Dolabololo 23
23
1Wakutu ngana no ḏegoro oromo ma'u mete'e ngowa'a la-lamo'o,
tailako la-la ino ngo-ngoromo ga'a no oromo.
2Sigare golowa tani camala,
na'o 'ani nyafusu lai lamo'o.
3Nyafusu awa ngo-ngoromo ga'a lai sa'i,
gena-ge pa'i mau tai'i sihaga ngana ḇato.
4Awa no munara singadolo masisengene i'a la dadi ngowa'a rema-enanga,
sieanga ḇato maksudu gena-ge.
5Wakutu ngana aro oḏi'i harata, enanga 'i iranga,
sababu kage-kage enanga gena-ge rema kalatu'u,
ḏua 'i soloro toma diwanga ma tero namo kareba.
6Oromo awa toma ngowa'a tata-cira 'ai wala,
nyafusu awa 'ai ngo-ngoromo ga'a lai sa'i.
7Sababu unanga gena-ge ma tero ngowa'a
ga'a 'aḏi marekene tamanga 'akala ma dara.
Unanga 'o kanau ra ngana,<<Oromo re ka'e ḏua,>>
mada'a unanga 'ai 'akala re sinyingara 'i boloto ua ra ngana.
8Ngo-ngoromo tani madanga, ngana na singunanga,
re 'ani demo ga'a lai rousu ngana na siwaro i'a ua.
9Kanau awa toma ngowa'a ga'a 'aḏi emono wo-waro manga ngau'u,
sababu ananga ya sipa-pake ua 'ani demo ga'a sanga 'akala ma la-la.
10No jujuru awa tana'a ma bati ma siḏa,
re no ra-rabasa awa guḏa toma ngowa 'olo daga.
11Sababu Matengo lao te'e ga'a 'o tuusu ananga,
Unanga gena-ge Ma JOU ga'a 'O simete'e ananga, Unanga 'o lawana ngana.
12Sitailako 'ani 'akala re sinyingara toma do-doto'o,
re 'ani ngau'u 'i si'isene demo-demo rema wo-waro.
13Mojongo awa ni doto'o ninga ngowa'a,
ananga 'aḏi sengene ua na'o ngini na'u ca'olo reo ja-ja'olo.
14Ngini nu ca'olo reo ja-ja'olo,
mada'a ngini ni sisalamata manga nyawa toma ngowa'a senge-sengene ma ngi'i.
15Hei 'ari ngowa'a nau'u, na'o ngana 'akala soro'unu,
'ari 'akala re sinyingara 'i maroanga ḏi'i.
16'Ari 'akala re sinyingara 'i maroanga,
na'o 'ani madanga 'i kanau sa-sakala ua.
17Awa 'ani 'akala re sinyingara 'i taleana toma ngowa'a baraḏosa,
mada'a ni silamo'o re mojongo Ma JOU tau-taunu.
18Sababu 'ani 'ahu toma biono i'a rema enanga,
re 'ani ngo-nganono 'i iranga ua.#Dol. 24:14
19Hei 'ari ngowa'a nau'u, no 'isene, re no dadi ngowa'a 'akala soro'unu,
sitalaḏi 'ani 'akala re sinyingara toma ngo'omo ma banari.
20Ma'u ḏagilomu awa reo ngowa'a ga'a 'eto-'etolo
bolo da-danata.
21Sababu ngowa'a ga'a 'eto-'etolo re da-danata, ḏuanga i'a 'aḏi dadi ngowa'a ma dinga'unu ua,
re ngowa'a ga'a nyanyaḏi otu ḏuanga i'a 'aḏi mapake baju 'aci-'acingi.
22No 'isene 'ani ḇaḇa sababu na'o unanga ua, ngana no cua,
re awa no je-jengere 'ani ngina wakutu mo piri'i ḏua.
23No tibo do-doto'o ga'a ba-banari re na wu'unu awa;
so'o gena ḏi'i 'akala soro'unu, do-doto'o re wo-waro lai ngido.
24Ḇaḇa matengo 'o monere na'o 'ai ngowa'a 'aḏi loasa re banari,
unanga gena-ge ḏuanga i'a 'o maroanga na'o 'ai ngowa'a nau'u 'akala soro'unu.
25Sieanga i'a 'ani ḇaḇa re ngina 'aḏi maroanga,
sieanga i'a 'ani ngina mo mone-monere, munanga ga'a siḏe-ḏegoro i'a ngana.
26Hei 'ari ngowa'a nau'u, no pula'a 'ani 'akala re sinyingara ra ngoi,
sieanga i'a 'ani la'o 'i sanangi no oḏi'i 'ari 'ahu ma ḏo-ḏagi.
27Sababu were'a su-sudala ma tero tana'a tuso'o ma ngido,
re were'a nakala ma tero sumu ga'a peletoro.
28Ananga gena-ge 'aḏi dola'aku ngowa'a ma tero tukanga ra-rabasa,
re 'aḏi si'a'a na-nau'u ma repe 'aḏi setia ua tamanga were'a.
29Ngowa'a ga'a 'aḏi poa'a, ngowa'a ga'a 'aḏi kuḏubungu.
Ngowa'a ga'a 'aḏi ma'u rubutu, ngowa'a ga'a 'aḏi masillio.
Ngowa'a ga'a 'aḏi sanga bodito ma sababu cua, ngowa'a ga'a manga la'o 'i kolili.
30Gena-ge ananga ga'a 'aḏi ḏegoro ka'e 'anggur singadolo utu golona,
re ananga 'aḏi sapolo di'a ka'e 'anggur capuru.
31Awa tatamo 'anggur, awa 'ani 'akala re sinyingara 'i daene sababu 'anggur 'i kolili,
re 'i jama-jamanga toma sawo'o ma dara,
re 'i 'uisi osama toma jolo'oro rema rasa ga'a sa'i masala,
32mada'a togumu i'a 'i tubu'u ma tero cuku'u,
re wusu ma bisa ma tero cuku'u ma jira.
33Gena ḏua 'ani la'o oḏi'i 'ori i'a hera-heranga,
re 'ani madanga 'i kanau demo-demo ga'a waro ma gogare ua.
34Ngana ma tero ngowa'a toma momoku ma dara,
ma tero ngowa'a toma kapala ma ngasu'u ma re'u.
35Ngana ḏuanga i'a no kanau: <<Ngowa'a 'aḏi tutu'u ngoi, mada'a ta basono ua ma si-siḏi.
Ngowa'a 'aḏi ca'olo ngoi, mada'a ta basono ua.
Wakutu 'ari getolo 'i iranga, ngoi ḏuanga i'a to disa 'anggur moju!>>
Currently Selected:
Dolabololo 23: SAJ
Highlight
Share
Compare
Copy
Want to have your highlights saved across all your devices? Sign up or sign in
2025 Indonesian Bible Society (LAI)