Levitikas 16
16
Dei blong Stretem Sin
1Nao biaen long dei ya we Hae God i kilim tufala pikinini ya blong Hae Pris Eron, from we tufala i tekem faea we i no tabu, tufala i leftemap long fes blong hem blong mekem wosip long hem, hem i toktok long Moses, brata blong hae pris ya. 2#Hib 6.19Hem i talem se, “Bambae yu talem long hae pris ya, se Rum ya we i Tabu we i Tabu insaed long Haos Tapolen blong mi, hem i no gat raet blong kam oltaem long hem, hem i save kam long hem long stret taem blong hem nomo, mo sipos hem i no obei long tok ya, bambae hem i ded from. Rum ya we kaliko i blokem, hemia ples we Bokis ya we i Saen blong Promes* blong mi i stap long hem, wetem Lid blong hem we i Ples we mi mi stap Tekemaot Sin blong yufala long hem, mo long Rum ya, antap long Lid ya, insaed long klaod we i stap kam long Rum ya, hemia nao ples we mi mi stap kamtru long yufala long hem. 3#Hib 9.7Mo sipos i stret taem blong hem i kam insaed long Rum ya, fastaem hem i mas mekem spesel sakrefaes long wan smol bul we i blong tekemaot sin blong hem, mo i mas mekem sakrefaes long wan man sipsip, we i blong bonem i bon evriwan blong mekem wosip long mi. 4Be hem i mas swim gud fastaem, mo i mas putum ol spesel klos blong hem. Hemia spesel sot blong hem, wetem bigfala kalsong blong hem, mo spesel strap blong hem, mo spesel hat blong hem, we olgeta evriwan, oli wokem long linen.* 5Mo yufala i mas tekem tu man nani mo wan man sipsip i kam, yufala i givim long hem blong i yusum tufala nani ya long spesel wosip we i blong tekemaot ol sin blong yufala evriwan, mo i mekem sakrefaes ya long man sipsip we blong i bonem i bon evriwan blong mekem wosip long mi.
6Nao hem i mas tekem bul ya i kam we i blong mekem spesel sakrefaes long hem blong tekemaot sin blong hem wetem ol sin blong famle blong hem. 7Mo hem i mas tekem tufala nani ya we i blong yusum long spesel wosip we i blong tekemaot ol sin blong yufala evriwan, nao i mas kam long doa blong yad blong Haos Tapolen blong mi. 8Long ples ya, bambae hem i mas sakem tufala spesel ston blong faenemaot se weswan long tufala nani ya i blong mi, mo weswan i blong go lus olgeta. 9Nani ya we tufala ston ya i soemaot se i blong mi, bambae hem i mas kilim blong mekem wan sakrefaes long hem blong tekemaot ol sin blong yufala evriwan. 10Mo nani ya we tufala ston ya i soemaot se i blong go lus olgeta, bambae hem i no kilim. Hem i mas tekem i kam long mi, blong soemaot se nani ya nao we bambae hem i ronemaot blong i go lus olgeta long draeples, we hemia i haf blong wok blong tekemaot ol sin blong yufala.#16.10: Narafala rod blong tanem tok blong vas ya i olsem. Mo nani ya we tufala ston ya i soemaot se i blong Asasel, bambae hem i no kilim. Hem i mas tekem i kam long mi, blong soemaot se nani ya nao we bambae hem i ronemaot i go long Asasel long draeples, blong tekemaot ol sin blong yufala i go longwe. Long tok ya, plante man oli ting se tok ya Asasel, hem i nem blong wan devel we i stap long draeples, we hem i prapa ples blong ol sin i go long hem.
11“Nao hem i mas tekem bul blong spesel sakrefaes ya we i blong tekemaot sin blong hem wetem ol sin blong ol famle blong hem, mo i mas kilim long ples ya. 12Nao hem i mas kam long Olta ya blong bonem sakrefaes, i mas tekemaot sam sakol faea we i laet, i fulumap long wan sensa,* mo i mas tekem insens* ya we i gat gudfala smel blong hem, we i makem long han blong hem we i fulap gud tu taem long hem, nao i mas kam insaed long Rum ya we i Tabu we i Tabu, narasaed kaliko ya i kam. 13Nao long fes blong mi, hem i mas sakem insens ya i go long faea long sensa ya, nao smok blong hem bambae i blokem Bokis ya wetem Lid blong hem we i Ples we mi mi stap Tekemaot Sin blong yufala long hem, blong hem i no save luk Lid ya, nao bambae i no ded from. 14Taem hem i kam insaed, hem i mas karem sam blad blong buluk ya, nao i mas pusum fingga blong hem i go long blad ya, mo i mas sakem smosmol antap long Lid blong Bokis ya. Mo hem i mas sakem blad ya smosmol bakegen seven taem long graon long fran blong Bokis ya.
15 #
Hib 9.12
“Nao biaen, hem i mas kilim nani ya we i blong mekem sakrefaes long hem blong tekemaot ol sin blong yufala, mo i mas tekem blad blong hem i kam insaed bakegen long Rum ya we i Tabu we i Tabu, mo i mas sakem smosmol i go long Lid blong Bokis ya mo long graon long fran blong Bokis ya, olsem we i mekem long blad blong buluk fastaem. 16Yufala i laen* blong Isrel,* mo Haos Tapolen blong mi i stap long medel blong ol haos tapolen blong yufala. Be yufala i stap mekem sin mo yufala i stap kam doti long fes blong mi, mo samting ya i stap mekem we Haos ya wetem Rum ya, tufala i stap kam doti long fes blong mi. Be long fasin ya, hae pris ya bambae i mekem Rum ya i kam klin bakegen long fes blong mi, mo biaen hem i mas mekem sem fasin long narafala haf blong Haos ya tu i kam klin bakegen. 17Mo long taem ya we hem i kam insaed long Rum ya blong mekem ol samting blong mekem hem wetem ol famle blong hem mo yufala evriwan i klin bakegen long fes blong mi, bambae i no mas gat man i stap long yad blong Haos Tapolen ya, gogo kasem taem we hem i finisim ol samting ya, mo i kamaot bakegen. 18Nao biaen, hem i mas tekem sam blad blong buluk ya wetem sam blad blong nani ya, i mas go long Olta blong Bonem Sakrefaes blong mekem Olta ya tu i klin. Hem i mas putum blad ya long ol fo hon* blong Olta ya, 19mo i mas pusum fingga blong hem i go long blad ya, i sakem smosmol seven taem i go long Olta ya, mo long fasin ya bambae hem i save tekemaot ol doti we i stap kam long Olta ya from ol sin blong yufala, i mekem i kam klin long fes blong mi.”
Narafala nani we i blong go lus olgeta
20Nao bakegen, Hae God i talem long Moses se, “Taem Hae Pris Eron i finisim olgeta samting ya blong mekem Rum ya we i Tabu we i Tabu wetem narafala haf blong Haos Tapolen blong mi, mo Olta blong Bonem Sakrefaes, trifala i klin bakegen long fes blong mi, biaen, hem i mas tekem narafala nani ya we i stap, i kam long mi. 21Nao hem i mas putum tufala han blong hem long hed blong nani ya, mo i mas talemaot olgeta rabis fasin blong yufala wetem ol fasin blong yufala we yufala i stap girap agens long mi, nao long fasin ya, bambae hem i putum olgeta sin ya i go long nani ya. Nao hem i mas go putum nani ya long han blong wan man we yufala i jusumaot finis, mo man ya i mas tekem nani ya i go long draeples, 22mo long ples ya, hem i mas letem i go fri. Nao nani ya bambae i karem olgeta sin ya blong yufala i go lus long ples we i no gat man long hem.
23 #
Esik 44.19
“Nao hae pris i mas kam insaed long yad blong Haos Tapolen blong mi bakegen, i mas tekemaot ol spesel klos ya we hem i werem blong kam insaed long Rum ya we i Tabu we i Tabu, i mas putumgud olgeta i stap long ples ya. 24Nao hem i mas swim long yad ya, mo i mas putum klos blong mekem wok blong hem bakegen. Nao hem i mas go afsaed bakegen, i mas kilim man sipsip ya we i blong hem wetem narafala man sipsip ya we i blong yufala, mo i mas bonem tufala long Olta ya blong mekem wosip long mi. Long fasin ya, bambae hem i mekem hem wetem yufala, yufala evriwan i klin long fes blong mi. 25Mo hem i mas tekem ol gris blong tufala anamol ya, i mas kam bonem long Olta ya. 26Nao man ya we i tekem nani i go long draeples i mas wasem ol klos blong hem, mo i mas swim, nao biaen hem i save kam insaed bakegen long ples ya we yufala i stap long hem.#16.26: Narafala rod blong tanem tok blong vas ya i olsem. Nao man ya we i tekem nani i go long Asasel long draeples i mas wasem ol klos blong hem, mo i mas swim, nao biaen hem i save kam insaed bakegen long ples ya we yufala i stap long hem. Mo yu luk Futnot P antap. 27#Hib 13.11Nao buluk ya wetem nani ya we hae pris i kilim tufala, mo we i tekem blad blong tufala i kam insaed long Rum ya we i Tabu we i Tabu blong tekemaot ol sin blong yufala, ol man oli mas tekem tufala wetem skin mo gat blong tufala, oli mas karemaot long ples ya we yufala i stap long hem, oli mas go bonem tufala long wan ples afsaed olgeta. 28Mo biaen, oli mas wasem ol klos blong olgeta, mo oli mas swim, nao oli save kam insaed bakegen long ples ya we yufala i stap long hem.”
Oltaem ol laen blong Isrel oli mas holem Dei ya blong Stretem Sin
29 #
Lev 23.26-32; Nam 29.7-11 Nao bakegen, Hae God i givim tok blong hem long Moses blong i talemaot long ol laen* blong Isrel.* Hem i talem se, “Ol rul blong Dei* ya blong Stretem* Sin we yufala i mas folem oltaem i olsem. Evri yia, long namba seven manis, long namba ten dei blong hem, bambae yufala wetem ol narafala man we oli stap wetem yufala, yufala evriwan i mas livim kakae blong yufala, mo yufala i no mas mekem wan wok nating. 30Long dei ya, hae pris i mas mekem ol samting ya we mi mi talem, nao bambae yufala i kam klin bakegen long fes blong mi. 31Dei ya i wan tabu dei blong yufala. Evri yia, long dei ya, i tabu blong yufala i kakae, mo i tabu blong yufala i mekem wok. Ol rul ya bambae yufala i mas holem oltaem nomo, gogo i no save finis. 32Mo sipos hae pris i ded, pikinini blong hem we oli kafsaedem tabu oel i go long hed blong hem blong makemaot hem se i man blong mi, mo oli putumap hem blong i jenisim papa blong hem, hem bambae i mas mekem ol wok ya, blong ol man blong mi bambae oli kam klin long fes blong mi bakegen. Hem i mas putum ol spesel klos ya blong hem, 33nao i mas mekem Rum ya we i Tabu we i Tabu, wetem narafala haf blong Haos Tapolen blong mi, mo Olta blong Bonem Sakrefaes, trifala i kam klin long fes blong mi, mo long semtaem, i mas mekem ol pris wetem yufala evriwan, yufala tu i kam klin long fes blong mi. 34Ol rul ya, bambae yufala i mas holem oltaem nomo, gogo i no save finis. Spesel wosip ya blong mekem man i klin long fes blong mi, bambae yufala i mas mekem wan taem nomo long wan yia, blong mekem yufala i kam klin long olgeta sin blong yufala.”
Nao hae pris i mekem olgeta samting ya we Hae God i talem long Moses.
Currently Selected:
Levitikas 16: OBBR
Highlight
Copy
Compare
Share
Want to have your highlights saved across all your devices? Sign up or sign in
Open Bislama Bible Revised
Bible Society of the South Pacific © 2012