NƲNƲLI 18
18
Pɔlʋ yɛ -ma Kolɛtɩ mö
1-Bha -gömö, Pɔlʋ -sɔ-ɔ -ma Atɛnɩ 'wʋ, 'n ɔ ji-e -ma -glɔ wa la-a Kolɛtɩ mö. 2-Ma ɔ ghlɩ-a 'zwiföyi -bhlʋ wa la-a Akilasɩ, ɔ -yɛ ɔ 'nglɔ Plisilɩ 'sɔ. Dʋdʋ wa la-a Italie 'bhuguglɔ 'kadʋ wa la-a Ghlɔmö, wa 'bhö-ö -ma 'lili'i. -Wʋʋ yɛ-a, -maa dʋdʋnyininyɔ wa la-a Klodɩ nɛ 'zwiföa 'bhuo 'wlʋ Ghlɔmöö 'gbë 'mö. Akilasɩɛ 'bhë, dʋdʋ wa la-a Pɔɔ -ma wa gwalɩnɩɔ -bha. 'N Pɔlʋ jua-a yawʋ nyini. 3Libho -bhlʋ ɔ -nyʋa 'sɔ -ji la-aa yɛ, 'n ɔ ji-e -ma wa 'ligbë'ë sɛ glɩ-ɩ. -Pëpïpangwa la -bha, 'n wa nʋnʋɔ 'mö-a debhlʋ libho. 4Sa -gwlɛnɩzlɩ nyini-a, -sɩbha Pɔlʋ mö la-a -ma 'zwiföaa -Lagɔbudu'u, 'n ɔ slɛmanɩ-a -Lagɔwɛlɩɛ de 'zwiföa -yɛ glɛköa 'sɔ dlɩ 'mö. 5Silasɩ -yɛ Timote 'sɔ 'bhö-ö 'mö-a Masedʋanɩ wa ji-a, Pɔlʋ 'nɩ nʋ la-a 'mö kabölibho 'n ɛ nɩ -Lagɔwɛlɩɛ 'nyizee gbagbʋ glɩnɩ. 'N ɔ nyɛ-a 'zwiföa 'dɩ naa, Puanyɔ -ɔ -Lagɔ -sa-a -bha mɔ-ɔ -yɛ-a Zezwi. 6-Ma ɩ 'mö, yuo yɛ 'zwiföa -wʋɔ-a köbha 'le 'n wa gbanɩɔ-a wɛlɩɛ yɛ-ɛ, 'n Pɔlʋ ji-a ɔ 'mökali 'mö vu. Ɔ nɛ -bha wa de naa: “A -yɛ 'mʋnɔ a 'bhïë gbʋ -bha. Ɩ nɩ'ɩ-a 'mö na-a 'wʋ yɩlɩ. -Sɩka'a-a 'mö, nɩkpa -wa 'nɩ-a 'zwiföa wa 'bhɛyɩ n ji-a möö.” 7Ɔ 'wlʋ-ɔ -ma, nɩkpɛ -bhlʋ wa la-a Zwitwisɩ, 'n ɔ ji-e -ma ɔ 'ligbë'ë mö. 'Mɔ nɩkpɛ la'a, -Lagɔ ɔ bʋbɔ -bha. Ɔ -budu -yɛ 'zwiföaa -Lagɔbudu 'sɔ 'n ɩ -gbɔnʋ la-a go 'wʋ. 8Ɩ-ɩ -sɩbha 'plɩ 'le 'bhë-ë, -Lagɔbuduo nyininyɔ wa la-a Klisɩpwisɩ -yɛ ɔ 'ligbë'ëë nɩkpa 'sɔ, 'n wa ji-a Nyininyɔ Zezwie wɛlɩ 'wʋ nglu, Kolɛtɩɛ nɩkpaa -bebe -wa pönɩ 'yɛ-a Pɔlʋ 'yukwli 'n wa jiɩ 'yɛ-a -nɩ 'wʋ nglu, 'n wa jua-a badize.
Nyininyɔ Zezwi yɛ Pɔlʋ 'wʋ ghlanɩ
9'Ylɩ -bhlʋɔ dʋdʋ, 'n Nyininyɔ Zezwi ji-a Pɔlʋ 'jie 'klʋ ji, ɔ nɛ -bha ɔ de naa: “-N 'na-a nganɩ -nɩ, gba 'kɔmʋʋ, -n 'na-a zʋ ngo yɛ -nɩ. 10N -nyɛmö 'sɔ -bhlinɩ 'wʋɔ yɛ -bɛ 'na -kamö cɛ yawʋ kwa ɔ -kamö 'jinyloli 'ji nʋ. Gba, na -lʋaa -bɛ -wʋ-ɔ ma'a -glɔ la'aa 'mö.” 11Ɔ -sa -ma Kolɛtɩ 'ylʋba -bhlʋ 'cʋɩ -ngbʋpʋlʋ, -maa nɩkpaa -Lagɔwɛlɩɛ nglipalɩ'ɩ.
'Zwiföa yɛ Pɔlʋ 'kla
12Laa do'o nɩkpɛ wa la-a Galinyɔ nyini la-a dʋdʋ wa la-a Akayi-e, 'zwiföa 'slonʋ-a 'wʋ, 'n wa ji-a Pɔlʋ -ma ɔ dlɩ'ɩ 'kla. 13Wa nɛ: “Nɩkpɛ la'a, nɩkpaa 'wlumö ɔ nyimanɩ-a 'ji, sa -Lagɔɔ gbö 'nɩ-a gba wa 'yɛ -sɩbha -Lagɔ bʋbɔɔ yɛ.” 14Pɔlʋ 'yɛ la gbʋ -dɩɛ mö, Galinyɔ nɛ: “'Zwiföayi, ɛ -yɛ la 'kulɩbhagbʋ glɩnɩ, ɛ -yɛ la 'yɛ -luo 'jinyimanɩgbʋ glɩnɩ-ɛ, a zugo la -bhaa yɛ n jiya la 'yukwli pönɩ. 15-Ma ɩ 'mö, -mɩ -laa -nɩ-ɛ, wɛlɩkïbhï -yɛ 'nglɩ 'sɔ, 'bhë a 'bhïë gböö 'mökpɛnɩwɛlɩ -bhaa yɛ, a 'bhï ɩ yɩlɩ-a 'wʋ. N'n na-a 'jɩbha n 'yɛ -saa -lie -zijlitunyɔ glɩnɩ.” 16'N ɔ jua-a -bha -zijle'e kpëti. 17Wa 'bhuo gblo-a wa -Lagɔbuduo nyininyɔ wa la-a Sɔsɩtɛnɩ 'wʋ, 'n wa jio-o -bha -zijlitubudu ngo'o bhɔtɔnʋ, Galinyɔ 'nɩɩ-ɩ gbʋɔ 'bhë 'wʋ -dɩ.
Pɔlʋ yɛ -ma Atiɔsɩ nimï mö
18Pɔlʋ gwlɛ-ɛ -ma Kolɛtɩ -daan, 'n ɔ ji-a ɔ -Lagɔdagwie kɩnɩ. Ɔ 'libhï-a bato 'wʋ, 'n ɔ -yɛ Akilasɩ -yɛ ɔ 'nglɔ Plisilɩ 'sɔ ji-e -ma Silie dʋdʋ -gömö mö. -Lagɔ Pɔlʋ palɩ la-a 'dɩ 'yukwli 'möö yɛ, wa 'yɛ möö ji, -glɔ wa la-a Sakle -ma wa kpalɩnɩ-a ɔ nyuko 'bhë 'n wa ji-a mö. 19Wa nyini-e -ma -glɔ wa la-a Efɛzɩ, -bha ɔ tɩ-a Akilasɩ -yɛ Plisilɩ 'sɔ, 'n ɔ ji-e -ma 'zwiföaa -Lagɔbudu'u pla, 'n ɔ -nyʋa 'sɔ ji-a -Lagɔwɛlɩ -gömö -sasanɩ. 20-Mʋa la'a nɛ ɔ -sa-a -bha 'ylɩ ja, 'bhë ɔ 'nɩɩ-ɩ 'wʋ nglu. 21Ɔ -wʋʋa-a kɩnɩ 'le, ɔ nɛ -bha wa de naa: “-Lagɔ -yɛ nglu, n ji ma'a a 'bhɛyɩ 'ylɩ -bhlʋ nimï ji.” 'N ɔ ji-a Efɛzɩɛ 'gbë 'mö 'wlʋ. 22Ɔ 'libhï-a bato 'wʋ, ɔ nyini-e -ma Sezale, 'n ɔ ji-a -Lagɔzakpa bhalɩ kwla'a mö. 'Bhë 'n ɔ ji-a Atiɔsɩ mö. 23Ɔ -sa-a -ma 'ylɩ ja, 'n ɔ ji-a nimï mö. 'N ɔ ji-a Galasie dʋdʋ -yɛ Flizie dʋdʋ 'sɔ -sasanɩ. Zezwie 'wʋbhlinɩngwa bhuo -wa -wʋ-ɔ -ma 'n ɔ ji-a wa nɩma 'mö 'tamanɩ.
Apolɔsɩ yɛ -ma Efɛzɩ -yɛ Kolɛtɩ 'sɔ ji
24'Zwiföyi -bhlʋ wa la-a Apolɔsɩ, -ɔ glɩnɩ-a -glɔ wa la-a Alɛzadlie nɩkpɛ, mɔ-ɔ ji-e -ma Efɛzɩ. Nɩkpɛ -ɔɔ gbagbagbʋ plu-a nɩkpa dlɩ mɔ -bha, -Lagɔbɔgʋ 'möö wɛlɩ ɔ -ji la 'yɛ-a tenyi. 25Nyininyɔ Zezwie wɛlɩ wa -slʋnʋɔ la-a 'n ɔ jiɩ-a 'kpɩa. 'N ɔ 'gbatuo-a 'mö. Ɔ -yɛ ɔ wɛlɩ gba 'le -wʋ, ɔ -kɩɩ 'yɛ ngli 'pa 'le -wʋ, 'mö ɔ slɛmanɩɩ -bha. -Mɩlado'o, Zaa badizebadize bhle'ee 'nyize ɔ -ji la -bha. 26-Ma -Lagɔbudu'u dlɩɛ 'wʋtɛnɔ nya ɔ gbanɩ-a Zezwie wɛlɩ. Akilasɩ -yɛ Plisilɩ 'sɔ 'nʋ-a ɔ nglie wɛlɩ, wa 'libhïɔ-a 'wʋ, 'n wa jio-a -Lagɔyuogblʋɔ de dlɩ 'mö slɛmanɩ 'sɩkösɩkö. 27Ɔ 'jɩbha ɔ 'yɛ la -ma dʋdʋ wa la-a Akayi möö yɛ, 'n -Lagɔdagwie jio-a 'kwa yawʋ pla-a. 'N wa ji-a -dagwie -mʋabha 'bɔgʋ 'wʋ 'pa naa, wa köbhɔ 'jinanɩswɩ'ɩ. Apolɔsɩ nyini-e -ma, -Lagɔɔ 'nyupalɩ -wʋɔ-a -gömöö yɛ, 'n -wa ka la-a -ma Zezwie wɛlɩ dlɩ 'wʋɔ nɩma ji-a ɔ yɛ 'mö 'tamanɩ. 28-Wʋʋ yɛ-a, -bha nɩkpa 'bhuo 'ji 'klʋ ɔ -sanɩ-ɛ -bha 'zwiföaa wɛlɩ 'ye, 'n ɔ tuluanʋa-a -ma -Lagɔwɛlɩɛ 'bɔgʋ 'mö 'ji naa, Zezwi-i -yɛ-a Puanyɔ -ɔ -Lagɔ -sa-a -bha.
Currently Selected:
NƲNƲLI 18: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
