NƲNƲLI 2
2
Zuzu 'Wlawla yɛ Zezwie 'wʋbhlinɩngwa -gömö sɛ 'sibhë
1'Zwiföaa 'pɩpɩ wa la-a Patɩkɔtɩ, ɛ bhɩabhɩazlɩ Zezwie 'wʋbhlinɩngwa 'bhuo 'titanɩɔ-ɔ debhlʋ 'wlu. 2'Gamö, -jiji 'bhönɩ-ɛ -ma ghayɩ, ɛ -bhlee -podiee -jiji, -budu -ʋʋ 'mö wa glɩ la-a, 'n ɛ ji-e -ma ye. 3Dalɩ -ɩ ghlanʋa-a 'wʋ -bhlee -kosuo 'dalɩ. Ɩ -sɔnʋ-a yawʋ, 'n ɩ jua-a -bhlʋ -bhlʋ 'wliyawʋ sɛ glɩ-ɩ. 4'N Zuzu 'Wlawla ji-a wa 'bhuo dlɩ zɔmö ye, 'n wa ji-a kabögbɩɛ gbagbʋ tɛ-ɛ, sa Zuzu 'Wlawla pʋa-a ngli.
5'Mɛ zlɩ la'a 'mö -ma Zelwizalɛmö, 'zwiföa -wa 'jɩbha-a -Lagɔgbʋ, -wa 'bhönɩ-ɛ -ma dʋdʋkpataa -gwlɩ 'bhuoo -gömö, wa-a la -ma. 6Nɩkpa la'a 'nʋ-a -jiji la'a, 'n wa -bebe ji-e -ma yɩlɩ kwla'a mö. Wa nyini-e -ma, ngli-i mönʋa -bha. -Wʋʋ yɛ-a, -ma Zezwie 'wʋbhlinɩngwaa ngli wa 'bhïë -dagwalɩgbɩ wa 'nʋ-ɔ -ma -bhlʋ -bhlʋ. 7-Gbagba ɩ palʋa-a -gömöö yɛ 'n wa ji-a ngli 'jɩbhajɩbhanɩ, wa nɛ: “Nɩkpa -wa -wʋ-ɔ -la gba 'le 'nɩ-ɛ bhe Galilee nɩkpa? 8Sa ɩ -wʋnʋ-ɔ 'mö-a 'mö, sa -aa -dagwalɩgbɩ -wʋ-a -bhlʋ -bhlʋ 'n -a -wɩɩ-ɛ -ma wa ngli 'nʋnʋ 'le 'nɩ? 9-Aa gla'aa -mʋmʋa 'bhönɩ Patɩɛ dʋdʋ -gömö, -ma Mɛdɩ, -ma Elamö, -ma Mezopotami, -ma Zwide, -ma Kapadɔsɩ, -ma Pɔɔ, -ma Azi. 10-Ma Flizi, -ma Pafili, -ma Ezipötɩ. Libie pɩa -a tʋnʋ-ɔ -ma Silɛnɩ yawʋ, -mʋa 'bhönɩ Ghlɔmö, 'zwiföa -yɛ -wa zʋa-a wajɩ 'zwiföa 'wʋ 'sɔ, 11Klɛtɩɛ nɩkpa -yɛ Alabie -lʋa 'sɔ, 'n -aa 'bhuo -nganɩ-ɛ -sa -ma wa ngli -aa 'bhigbɩ 'mö -lie -li -Lagɔ nʋ-aa 'dɩɛ?” 12Wa 'bhuo ngli-i mönʋa -bha. Sa wa 'yɛ 'mö gbagbanɩ wa 'nɩɩ -ji. 'N wa 'jɩbhajɩbhanɩ-a ngli naa: “Slɛ-a 'mö -mɩ -laa -nɩ zɔmö 'nɩ?” 13Wa gla'aa -mʋmʋa, glapalɩswɩ'ɩ wa nɛ: “Nʋ wa lʋ-a 'wʋ.”
Piɛlɩ yɛ -bha nɩkpa 'bhuoo 'ji 'klʋ Zezwie gbʋ gbanɩ
14'N Piɛlɩ -yɛ Zezwie tiatiangwa kugbïa -bhlʋ -mʋabha 'sɔ ji-e -bha nɩkpa la'aa 'ji 'klʋ nyini. 'N ɔ ji-a wɛlɩ ghayɩ kwa, ɔ nɛ -bha wa de naa: “-Abhɩayi, abha 'zwiföa -yɛ abha la'a bhuo-o glɩ-ɛ ma'a Zelwizalɛmö 'sɔ, a pönɩ na wɛlɩ 'yukwli. 15Nɩkpa a -tɔnʋ-ɔ -la naa nʋ-ʋ -wʋʋa 'lɩbha 'le, nʋ 'nʋa 'lɩbha 'le -wʋ, -wʋʋ yɛ-a, zɩgbadlɩglie -ngbïmʋna mö -a glɩ-ɛ la'a. 16-Ma ɩ 'mö, wɛlɩ -ɩ -Lagɔɔ 'mögbanɩnyɔ Zowɛlɩ gba la-a mɩ-ɩ 'wlenɩ-ɛ la'a 'wʋ. 17Sa'a ɩ 'cɛlɩɔ-a naa:
-Lagɔ nɛ naa: 'Pɩɛ sɛyɩlade -yɛ nyini 'le -wʋ-ɔ,
nɩkpa 'bhuo n ji-a na Zuzu -gömö -laa.
-Bhaa do'o, a nyɩbhɛlɩgwie -yɛ a nglugwie 'sɔ
n ji-a 'mö gbanɩɛ,
-li 'yɛ-a a ngɩgbɔtɩ 'jie 'klʋ ji,
a nyɩkposwi 'yɛ-a 'jɩlɩ ghla.
18Na nyɩgbajʋlʋɩ -yɛ na nyɩgbajʋlʋngwlɩ 'sɔ, 'mɩ zlɩa la'a 'mö na Zuzu n jua-a -gömö -laa,
ʋ 'kʋa-a 'mö gbanɩ.
19Nganɔɔ 'wʋbhïli n ji-e -ma ghayɩ tulua
n 'yɛ-a ma'a dʋdʋkpata -gömö bhatɩ -la,
dlu, -kosu -yɛ gbeyloko 'sɔ.
20'N 'ylʋzalʋ 'yɛ-a julumanɩ,
'n 'cʋ 'yɛ-a dluo swɩ'ɩ zalɩmanɩ.
-Ɩ la'a -yɛ 'wʋ 'wlenɩ 'le -wʋ-ɔ,
Nyininyɔɔ zlɩ 'kadɛɛ de -wʋ-a nyini 'le.
21-Bhaa do'o nɩkpɛ -mɔ -yɛ Nyininyɔ 'mö winɩ ɔ ji 'pʋ.
22Izlayɛlɩɛ nɩkpayi, -ɩ n ji-e la'a gba, a pönɩɩ 'yukwli. Nazalɛtɩɛ Zezwi, nɩkpɛ -ɔɔ 'mö -Lagɔ tuluanɩ-a ʋ 'mötɛnɔ, mɔ -bha. -Wʋʋ yɛ-a, ɔ 'mö ʋ nʋnʋ-a bhatɩ, zɩzɛli -yɛ ʋ 'möjɩblɩnɩli 'sɔ -ma a 'gbamö, a 'bhï a -ji -sɩbha. 23'Mɔ nɩkpɛ, 'mɔ -wa 'pa-a 'pɛlʋ sa -Lagɔɔ 'bhë 'jɩbhɩ la-a, sa ʋ zʋɩ la-a. 'N a jio-a 'jinylolie nʋngwa 'ye 'nyɛ, 'n wa jio-a su 'klʋ kʋnʋ 'n ɔ ji-a tlɩ. 24-Lagɔ kɔ gala, ʋ kɔ -ma tlɩtlɩɛ 'likpï ngli -sa 'bhë. -Wʋʋ yɛ-a, tlɩtlɩɛ 'nɩ la bhɛlɩ ɛ 'kɔ lu. 25-Ma -Lagɔwɛlɩɛ 'bɔgʋ 'mö, ɔ yɛ Davidɩ gba-a naa:
N jɩnɩ Nyininyɔ -Lagɔ 'wʋ 'kɔmʋʋ,
ɔ-ɔ -bha na linɩkpɛsɔ pɩa 'bɩ.
Mɔ-ɔ su'u -bha, n ji-e 'mö gbʋgbɔɔ yɛ.
26Ɩ yɛ -ma na dlɩ zɔmö 'mʋna ye-e -ma,
'n -ma na ngli 'mʋnaa 'wʋbhïwɛlɩ -wʋ-ɔ -ma 'wlʋ 'le.
N -yɛ tlɩ na dlɩ 'tɛ-ɛ 'wʋ.
27-Wʋʋ yɛ-a, -n 'na ka'a -ma 'kudungwa 'gbamö tɩ.
-Na 'nyizee -lɔ n glɩnɩ -bha, -n 'na ka'a 'ji yawʋ -sa n 'yɛ zɛ.
28-Nmö -slʋnʋ'ʋ-a 'pɩɛ 'yuogblʋ de,
-n -yɛ -bha na yawʋ -wʋ, 'mʋna ji'i-a dlɩ zɔmö yee.
29-Abhɩayi, -aa -tɩbhatɩbha Davidɩɛ yɛ n jiya-a la'a dlɩ 'mö slɛmanɩɛ. Ɔ yɛ tlɩ wa kɔ zʋ 'bhë. Ɔ lesikpa -bhla ma'a -zɩnɩ'ɩ -aa dʋdʋ -gömö. 30-Lagɔɔ 'mögbanɩnyɔ ɔ glɩnɩ la -bhaa yɛ, ɔ -ji la-a sɛ naa -Lagɔ kɔ cɛ zlugonʋ 'bhë naa, sa ɔ glɩnɩ-a dʋdʋnyininyɔ 'kadɔ, -sɩbha ʋ ji-a ɔ ngëyi 'möö nɩkpɛ -bhlʋ dʋdʋnyininyɔ 'wʋ zʋa. 31Sa Puanyɔ -ɔ -Lagɔ -sa-a -bha ji-a glu 'wlʋɔ 'mɩ -Lagɔ tuluanɩɔ-a 'ji 'gamö. -Lagɔ 'nɩ-ɛ 'dɛdɛ'ɛ Zezwi -ma 'kudungwa 'gbamö tɩ, ʋ 'nɩɔ-ɔ 'ji yawʋ -sa ɔ -gazɛ 'yɛ zɛ. 32-Lagɔ kɔ glu -sa -aa 'bhuo kɩ yɩlɩ 'bhë. 33Ɔ mö-ö -ma -Lagɔɔ linɩkpɛsɔ pɩa 'bɩ sɛ -glɩɛ, Zuzu 'Wlawla ɔ -Tɩbha -Lagɔ nʋ la-a ʋ ji nɩkpa -gömö -laa, 'mʋ ɔ -laya-a -gömö. 'Mɩ wɛlɩ ɔ 'wlenɩ-a 'wʋɔ yɛ, -ɩ a -wʋ-ɔ la'a jɩla 'le, -ɩ a -nganɩ 'yɛ-ɛ -la, 'n ɩ -wʋ-ɔ -sɩbha. 34-Wʋʋ yɛ-a, Davidɩ 'nɩ-ɛ Zezwie swɩ'ɩ -Lagɔ 'wʋ -gbla 'bhë-ë, sa'a ɔ gba-a naa:
Na Nyininyɔ -Lagɔ nɛ -bha na nyininyɔɔ de naa,
glɩ la'a na linɩkpɛsɔ pɩa 'bɩ yɛ,
35la n -jimö-a -na tʋngwa 'ye 'nyɛnɩɛ,
-n 'kʋa -gömö jinɩ, -bha 'yɛ nyini.
36-Ma ɩ 'mö, abha Izlayɛlɩɛ nɩkpa jɩblɩnɩ 'jinanɩswɩ'ɩ sɛ naa, Zezwi la'a a kʋnʋ-a su 'klʋ, 'mɔ -Lagɔ -sa-a -bha, 'mɔ ʋ zʋa-a Nyininyɔ 'wʋ.”
Taka -nɩkpa -wa nglu-a Zezwie wɛlɩ 'wʋ
37Nɩkpa la'a 'nʋ-a wɛlɩ la'a wa dlɩa-a nʋʋa-a libho yawʋ tenyi, wa nɛ -bha Piɛlɩ -yɛ Zezwie tiatiangwa -mʋabha 'sɔɔ de naa: “-Abhɩayi, sa -a ji-a 'mö zʋzʋnʋɔ 'nɩ?” 38Piɛlɩ nɛ -bha wa de: “A ligba a 'yɛ a 'jinyloli cɛ 'mö -sa, wa 'kaya Zezwi 'Klie 'nglɩ 'mö badizenɩ -bhlʋ -bhlʋ, -Lagɔ 'yɛ a 'jinylolie gbʋ 'ji 'tatinɩ, 'bhë ʋ 'kaya Zuzu 'Wlawla -gömö -la. 39-Wʋʋ yɛ-a, Zuzu 'Wlawlaa nɩkpaa -gömölawɛlɩ la'a, a -yɛ a 'gwie 'sɔɔ -li -bha, 'bhë -wa bhuo-o -wʋ-ɔ -ma 'yu 'yu, -aa Nyininyɔ -Lagɔ ji-a wɔzɩɛ, wa li 'yɛ -bha.” 40-Sɩbhaa wɛlɩ -mɩmɩɛ -bɛ nya Piɛlɩ zʋnʋa-a 'dɩ 'mö, 'n ɔ nʋ-a: “Nɩkpa -wa ka-a -la 'kpʋkpʋli 'wlumö, a 'wlʋʋa gla'a a 'yɛ 'pʋ.” 41Piɛlɩ gba-a -sɩbha, -wa nglu-a ɔ wɛlɩ 'wʋ, 'n wa jua-a badize. 'Mɛ zlɩ la'a 'mö, -wa bhlinɩ-a Zezwie 'wʋbhlinɩngwa -gömö, wa nɩkpaa 'wli taa swɩ.
Taka -Lagɔzakpaa 'pɩ
42Wa 'bhuo, -Lagɔwɛlɩ Zezwie tiatiangwa pʋa-a ngli, 'mɩ wa pönɩ-a 'yukwli 'kɔmʋʋ, 'n wa -ghöbhanɩ-a 'kɔmʋʋ, 'n wa linɩ-a debhlʋ 'kɔmʋʋ, 'n wa pa-a -Lagɔ -bɛlɩ 'kɔmʋʋ. 43Zezwie tiatiangwa, bhatɩ wa -wʋ-a -Lagɔɔ 'mötɛnɔ nya nɛ nʋnʋ 'lee yɛ, nɩkpa la'a 'bhuo -Lagɔɔ nganɔ wa ka la-a -gömö. 44-Wa ka-a Zezwi dlɩ 'wʋ, wa 'bhuo debhlʋ wa glɩ la -bha, 'n wa ji-a wa -li 'bhuo 'wʋ 'slonʋ. 45-Wa ka-a 'lagblie, -wa ka 'yɛ-a -li -mɩmɩ wa -kɩɩ 'pɛlʋ 'pa, 'n wa dlinɩ-a ɩ mëni sa wa plaplagbɩ -wʋ-a -bhlʋ -bhlʋ.
46Sa zlɩ zɩ-a, -sɩbha wa 'titanɩ-ɛ -ma -Lagɔbudu 'kadʋ 'mö 'wlu, -ma wa 'ligbï'ï 'yɛ, wa -yɛ 'fʋlo 'mö -dɩdɩnɩ, wa dlɩa zɔmö-ö -plɛɛplɛ'ɛ, 'n wa linɩ-a 'mʋna 'mö debhlʋ. 47'N wa 'ghlimanɩ-a -Lagɔɔ 'nglɩ. Nɩkpa 'bhuo -kʋa yɩlɩ, 'n wa ka-a wa 'mʋna 'mlɩ. Sa zlɩ zɩ-a, nɩkpa -mʋa -Lagɔ pua-a 'lili'i, 'n ʋ pʋa-a -bha Zezwie -zakpa 'möö -lʋa -gömö.
Currently Selected:
NƲNƲLI 2: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
NƲNƲLI 2
2
Zuzu 'Wlawla yɛ Zezwie 'wʋbhlinɩngwa -gömö sɛ 'sibhë
1'Zwiföaa 'pɩpɩ wa la-a Patɩkɔtɩ, ɛ bhɩabhɩazlɩ Zezwie 'wʋbhlinɩngwa 'bhuo 'titanɩɔ-ɔ debhlʋ 'wlu. 2'Gamö, -jiji 'bhönɩ-ɛ -ma ghayɩ, ɛ -bhlee -podiee -jiji, -budu -ʋʋ 'mö wa glɩ la-a, 'n ɛ ji-e -ma ye. 3Dalɩ -ɩ ghlanʋa-a 'wʋ -bhlee -kosuo 'dalɩ. Ɩ -sɔnʋ-a yawʋ, 'n ɩ jua-a -bhlʋ -bhlʋ 'wliyawʋ sɛ glɩ-ɩ. 4'N Zuzu 'Wlawla ji-a wa 'bhuo dlɩ zɔmö ye, 'n wa ji-a kabögbɩɛ gbagbʋ tɛ-ɛ, sa Zuzu 'Wlawla pʋa-a ngli.
5'Mɛ zlɩ la'a 'mö -ma Zelwizalɛmö, 'zwiföa -wa 'jɩbha-a -Lagɔgbʋ, -wa 'bhönɩ-ɛ -ma dʋdʋkpataa -gwlɩ 'bhuoo -gömö, wa-a la -ma. 6Nɩkpa la'a 'nʋ-a -jiji la'a, 'n wa -bebe ji-e -ma yɩlɩ kwla'a mö. Wa nyini-e -ma, ngli-i mönʋa -bha. -Wʋʋ yɛ-a, -ma Zezwie 'wʋbhlinɩngwaa ngli wa 'bhïë -dagwalɩgbɩ wa 'nʋ-ɔ -ma -bhlʋ -bhlʋ. 7-Gbagba ɩ palʋa-a -gömöö yɛ 'n wa ji-a ngli 'jɩbhajɩbhanɩ, wa nɛ: “Nɩkpa -wa -wʋ-ɔ -la gba 'le 'nɩ-ɛ bhe Galilee nɩkpa? 8Sa ɩ -wʋnʋ-ɔ 'mö-a 'mö, sa -aa -dagwalɩgbɩ -wʋ-a -bhlʋ -bhlʋ 'n -a -wɩɩ-ɛ -ma wa ngli 'nʋnʋ 'le 'nɩ? 9-Aa gla'aa -mʋmʋa 'bhönɩ Patɩɛ dʋdʋ -gömö, -ma Mɛdɩ, -ma Elamö, -ma Mezopotami, -ma Zwide, -ma Kapadɔsɩ, -ma Pɔɔ, -ma Azi. 10-Ma Flizi, -ma Pafili, -ma Ezipötɩ. Libie pɩa -a tʋnʋ-ɔ -ma Silɛnɩ yawʋ, -mʋa 'bhönɩ Ghlɔmö, 'zwiföa -yɛ -wa zʋa-a wajɩ 'zwiföa 'wʋ 'sɔ, 11Klɛtɩɛ nɩkpa -yɛ Alabie -lʋa 'sɔ, 'n -aa 'bhuo -nganɩ-ɛ -sa -ma wa ngli -aa 'bhigbɩ 'mö -lie -li -Lagɔ nʋ-aa 'dɩɛ?” 12Wa 'bhuo ngli-i mönʋa -bha. Sa wa 'yɛ 'mö gbagbanɩ wa 'nɩɩ -ji. 'N wa 'jɩbhajɩbhanɩ-a ngli naa: “Slɛ-a 'mö -mɩ -laa -nɩ zɔmö 'nɩ?” 13Wa gla'aa -mʋmʋa, glapalɩswɩ'ɩ wa nɛ: “Nʋ wa lʋ-a 'wʋ.”
Piɛlɩ yɛ -bha nɩkpa 'bhuoo 'ji 'klʋ Zezwie gbʋ gbanɩ
14'N Piɛlɩ -yɛ Zezwie tiatiangwa kugbïa -bhlʋ -mʋabha 'sɔ ji-e -bha nɩkpa la'aa 'ji 'klʋ nyini. 'N ɔ ji-a wɛlɩ ghayɩ kwa, ɔ nɛ -bha wa de naa: “-Abhɩayi, abha 'zwiföa -yɛ abha la'a bhuo-o glɩ-ɛ ma'a Zelwizalɛmö 'sɔ, a pönɩ na wɛlɩ 'yukwli. 15Nɩkpa a -tɔnʋ-ɔ -la naa nʋ-ʋ -wʋʋa 'lɩbha 'le, nʋ 'nʋa 'lɩbha 'le -wʋ, -wʋʋ yɛ-a, zɩgbadlɩglie -ngbïmʋna mö -a glɩ-ɛ la'a. 16-Ma ɩ 'mö, wɛlɩ -ɩ -Lagɔɔ 'mögbanɩnyɔ Zowɛlɩ gba la-a mɩ-ɩ 'wlenɩ-ɛ la'a 'wʋ. 17Sa'a ɩ 'cɛlɩɔ-a naa:
-Lagɔ nɛ naa: 'Pɩɛ sɛyɩlade -yɛ nyini 'le -wʋ-ɔ,
nɩkpa 'bhuo n ji-a na Zuzu -gömö -laa.
-Bhaa do'o, a nyɩbhɛlɩgwie -yɛ a nglugwie 'sɔ
n ji-a 'mö gbanɩɛ,
-li 'yɛ-a a ngɩgbɔtɩ 'jie 'klʋ ji,
a nyɩkposwi 'yɛ-a 'jɩlɩ ghla.
18Na nyɩgbajʋlʋɩ -yɛ na nyɩgbajʋlʋngwlɩ 'sɔ, 'mɩ zlɩa la'a 'mö na Zuzu n jua-a -gömö -laa,
ʋ 'kʋa-a 'mö gbanɩ.
19Nganɔɔ 'wʋbhïli n ji-e -ma ghayɩ tulua
n 'yɛ-a ma'a dʋdʋkpata -gömö bhatɩ -la,
dlu, -kosu -yɛ gbeyloko 'sɔ.
20'N 'ylʋzalʋ 'yɛ-a julumanɩ,
'n 'cʋ 'yɛ-a dluo swɩ'ɩ zalɩmanɩ.
-Ɩ la'a -yɛ 'wʋ 'wlenɩ 'le -wʋ-ɔ,
Nyininyɔɔ zlɩ 'kadɛɛ de -wʋ-a nyini 'le.
21-Bhaa do'o nɩkpɛ -mɔ -yɛ Nyininyɔ 'mö winɩ ɔ ji 'pʋ.
22Izlayɛlɩɛ nɩkpayi, -ɩ n ji-e la'a gba, a pönɩɩ 'yukwli. Nazalɛtɩɛ Zezwi, nɩkpɛ -ɔɔ 'mö -Lagɔ tuluanɩ-a ʋ 'mötɛnɔ, mɔ -bha. -Wʋʋ yɛ-a, ɔ 'mö ʋ nʋnʋ-a bhatɩ, zɩzɛli -yɛ ʋ 'möjɩblɩnɩli 'sɔ -ma a 'gbamö, a 'bhï a -ji -sɩbha. 23'Mɔ nɩkpɛ, 'mɔ -wa 'pa-a 'pɛlʋ sa -Lagɔɔ 'bhë 'jɩbhɩ la-a, sa ʋ zʋɩ la-a. 'N a jio-a 'jinylolie nʋngwa 'ye 'nyɛ, 'n wa jio-a su 'klʋ kʋnʋ 'n ɔ ji-a tlɩ. 24-Lagɔ kɔ gala, ʋ kɔ -ma tlɩtlɩɛ 'likpï ngli -sa 'bhë. -Wʋʋ yɛ-a, tlɩtlɩɛ 'nɩ la bhɛlɩ ɛ 'kɔ lu. 25-Ma -Lagɔwɛlɩɛ 'bɔgʋ 'mö, ɔ yɛ Davidɩ gba-a naa:
N jɩnɩ Nyininyɔ -Lagɔ 'wʋ 'kɔmʋʋ,
ɔ-ɔ -bha na linɩkpɛsɔ pɩa 'bɩ.
Mɔ-ɔ su'u -bha, n ji-e 'mö gbʋgbɔɔ yɛ.
26Ɩ yɛ -ma na dlɩ zɔmö 'mʋna ye-e -ma,
'n -ma na ngli 'mʋnaa 'wʋbhïwɛlɩ -wʋ-ɔ -ma 'wlʋ 'le.
N -yɛ tlɩ na dlɩ 'tɛ-ɛ 'wʋ.
27-Wʋʋ yɛ-a, -n 'na ka'a -ma 'kudungwa 'gbamö tɩ.
-Na 'nyizee -lɔ n glɩnɩ -bha, -n 'na ka'a 'ji yawʋ -sa n 'yɛ zɛ.
28-Nmö -slʋnʋ'ʋ-a 'pɩɛ 'yuogblʋ de,
-n -yɛ -bha na yawʋ -wʋ, 'mʋna ji'i-a dlɩ zɔmö yee.
29-Abhɩayi, -aa -tɩbhatɩbha Davidɩɛ yɛ n jiya-a la'a dlɩ 'mö slɛmanɩɛ. Ɔ yɛ tlɩ wa kɔ zʋ 'bhë. Ɔ lesikpa -bhla ma'a -zɩnɩ'ɩ -aa dʋdʋ -gömö. 30-Lagɔɔ 'mögbanɩnyɔ ɔ glɩnɩ la -bhaa yɛ, ɔ -ji la-a sɛ naa -Lagɔ kɔ cɛ zlugonʋ 'bhë naa, sa ɔ glɩnɩ-a dʋdʋnyininyɔ 'kadɔ, -sɩbha ʋ ji-a ɔ ngëyi 'möö nɩkpɛ -bhlʋ dʋdʋnyininyɔ 'wʋ zʋa. 31Sa Puanyɔ -ɔ -Lagɔ -sa-a -bha ji-a glu 'wlʋɔ 'mɩ -Lagɔ tuluanɩɔ-a 'ji 'gamö. -Lagɔ 'nɩ-ɛ 'dɛdɛ'ɛ Zezwi -ma 'kudungwa 'gbamö tɩ, ʋ 'nɩɔ-ɔ 'ji yawʋ -sa ɔ -gazɛ 'yɛ zɛ. 32-Lagɔ kɔ glu -sa -aa 'bhuo kɩ yɩlɩ 'bhë. 33Ɔ mö-ö -ma -Lagɔɔ linɩkpɛsɔ pɩa 'bɩ sɛ -glɩɛ, Zuzu 'Wlawla ɔ -Tɩbha -Lagɔ nʋ la-a ʋ ji nɩkpa -gömö -laa, 'mʋ ɔ -laya-a -gömö. 'Mɩ wɛlɩ ɔ 'wlenɩ-a 'wʋɔ yɛ, -ɩ a -wʋ-ɔ la'a jɩla 'le, -ɩ a -nganɩ 'yɛ-ɛ -la, 'n ɩ -wʋ-ɔ -sɩbha. 34-Wʋʋ yɛ-a, Davidɩ 'nɩ-ɛ Zezwie swɩ'ɩ -Lagɔ 'wʋ -gbla 'bhë-ë, sa'a ɔ gba-a naa:
Na Nyininyɔ -Lagɔ nɛ -bha na nyininyɔɔ de naa,
glɩ la'a na linɩkpɛsɔ pɩa 'bɩ yɛ,
35la n -jimö-a -na tʋngwa 'ye 'nyɛnɩɛ,
-n 'kʋa -gömö jinɩ, -bha 'yɛ nyini.
36-Ma ɩ 'mö, abha Izlayɛlɩɛ nɩkpa jɩblɩnɩ 'jinanɩswɩ'ɩ sɛ naa, Zezwi la'a a kʋnʋ-a su 'klʋ, 'mɔ -Lagɔ -sa-a -bha, 'mɔ ʋ zʋa-a Nyininyɔ 'wʋ.”
Taka -nɩkpa -wa nglu-a Zezwie wɛlɩ 'wʋ
37Nɩkpa la'a 'nʋ-a wɛlɩ la'a wa dlɩa-a nʋʋa-a libho yawʋ tenyi, wa nɛ -bha Piɛlɩ -yɛ Zezwie tiatiangwa -mʋabha 'sɔɔ de naa: “-Abhɩayi, sa -a ji-a 'mö zʋzʋnʋɔ 'nɩ?” 38Piɛlɩ nɛ -bha wa de: “A ligba a 'yɛ a 'jinyloli cɛ 'mö -sa, wa 'kaya Zezwi 'Klie 'nglɩ 'mö badizenɩ -bhlʋ -bhlʋ, -Lagɔ 'yɛ a 'jinylolie gbʋ 'ji 'tatinɩ, 'bhë ʋ 'kaya Zuzu 'Wlawla -gömö -la. 39-Wʋʋ yɛ-a, Zuzu 'Wlawlaa nɩkpaa -gömölawɛlɩ la'a, a -yɛ a 'gwie 'sɔɔ -li -bha, 'bhë -wa bhuo-o -wʋ-ɔ -ma 'yu 'yu, -aa Nyininyɔ -Lagɔ ji-a wɔzɩɛ, wa li 'yɛ -bha.” 40-Sɩbhaa wɛlɩ -mɩmɩɛ -bɛ nya Piɛlɩ zʋnʋa-a 'dɩ 'mö, 'n ɔ nʋ-a: “Nɩkpa -wa ka-a -la 'kpʋkpʋli 'wlumö, a 'wlʋʋa gla'a a 'yɛ 'pʋ.” 41Piɛlɩ gba-a -sɩbha, -wa nglu-a ɔ wɛlɩ 'wʋ, 'n wa jua-a badize. 'Mɛ zlɩ la'a 'mö, -wa bhlinɩ-a Zezwie 'wʋbhlinɩngwa -gömö, wa nɩkpaa 'wli taa swɩ.
Taka -Lagɔzakpaa 'pɩ
42Wa 'bhuo, -Lagɔwɛlɩ Zezwie tiatiangwa pʋa-a ngli, 'mɩ wa pönɩ-a 'yukwli 'kɔmʋʋ, 'n wa -ghöbhanɩ-a 'kɔmʋʋ, 'n wa linɩ-a debhlʋ 'kɔmʋʋ, 'n wa pa-a -Lagɔ -bɛlɩ 'kɔmʋʋ. 43Zezwie tiatiangwa, bhatɩ wa -wʋ-a -Lagɔɔ 'mötɛnɔ nya nɛ nʋnʋ 'lee yɛ, nɩkpa la'a 'bhuo -Lagɔɔ nganɔ wa ka la-a -gömö. 44-Wa ka-a Zezwi dlɩ 'wʋ, wa 'bhuo debhlʋ wa glɩ la -bha, 'n wa ji-a wa -li 'bhuo 'wʋ 'slonʋ. 45-Wa ka-a 'lagblie, -wa ka 'yɛ-a -li -mɩmɩ wa -kɩɩ 'pɛlʋ 'pa, 'n wa dlinɩ-a ɩ mëni sa wa plaplagbɩ -wʋ-a -bhlʋ -bhlʋ.
46Sa zlɩ zɩ-a, -sɩbha wa 'titanɩ-ɛ -ma -Lagɔbudu 'kadʋ 'mö 'wlu, -ma wa 'ligbï'ï 'yɛ, wa -yɛ 'fʋlo 'mö -dɩdɩnɩ, wa dlɩa zɔmö-ö -plɛɛplɛ'ɛ, 'n wa linɩ-a 'mʋna 'mö debhlʋ. 47'N wa 'ghlimanɩ-a -Lagɔɔ 'nglɩ. Nɩkpa 'bhuo -kʋa yɩlɩ, 'n wa ka-a wa 'mʋna 'mlɩ. Sa zlɩ zɩ-a, nɩkpa -mʋa -Lagɔ pua-a 'lili'i, 'n ʋ pʋa-a -bha Zezwie -zakpa 'möö -lʋa -gömö.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996