MATEO 27

Wano mén Jesus lo Pilato

(Mr. 15:1; Lc. 23:1-2; Jn. 18:28-32)

1Chene wyenii lyu, wyan yra fxuz ne rnebééy lo yra fxuz diiz yra men men ne rnebééy lo men-Israel gan pezee yket men Jesus. 2Lex wliib men Ne zano men Ne, wdekwent men Ne lo Poncio Pilato ne nak gobernador.

Wet Judas

3Chene wii Judas ne wdekwent Jesus, ne le men che wal yket Jesus, ngyidet wuu lextoo Judas, wa Judas wacheree Judas yra galebchii med plat guin lo fxuz ne rnebééy lo yra fxuz no le lo men ne rnebééy lo men-Israel, 4re Judas:

―Noze xdol noo wye noo ne wnizkwent noo te mén ne bet xdoldet chen guet men.

Per wke men yra men, re men:

―¿Pe ylaa noo cheguin? ¡Xkwent de nga!

5Orguin wtxoon Judas yra med guin lenxeydoo Dëdyuzh, wruu Judas nga. Wa Judas wasee Judas duu yen Judas, wxii Judas yen Judas.

6Lex wtop yra fxuz ne rnebééy lo yra fxuz yra med guin, re men:

―Nuudet ysee be medree ledne ruu goon porke medree wezh wka men ne wnizkwent men ne guet.

7Orguin wuu men diiz yra men, kon med guin wka men xelyu mén ne rzhexkwaa ne yu, chen nga tsugyeer menzit. 8Por neguin axtegue naaree benak la lyu guin Lyu Ren. 9Zenga wak kumplir diiz ne re profet-Jeremías chene re men: “Wnëëz men yra galebchii med plat, lal ne re men-Israel ne non men, 10kon med guin wka men xelyu men ne rzhexkwaa ne yu zegne wkyeen Dëdyuzh noo.”

Le Jesus zu lo Pilato

(Mr. 15:2-5; Lc. 23:3‑5; Jn. 18:33-38)

11Chene zu Jesus lo gobernador-Pilato, wnabdiiz men lo Ne, re men:

―¿Pe laa de nak xerrey men-Israel?

Wke Ne re Ne:

―Zegwa we zeg na de.

12Or ne le yra fxuz ne rnebééy lo yra fxuz kakagyii Jesus yra men men ne rnebééy lo men-Israel, bet wkedet Ne. 13Lex re Pilato lo Ne:

―¿Pe rondet de yra ne kanii men por laa de?

14Per ni te diiz wkedet Ne. Por neguin kesentyent wzee wzak Pilato.

Wkyeen mén ne guet Jesus

(Mr. 15:6-20; Lc. 23:13‑25; Jn. 18:38–19:16)

15Lo lni nak xkoxtumber Pilato rselaa Pilato te mén ne nuu chegyiib, log mén ne guetee mengyëz. 16Cheguin nuu te men ne la Barrabás chegyiib; nesree nesrotee nuu diiz yra ne wlaa men. 17Chene le yra mén wdop, wnabdiiz Pilato lo yra mén, re Pilato:

―¿Txu rlaan de yselaa noo, Barrabás u Jesus ne rnii mén Crist?

18Re Pilato zenga porke wyenen Pilato ne por gyelembidye wdekwent men Jesus.

19Or ne le Pilato zob ledne rlaa Pilato gyelextis, wxaal xewnaa Pilato diiz lo Pilato, re men: “Ygaldet de mgyeey gwa, bet xdoldet men. Porke kesentyent ndxiin wnexgyëëlen noo negyëëlree por laa men.”

20Per le fxuz ne rnebééy lo yra fxuz no le yra men ne rnebééy lo men-Israel che wun men gan wguu men lextoo yrandxee mén chen ynab men ne yláá Barrabás, le Jesus guet. 21Lex wnabdiiz Pilato lo yra mén ste, re Pilato:

―¿Delo yrup ménree, txuzh rlaan de yselaa noo?

Wke men re men:

―¡Barrabás!

22Orguin re Pilato:

―¿Jesus ne rnii mén Crist naa, pagox ylaa noo men?

Wke men yra men, re men:

―¡Lo kruz gukaa men!

23Lex re Pilato lo men yra men:

―¿Penako? ¿Pe ne malzhe wlaa men?

Per lel mazre rderëz men, re men:

―¡Lo kruz gukaa men!

24Chene wyenense Pilato ne rukasdet mén xdiiz Pilato, sinke lel mazre rderëz men, wgoob Pilato nis, waa nya Pilato nes lo men yra men, lex re Pilato:

―Let noodet rap dol ne guet ménree ne bet xdoldet; laatee de nan.

25Lex wke men yrandxee men, re men:

―Led noo yra noo no le led zhiin noo gyab dol gwa.

26Orguin wselaa Pilato Barrabás; lex wkyeen Pilato soldad ne ydee soldad xkwent Jesus; chene wluzh wdee men xkwent Ne, wdekwent Pilato Ne lo men chen tsakaa men Ne lo kruz.

27Zhich guin zano men Ne ruyuloow; lex wtop men yrandxee sesoldad men wbiin men noze kbii Ne. 28Wluzh nga wboo men xab Ne, wnegak men Ne te lërnloo, 29no wzhexkwaa men te korongyëts wzoob meno xtoo Ne, no wguu men tebla bëg nyabëë Ne. Lex rzuzhib men lo Ne, rzhidxno men Ne, re men:

―¡Kesentyent non xerrey men-Israel!

30Rtxonxen men led Ne no rnëëz men bëg guin ne nzen Ne rkyits meno xtoo Ne. 31Chene wluzh wlaa men Ne zenga, wboo ke men lërnloo guin led Ne, wnegak ke men Ne xab Ne, lex zano men Ne chen ykaa men Ne lo kruz.

Wkaa mén Jesus lo kruz

(Mr. 15:21-32; Lc. 23:26-43; Jn. 19:17-27)

32Chene wruno men Jesus nga, nëz wtsëlo men te men-Cirene ne la Simon, lex wkyenfwers men mén guin weey men xekruz Ne.

33Chene wdxiin men ledne la Gólgota (Gólgota rna, Berxtoo Mengut.), 34nga wdee men bin ne noots ne kesentyent nla nyoo Ne; per chene wzeen No, nadet Ne nyoo No.

35Chene che wkaa soldad Ne lo kruz, wa soldad pwest gan txuzh yganen xab Ne. Zenga wak kumplir diiz ne zëëd lo xgyiich Dëdyuzh ledne re: “Wgyizlsaa men xab noo no wa men pwest gan txu yganeno.” 36Lex wzob men nga, wbinnap men Ne. 37Wkaa men leter xtoo xekruz Ne gan pe kwentzhe ka Ne nga, re leter guin: “Laa Jesus ne nak xerrey men-Israel nee.”

38No wkaa men txup ngbaan lo kruz, te men wkaa lo kruz ne zob koo Ne ladbëë, le ste men wkaa lo kruz ne zob koo Ne ladbëg. 39Yrandxee mén ne rdee nga, rdxii xtoo men, rninyaan men lo Ne, 40re men:

―Laa de nga nlitla xeydoo Dëdyuzh no tsonegue gbiz nlep ke do ste, orrenaa guselaa de laake de. Belne XPee Dëdyuzh nak de, gugyët lo kruz.

41Zenga ke rzhidxno yra fxuz ne rnebééy lo yra fxuz Ne yra men maxter ley no le yra men men ne rnebééy lo men-Israel, re men:

42―Wselaa ménree ste mén, per rundet men gan yselaa men men laake men. Belne laa men nak xerrey men-Israel, gyët men lo kruz naa chen ylaleedx be men. 43Belne wkalo men Dëdyuzh, yselaa Dëdyuzh men nabes belne nli ryaan Dëdyuzh men; porke re men XPee Dëdyuzh nak men.

44Axtegue no ngbaan ne ka lo kruz ne zob koo Jesus wninyaan lo Jesus.

Le Jesus wet

(Mr. 15:33-41; Lc. 23:44‑49; Jn. 19:28-30)

45Or ne rwen ngbiz, waknkeb ydendxee gyëzlyu, axtegue beytson wzëë wyenii ste. 46Zeg beytson ke wkarëzyaa Jesus, re Ne:

―Elí, Elí, ¿lama sabactani? ―Diizree rna: Dëdyuzhe, Dëdyuzhe, ¿penak wboleedx de noo?

47Gwrol men ne ndxin nga, ne won men wkarëz Ne, re men:

―Profet-Elías rkarëz men.

48Orgueguin noze rzhoon te ke men ne zu nga, waxii men tebla zhiil, wgaz meno kon binaguer; lex wzoob meno xtoo te bëg, wtee meno ruu Jesus chen goo Ne binaguer. 49Per le stebëd men re:

―Zeka men, gan pe schiid Elías yselaa men.

50Lex wkarëzyaa Jesus ste, wetgue Ne. 51Orgueguin wrëznzeli kortin ne ka lenxeydoo Dëdyuzh, gwrooltee wako, no wni lyu, no waktxupla yra gyeroo, 52no wyal baa; ndal xpén Dëdyuzh ne che wet wban. 53Chene le Jesus che wban, wruu mén guin lenbaa, wdee men lenlgyëz-Jerusalén, ndal mén wii men.

54Ne wii kapitan yra men soldad ne ndxin rapkwent Ne ne kani lyu no le yra neguin ne kayak, kesentyent wdxe men, re men:

―Nli ne XPee Dëdyuzh nak ménree.

55Ndal wnaa ne wrunal Jesus axtegue Galilea no ne wun xyudar Ne, ndxin axtegue nat rwii men yra neguin ne kayak. 56Lad wnaa guin zu Mli Matlen no zu Mli ne nak xnaa Jacob yrup Jacob Xeb no le xnaa xpiin Zebedew.

Le Jesus wgueedx

(Mr. 15:42-47; Lc. 23:50‑56; Jn. 19:38-42)

57Or ne che rzëë, wdxiin te menrik ne la Xeb ne nak men-Arimatea no mén guin nak te xpén Jesus. 58Wa mén guin lo Pilato wnab men xkwerp Jesus. Lex wkyeen Pilato soldad ne ydekwent soldad Ne lo men. 59Orguin wkakwent men Ne, wtxël men Ne te saben ndaa. 60Lex walu men Ne te lenbakweb ne che wkeen men txugye. Wluzhse wtsëë men rubaa kon te gyeroo, lex sya men. 61Le Mli Matlen no le ste Mli wzobchee nes rubaa guin.

Wbinnap soldad ruxbaa Jesus

62Ne wra gyëël guin, dxe guin nak dxe ne rne men-Israel, wdop fxuz ne rnebééy lo yra fxuz yra men men ne nak farisew, wa men lo Pilato, 63re men:

―Dechey, wnileedx noo ne chene benak mbán ménro ne nan rkade, re men ne chene gyon gbiz, yban ke men. 64Por neguin gukyeen men ne kwinnap xbaa men axtegue ne gyon gbiz, tegue tsa xpén men gyëël gweey men men, lex gue men lo mén: “Wban men.” Belne ylaa men zenga, mazre ykade men mén ke ne primer.

65Lex re Pilato lo men yra men:

―Le soldad ndxin wa; gutsano soldad chen kwinnap soldad rubaa wen wenendxee zegne rlaan de.

66Lex wa men watsëchiich men rubaa, wguu men te beey rubaa. Zhich guin wsan men soldad wbinnap rubaa.

Currently Selected:

MATEO 27: zpi

Highlight

Copy