Dolabololo 14
14
1Were'a ga'a 'akala soro'unu, munanga gena-ge mo simomi'i 'ami wala,
mada'a were'a ga'a haga, munanga gena-ge mo maparego 'ami wala masiretene.
2Ngowa'a ga'a manga 'ahu ma ngo'omo 'i boloto, ananga gena-ge 'aḏi silamo'o re mojongo Ma JOU.
Mada'a ngowa'a ga'a manga 'ahu 'i seko-seko, ananga gena-ge 'aḏi sipa-pake ua Unanga.
3Ngowa'a haga manga madanga ma dara ma tero sa'olo ja-ja'olo ga'a 'i ca'olo manga ḏuḏunu masiretene,
mada'a ngowa'a 'akala soro'unu manga 'uḏu ma betu'u 'i saolo ananga.
4Na'o kama sapi ua, guḏa ma hasili repe ua,
mada'a reo sapi guḏa ma hasili 'i pai-pai'i masala.
5Sakisi ga'a setia 'o kanau ba-banari re sa-sakala ua,
mada'a sakisi ga'a te-tero ua pa'i nyengara 'o kanau sa-sakala.
6Ngowa'a ga'a situ-tuhu 'akala soro'unu, ananga gena-ge 'aḏi disa 'akala soro'unu mada'a ya sanga ua,
mada'a ngowa'a remanga wo-waro ga'a ya sinyanyasele, ananga gena-ge 'aḏi gapanga sanga do-doto'o.
7Awa no ma'u ḏagilomu reo ngowa'a ga'a 'aḏi emono wo-waro,
sababu manga wo-waro 'i cua tamanga 'uḏu ma betu'u.
8Ngowa'a pahe ga'a 'akala soro'unu, ananga 'aḏi sahe manga ngo'omo masiretene,
mada'a ngowa'a ga'a 'aḏi emono wo-waro 'aḏi sanga sihaga reo manga haga masiretene.
9Ngowa'a haga 'aḏi sice-ceka'a jou-jou di'a singi-ngiranga ḏosa,
mada'a ngowa'a ga'a manga 'ahu 'i boloto, 'aḏi sijumu manga 'akala ma la-la.
10'Akala re sinyingara 'i waro enanga ma susa masiretene,
re ngowa'a lelegu ya basono ua enanga ma sanangi.
11Ngowa'a kajahatana manga wala ḏuanga i'a 'i ru'ata,
mada'a ngowa'a ga'a manga 'ahu 'i boloto, ananga gena-ge manga wala 'i ganapu dadi lamo'o.
12'Age ngo'omo ga'a ngowa'a 'aḏi ta'ajiri boloto,
mada'a enanga ma dere 'i tagi toma ngi'i se-sengene.
13Kalaha ngowa'a 'aḏi manye-nyelo'o, ananga manga 'akala re sinyingara ma dara 'i kangela,
re manga roanga 'i ma ḏogumu tala, 'aḏi duka re balisa.
14Ngowa'a ga'a 'aḏi celolo manga 'akala re sinyingara toma ngo'omo boloto, ḏuanga i'a 'aḏi sanga ma hasili mete'e manga ga'a ma jira,
mada'a ngowa'a la-la ḏuanga i'a 'aḏi sanga ma hasili mete'e manga ga'a ma la-la.
15Ngowa-ngowa'a ga'a 'ahu ma wo-waro rimoi i'a mai ua, 'aḏi ngaku demo ga'a ananga 'aḏi 'isene,
mada'a ngowa'a ga'a 'akala soro'unu, 'aḏi totoho la-la manga ḏo-ḏagi.
16Ngowa'a 'akala soro'unu 'aḏi ma'istiari re 'aḏi malalo'o toma kajahatana,
mada'a ngowa'a ga'a 'aḏi emono wo-waro, manga ga'a 'i mete'e manga mau mada'a 'aḏi basono salamata.
17Ngowa-ngowa'a ga'a 'aḏi ruta caiti, ananga 'aḏi 'a'a 'ori i'a ma haga,
mada'a ngowa'a ga'a 'akala soro'unu 'aḏi sijumu manga 'akala ḇanyo.
18Ngowa-ngowa'a ga'a 'ahu ma wo-waro rimoi i'a mai ua, ananga gena-ge 'aḏi dadi haga,
mada'a ngowa'a ga'a 'akala soro'unu, ananga 'aḏi masidolumu rema wo-waro.
19Ngowa'a ma jira ḏuanga i'a 'aḏi mapagara manga biono ngadolo toma tana'a toma ngowa'a manga 'akala re sinyingara ma la-la,
ngowa'a kajahatana ḏuanga i'a 'aḏi magolo-golo'o toma ngowa'a loasa re banari manga ngalana.
20Kalaha manga ḏagilomu masiretene, ngowa'a ma dinga'unu ua ya'u emono,
mada'a ngowa'a rema-enanga manga ḏagilomu repe.
21Ngowa-ngowa'a ga'a 'aḏi sipa-pake ua manga ḏagilomu, gena-ge 'i ḏosa,
mada'a ngowa'a ga'a 'aḏi sijumu manga 'akala la-la toma ngowa'a ma dinga'unu ua, ananga 'aḏi bara'utungu.
22Ngowa'a ga'a manga rancana cira, ḏuanga i'a 'aḏi iranga ngo'omo,
mada'a ngowa'a ga'a manga rancana la-la, ananga ngowa'a ya'u dadalara re ya'u ngaku.
23Toma makutale ma dara rema hasili,
mada'a ngowa'a pa'i demo-demo ḇato 'i sigasa kuranga re ngadolo ua.
24Ngowa'a 'akala soro'unu manga lastari gena-ge manga pahe,
mada'a ngowa'a ga'a 'aḏi emono wo-waro, ananga gena-ge 'aḏi sanga pa'i haga pai-pai'i.
25Sakisi ga'a setia, ananga 'aḏi sisalamata ngowa'a lelegu manga 'ahu,
mada'a ngowa-ngowa'a ga'a 'aḏi siare sa-sakala, ananga gena-ge ga'a tukanga sihaga.
26Ngowa-ngowa'a ga'a 'aḏi silamo'o re mojongo Ma JOU, Unanga ya'u saolo,
re ḏi'i manga ngowa-ngowa Unanga manga ngi'i di'a 'aḏi sanga saolo.
27Ngowa-ngowa'a ga'a 'aḏi silamo'o re mojongo Ma JOU, Unanga gena-ge manga 'ahu ma cimi,
singadolo ngowa'a 'aḏi sanga silalo'o toma 'ori i'a ma jira.
28Toma rayata manga repe, gena-ge ma 'olana 'ai mulia,
mada'a na'o rayata 'i cua pamarenta 'i ru'ata.
29Ngowa'a ga'a 'akala ḇanyo ngowa'a pahe remanga wo-waro ma repe di'a 'ahu,
mada'a ngowa'a ga'a ruta caiti, ananga gena-ge 'aḏi sijumu manga haga.
30'Akala ḇanyo 'i sisanangi lese,
mada'a 'akala kaleḏa 'i si'a'a obongo rapo'o.
31Ngowa'a ga'a sikangela ngowa'a ma dinga'unu ua, ananga gena-ge sije-jengere Ma Jou'ongu Madutu, Unanga gena-ge ga'a ro sidadi ananga,
mada'a ngowa'a ga'a sijumu 'akala re sinyingara ma la-la toma ngowa-ngowa'a ma dinga'unu ua, ananga gena-ge 'aḏi silamo'o Ma Jou'ongu Madutu.
32Ngowa'a kajahatana 'aḏi eta'a sababu kajahatana masiretene,
mada'a ngowa'a loasa re banari 'o sanga saolo sababu manga 'akala re sinyingara loasa re banari.
33'Akala soro'unu 'i tegoro toma ngowa'a remanga wo-waro ga'a ya sinyanyasele,
mada'a ngowa'a ga'a 'aḏi emono wo-waro 'aḏi nana'o enanga ua tamanga 'akala re sinyingara ma dara.
34Banari 'i sikau'u bangsa ma lomanga,
mada'a ḏosa 'i sicamari bangsa ma lomanga.
35'Olana 'o sanangi toma budaka ga'a remanga 'akala ma la-la,
mada'a unanga 'ai duruta 'i nga'unu toma ngowa'a ga'a sipula'a mara'a.
Currently Selected:
Dolabololo 14: SAJ
Highlight
Share
Compare
Copy
Want to have your highlights saved across all your devices? Sign up or sign in
2025 Indonesian Bible Society (LAI)