Imamat 13
13
Huku-hukumu mangale si-siḏi eno'o
1Ma JOU 'o kanau ra Musa re 'a Harun ma betongo so'o ne: 2<<Na'o matengo 'ai eno'o 'i roboso bolo poloḏo-poloḏo, bolo 'o gigianga tai lese ma eno'o ga'a ḏa enanga 'i dadi si-siḏi eno'o, unanga balasu sigasa toma 'imam 'a Harun bolo tai ngowa'a nau'u matengo ga'a dadi 'imam. 3Re 'imam balasu 'o disa waro si-siḏi eno'o. Na'o toma ngi'i gena-ge 'ai gogo 'i dadi buḏo re ma si-siḏi lebe ngido reo eno'o, ma si-siḏi gena-ge si-siḏi eno'o. 'Imam balasu 'o siajele toma ngowa'a gena-ge re ngowa'a Israel mo-moini balasu 'aḏi waro ḏi'i mangale unanga gena-ge 'o dadi najis. 4Mada'a na'o tai eno'o gena-ge pa'i gigianga buḏo re 'i lebe ngido ua reo eno'o, re 'ai gogo 'i buḏo ua, 'imam balasu 'o siwola i'a ngowa'a gena-ge ma di'ara wangere tumudingi. 5Toma wangere ma soi tumudingi, 'imam balasu dadunu 'o disa waro unanga gena-ge moju. Na'o mete'e 'imam 'ai 'akala ma sanga, si-siḏi gena-ge so'o gena moju re 'i rarata ua, 'imam balasu 'o siwola i'a ngowa'a gena-ge ma di'ara wangere tumudingi moju. 6Toma wangere ma soi tumudingi, 'imam balasu dadunu 'o disa waro moju unanga gena-ge. Na'o 'ai eno'o ga'a si-siḏi wa oḏi'i i'a mulai jolo re 'i rarata ua, 'imam balasu 'o siajele toma ngowa'a gena-ge re ngowa'a Israel mo-moini balasu 'aḏi waro ḏi'i mangale unanga gena-ge dadunu ro dadi 'ofi moju ra Ma JOU 'ai momina sababu si-siḏi gena-ge pa'i poloḏo-poloḏo ḇato. Ngowa'a gena-ge balasu 'a 'uju 'ai pakeanga re unanga dadunu ro dadi 'ofi mode-mode'e ra Ma JOU 'ai momina. 7Na'o 'imam ro siajele unanga ro dadi 'ofi moju ra Ma JOU 'ai momina, mada'a na'o 'ai si-siḏi dadunu 'i rarata moju, unanga ngowa'a balasu dadunu 'u sigasa toma 'imam, re 'o golo'o 'imam dadunu 'o disa waro 'ai si-siḏi. 8'Imam balasu dadunu 'o disa waro si-siḏi eno'o re na'o ma si-siḏi dogo 'i rarata, 'imam balasu 'o siajele toma ngowa'a gena-ge re ngowa'a Israel mo-moini balasu 'aḏi waro ḏi'i mangale unanga gena-ge 'o dadi najis, sababu si-siḏi gena-ge 'i dadi si-siḏi eno'o.
9Wakutu matengo i'a sanga si-siḏi eno'o, unanga gena-ge ananga balasu 'u sigasa toma 'imam, 10re 'imam 'u disa waro. Na'o ngowa'a gena-ge 'ai eno'o 'i roboso re buḏo re 'ai gogo toma ngi'i gena-ge 'i dadi buḏo, re ḏi'i roboso gena-ge 'i pici, 11enanga gena-ge si-siḏi eno'o tai lese. Dadi 'imam balasu 'o siajele toma ngowa'a gena-ge re ngowa'a Israel mo-moini balasu 'aḏi waro ḏi'i mangale unanga gena-ge 'o dadi najis. Paralu ua siwola i'a unanga moju, sababu mode-mode'e unanga 'o najis. 12Na'o 'imam 'o oḏi'i 'ai si-siḏi eno'o ma buḏo ri ngadolo tai sae'e re tai rou, 13re 'imam 'o disa waro mode-mode'e 'ai lese rimoi re si-siḏi eno'o gena-ge ri rarumu tai lese, re 'ai eno'o ri buḏo mo-moini, 'imam balasu 'o siajele toma ngowa'a gena-ge re ngowa'a Israel mo-moini balasu 'aḏi waro ḏi'i, mangale unanga gena-ge ro dadi 'ofi, sababu 'ai lese 'i buḏo mo-moini, re unanga 'o dadi 'ofi ra Ma JOU 'ai momina. 14Mada'a na'o eno'o ma ngomu'u ri pici, unanga ro dadi najis. 15Re 'imam balasu 'o disa waro unanga gena-ge 'ai eno'o ga'a 'i pici re 'o siajele toma ngowa'a gena-ge re ngowa'a Israel mo-moini balasu 'aḏi waro ḏi'i mangale unanga gena-ge 'o dadi najis. Eno'o ma ngomu'u ga'a 'i pici, enanga 'i najis, sababu enanga gena-ge si-siḏi eno'o. 16Mada'a na'o ngowa'a gena-ge 'ai eno'o ma ngomu'u ga'a 'i pici, enanga ri la singadolo 'i dadi buḏo moju, unanga balasu dadunu 'o talaḏi 'imam moju. 17'Imam balasu dadunu 'u parikisa moju. Na'o 'ai eno'o gena-ge 'i dadi buḏo, 'imam balasu 'o siajele toma ngowa'a ga'a si-siḏi gena-ge re ngowa'a Israel mo-moini balasu 'aḏi waro ḏi'i mangale unanga gena-ge 'o dadi 'ofi moju; unanga mode-mode'e ro 'ofi ra Ma JOU 'ai momina.
18Na'o matengo 'ai lese rema bu'u ga'a ri la, 19mada'a toma ngi'i gena-ge 'i dadi roboso ga'a buḏo bolo gigianga ga'a 'i buḏo ko-kolili, ngowa'a gena-ge balasu 'a sijumu toma 'imam. 20Re imam balasu 'o disa waro gena-ge. Na'o gena-ge lebe ngido tai eno'o re 'ai gogo 'i buḏo, 'imam balasu 'o siajele toma ngowa'a gena-ge re ngowa'a Israel mo-moini balasu 'aḏi waro ḏi'i mangale unanga gena-ge 'o dadi najis, sababu si-siḏi eno'o 'i konyo toma bu'u ma dara. 21Mada'a wakutu 'imam dadunu 'o disa waro unanga gena-ge 'ai eno'o ga'a si-siḏi wa oḏi'i i'a mulai jolo re 'i rarata ua, 'imam balasu siwola i'a unanga ma di'ara wangere tumudingi. 22Na'o si-siḏi gena-ge ganapu 'i rarata, 'imam balasu 'o siajele toma ngowa'a gena-ge re ngowa'a Israel mo-moini balasu 'aḏi waro ḏi'i mangale unanga gena-ge 'o dadi najis, sababu unanga 'ai si-siḏi eno'o. 23Mada'a na'o 'ai si-siḏi gena-ge rema enanga moju re 'i rarata ua, enanga pa'i bu'u ma ḇokeke, re 'imam balasu 'o siajele toma ngowa'a gena-ge re ngowa'a Israel mo-moini balasu 'aḏi waro ḏi'i mangale unanga gena-ge 'o dadi 'ofi ra Ma JOU 'ai momina.
24Na'o matengo 'o sanga nyaboto sababu 'o ro'u re eno'o 'i pici kara 'ai nyaboto ma la-la'eme 'i dadi buḏo, bolo buḏo ko-kolili, 25'imam balasu 'o disa waro ngi'i gena-ge, re na'o ma gogo 'i buḏo re ma nyaboto lebe ngido reo eno'o, enanga gena-ge si-siḏi eno'o, ga'a 'i konyo toma nyaboto ro'u ma dara gena-ge, 'imam balasu 'o siajele toma ngowa'a gena-ge re ngowa'a Israel mo-moini balasu waro ḏi'i mangale unanga gena-ge 'o dadi najis. 26Mada'a na'o ma gogo toma ngi'i gena-ge 'i buḏo ua, re 'i lebe ngido reo eno'o, re eno'o ma bageanga ga'a si-siḏi mulai 'i jolo, ngowa'a gena-ge imam balasu 'u siwola i'a ma di'ara wangere tumudingi. 27Toma wangere ma soi tumudingi, 'imam balasu 'o disa waro, na'o 'ai si-siḏi gena-ge 'i rarata tai eno'o, 'imam balasu 'o siajele toma ngowa'a gena-ge re ngowa'a Israel mo-moini balasu waro ḏi'i mangale unanga gena-ge 'o dadi najis ra Ma JOU 'ai momina sababu enanga gena-ge si-siḏi eno'o. 28Mada'a 'ai si-siḏi ma ngi'i ma duhu 'i ngali ua re 'i rarata ua mada'a mulai 'i jolo, 'imam balasu 'o siajele ngowa'a gena-ge re ngowa'a Israel mo-moini ḏi'i balasu 'aḏi waro mangale unanga gena-ge 'o dadi 'ofi ra Ma JOU 'ai momina sababu si-siḏi gena-ge pa'i ro'u ma ḇokeke ḇato. 29Na'o na-nau'u bolo we-were'a matengo 'aḏi sanga si-siḏi toma sae'e bolo toma okoko ma eno'o, 30'imam balasu 'a disa waro si-siḏi gena-ge. Na'o si-siḏi toma ngi'i gena-ge lebe ngido reo eno'o, rema gogo ga'a 'i sulara re 'alusu, ḏua 'imam balasu 'o siajele toma ngowa'a gena-ge re ngowa'a Israel mo-moini balasu waro ḏi'i mangale unanga gena-ge 'o dadi najis. Enanga gena-ge 'o kaḏuḏi, sababu si-siḏi eno'o toma sae'e bolo toma okoko ma eno'o. 31Na'o 'imam 'o disa waro manga si-siḏi gena-ge mada'a 'i ngido ua tamanga eno'o, manga gogo 'i kotu'u riwara toma ngi'i gena-ge, ananga, imam balasu yau siwola i'a ma di'ara wangere tumudingi. 32Toma wangere ma soi tumudingi, 'imam balasu dadunu disa waro si-siḏi toma ngi'i gena-ge. Na'o si-siḏi gena-ge 'i rarata ua, re ma gogo ua ga'a 'i sulara, re si-siḏi gena-ge 'i ngido ua reo tamanga eno'o. 33Gena ḏua, ngowa'a gena-ge balasu ya ḇukuku manga kukumu, mada'a toma ngi'i ga'a si-siḏi gena-ge ya ḇukuku yoḏu'u, kara 'imam balasu 'o siwola i'a ananga gena-ge ma di'ara wangere tumudingi moju. 34Toma wangere ma soi tumudingi 'Imam balasu dadunu 'o disa waro moju bageanga rema si-siḏi. Na'o ma si-siḏi 'i rarata ua, re 'i lebe ngido ua toma eno'o ma dara, 'imam balasu 'o siajele toma ngowa'a gena-ge re ngowa'a Israel mo-moini balasu 'aḏi waro ḏi'i mangale unanga gena-ge 'o dadi 'ofi. Gena ḏua, unanga balasu 'o 'uju 'ai pakeanga re 'o dadi 'ofi mode-mode'e ra Ma JOU 'ai momina. 35Mada'a togumu i'a imam ro siajele, unanga gena-ge 'o dadi 'ofi, unanga 'ai si-siḏi dadunu 'i rarata moju, 36'imam balasu dadunu 'a disa waro moju. Na'o 'ai si-siḏi mode-mode'e 'i rarata, paralu riwara 'imam balasu 'o disa ma gogo ga'a 'i sulara, sababu mode-mode'e unanga 'o dadi najis. 37Mada'a na'o mete'e 'imam 'ai 'akala ma sanga, si-siḏi gena-ge 'i ngali ua mada'a ma tero, re 'ai gogo kotu'u 'i konyo toma ngi'i gena-ge re si-siḏi gena-ge ri la re unanga ro 'ofi. Sababu gena-ge, 'imam balasu 'o siajele toma ngowa'a gena-ge re ngowa'a Israel mo-moini balasu 'aḏi waro ḏi'i mangale unanga gena-ge ro 'ofi ra Ma JOU 'ai momina.
38Na'o na-nau'u matengo bolo we-were'a matengo 'age rema gigianga buḏo tamanga eno'o, 39'imam balasu 'o disa waro gigianga gena-ge. Na'o enanga gena-ge 'i buḏo madutu ua, enanga gena-ge pa'i kaḏuḏi, ananga gena-ge 'aḏi 'ofi ra Ma JOU 'ai momina. 40Na'o na-nau'u 'ai utu 'i wuru'u singadolo 'o dadi peala, unanga gena-ge 'o 'ofi moju ra Ma JOU 'ai momina. 41Na'o na-nau'u matengo 'o peala tai sae'e ma biono, unanga 'o 'ofi moju ra Ma JOU 'ai momina. 42Mada'a toma peala gena-ge bae toma sae'e bae toma sae'e ma biono 'age rema si-siḏi i buḏo ko-kolili, dadi gena-ge si-siḏi ma la ua 'i konyo tai sae'e bolo tai sae'e ma biono gena-ge. 43Dadi, 'imam balasu 'o disa waro ngowa'a gena-ge, re na'o 'i konyo roboso buḏo ko-kolili, ma duhu ma tero sa'olo si-siḏi eno'o toma lese, 44unanga gena-ge ngowa'a ga'a sanga si-siḏi eno'o, unanga 'o dadi najis. Dadi, 'imam balasu 'o siajele toma ngowa'a gena-ge re ngowa'a Israel mo-moini balasu 'aḏi waro ḏi'i mangale unanga gena-ge 'o dadi najis sababu 'ai si-siḏi gena-ge tai sae'e.
45Matengo i'a 'o sanga si-siḏi eno'o, unanga balasu 'o mapake pakeanga 'aci-'acingi, re sieanga i'a 'ai utu 'i kawusa unanga balasu 'a taku 'ai madanga ma re'u rai giama re 'o poa'a, <<Najis, ngoi to najis.>> 46Ma di'ara unanga 'o sanga ma si-siḏi eno'o, unanga 'o najis moju. Sababu gena-ge, unanga balasu 'o tegoro siwola i'a toma bangsa Israel manga suyu'u ma daeraha ma ḏuḏunu.
'Atoranga-'atoranga mangale keho toma pakeanga
47Na'o toma pakeanga 'age rema keho bae si'a'a toma ḇa'a wol, bolo si'a'a ḇa'a lenan, 48bae ḇa'a wol bolo lenan ga'a 'i singuwele bolo sidini bae toma haiwani ma eno'o, bolo toma 'oru ḇato ga'a si'a'a reo haiwani ma eno'o, 49re na'o ma nana'o ma tana'a 'i 'ijo-'ijo, bolo 'i ko-kolili toma baranga gena-ge, enanga ri keho. Dadi baranga ma dutu unanga balasu 'a sijumu toma 'imam. 50'Imam balasu 'o disa waro keho ma nana'o kara 'a siwola i'a ma di'ara wangere tumudingi. 51Toma wangere ma soi tumudingi 'imam balasu dadunu 'o disa waro keho moju, na'o nana'o gena-ge 'i dasala toma baranga, keho gena-ge ga'a 'i siwejere baranga. Dadi baranga gena-ge 'i dadi najis. 52Sababu gena-ge, baranga gena-ge 'imam balasu 'a tau'u sababu ma keho ri dasala dadi balasu 'i singi-ngiranga reo u'u.
53Mada'a na'o mete'e 'imam 'ai disa waro ma keho gena-ge 'i dasala ua toma baranga gena-ge, 54unanga 'o soma'a ngowa'a 'aḏi 'uju baranga gena-ge kara 'imam 'a siwola i'a ma di'ara wangere tumudingi. 55Re 'uju togumu i'a, 'imam dadunu disa waro ma keho gena-ge moju, re ma nyonyata ma keho gena-ge 'i dasala ua re ma duhu 'i ngali ua, dadi enanga 'i najis. Kalaha ma keho gena-ge pa'i toma biono bolo toma ḏuḏunu ḇato, 'imam balasu 'o tau'u baranga gena-ge. 56Mada'a na'o mete'e 'imam 'ai disa waro, ma keho gena-ge mulai jolo re unanga balasu 'o 'acingi re sisupu ma bageanga ga'a rema keho toma baranga gena-ge. 57Mada'a na'o ma keho gena-ge dadunu rema enanga moju toma baranga gena-ge, enanga ma nana'o keho 'i rarata, dadi imam balasu 'a tau'u. 58Mada'a na'o 'uju togumu i'a, ma keho gena-ge ri iranga, balasu dadunu 'a 'uju soi moi moju, kara enanga ri dadi 'ofi ra Ma JOU 'ai momina. 59'Atoranga-'atoranga gena-ge mangale keho toma pakeanga ga'a 'i si'a'a reo lenan, bolo wol, ga'a 'i singuwele bolo sidini, bolo 'oru ḇato ga'a si'a'a reo eno'o, la 'imam nyengara 'o sitantukanga enanga gena-ge 'i najis bolo 'ofi ra Ma JOU 'ai momina. >>
Currently Selected:
Imamat 13: SAJ
Highlight
Share
Compare
Copy
Want to have your highlights saved across all your devices? Sign up or sign in
2025 Indonesian Bible Society (LAI)