Levitikas 23
23
Ol lafet blong mekem wosip long Hae God
1Nao Hae God i givim tok blong hem long Moses bakegen, 2blong i go talemaot long ol laen* blong Isrel.* Hem i talem se, “Mi mi makemaot ol lafet* blong yufala we bambae yufala i mas kam wanples blong mekem wosip long mi, mo yufala i mas holem ol dei blong olgeta oli tabu, oli dei blong lafet blong mi.”
Sabat dei
3 #
Eks 20.8-10; 23.12; 31.15; 34.21; 35.2; Dut 5.12-14 Nao hem i talem se, “Yufala i gat sikis dei blong mekem ol wok blong yufala, be yufala i mas tingbaot we namba seven dei, hem i Sabat* dei we i dei blong spel. Long dei ya, bambae yufala i no wok, be yufala i mas kam wanples blong mekem wosip long mi. Long olgeta ples we bambae yufala i stap long hem, be Sabat dei, hem i dei blong mi we yufala i mas ona long hem.”
Lafet blong Pasova wetem Lafet blong Kakae Bred we i No Gat Is long hem
(Namba 28.16-25)
4Nao Hae God i talem se, “Mi mi Hae God, mi God blong yufala. Ol narafala lafet ya blong yufala we mi mi makemaot, bambae yufala i mas talemaot olgeta long ol man long stret taem blong olgeta. Ol rul blong olgeta i olsem. 5#Eks 12.1-13; Dut 16.1,2Evri yia, long fas manis blong yia, long namba fotin dei blong hem, i stat long taem we san i go daon, bambae yufala i mas mekem Lafet* ya blong Pasova* blong ona long mi. 6#Eks 12.14-20; 23.15; 34.18; Dut 16.3-8Mo long namba fiftin dei blong manis ya, bambae yufala i mas statem Lafet ya blong Kakae Bred we i No Gat Is long hem, mo bambae lafet ya i stap go kasem seven dei. Long taem ya, i tabu blong yufala i kakae bred* we i gat is long hem. 7Fas dei blong ol seven dei ya, hem i wan tabu dei we i dei blong mi. Long dei ya, bambae yufala i no wok. Bambae yufala i mas kam wanples blong mekem wosip long mi. 8Mo evri dei long ol seven dei ya, bambae yufala i mas tekem ol presen blong yufala i kam blong bonem long Olta blong givim i kam long mi. Mo long namba seven dei blong hem, bambae yufala i no wok, bambae yufala i kam wanples bakegen blong mekem wosip long mi.”
Ol rul blong fas kakae blong garen
9Nao Hae God i talem long Moses se, 10-12“Taem yufala i go stap long kantri ya we mi bambae mi givim long yufala, mo yufala i wokem garen,* bambae yufala i mas tekem ol fas kakae blong garen blong yufala i kam, mo long nekis dei biaen long Sabat* dei blong Lafet* blong Kakae Bred we i No Gat Is long hem, yufala i mas givim ol kakae ya long pris. Nao pris ya i mas tekem, i leftemap long fes blong mi blong makemaot se i wan spesel presen we yufala i givim i kam long mi, blong mi mi save glad long yufala. Mo long dei ya, yufala i mas tekem wan smol man sipsip we i gat wan yia blong hem mo we i no gat wan samting i rong long bodi blong hem, blong mekem sakrefaes ya long hem we i blong bonem i bon evriwan blong mekem wosip long mi. 13Mo yufala i mas tekem wan lita waen, mo tu kilo flaoa we yufala i tantanem wetem olifoel,* yufala i putum tufala wetem sipsip ya, nao pris i bonem long Olta blong givim i kam long mi, mo gudfala smel blong hem bambae i mekem mi mi glad tumas long hem. 14Mo bambae i tabu blong yufala i kakae ol fas kakae ya blong garen, nating we i no tan, no we yufala i rusum, no we yufala i mekem bred* long hem, be i tabu blong yufala i kakae fastaem, gogo kasem we yufala i mekem sakrefaes ya long mi. Hemia i wan rul we olgeta we bambae oli stap kamaot biaen long yufala oli mas holem oltaem nomo, long olgeta ples we bambae oli go stap long hem.”
Lafet blong Tekemaot Kakae long Garen
(Namba 28.26-31)
15 #
Eks 23.16; 34.22; Dut 16.9-12 Nao Hae God i talem se, “Evri yia, i stat long dei ya we yufala i mekem spesel presen long mi long ol fas kakae blong garen,* bambae yufala i mas kaontem ol dei, 16mo long namba fifti#23.16: Olbaot long Niutesteman, ol man oli stap talem dei ya se dei blong Pentekos. dei blong hem, we hemia dei ya biaen long namba seven Sabat* dei, bambae yufala i mas tekem presen bakegen long narafala kakae blong garen blong givim i kam long mi. 17Bambae olgeta famle wanwan oli mas aot long ol ples blong olgeta, oli mas tekem tu bred* i kam, blong pris i leftemap long fes blong mi blong makemaot se i wan spesel presen blong mi. Tufala bred ya, oli mas mekem long fo kilo flaoa, mo oli mas putum is long hem. Hemia i presen blong mi long ol fas kakae blong garen blong yufala. 18Mo yufala i mas tekem seven smol man sipsip we olgeta evriwan i gat wan yia blong olgeta, mo wan smol bul mo tu man sipsip, we olgeta evriwan i no gat wan samting i rong long bodi blong olgeta. Ol anamol ya oli blong mekem sakrefaes ya we i blong bonem i bon evriwan, nao pris i mas bonem olgeta long Olta blong mekem wosip long mi, wetem wan presen long kakae blong garen mo wan presen long waen. Nao gudfala smel blong olgeta bambae i mekem mi mi glad tumas long hem. 19Mo yufala i mas tekem wan man nani blong mekem spesel sakrefaes ya blong tekemaot ol sin blong yufala, mo tu man sipsip we tufala i gat wan yia blong tufala blong mekem sakrefaes ya we pris i bonem haf, yufala i kakae haf blong soemaot we yufala i stap fren gud wetem mi. 20Nao pris bambae i tekem tufala bred ya wetem tufala sipsip ya, nao bambae i leftemap long fes blong mi blong makemaot olgeta se i wan spesel presen blong mi, we i tabu, i blong ol pris nomo blong oli kakae. 21Nao long dei ya, bambae yufala i no mas go mekem ol wok blong yufala, yufala i mas stap wanples blong mekem wosip long mi. Hemia i wan rul we yufala wetem olgeta we bambae oli stap kamaot biaen long yufala, yufala i mas holem oltaem nomo, long olgeta ples we bambae yufala i go stap long hem.
22 #
Lev 19.9,10; Dut 24.19-22 “Mi mi Hae God, mi God blong yufala, mo sipos yufala i go blong tekemaot kakae long garen blong yufala, bambae yufala i no mas tekemaot ol kakae long saed blong hem. Mo yufala i no mas gobak blong karem ol haf blong hem we yufala i mestem i stap. Yufala i mas livim ol samting ya i stap blong ol puaman mo ol narafala man we oli stap wetem yufala.”
Lafet blong Blu long Pupu
(Namba 29.1-6)
23Nao Hae God i talem long Moses se, 24“Evri yia, long namba seven manis long fas dei blong hem, bambae yufala i holem wan dei i tabu, we bambae yufala i spel long hem. Long dei ya, sipos yufala i harem pupu i singaot, bambae yufala evriwan i mas kam wanples blong mekem wosip long mi. 25Long dei ya, bambae yufala i no mas mekem ol wok blong yufala, yufala i mas spel, mo bambae yufala i mas mekem sakrefaes long mi we yufala i bonem long Olta blong givim i kam long mi.”
Dei blong Stretem Sin
(Namba 29.7-11)
26 #
Lev 16.29-34
Nao Hae God i talem long Moses se, 27“Evri yia, long namba seven manis, long namba ten dei blong hem, bambae yufala i mas mekem ol spesel wosip blong Dei* blong Stretem* Sin, blong mekem yufala i kam klin long fes blong mi. Long dei ya, bambae yufala i no mas kakae wan samting. Bambae yufala i mas kam wanples blong mekem wosip long mi, mo yufala i mas mekem sakrefaes long mi we yufala i bonem long Olta blong givim i kam long mi. 28Bambae i tabu blong yufala i mekem ol wok blong yufala long dei ya, from we yufala i mas mekem spesel wosip ya blong mekem yufala i klin long fes blong mi. 29Mo sipos wan man i kakae wan samting long dei ya, bambae mi mi no moa save kaontem hem, se i man blong mi#23.29: Yu luk futnot J long 7.20. 30Mo sipos wan man i mekem wok blong hem long dei ya, bambae mi mi kilim hem i ded. 31Long dei ya, i tabu blong yufala i mekem wan wok. Hemia i wan rul we yufala wetem ol pikinini blong yufala mo olgeta we bambae oli stap kamaot biaen long yufala, yufala i mas holem oltaem nomo, long olgeta ples we bambae yufala i go stap long hem. 32I stat long namba naen dei blong manis ya, long taem we san i godaon, bambae yufala i mas spel go kasem namba ten dei blong hem, long taem we san i godaon bakegen. Hemia i wan spesel dei blong spel blong yufala, we i tabu blong yufala i kakae wan samting.”
Lafet blong Wokem ol Wansaed Haos
(Namba 29.12-40)
33 #
Dut 16.13-15
Nao Hae God i givim tok blong hem long Moses bakegen, 34blong i go talemaot long ol laen* blong Isrel.* Hem i talem se, “Evri yia, long namba seven manis, long namba fiftin dei blong hem, bambae yufala i mas mekem Lafet* blong ol Wansaed* Haos, mo lafet ya i mas gohed go kasem namba seven dei blong hem. 35Long fas dei blong lafet ya, yufala i no mas mekem ol wok blong yufala, yufala i mas kam wanples blong mekem wosip long mi. 36Mo evri dei go kasem seven dei, bambae yufala i mas bonem ol sakrefaes blong yufala long Olta blong givim olgeta i kam long mi. Mo long namba eit dei blong hem, yufala i mas kam wanples bakegen blong mekem wosip long mi, mo blong mekem sakrefaes bakegen long mi. Hemia i dei blong mekem wosip long mi, mo i tabu blong yufala i mekem ol wok blong yufala long hem.
37-43“Evri yia, biaen long taem ya we yufala i tekemaot ol kakae long garen* blong yufala, long namba seven manis, i stat long namba fiftin dei blong hem, bambae yufala i mas mekem lafet ya, mo lafet ya i mas gohed go kasem seven dei. Fas dei blong hem i wan tabu dei we i dei blong spel blong yufala, mo namba eit dei tu bambae i dei blong spel blong yufala. Nao long fas dei ya, yufala i mas tekem ol nambawan frut long ol tri blong yufala, mo yufala i mas tekem ol lif blong pamtri,* mo ol han blong ol tri we i gat plante lif long hem, nao yufala i mas statem lafet ya. Mo yufala i mas ona long mi mo yufala i mas glad, go kasem seven dei. Evri yia, long namba seven manis, yufala i mas mekem lafet ya go kasem seven dei. Rul ya, yufala wetem ol pikinini blong yufala mo olgeta we bambae oli stap kamaot biaen long yufala, yufala evriwan i mas holem olwe, gogo i no save finis. Yufala i laen blong Isrel, mo yufala evriwan i mas slip long ol wansaed haos ya go kasem seven dei, blong olgeta ya we bambae oli kamaot biaen long yufala bambae oli save we mi mi Hae God, mi God blong yufala, mo mi mi tekemaot yufala long Ijip, mi tekem yufala i kam, mo long taem ya, mi mekem we yufala i stap slip long ol wansaed haos nomo.
“Hemia nao ol lafet we bambae yufala i mas mekem blong mekem wosip long mi mo blong ona long mi. Long ol lafet ya, bambae yufala i mas kam wanples blong mekem wosip long mi, mo blong bonem ol sakrefaes blong yufala. Hemia ol kakae we i blong bonem long Olta blong givim i kam long mi, wetem ol sakrefaes we i blong bonem i bon evriwan, mo ol presen long kakae blong garen, mo ol narafala sakrefaes, mo ol presen long waen we yufala i mas tekem i kam long ol dei ya wanwan blong ol lafet ya. Ol sakrefaes ya oli antap long ol narafala sakrefaes we yufala i stap mekem evri wik long Sabat* dei, mo oli antap tu long ol presen we yufala i stap givim long mi, mo ol sakrefaes we yufala i stap mekem blong fulumap ol promes blong yufala, mo ol presen ya we yufala i stap givim long mi long gladhat nomo blong yufala.”
44Nao Moses i go talemaot ol tok blong ol lafet ya long olgeta, olsem we Hae God i talem long hem.
Currently Selected:
Levitikas 23: OBBR
Highlight
Copy
Compare
Share
Want to have your highlights saved across all your devices? Sign up or sign in
Open Bislama Bible Revised
Bible Society of the South Pacific © 2012