Levitikas 6
6
1 #
Nam 5.5-8
Mo bakegen, Hae God i givim tok blong hem long Moses 2blong i go talemaot long ol laen* blong Isrel.* Hem i talem se, “Sipos wan long yufala i no wantem givimbak mane we wan long yufala i bin givim long hem blong i holemgud i stap, no i stilim wan samting blong wan long yufala, no i stap ravem wan long yufala, 3no i mekem strong tok long nem blong mi, se i no luk wan samting we wan long yufala i lusum, be i stap giaman nomo, i holem finis i blong hem, man olsem i mekem sin agens long mi. 4-5Sipos wan man i mekem wan long ol fasin ya, bambae hem i mas pem faen long man ya, mo i mas tekem olgeta samting ya we i bin stilim, i givim i gobak long man blong hem, no i mas pem long ful praes blong hem. Mo fasin blong makem faen blong man ya i olsem. Sipos praes blong samting ya we hem i stilim i faef taosen vatu, faen blong hem wan taosen vatu. 6Mo hem i mas tekem wan man sipsip no wan man nani we i no gat wan samting i rong long bodi blong hem, i mas kam givim long pris, blong pris i mekem sakrefaes long hem blong tekemaot sin blong man ya blong mekem hem i klin bakegen long fes blong mi. Pris bambae i makem praes blong anamol ya long sem mane we oli stap yusum oltaem long ples blong mekem wosip, mo praes blong hem i mas stret long praes blong samting ya we man ya i stilim. 7Nao pris i mas mekem sakrefaes long anamol ya blong tekemaot sin ya, mo long fasin ya mi bambae mi fogivim man ya, mi tekemaot sin blong hem.”
Sakrefaes we i blong bonem i bon evriwan
8Nao Hae God i givim tok blong hem long Moses 9blong i go talemaot long Eron wetem ol pikinini boe blong hem, blong makemaot ol fasin blong wok blong pris. Hem i talem se, “Moses. Sipos wan long olgeta i mekem sakrefaes ya we i blong bonem i bon evriwan, ol rul we bambae hem i mas folem i olsem. Sakrefaes ya blong sapa we i blong bonem i bon evriwan blong givim i kam long mi, bambae hem i mas stap long Olta go kasem long moning bakegen, mo pris ya i mas lukaot gud long faea blong Olta blong i stap laet gud long naet. 10Nao long moning, wan long olgeta i mas putum bigfala kalsong blong hem we oli wokem long gudfala kaliko ya linen,* mo i mas putum longfala klos blong hem we oli wokem long sem kaliko ya, nao i mas go long Olta ya, i tekemaot asis blong faea wetem ol gris we i stap ron i go long hem, i putum long saed blong Olta ya. 11Nao hem i mas go jenisim ol klos ya blong hem bakegen, mo i mas kam tekem asis ya, i karem i go bitim ol haos tapolen blong yufala, i go long wan ples afsaed we i klin long fes blong mi, nao i kafsaedem long ples ya. 12Mo faea ya long Olta, bambae olgeta oli no mas letem i ded, hem i mas laet olwe. Evri moning, bambae wan long olgeta i mas pusum sam moa faeawud i go long hem, mo i mas mekemrere sakrefaes ya blong moning we i blong bonem i bon evriwan, i putum antap long hem blong bonem, mo i mas bonem ol gris blong ol sakrefaes ya we i blong soemaot we man i stap fren gud wetem mi. 13Faea ya long Olta, bambae olgeta oli no mas letem i ded, hem i mas laet oltaem nomo.”
Presen long ol kakae blong garen
14-15Mo bakegen, Hae God i talem se, “Moses. Sipos wan man i wantem mekem presen long mi long kakae#6.14-15: Tok ya kakae blong garen, tok blong hem i stap long futnot D, long 2.1. blong garen,* ol rul we Eron olgeta bambae oli mas folem i olsem. Sipos wan man i tekem kakae blong garen blong hem, i granem i kam flaoa, i tekemaot beswan blong hem mo i tantanem wetem olifoel,* nao i tekem i kam blong givim i kam long mi, bambae wan long ol pris ya i mas karem i kam long fran blong Olta, blong givim i kam long mi. Nao hem i mas tekem smol haf blong flaoa ya long han blong hem, wetem insens* we man ya i karem i kam wetem, i bonem tufala long Olta blong soemaot we man ya i givim olgeta samting ya evriwan i kam long mi. Mo gudfala smel blong hem bambae i mekem mi mi glad tumas long hem. 16-17Nao haf blong flaoa ya we i stap i blong olgeta. Bambae olgeta oli save wokem bisket* long hem, be i tabu blong oli putum is long hem. Mo oli mas kakae bisket ya insaed long yad blong Haos Tapolen blong mi, from we ples ya i tabu. Kakae ya, mi mi makemaot long olgeta kakae we oli mas bonem blong givim i kam long mi, se i blong olgeta, mo hem i tabu we i tabu, i olsem ol haf blong sakrefaes ya we i blong tekemaot sin, mo ol haf blong spesel sakrefaes ya we i blong tekemaot sin blong man we i ravem mi, no i ravem narafala man.
18“Nao oltaem, ol pikinini boe blong Eron, wetem olgeta we bambae oli stap kamaot biaen long hem bambae oli save kakae haf blong ol presen we i blong bonem long Olta blong givim i kam long mi. Be kakae we man i givim finis i kam long mi, hem i tabu we i tabu, mo sipos narafala man i tajem kakae ya, bambae paoa blong kakae ya i spolem hem.”
19-20Mo bakegen, Hae God i givim tok blong hem long Moses blong i go talemaot long Eron wetem ol pikinini boe blong hem. Hem i talem se, “Moses. I stat long dei we Eron bambae i kam hae pris, hem i mas tekem wan kilo flaoa we i beswan, i seraot long tu haf, nao bambae i mekem sakrefaes long hem, we bambae i bonem haf long moning, haf long sapa. Hemia i presen long ol kakae blong garen we bambae hem i mas mekem evri dei.#6.19-20: Narafala rod blong tanem tok blong Hae God long Moses long tufala vas ya i olsem. Long dei ya we Eron bambae i kam hae pris, hem i mas tekem wan kilo flaoa we i beswan, blong i mekem sakrefaes long hem. Flaoa ya, i mas sem mak long presen long kakae blong garen we yufala i stap mekem evri dei, mo hem i mas seraot flaoa ya long tu haf, mo i mas bonem haf long moning, mo haf long sapa. 21Bambae hem i mas tantanem wetem olifoel, mo i mas kukum long fasin blong kukum kek, mo i mas brebrekem, nao i mas mekem sakrefaes long hem, we gudfala smel blong hem bambae i mekem mi mi glad tumas long hem. 22Mo ol laen* blong Eron we bambae oli kam hae pris bambae oli mas mekem sakrefaes ya oltaem, gogo i no save finis, mo bambae oli mas bonem i bon evriwan blong mekem sakrefaes long mi. 23I tabu blong pris i kakae haf blong wan presen long kakae blong garen, we wan long olgeta i tekem i kam blong givim i kam long mi. Ol presen olsem, bambae oli mas bonem i bon evriwan long Olta.”
Ol sakrefaes blong tekemaot sin
24Nao Hae God i givim tok blong hem long Moses, 25blong i go talemaot long Eron wetem ol pikinini blong hem, blong makemaot ol fasin blong wok blong pris. Hem i talem se, “Moses. Sipos wan man i wantem mekem sakrefaes blong tekemaot sin blong hem, ol rul we ol pris bambae oli mas folem i olsem. Sipos wan man i kilim wan anamol we i blong mekem sakrefaes ya, bambae hem i mas kilim klosap long Olta long saed blong hem i go long not, long ples blong kilim ol anamol blong mekem sakrefaes ya we i blong bonem i bon evriwan. Nao mit blong sakrefaes ya, hem i tabu we i tabu. 26From samting ya, wan long olgeta we bambae i bonem sakrefaes ya, hem i mas kakae mit ya insaed long yad blong Haos Tapolen blong mi nomo, from we ples ya nomo i tabu. 27Sipos wan man no wan samting i tajem mit ya, bambae paoa blong mit ya i spolem hem from we i tabu we i tabu. No sipos blad blong sakrefaes ya i go long klos blong wan man, hem i mas wasem klos ya long yad ya nomo. 28Sipos pris i kukum mit ya long wan graonpot, be biaen, hem i mas brebrekem graonpot ya. No sipos hem i kukum long wan sospen, be biaen, i mas skrasemgud, mo i mas wasemgud. 29Ol pris nomo wetem ol pikinini boe blong olgeta oli save kakae mit blong sakrefaes ya, from we hem i tabu we i tabu. 30Be sipos hae pris i tekem blad blong sakrefaes ya i kam insaed long Rum ya we i Tabu blong i mekem ol wok blong tekemaot sin, bambae i tabu blong olgeta i kakae mit blong hem. Bambae oli mas bonem olgeta mit ya evriwan.”
Currently Selected:
Levitikas 6: OBBR
Highlight
Copy
Compare
Share
Want to have your highlights saved across all your devices? Sign up or sign in
Open Bislama Bible Revised
Bible Society of the South Pacific © 2012