Gaanz gul wun magoon, bagalugul ada gandamb gan gagil aga.»
Maan ande bapaaŋ ba Yees
(Maday 12:46-50; Malgo 3:31-35)
19Maan ande bapaaŋ ba Yees baba bagal bawiy mu gumudal, gaanz loo bagug mu guduul bel a bel mu gumudeel mumbad gibug gya baad gyagal gyavul. 20Muud mos gamuyabas ndaa: «Ngwaag ande bapaaŋ banze abaa a nze, bal ande mfun a nze.» 21Gaanz Yees gabalees abooz ndaa: «Maam ande bapaaŋ bame, bal ban babalawug Ndag ya Nzaam ande guyisaleen.»
Yees gaŋaneen muhuuŋ
(Maday 8:23-27; Malgo 4:35-41)
22Giluum gimos, Yees galees balongog bande ndaa: «Dubwilaan gu sim lambaan la zwa#8:22 ha gulu zwa la Galiley. Mu gizyuŋ gyagal gu sim lambaan gun gwagal baad ban bago Bayuda..» Ibun bawiŋin mu bwaad, baween. 23Daaŋ lubabwilaag, Yees gabid. Mumbal imos, gigul gyanigis mazya; mazya mayandag guyuul mu bwaad, bagal mu gigoonz. 24Balongog bapusaan, bamuwusul ande gubog ngol ndaa: «Looŋ, looŋ, biis budafi!» Yees gawusug, gaŋaneen gigul ande gideem, mumbal imos byalemeen nyee. 25Yees galees balongog bande ndaa: «Lugwigil labeen alunu?» Gaanz bagal mu boom, bayandag guyidig, baŋunaan baa ye baa ndaa: «Muud wu nsil gili naa? Gabala ŋaneen muhuuŋ ande mazya, ma se munu gumulemvegeen#8:25 Gufwanas mu Mig 65:8; 89:10; 107:23-32.!»
Yees gazunus muud wagal ande mihuuŋ myambi
(Maday 8:28-34; Malgo 5:1-20)
26Baduul mu gizyuŋ gya bis Gelaza#8:26 Mu bison byambaan gulu bis Gadalena (Mad 8.28 ande bison bya nsin) ibun bambaan bal ande bis Gelzezena. , gileen gu sim lambaan la zwa, ladalanaag ande Galiley. 27Daaŋ Yees gadulug mu maan, muud mos wa mbaanz gagal ande mihuuŋ myambi; gawiy mu gugudaan ande nde, yandag tam, loo gabwadaag mulel, loo gagalaag mu nzo, gabidaag gu bibamb, gawiy gutwaal a Yees. 28Daaŋ lugadeel Yees, gawagal ngol ibun gagibwiis mu miil mya nde, gansuun ande ngol ayooz: «Yees, mwaan a Nzaam wagu Yul, kii nze ande me? Yi gubondol, loo gungyangas!» 29Gansunaag ndubun mumbad Yees galees muhuuŋ ambi mu guduug gul muud wu. Mbal yavul muhung loo gamuwezeleeg; ada kipil bamugang minyolol mu miil ande mu myoog, ada ba musi mu dag mumbad gumugeb, bugamigyeleeg, ibun muhuuŋ a mbi gawa mudwalaag ha bihan bi gingeeŋ. 30Yees gamuwuful: «Zin lanze naa?» Nde ndaa: «Zin lame “Bavul”» mumbad mihuuŋ myambi myavul mya wiŋin mukab lande. 31Ibun mihuuŋ myambi myabondol Yees mu gugo gumidum gu nsi yi bafwa.
32Gunu gwagal ande gibug giginen gi bangul#8:32 Malg 5.11 ande bison bya gunsin. balyaag ato musel. Mihuuŋ myambi myaloom gul Yees mu gumiboomon mu guwiŋin mu bangul. Yees gabawe nswa. 33Mihuuŋ myambi myaduug gul muud, ibun myawiŋin mu bangul. Bangul abooz bamongog ato musel badye tiin ibun babwi mu zwa, bamyood. 34Baad badalaag bangul daaŋ lubadeel paan yi, badiin. Badwaal musam gu mbaanz ande mu mabul makuund. 35Baad baduug mu mabul, mumbad gudal maamb maalig. Daaŋ lubaduul gul Yees, badeel muud waduug mihuuŋ myambi: wabwaad milel, wabwensen mu miil mya Yees, nduuŋ yi gi muud yi mufudugeen, wayiig piim. Ibun boom bubagam. 36Ban badeel paan pil yiyalig, bade kipil muud wagal ande mihuuŋ gazuun. 37Ibun, baad abooz bagiziuŋ gya Gelaza, baloom gul Yees mu gudoog ha bul bwa baa mumbad bagal mu boom. Yees gawiŋin mu bwaad, gaween. 38Muud waduug mihuuŋ myambi, galoom gul Yees mu gugween ande nde. Gaanz Yees gamufudul ibun gamulees ndaa: 39«Fudug gu nzo nze, badeleen mapiim amooz makagusal Nzaam.» Ibun muud wu gaween mu mabul, gayabas paan ayooz yi musaleen Yees.
Mwaan a Zayilus wu mukaad ande mukaad wagam nsooŋ mulel a Yees
(Maday 9:18-26; Malgo 5:21-43)
40Daaŋ Yees gafudug gusim la zwa, gibug gya baad bamuyamb, pamb lo, abooz bamuzigaag. 41Mu daaŋ lunu, muud mos gawiy, zin lande Zayilus, gagal mfum ya nzo yi bisaam yi Bayuda. Gawiy gul Yees, gabwi mu miil myande, gamubondeleen mu guween gu nzo nde, 42mumbad gagal ande mwaan mos peel wu mukaad, wagal ande mvul gum eyool, gagal mu gufwa.
Daaŋ Yees gaweneeg gu nzo Zayilus, gibug gyawa mugwedeseeg ndamb ayooz. 43Gwagal ande mukaad mos, gagal ande gikaas gya kos mvul guum eyool. Gabebes biim byavul gul mingaaŋ#8:43 Mu bison byambaan loo gulu ande gidin gi: Gabebes biim abyooz bigakensen gul mingaŋ., gaanz ada mos loo gamuzunus. 44Gapusaan gungoy a Yees, gagaam nsoŋ mulel ande. Mbal imos, mansil manswiig. 45Yees gawuful: «Naa makam?» Ata mos loo gagumeen. Ibun Pedel ndaa: «Looŋ, baad baguzyede ndaamb ande ndaamb munu gwayugaan.» 46Gaanz Yees ndaa: «Gul ande muud makaam, mumbad yimawug ngol yimos yimatoog.» 47Mukaad, daaŋ lugadeel ndaa bamuyaba, gaween mun gwadeged, gabwi mu miil mya Yees. Gadeleen Yees a miis mya baad abooz mumbad a kii gamugameen ande kipil gazuun mu mbal imos. 48Yees gamulees ndaa: «Mwaan a me wu mukaad, lugwigil lanze lu guzunusu#8:48 lu guzunusu dolo lu gugulusu.. Ween mu ngeemb.»
49Daaŋ Yees gawagalaag ndubun, ngeez mos waduug gu nzo Zayilus mfum wa nzo yi bisaam yi Bayuda, gamulees ndaa: «Mwaan anze wafi. Loo guyaŋas lyaag Looŋ.» 50Gaanz Yees bugamuwug ibun galees Zayilus ndaa: «Loo guwug boom, gwigila, mwaan bugazuna.» 51Daaŋ Yees gaduul a nzo ya Zayilus, gadun muud mu goguwiŋin ande nde. Gaseen Pedel, Yowaan, Zyaag, daad ande ngwa mwaan. 52Abooz bagal mun gulil ande kyeen. Ibun Yees ndaa: «Loo gulil, mwaan a gofwa, wabidi.» 53Baad basey Yees, mumbad bayaab ndaa mwaan wafi. 54Ibun Yees gagam goog la mwaan, gawagal mundag ya ngol: «Mwaan, madaga!» 55Mwaan gafudul mooy, mumbal imos gamadag. Yees gabalees mu gumuwa biim bigulya. 56Bibud byande bayidig. Gaanz Yees gabanan manswi, gabalees ndaa: paan yi yiyimalig, loo gudeel ada muud.
Currently Selected:
Luug 8: noq
Highlight
Copy
Compare
Share
Want to have your highlights saved across all your devices? Sign up or sign in
2025 The Seed Company in coordination with Association Congolaise de Traductions de la Bible
