Dolabololo 28
28
1Kalaha ngowa'a 'aḏi kunu'i ua, ngowa'a kajahatana 'aḏi wiḏi,
mada'a ngowa'a loasa re banari, 'aḏi basono ogoro ma tero singa ra-ramasa ie.
2Sababu ma'u lawana toma bangsa ma dara, 'age rema bi-biri'i manga repe;
mada'a sababu ngowa'a pahe matengo rai wo-waro re 'ai 'akala soro'unu,
bangsa gena-ge 'i dadi te'e re tahana.
3Bi-birir'i ga'a ma dinga'unu ua ga'a 'aḏi sikangela ngowa-ngowa'a lamahana,
ma tero besa'a lamo'o 'i sijira gutu'u.
4Ngowa'a ga'a 'aḏi si'u'ua Ma Jou'ongu Madutu 'ai hukumu, ananga 'aḏi sihie-hie ngowa'a kajahatana,
mada'a, ngowa'a ga'a 'aḏi mete'e Ma Jou'ongu Madutu 'ai hukumu, ananga 'aḏi lawana ngowa'a kajahatana.
5Ngowa'a ma jira 'aḏi sahe ua 'adili,
mada'a ngowa'a ga'a 'aḏi makutale mete'e Ma JOU, ananga gena-ge 'aḏi sahe 'adili mode-mode'e.
6Lebe rousu, ngowa'a ma dinga'unu ua ga'a manga de'oso re ḏegoro kama rapu ua,
reo ngowa'a rema-enanga ga'a manga de'oso re ḏegoro 'i cira.
7Ngowa'a ga'a mete'e Ma Jou'ongu Madutu 'ai hukumu, gena-ge ngowa'a nau'u remanga wo-waro ga'a ya sinyanyasele,
mada'a ngowa'a ga'a 'aḏi marimoi reo ngowa'a danata, gena-ge ngowa'a ga'a 'aḏi sipula'a mara'a ma ḇaḇa.
8Ngowa'a ga'a 'aḏi dadi ngowa'a rema-enanga sababu 'aḏi sanga pipisi ma bunga pai-pai'i, #Sup. 22:25; Im. 25:36
ananga 'aḏi lomu gena-ge di'a ngowa'a ga'a manga 'akala re sinyingara 'i la-la toma ngowa'a ma lamahana.
9Ngowa'a ga'a 'isene ua Ma Jou'ongu Madutu 'ai hukumu,
ananga manga nyiata Ma Jou'ongu Madutu ḏi'i 'o basono katere wawaḏu.
10Ngowa'a ga'a baja, ngowa'a ga'a manga 'ahu 'i boloto, la 'aḏi mete'e 'ahu ma jira,
ananga masiretene 'aḏi sado tamanga jojoḏi masiretene, #Mat. 18:6; Mrk. 9:42; Luk. 17:2
mada'a ngowa'a ga'a manga de'oso re ḏegoro kama rapu ua,
ananga ḏuanga i'a 'aḏi sanga warisi ma rousu.
11Ngowa'a rema-enanga 'aḏi basono tala manga diri, ananga 'akala soro'unu,
mada'a ngowa'a ma dinga'unu ua, remanga wo-waro ga'a ya sinyanyasele, ananga 'aḏi nana'o mode-mode'e ngowa'a rema-enanga manga tabeata.
12Na'o ngowa'a loasa re banari 'aḏi siḏagi parenta, ngowa'a repe 'aḏi monere,
mada'a na'o ngowa'a kajahatana 'aḏi siḏagi parenta, ngowa'a repe 'aḏi magogono.
13Ngowa'a ga'a gogono manga ḏosa, ananga 'aḏi sanga 'utungu ua tamanga 'ahu ma dara.,
mada'a ngowa'a ga'a mangaku manga ḏosa re 'aḏi maḏibo toma ngo'omo boloto, ḏuanga i'a 'aḏi basono Ma JOU 'ai 'akala ma la-la.
14Bara'utungu ngowa'a ga'a silamo'o re mojongo Ma JOU tau-taunu,
mada'a ngowa'a ga'a manga 'akala re sinyingara 'i te'e, ananga ḏua 'aḏi eta'a toma bodito.
15Na'o ngowa'a kajahatana 'aḏi sikangela ngowa'a ma dinga'unu ua,
ma tero singa ga'a 'i poa'a bolo beruang ga'a 'i kunu'i ananga.
16Ngowa'a lalamo'o matengo ga'a kai wo-waro lai ngido ua di'a 'ahu, 'o sikangela ngowa'a lelegu,
mada'a ngowa'a ga'a 'aḏi emono 'ori i'a ma foriki, ananga ḏuanga i'a 'aḏi sanga 'ahu lai kiḏanga.
17Ngowa'a ga'a sisengene ngowa'a lelegu, ananga 'aḏi basono ngowa'a ya'u kunu'i tau-taunu singadolo manga 'ahu ma ḏo-ḏogumu;
Awa ngana no riono ananga.
18Ngowa'a ga'a 'manga de'oso re ḏegoro kama rapu ua, ananga ḏuanga i'a 'aḏi sanga salamata.
ngowa'a ga'a manga 'ahu 'i seko-seko, ti'ara ua 'aḏi eta'a.
19Ngowa'a guḏa ga'a cufala, ḏuanga i'a 'aḏi sanga ngo-ngoromo lai repe,
mada'a ngowa'a ga'a koya reo 'ori i'a ma pake ua, ananga ḏuanga i'a 'aḏi dadi ngowa'a ma dinga'unu ua.
20Ananga ga'a ngowa'a ya'u ngaku, ḏuanga i'a sanga barakati repe,
mada'a ngowa'a ga'a mau caiti dadi ngowa'a rema-enanga, 'aḏi wiḏi yoḏu'u tamanga hukumana.
21Rousu ua no pa'ala kaci moi;
mada'a mau sanga pipisi ceka'a ua, ngowa'a 'aḏi sito-to'u hukumu.
22Ngowa'a ga'a tala'a 'aḏi mau capati dadi ngowa'a rema-enanga;
ananga 'aḏi waro ua mangale ḏuanga i'a 'aḏi dadi ngowa'a ma dinga'unu ua.
23'Aguna ga'a tukang ḇangata ngowa'a, ḏuanga i'a ngowa'a ya'u dadalara,
reo ananga ga'a masa-sakala sitoro ngowa'a.
24Ngowa'a ga'a 'aḏi tori'i ma ḇaḇa re ngina manga 'ori i'a rana, re 'aḏi ta'ajiri gena-ge ḏosa ua,
ananga masiretene ma tero ngowa'a to-tori'i ḏi'i. m
mada'a ngowa'a 'aḏi ngaku ra Ma JOU, ḏuanga i'a 'aḏi sanga pai-pai'i.
25Ngowa'a danata pa'i sibaolo ma'u go'oro,
mada'a ngowa'a ga'a ngaku Ma JOU, ḏua 'aḏi sanga pai-pai'i.
26Ngowa'a ga'a ngaku manga diri masiretene, ananga gena-ge ngowa'a ga'a 'aḏi emono wo-waro,
Mada'a ananga ga'a 'aḏi 'ahu mete'e 'akala soro'unu, ananga ḏuanga i'a 'aḏi salamata.
27Ngowa'a ga'a 'aḏi riono ngowa'a ma dinga'unu ua, ananga kama kuranga ua,
mada'a ngowa'a ga'a 'aḏi sioḏi'i ua ngowa'a ma dinga'unu ua manga paralu, ananga ḏuanga i'a 'aḏi sanga kutuki.
28Na'o ngowa'a kajahatana 'aḏi siḏagi parenta,
ngowa'a 'aḏi magogono;
na'o ngowa'a kajahatana 'aḏi iranga,
ngowa'a loasa re banari 'aḏi ma dogo repe.
Currently Selected:
Dolabololo 28: SAJ
Highlight
Share
Compare
Copy
Want to have your highlights saved across all your devices? Sign up or sign in
2025 Indonesian Bible Society (LAI)