Luk 21
21
De Wätfru äa Opfa
Mrk 12:41-44
1Aus Hee oba oppkjikjt, sach Hee, woo de Rikje äare Gowen en dän Gotteskausten enläden. 2Hee sach oba uk eene jewesse oame Wätfru twee Koppasch#21:2 Griechisch Lepton: 128 Lepton to 1 Denarius. doa enlajen. 3Un Hee säd: Ekj saj junt woarhauftich, daut dise oame Wätfru haft mea enjelajcht, aus aul dee. 4Wiels dee haben aula ut äarem Äwafluss fa de Gottes-Gowen enjelajcht. Dise oba haft von äare Oamoot aul äare Läwens-Meddel, dee see haud, enjelajcht. 2Kor 8:12
De Tempel woat doljebroaken woaren
Mat 24:1-14; Mrk 13:1-13
5Un aus atelje von däm Tempel säden, daut dee met scheene Steena un jeweide Jeschenkja utjestraumt wia, säd Hee: 6Äwa dise Dinja, dee jie hia seenen, doa woaren Doag komen, wua kjeen Steen opp däm aundren bliewen woat, dee nich woat raufjebroaken woaren. Luk 19:44 7See fruagen Am oba un säden: Liera, wanea woat daut sennen, un waut es daut Tieekjen, wanea daut passieren saul? 8Un Hee säd: Paust opp, daut jie nich veleit woaren. Wiels väle woaren komen unja mienem Nomen un sajen: Ekj sie daut! un: De Tiet es dichtbie jekomen! Got äant nich hinjaraun. 9Wan jie oba hieren woaren von Kjriej un Opprua, dan enjst junt nich; wiels dit mott ieescht passieren; oba daut Enj es noch nich fuaz doa.
10Dan säd Hee to äant: Nazion woat jäajen Nazion oppstonen un Kjennichrikj jäajen Kjennichrikj. 11Un doa woaren opp veschiedne Städen groote Ieedbäben passieren un Hungasch-Nooten un Pestilenz; uk furchtboare Dinja un groote Tieekjens vom Himmel woaren passieren. 12Oba ver dit aula woaren see äare Henj aun junt lajen un junt vefoljen, junt aun de Synagogen un Jefenkjnissen äwajäwen, om junt ver Kjennichs un Gowernieren to brinjen om mien Nomens haulwen. Mat 10:18-22,30 13Oba daut woat junt fa een Zeichnis utkomen. 14Dan nämt junt daut nu to Hoaten, daut jie nich verhäa sorjen, woo jie junt veteidjen sellen, Luk 12:11 15wiels ekj woa junt Mul un Weisheit jäwen, dee aul june Jäajna nich woaren wadaspräakjen un wadastonen kjennen. Apj 6:10 16Jie woaren oba soogoa von Elren un Breeda un Frintschoft un Frind äwajäft woaren, un see woaren atelje von junt dootmoaken. 17Un jie woaren von aulem jehaust woaren om mien Nomens haulwen. 18Un nich eene Hoa von jun Kopp saul veloaren-gonen. Luk 12:7 19Jewent june Seelen derch june Jedult. Heb 10:36
Jerusalem woat enne Grunt jebrocht woaren
Mat 24:15-21; Mrk 13:14-19
20Wan jie oba Jerusalem von Armeeen beloagat seenen woaren, dan moakjt, daut de Venichtunk dichtbie es. 5Mo 28:49-57; Ps 79:1-13 21Dan lot dee en Judäa no de Boaj flichten; un wäa en äare Medd es, dee saul doa rutranen, un wäa oppem Launt es, saul nich nengonen. 22Wiels daut sent de Doag von Racheewen, daut aules erfelt woat, waut jeschräwen steit. 5Mo 32:35 23Wee oba de Schwangere un dee, waut de Brost jäwen en dee Doag; wiels doa woat groote Noot sennen em Launt, un een Oaja äwa dit Volkj, 24un see woaren faulen derch daut Schoape vom Schwieet un jefangen wajchjefieet woaren mank aul de Velkja; un Jerusalem woat von de Heiden doljeklunjt woaren, bat de Tieden von de Heiden woaren erfelt sennen. Jes 63:18; Ree 11:25; Opb 11:2
De Menschensän woat komen
Mat 24:29-31; Mrk 13:24-27
25Un doa woaren Tieekjens passieren aun de Sonn un Mon un Stierns, un opp de Ieed woat de Velkja Angst sennen met Rotloosichkjeit von daut ruzhende Mäa un de Walen. Opb 6:12-13 26Un de Menschen woaren veschmachten von Forcht un von Wachten fa de Dinja, dee opp dän Ieedboddem komen sellen; wiels uk de Himmels-Kjraften woaren jescheddat woaren. 27Un dan woaren see dän Menschensän en eene Wolkj komen seenen met groote Krauft un Harlichkjeit. Dan 7:13 28Wan oba dit woat aunfangen to passieren, dan kjikjt opp, un häft june Kjap opp, wiels june Erleesunk sikj nodat. Flp 4:4-5
De Lia aum Fiejenboom
Mat 24:32-35; Mrk 13:28-31
29Un Hee säd äant een Jlikjnis: Seet dän Fiejenboom un aul de Beem; 30wan dee nu utloten, dan see jie un weeten aul von selfst, daut de Somma dichtbie es. 31Jrod soo uk jie, wan jie dit aula passieren seenen, dan moakjt, daut Gott sien Rikj dichtbie es. 32Ekj saj junt woarhauftich: Dise Jennerazion woat nich vegonen, bat aules passieet es. 33Himmel un Ieed woaren vegonen; oba miene Wieed woaren nich vegonen.
Jesus sien Wadakomen
Mat 24:36-51; Mrk 13:32-37
34Oba heet junt, daut june Hoaten nich woaren belaust woaren met Fräten un Supen un met Sorjen äwa dit Läwen un jan Dach onverhofs äwa junt kjemt; Mrk 4:19; 1Tess 5:3 35wiels soo aus eene Schlenj woat dee komen äwa aul dee, dee opp däm gaunzen Ieedboddem wonen. 36Doawäajen woakt aule Tiet un bät, daut jie wirdich je-acht woaren, wajch to ranen von aul dit, daut doa passieren saul, un to stonen ver däm Menschensän. 37Hee lieed oba äwadach em Tempel, un de Nacht jinkj Hee rut un bleef opp däm Boajch, dee doa Oliewen-Boajch jenant woat. 38Un aul daut Volkj kjeem tiedich aum Morjen em Tempel no Am, Am to hieren.
Lukas
Currently Selected:
Luk 21: DKB
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 von de Kjennichs-Bibel Jesalschoft
