Eksodas 30
30
Olta blong Bonem Insens
(Eksodas 37.25-28)
1Nao Hae God i talem long Moses se, “Moses. Bambae yufala i mas wokem wan Olta bakegen long wud ya kasis,* blong bonem insens* long hem. 2Olta ya bambae i skwea, we bigfala blong hem i kasem klosap fifti sentemeta, mo hae blong hem bambae i kasem ova long naenti sentemeta. Antap long ol fo kona blong hem, bambae i gat samting olsem hon* blong buluk, we oli haf blong Olta ya nomo. 3Bambae yufala i tekem gol ya we i klin gud, i beswan, yufala i blokem top blong Olta ya wetem ol fo saed blong hem, mo ol fo hon blong hem we i stap long ol kona blong hem, long gol ya. Mo bambae yufala i wokem wan strap long gol i goraon long hem. 4Mo bambae yufala i wokem tu ring long gol, yufala i hangem tufala wanwan long tu saed blong hem, aninit long strap ya we i goraon long hem. Tufala ring ya i blong holem tu stik blong karem Olta ya. 5Mo bambae yufala i wokem tufala stik ya long wud ya kasis, mo bambae yufala i blokem tufala tu long gol. 6Nao bambae yufala i putum Olta ya long Rum ya we i Tabu, narasaed long kaliko ya saed i kam, we long narasaed kaliko ya saed i go, i gat Bokis ya we i Saen blong Promes* blong mi i stap, wetem Lid ya blong hem we i Ples we mi mi stap Tekemaot Sin blong yufala. Antap long Lid ya nao, hem i ples we bambae mi mi stap kam blong mit wetem yu long hem.#30.6: Tok blong vas ya i folem plante olfala Oltesteman long lanwis ya Hibru, be sam long ol olfala Oltesteman ya i talem olsem. Nao bambae yufala i putum Olta ya long Rum we i Tabu, narasaed long kaliko ya saed i kam, we long narasaed kaliko ya saed i go, i gat Bokis ya we i Saen blong Promes blong mi i stap long hem. Mo long ples ya nao bambae mi mi stap kam blong mit wetem yu long hem. 7Nao evri moning, taem Eron i stap go mekemrere ol laet insaed, bambae hem i tekem insens ya we i gat gudfala smel, i bonem long Olta ya. 8Mo long sapa, taem hem i kam blong laetem ol laet ya, bambae hem i bonem insens long Olta ya bakegen. Fasin ya we bambae yufala i bonem insens blong givim i kam long mi i blong stap olwe, bambae yufala i no mas letem wan samting i blokem. 9Mo bambae yufala i no save bonem narafala samting long Olta ya blong givim i kam long mi, olsem insens ya we mi mi talem se i no stret, no anamol, no kakae we yufala i wantem givim i kam long mi. Mo bambae yufala i no save kafsaedem waen long hem tu blong givim i kam long mi. 10Oltaem, wan taem long wan yia, bambae Eron i mas tekem smol blad blong anamol ya we hem i kilim blong tekemaot sin blong yufala, i mas kam putum long ol fo hon blong Olta ya blong mekem i klin long fes blong mi. Evri yia, bambae hae pris* i mas mekem olsem, mo fasin ya i mas stap olwe, gogo i no save finis. Mi mi Hae God, mo Olta ya bambae i mas tabu we i tabu, i mas blong mi olgeta.”
Mane we ol man oli givim i go long Hae God long taem blong sensas
11Nao Hae God i talem long Moses se, 12“Yufala i man blong mi, mo taem yu mekem sensas blong kaontem yufala, bambae yufala evriwan i mas pemaot laef blong yufala long mi, blong yufala i stap laef. Long fasin ya, trabol bambae i no save kasem yufala long taem ya we bambae yu stap kaontem yufala. 13#Eks 38.25,26; Mat 17.24Olgeta man ya we bambae yu kaontem olgeta, bambae olgeta wanwan oli mas givim tu handred fifti vatu* i kam long mi. Hemia wan presen we oli mas givim long mi. 14Taem yu mekem sensas, bambae yu mas kaontem olgeta man we oli gat twanti yia blong olgeta no ova long twanti yia, nao olgeta ya evriwan bambae oli mas givim mane ya. 15Taem yufala i givim mane ya long mi blong pemaot laef blong yufala, olgeta we oli rijman bambae oli no givim bigwan, mo olgeta we oli puaman bambae oli no givim smol, bambae yufala evriwan i mas givim sem mak nomo. 16Bambae yu tekem mane ya long olgeta, yu yusum blong lukaot long Haos Tapolen ya blong mi. Mane ya i blong pemaot laef blong yufala blong yufala i stap laef, nao oltaem bambae mi mi stap tingbaot yufala, mi stap blokem yufala, blong trabol i no kasem yufala.”
Bras Besin we ol pris bambae oli yusum blong wasem han mo leg blong olgeta long hem
17Nao Hae God i talem long Moses se, 18#Eks 38.8“Bambae yufala i mas wokem wan Besin long bras mo yufala i wokem ples blong hem tu long bras. Bambae yufala i putum Besin ya i stap long medel blong Haos Tapolen ya blong mi mo Olta ya blong Bonem Sakrefaes, mo bambae yufala i putum wota long hem. 19-21Nao taem Eron mo ol pikinini blong hem oli wantem kam insaed long Haos Tapolen ya, no oli wantem kam long Olta ya blong Bonem Sakrefaes blong givim i kam long mi, be fastaem bambae oli mas wasem han mo leg blong olgeta long Besin ya, blong oli klin long fes blong mi, nao bambae oli no ded. Hemia i wan rul we olgeta ya wetem olgeta we bambae oli kamaot biaen long olgeta, bambae oli mas holem oltaem gogo i no save finis.”
Tabu oel we i blong makemaot samting se i blong Hae God
(Eksodas 37.29)
22 #
Eks 37.29
Nao Hae God i talem long Moses se, 23“Bambae yufala i mas tekem ol samting ya we i gat gudfala smel, blong miksimap olgeta blong wokem tabu oel blong mi. Bambae yufala i tekem sikis kilo mir* we i no strong, i wota yet, mo tri kilo sinamon* we i gat gudfala smel, mo tri kilo kalamas* we i gat gudfala smel, 24mo sikis kilo kasia.* Bambae yufala i skelem olgeta long skel* we oli stap yusum long Haos blong mi, nao bambae yufala i tekem fo lita olifoel,* 25yufala i miksimap ol samting ya i go long hem olsem we yufala i stap wokem senta, blong mekem i kam tabu oel blong mi.
26“Bambae yu tekem oel ya, yu kafsaedem smol i go long Haos Tapolen ya blong mi we bambae mi stap mit wetem yufala long hem, mo long Bokis ya we i Saen blong Promes* blong mi. 27Bambae yu kafsaedem i go tu long Tebol ya blong Bred wetem olgeta samting blong hem, mo long Ples ya blong Putum Laet, wetem olgeta samting blong hem, mo long Olta ya blong Bonem Insens, we trifala i stap insaed long Haos Tapolen ya. 28Mo bambae yu kafsaedem i go long Olta ya blong Bonem Sakrefaes wetem ol samting blong hem, mo i go tu long Bras Besin ya wetem ples blong hem. 29Long fasin ya, bambae yu mekem ol samting ya oli tabu we i tabu, oli blong mi nomo. Nao sipos wan man no wan samting i tajem wan long ol samting ya, paoa blong samting ya bambae i spolem hem. 30Mo bambae yu kafsaedem smol i go long Eron mo long ol pikinini blong hem, mo yu putumap olgeta oli tabu, oli pris* blong mi, nao bambae oli stap wok blong mi. 31Bambae yu go talemaot long ol man ya, we mi mi talem se, ‘Oel ya i tabu, i blong mekem wok blong mi nomo. Bambae ol pris oli no save yusum narafala oel, oli mas yusum hemia nomo blong mekem wok blong mi, mo oli mas holem fasin ya olwe, gogo i no save finis. 32Bambae oli no save kafsaedem oel ya i go long ol man olbaot, mo bambae yufala i no save miksimap ol samting ya we i gat gudfala smel, blong wokem oel blong yufala long hem. Oel ya i tabu, i blong mi, mo bambae yufala i mas tinghevi long hem. 33Sipos wan man i mekem oel olsem we i blong hem, no i kafsaedem oel ya blong mi i go long man we i no pris, mi bambae mi no moa save kaontem hem, se i man blong mi.#30.33: Tok ya we i talem se “bambae mi mi no moa save kaontem hem, se i man blong mi”, i min se man ya bambae i ded.’ ”
Insens blong bonem long Olta
(Eksodas 37.29)
34-35Nao Hae God i talem long Moses se, “Bambae yufala i mas tekem ol samting ya we i gat gudfala smel, blong yufala i wokem insens* long hem blong bonem long Olta. Bambae yufala i tekem fo samting ya we i gat gudfala smel, we evriwan, yufala i tekem sem mak long hem, we wan haf, stakte,* mo wan haf, onika* mo wan haf, galbanam,* mo wan haf, frangkinsens* we i klin gud. Nao bambae yufala i miksimapgud olgeta blong wokem insens, olsem we yufala i stap wokem ol narafala paoda ya we yufala i stap bonem blong mekem ples i smel gud. Bambae yufala i miksimap wetem smol sol blong mekem i save stap longtaem, we i klin gud, i tabu, i blong mi. 36Nao bambae yu tekem smol haf blong insens ya, yu granem bakegen blong i kam smosmol olgeta, nao yu go insaed long Haos Tapolen ya blong mi, yu saksakem i go long graon long fran blong Bokis ya we i Saen blong Promes* blong mi, we i stap long ples ya. Insens ya i tabu we i tabu, i blong mi nomo, mo bambae yufala i mas tinghevi long hem. 37Bambae yufala i no save miksimap ol samting ya we i gat gudfala smel, blong wokem insens blong yufala long hem. Insens ya i tabu, i blong mi, mo bambae yufala i mas tinghevi long hem. 38Sipos wan man i wokem insens blong hem olsem, nao i bonem blong mekem ples i gat gudfala smel, bambae mi mi no moa save kaontem hem, se i man blong mi.#30.38: Yu luk futnot B long 30.33.”
Currently Selected:
Eksodas 30: OBBR
Highlight
Share
Compare
Copy
Want to have your highlights saved across all your devices? Sign up or sign in
Open Bislama Bible Revised
Bible Society of the South Pacific © 2012
