MATEO 24

Re Jesus ne sluzh xeydoo Dëdyuzh

(Mr. 13:1-2; Lc. 21:5-6)

1Chene wruu Jesus lenxeydoo Dëdyuzh ne sya Ne, wbig yra xpén Ne rluu men yra zegne nyeep ydoo guin lo Ne. 2Lex re Ne lo men:

―Nligue yna noo lo de, yra neree ne rwii de, ni te gye gyandet led ste gye, yrandxoo luzh.

Beey ne tsuu chene le gyëzlyu che wyob nitlo

(Mr. 13:3-23; Lc. 21:7-24; 17:22-24)

3Or ne zob Jesus gyey-Olivos, wbig yra xpén Ne lo Ne, laangue wnabdiiz men lo Ne, re men:

―Rlaan noo yzëët de gan pa or gak yra negwa. ¿Pezee gak beey ne tsuu chene le de che wyob chiid ste no chene le gyëzlyu che wyob nitlo?

4Wke Ne re Ne:

―Gugap kwent, rut ydeedet de si ykade de. 5Porke schiid ndal mén ne ykade, gue men: “Noo nak Crist”; no ndal mén gun men gan ykade men. 6No chene gon de diiz ne le dilroo nuu nesree nesrotee, ydxedet de, porke zenga nak ne rap degne gak; per let laadet ne nitlo gyëzlyu nga. 7Porke te nacion til yrup ste nacion, te gobyeren til yrup ste gobyeren, no ndal ledne tsuu gbiin no kesentyent yni lyu. 8Per chene gak yra neree, laa ne gyed selondxee gyelenles nga.

9’Cheguin ydekwent mén de lo mén ne yzakzi de, yket men de, no kwinyaan yrandxee mén de por ne nak de xpén noo. 10Chene gak yra neree, ndal mén ysalzaan ne rlaleedx men noo; ydekwentelsaa men xkompanyer men lo xtis no kwinyanelsaa men. 11Zuu ndal profet ne ykade no ndal mén gun men gan ykade men. 12Por tant ydaal ne mal, ndal mén gyanelsaadetre. 13Per le mén ne ysalzaandet xdiiz noo ydeblo ne ybán men, men guin nak ne gap gyelembán ne nunk luzhdet. 14Xdiznzoon Dëdyuzh ne kayakzëët lo de yra de, axtegue ne gakzëëto ydendxee gyëzlyu chen gaknan yrandxee méno; lex nitlo gyëzlyu.

15’Che wkaa profet-Daniel xkwent ne mbixleedx; por neguin chene kwii de zhoob ne mbixleedx lenxeydoo Dëdyuzh (men ne gool neree, ydee men kwento), 16men ne nuu Judea rap men degne yzhoon men gya men gyeey den. 17Men ne zob xtoo xyuu rap men degne yzhoon men, koodet men ne nuu lenxyuu men; 18men ne zu den ybereedet men tsaxii men xab men. 19¡Prob yra wnaa ne nakzhiin chene ydxiin dxe guin! ¡Prob yra wnaa ne rap mëëd ne roo dud! 20Gunab lo Dëdyuzh ne gakdet neree mëëw ne rak nal ni dxe ne rne be. 21Porke chene ydxiin dxe guin, kesentyent tsuu gyelenles ne nunk gardet tsuu kwlolne waa gyëzlyu, ni ybereedetro tsuu we. 22Belne ytsowndopdet Dëdyuzh tyemp ne gak yra neguin, rutlel yláádet; per stsowndop No por ne ryaan Ne yra xpén Ne.

23’Chene ydxiin dxe guin, belne nuu mén yna lo de yra de: “Gukwii, le Crist zu nee”, o “Gukwii, le Crist zu wa”, ylaleedxdet de men. 24Porke zuu ndal mén ne ykade, gue men laa men nak Crist, no zuu ndal mén ne ykade, gue men laa men nak profet; ylaa men gyelmilaguer no ylaa men logne yzee sak mén, chen ykade men mén no belne gun men gan, axtegue xpén Dëdyuzh ykade men. 25Le yra neree che nague noo lo de yra de. 26Por neguin belne yna men lo de: “Nan de gon, le Crist zu denbidx”, tsadet de; o belne yna men: “Nan de gon, le Crist nuu lenyuu gwa”, ylaleedxdet do. 27Porke chene chiid Men ne wdxiid wak Mén, zaknyoogoo, gako zegne rak chene rkabtsa ne reep nis nes ledne rlen ngbiz raknyoo we axtegue nes ledne raaz ngbiz. 28Ledne nex mawet, nyoo rdop ngolo.

Schiid Men ne wdxiid wak Mén

(Mr. 13:24-37; Lc. 21:25-33; 17:26-30, 34-36)

29’Zegne tesu yra dxe guin ne tsuu gyelenles, gaknkeb lo ngbiz, ni mëëw yzeniidetre, gyitxee yra mël ne ndxiib gyeybaa, no yni yrandxee ne nuu gyeybaa. 30Cheguin tsuu beey gyeybaa ne chiid Men ne wdxiid wak Mén. Yrandxee mengyëzlyu kesentyent goon men no swii men Men ne wdxiid wak Mén zëëd men lad bëw ydebxpoder men no ydebxgyelenzoon men. 31No yxaal men yra xangel men kwëz xangel men trompet kesentyent fwert, chen ytop xangel men yrandxee xpén men, men ne nuu ydendxee gyëzlyu.

32’Gukwii zegnak yag-ig: Chene rreeno ne rlen gyizh lo we, ryenengue de ne le mëëw ne rak neey che zëdyob. 33Zenga ke chene kwii de ne le yra neree che kayak, syenengue de ne le Men ne wdxiid wak Mén che zëdguex. 34Nligue yna noo lo de yra de ne antes ne guet yra mén ne nuu naaree, gak yra neree. 35Gyeybaa no le gyëzlyu snitlo we, per le xdiiz noo tesudet ne gako.

36’Per le dxe, le or ne gako, rut nandeto, ni angel ne nuu gyeybaa nandeto, ni XPee Dëdyuzh. Nonchee Dëdyuzh Xuz be nano.

37’Zegne wak tyemp ne wuu Noé, zenga ke gak chene chiid Men ne wdxiid wak Mén. 38Tyemp guin, antes ne gyab gyoroo gyoduxtee, ru mén, roo mén, rtsëlnya mén, rdee zhinzaap men rtsëlnya, axtegue ne le dxe ne wdee Noé lenbark wdxiin. 39Axtegue bet wadet lextoo men, tebegue wzelo wyab gyoroo gyoduxtee, weeyo men yrandxee men. Zenga ke gak chene chiid Men ne wdxiid wak Mén. 40Chene ydxiin dxe guin, ledne zu txup mgyeey den, te men gya, te men gyan. 41Zenga ke ledne kayuut txup wnaa, te men gya, te men gyan.

42’Por neguin list gugak yra de, porke nandet de gan pa dxe chiid Men ne wdxiid wak Mén. 43Gugaknan neree, ne belne nan xpexwaan te yuu gan pa or ydxiin ngbaan gyëël tee ngbaan kwan ngbaan lenxyuu men, sobna men ydeedet men si tee ngbaan kwan lenxyuu men. 44Zenga ke laa de yra de, list gugak; porke te dxe ne axtegue ni kambë́zdet de Men ne wdxiid wak Mén, chiid men.

Moswen no mosmal

(Lc. 12:41-48)

45’¿Txu nak te moswen? Laa men nga nak te men ne noze list zu ne rsan xpatron men yra xpén xpatron men lo men chen ydee men ne gu men or ne ryal gu men. 46Nzoon mos guin ne chene rberee xpatron men, le men kalaa dxiin ne ryal ylaa men. 47Nligue yna noo lo de yra de ne su xpatron men men ynebééy men yrandxee ne rap xpatron men. 48Per belne mal mos guin, nuu lextoo men ybereedetgue xpatron men, 49rzelo men rzakzi men semos men, le laa men ru rootee yra men menguu. 50Laatee te dxe ne axtegue ni kambë́zdet mos guin xpatron men, ydxiin xpatron men no te or ne axtegue ni nandet men ne ydxiin xpatron men. 51Lex kesentyent yzakzi xpatron men men, yxaal men men ledne ryal gya yra mén ne noze rkanlo wen; nga goon men axtegue guleey men.

Currently Selected:

MATEO 24: zpi

Highlight

Copy