Eksodas 21
21
Ol loa we i stap from ol slef
(Dutronome 15.12-18)
1Nao Hae God i talem long Moses se, “Moses. I gat ol narafala loa tu we yu mas go talemaot long ol man ya blong oli folem. 2#Lev 25.39-46Yufala ol Hibru,* mo sipos wan long yufala i pemaot wan long yufala bakegen blong i kam slef* blong hem, man olsem bambae i save wok slef blong hem sikis yia nomo, nao long namba seven yia, bambae hem i save go fri we i no pem masta blong hem from. 3Sipos man olsem i mared taem i kam slef, taem hem i go fri bakegen, bambae i save tekem woman blong hem i go wetem hem. Be sipos hem i kam we i no gat woman blong hem, bambae i mas go fri hem wan. 4Sipos wan masta i givim woman long slef olsem blong i mared long hem, nao woman ya i bonem ol pikinini blong slef ya, be woman ya wetem ol pikinini ya oli blong masta ya nomo. Sipos slef olsem i go fri, bambae hem i mas go hem wan. 5Be sipos hem i talemaot long klia ples we hem i laekem tumas masta blong hem mo woman blong hem mo ol pikinini blong hem, nao i no wantem go fri, 6ale, masta blong hem bambae i mas tekem hem i go long ples blong mekem wosip, nao long ples ya, bambae i mekem hem i stanap long doa, no long pos blong doa, nao bambae i tekem nil, i stikim sora blong hem i gotru blong mekem hol. Nao man ya bambae i stap wok slef blong masta ya oltaem long laef blong hem.
7“Sipos wan man i salemaot dota blong hem blong i kam slef, bambae gel ya i no save go fri olsem we ol man slef oli save go fri. 8Sipos man we i pem gel olsem i tekem gel ya i kam woman blong hem, be biaen, i no moa laekem hem bakegen, bambae hem i no save letem wan strenja i kam pemaot gel ya, from we hem i brekem promes blong hem long gel ya finis. Hem i mas letem papa blong gel ya i kam pemaot hem bakegen. 9Sipos man i pem wan woman slef blong boe blong hem i mared long hem, man ya i mas lukaot gud long woman slef ya olsem we i dota blong hem stret. 10Sipos man i pem wan woman slef blong i kam narafala woman blong hem, be hem i mas givhan gud long hem, olsem we i stap mekem oltaem long fas woman blong hem. Oltaem hem i mas givim kakae mo klos long hem, mo i mas mekem ol fasin long hem we i stret blong man i mekem long woman blong hem. 11Sipos hem i no mekem trifala samting ya long hem, bambae woman ya i save go fri we i no pem hem from.”
Ol loa blong stretem ol trabol blong ol man we oli faet
12 #
Lev 24.17
Mo Hae God i talem se, “Sipos wan man i kilim narafala man i ded, bambae yufala i mas kilim man ya tu i ded. 13#Nam 35.10-34; Dut 19.1-13; Jos 20.1-9Be sipos man olsem i no tingting blong kilim narafala man ya, i akseden nomo, bambae hem i save ronwe i go haed long wan long ol taon ya we bambae mi mi jusumaot se yufala i save go haed long hem, nao bambae hem i save stap gud long ples ya. 14Be sipos wan man i kros, nao i girap, i go kilim narafala man i ded, nating we hem i ronwe, i kam long olta blong mi blong stap gud long ples ya, be yufala i mas tekemaot hem, yufala i kilim hem i ded.
15“Man we i girap, i mekem faet long papa no mama blong hem, bambae yufala i mas kilim hem i ded.
16 #
Dut 24.7
“Man we i stilim wan man, nao i go salem hem i kam slef,* no i mekem hem i kam slef blong hem nomo, bambae yufala i mas kilim hem i ded.
17 #
Lev 20.9; Mat 15.4; Mak 7.10 “Man we i singaot* trabol i kam long papa no mama blong hem, bambae yufala i mas kilim hem i ded.
18“Sipos i gat faet, nao wan man i stonem narafala man long ston, no i faetem hem, be narafala man ya i no ded, bambae yufala i no save panisim man ya. Sipos man ya we i karekil i stap ledaon long bed nomo, 19nao biaen i save girap, i save wokbaot wetem wokingstik, man ya we i kilim hem i mas faen long hem from we i lusum taem blong hem, mo i mas lukaot long hem gogo kasem we hem i kam oraet bakegen.
20“Sipos wan man i gat slef blong hem, nating we slef ya i man no i woman, nao i tekem stik, i kilim slef ya, we wantaem nomo slef ya i ded, bambae man ya i mas kasem panis. 21Be sipos slef ya i stap wan dei no tu dei, nao biaen i ded, man ya bambae i no mas kasem panis. Panis blong hem we i lusum slef blong hem, we i olsem mane blong hem, hemia bambae i naf.
22“Sipos sam man oli stap faet mo wan long olgeta i mestem, i kilim wan woman we i gat bel, nao woman ya i lusum pikinini blong hem, be i no karem narafala kil long bodi blong hem, man we i mekem samting ya i mas pem faen long man blong woman ya. Man blong woman ya bambae i save putum mak blong faen ya, mo sipos ol lida oli agri long hem, se i stret, man ya bambae i mas pem olsem. 23Be sipos man ya i mekem narafala samting long woman ya, panis blong man ya bambae i mas folem mak blong kil ya we woman ya i karem. Sipos woman ya i ded, man ya i mas ded. 24#Lev 24.19,20; Dut 19.21; Mat 5.38Sipos hem i lusum ae blong hem, man ya i mas lusum ae blong hem. Sipos i lusum tut blong hem, man ya i mas lusum tut blong hem. Sipos i lusum han blong hem, man ya i mas lusum han blong hem. Sipos i lusum leg blong hem, man ya i mas lusum leg blong hem. 25Sipos man i bonem woman ya long faea, man ya i mas bon long faea. Mo sipos woman ya i karekil, nating we blad i ron no i no ron, be man ya i mas karekil olsem tu.
26“Sipos wan man i gat slef blong hem, nating we slef ya i man no i woman, nao hem i kilim slef ya long ae blong hem, we i spolem ae blong hem, bambae hem i mas letem slef ya i go fri, olsem pei blong ae blong hem we hem i spolem. 27Mo sipos wan man i kilim slef blong hem nao i kilimaot wan tut blong hem, hem i mas letem slef ya i go fri olsem pei blong tut blong hem.
28“Sipos wan bul i sperem wan man, nao man ya i ded, bambae yufala i mas stonem bul ya gogo i ded. Be bambae yufala i no mas kakae mit blong hem, mo bambae yufala i no mas panisim man we bul ya i blong hem. 29Be sipos ol man oli save we bul ya i wael, i stap ronem man, mo oli talem plante taem finis long man blong hem be hem i no putum long fenis, nao bul ya i go sperem wan man i ded, bambae yufala i mas stonem bul ya i ded, mo yufala i mas stonem man ya blong hem tu i ded. 30Be sipos man blong bul ya i wantem pemaot laef blong hem blong i no ded, mo ol famle blong dedman ya i glad, bambae man ya i save mekem, be i mas pem long ful praes we oli putum. 31Sipos bul ya i sperem wan pikinini, nating we boe no gel, be yufala i mas folem ol tok we Loa ya i talem. 32Mo sipos bul ya i sperem wan slef, nating we slef ya i man no i woman, bambae man blong bul ya i mas pem fiftin taosen vatu*#21.32 Fiftin taosen vatu ya, long mane blong ol laen blong Isrel bifo, oli talem se toti silva mane we hemia i praes blong pemaot wan slef long taem ya. i go long masta blong slef ya, mo yufala i mas stonem bul ya tu i ded.
33“Sipos wan man i gat wan wel blong hem, be i no blokemgud, no i digim wan hol be i no blokem, nao wan buluk no wan dongki i foldaon, i go long hol ya, nao i ded, 34bambae man ya i mas pem anamol ya long man blong hem, be anamol ya bambae i stap long hem, i blong hem. 35Sipos bul blong wan man i kilim wan bul blong narafala man i ded, bambae tufala man ya i mas salemaot bul ya we i laef, nao tufala i mas seraot mane blong hem, mo bambae tufala i mas seraot mit blong bul ya tu we i ded. 36Be sipos ol man oli save we bul ya i wael, i stap sperem ol narafala anamol, be man blong hem i no putum long fenis, bambae hem i mas givim wan bul we i laef i go long man ya we bul blong hem i ded, be bul ya we i ded bambae i blong hem.”
Currently Selected:
Eksodas 21: OBBR
Highlight
Share
Compare
Copy
Want to have your highlights saved across all your devices? Sign up or sign in
Open Bislama Bible Revised
Bible Society of the South Pacific © 2012
