ZAA 'BƆGƲ 11
11
Lazalɩ yɛ glu 'wlʋ
1'Ylɩ -bhlʋ, -ma Betanie 'gbë 'mö nɩkpɛ -bhlʋ wa la-a Lazalɩ, -ɔ glɩnɩ-a Mali -yɛ Malɩtɩ 'sɔɔ -dagunyɩbhɛlʋgu, 'mɔ gu -wʋ la-a 'lɩbha 'le. 2Nglɔ la'a -ɔ sulu la-a Nyininyɔ palɩfɛ kpli -gömö, 'n ɔ ji-e -bha ɔ nyuko sɔnʋ mɔ-ɔ -yɛ-a Mali. 3'N -dagwienglugwie la'a 'sɔ ji-e -ma Zezwie 'bhɛyɩ nɩkpɛ tia naa, ɔ -yɛ mö ɔ nʋ: “Nyininyɔ, -ɔ -n 'jɩbha la-a, gu -wʋɔ 'lɩbha 'le.” 4Wa -sanɩ-a Zezwi 'dɩ, ɔ nɛ: “Gu -la mʋ-ʋ 'nɩɔ-ɔ kwaa ji, mʋ-ʋ ji-a -Lagɔɔ 'mötɛnɔ tulua, 'n -Lagɔɔ 'Guo 'nglɩ 'yɛ-ɛ -ma ʋ 'mö 'ghlimanɩɔ.” 5'Jɩbha Zezwi 'jɩbha la-a Malɩtɩ-ɛ, ɔ -dagunglugu -yɛ Lazalɩ 'sɔ. 6Ɔ jɩblɩnɩ-a sɛ naa Lazalɩ gu -wʋɔ 'lɩbha 'le 'bhë-ë, ma ɔ glɩ la-a ɔ -sa -ma ylɩ -mɩmɩ 'sɔ. 7'Bhë 'n ɔ ji-e 'mö-a -bha ɔ 'wʋbhlinɩngwaa de gba naa: “A -sɔ 'wʋ -a 'yɛ -ma Zwide nimï mö.” 8Ɔ gba-a -sɩbha, ɔ 'wʋbhlinɩngwa nɛ naa: “-Abhitɩbha, 'zwiföa -yɛ la nʋ wa -kamö tɩkpaku 'mö 'lɩbha nʋ, -bhaa 'bɩ 'nɩ-ɛ -bhla 'mö gwlɛ, 'n -n nʋ-a -n 'yɛ -ma nimï möö?” 9Zezwi -sa-a -gömö, ɔ nɛ: “'Glie kugbïa 'sɔ zlɩ 'nɩ bhe 'mö -ka? Nɩkpɛ -yɛ zlɩga namö 'le -wʋ, ɔ'ɔ gozo, ɔ jɩnɩ zlɩ 'wʋɔ yɛ -bha. 10-Ma ɩ 'mö, nɩkpɛ -yɛ dʋdʋ namö 'le -wʋ-ɔ, -ma ɔ 'pɩ 'mö zlɩ 'nɩ -ma -wʋɔ yɛ, gozo ɔ gozo -bha.”
11Zezwi gba-a -sɩbha 'bhë, ɔ nɛ -bha -gömö naa: “-Aa bheyi Lazalɩ pö 'jɩla 'mö, möö n ji -bha n 'kɔ gala.” 12Ɔ 'wʋbhlinɩngwa nɛ -bha ɔ de: “Nyininyɔ, ɔ -yɛ 'jɩla 'mö pö-ö, 'pʋɔ ɔ ji -bha.” 13Zezwi 'yɛ-ɛ -sɩbha gba-a, Lazalɩɛ tlɩtlɩgbʋ ɔ -wʋ la-a gba 'le. Ɔ 'wʋbhlinɩngwa 'pa-a -nɩ dlɩ wa -tɔnʋ naa 'jɩlaa jɩlaa gbʋ ɔ gba la. 14'N Zezwi jua 'mö-a 'dɩ -sanɩ vaa naa: “Lazalɩ yɛ tlɩ 'bhë. 15Sa n'n-n -bha -wʋ, 'mʋna-a wʋ'ʋ-a 'lɩbha 'le a yɛ, a ka'a dlɩ 'wʋ -kaa yɛ. A -sɔ-a 'mö 'wʋ -a 'kɔ -ma ghlɩ.” 16Toma wa la 'yɛ-a puyi -dɩ-a gbʋ, ɔ nɛ -bha Zezwie 'wʋbhlinɩngwa -mʋabhaa de: “A -sɔ 'wʋ -a 'yɛ 'yɛ -nɩ mö, -a -nyɔɔ 'sɔ 'yɛ debhlʋ tlɩnɩ.”
17Zezwi nyini-e -ma-a, wa yɛ Lazalɩ zʋ 'bhë ɔ ka -ma lesikpa 'mö 'ylɩ -mʋna. 18-Bha Zelwizalɛmöö 'gbë yawʋ Betanie gbë pö la -bha, kwili ta 'wʋɔ swɩ. 19'N 'zwiföaa -bɛ ji-e -ma Malɩtɩ -yɛ Mali 'sɔɔ 'bhɛyɩ mö wa 'kʋa wa -daguo yɛ dlɩ 'mlɩ zʋ. 20Malɩtɩ 'nʋ-ɔ naa Zezwi-e ji 'le, 'n ɔ jio-a 'yuo mö, Mali glɩ -ma -nɩ 'ligbë'ë. 21Malɩtɩ nɛ -bha Zezwie de naa: “Nyininyɔ, -n -yɛ la la'a -wʋ-ɔ, na -dagu 'na la tlɩ. 22-Ma ɩ 'mö, -sɩka'a 'bhë -bhla, n -ji sɛ naa, 'manɩluo bhë -n -yɛ -Lagɔ 'jɩbhanɩ 'ye ʋ -jimʋ-a 'nyɛɛ.” 23Ɔ gba-a -sɩbha, Zezwi nɛ -bha ɔ de: “-Na -dagu glu ɔ ji-a 'wlʋɔ.” 24Malɩtɩ nɛ: “Nn, n -ji sɛ naa, pɩɛ 'bhlonʋde, la nɩkpa ji-a glu 'wlʋnʋɔ ɔ ji glu 'wlʋ.” 25Zezwi nɛ -bha ɔ de: “-Amö-ö -yɛ-a gluwlʋwlʋɛ -yɛ 'kɔgwlɛpɩ sɔ, -ɔ ka'a dlɩ 'wʋ -ka, ɔ ji tlɩɛ 'bhë oo -bhlɩɛ ɔ ji -bha. 26Nɩkpɛ -yɛ -bhlɩ ɔ ka'a dlɩ 'wʋ -ka-a ɔ 'na tlɩ 'lɩlɩlɩ. -N kɩ dlɩ 'wʋ 'nɩ-ɩ?” 27Ɔ nɛ: “Nn, Nyininyɔ, n kɩ dlɩ 'wʋ naa Puanyɔ -ɔ -Lagɔ -sa-a -bha, -Lagɔɔ Gu -ɔ ji la-a ma'a 'pɩ 'wʋ jie, mɔ -n glɩnɩ -bha.”
28Malɩtɩ gba-a -sɩbha 'bhë, 'n ɔ ji-a ɔ -dagu Mali wɔzɩ kwla'a mö, 'n ɔ jio-a 'ngungwanɩ, ɔ nɛ: “-Abhitɩbha yɛ ji 'bhë, ɔ nɛ mö.” 29Mali 'nʋ-a wɛlɩ la'a, ɔ -sɔ-a 'wʋ -vlala 'n ɔ jio-o -ma ghlɩ. 30Zezwi 'nɩ-ɛ la -bhla -ma 'gbë 'mö pla, bhle -aa 'wʋ Malɩtɩ ghlɩɔ la-a, -bha ɔ glɩ la-a -bhla. 31'Zwiföa -wa -yɛ Mali 'sɔ glɩ la-a -ma 'ligbë'ë, -wa -wʋɔ la-a dɛpö 'le yɩlɩ-a ɔ -vlalaa 'wʋsɔlɩ ɔ 'wlʋ-a 'pɩ-ɛ, 'bɩ wa möɔ -bha, wa -tɔnʋ la -ma lesikpa 'klʋ ɔ -wʋ la winɩɛ mö 'le. 32La Zezwi glɩ la-a, Mali nyini-e -bha ɔ yɩlɩɔ-a, 'n ɔ ji-e -bha ɔ dlɩ'ɩ -kokomunigbö glu 'pa, 'bhë ɔ nɛ: “Nyininyɔ, -n -yɛ la la'a -wʋ na -dagu 'na la tlɩ.” 33Zezwi yɩlɩ-a ɔ wiwilɩ -yɛ 'zwiföa ɔ -nyʋa namö la-aa wiwilɩ-ɛ, kalɛ-ɛ 'lɩbhɔ -bha, 'n dlɩ jio-a ngo ye. 34'N ɔ jua-a ngli 'jɩbha, ɔ nɛ: “La a zʋɔ-a 'nɩ?” Wa nɛ -bha ɔ de: “Nyininyɔ, ji -a 'yɛ mö -n 'yɛ -bha yɩlɩ.” 35'N Zezwi ji-a wi. 36Ɔ-ɔ wi 'le 'zwiföa nɛ: “Yie, 'jɩbha ɔ 'jɩbhɔ la-a tenyi lɛ!” 37-Ma wa gla'a -mʋmʋa nɛ: “-Ɔ kalɩ-ɛ la'a 'lɔkpɔlɔkpɔnyɔ 'jie-e, ɔ'ɔ la cɛ bhɛlɩ ɔ 'yɛ nʋ naa Lazalɩ 'na-a tlɩ -nɩ nʋ?”
38'Kalɛ bhlinɩ-a 'sɔdo'o Zezwi dlɩ zɔmö, ɔ -sɔ-a 'wʋ, 'n ɔ ji-e -ma lesikpa yawʋ mö. -Ma 'kpɩ 'möö -dʋ la-a -sɩbha, 'n wa ji-e -bha ʋ ngo'o kpiyi -plebhë 'wʋ 'sunʋ. 39Zezwi nɛ: “A -sa -bha kpiyi 'ye.” Lazalɩɛ -dagunglugu Malɩtɩ nɛ: “Nyininyɔ, ɔ 'ylɩɛ -mʋnazlɩ-ɛ la'a -ma lesikpa 'mö, ɔ-ɔ nglɛ 'pa 'le.” 40Ɔ gba-a -sɩbha, Zezwi nɛ -bha ɔ de naa: “N'n-n la bhe -bha -na de gba naa, -n ka'a dlɩ 'wʋ -ka -n ji -Lagɔɔ 'ghlinɔ yɩlɩ nʋ 'nɩ-ɩ?” 41'N wa ji-e -bha kpiyi 'ye -sanɩ. Zezwi yɩlɩ-a ghayɩ ɔ nɛ: “-Atʋ, n -bhalɩmö sa -n -pönɩ'ɩ-a 'yukwlie yɛ. 42N -ji na-a sɛ naa yukwli -n -pönɩ'ɩ-a 'kɔmʋʋ, -wʋʋ yɛ n gba-a -sɩbha, nɩkpaa -zakpa -a -binɩ'ɩ-ɛ la'a 'wʋɔ yɛ -bha. Wa 'kɩ dlɩ 'wʋ -ka naa -nmö tia'a -bha.” 43Ɔ gba-a sa'a 'bhë, 'n ɔ ji-a 'mö 'kpö tenyi, ɔ nɛ: “Lazalɩ! 'Wlʋ 'pɩ!” 44'N Lazalɩ -ɔ tlɩ la-a ji-a 'pɩ 'wlʋ, ɔ kpli -yɛ ɔ -kɔtɩ 'sɔ 'gwanɩɔ-ɔ -yʋkʋpɩ yɛ, ɔ 'wlukple ka lokwi yawʋ. Zezwi nɛ -bha wa de: “A bulonʋɔ ɔ 'yɛ mö.”
Wa yɛ Zezwie 'lɩbhalɩbhadɩ zʋ
45'Zwiföa -wa ji la-a Malie 'bhɛyɩ, wa gla'aa nɩkpaa -bɛ -wa yɩlɩ-a -ɩ Zezwi nʋ-a, 'n wa jio-a dlɩ 'wʋ -ka. 46'Bhë -mʋmʋa -sɔ-a 'wʋ, 'n wa ji-e -ma falizɩɛ ghlɩ, 'n wa jua-a -ɩ Zezwi nʋ-aa 'dɩ -sanɩ. 47-Lagɔbʋbɔngwa -yɛ falizɩɛ 'sɔ pla-a -ma, 'n wa ji-a 'zwiföaa -zijlitungwa 'wlu gbëna. Wa nɛ: “Sa -a ji-a 'mö zʋzʋnʋɔ 'nɩ? Nɩkpɛ -la bhatɩɛ -bɛ ɔ -wʋ-ɔ 'mö-a nɛ nʋ 'le. 48-A -kɔɔ -sɩbha cɛ yawʋ -sa, nɩkpa 'bhuo dlɩ wa jio-a 'wʋ -kaa, 'n Ghlɔmöö 'bhugwie 'yɛ-a -aa -Lagɔbudu 'kadʋ -yɛ -aa dʋdʋ 'sɔ sɛ -sa kwla'a ji.”
49-Ma wa gla'aa nɩkpɛ -bhlʋ, ɔ nglɩ-ɩ -yɛ-a Kayifö, 'ma 'ylʋba la'aa 'mö mɔ-ɔ glɩnɩ la-a -Lagɔbʋbɔnyɔ 'kadɔ. Ɔ nɛ -bha wa de: “A'a -ma ɩ 'mö -lu -bhlʋɔ 'bhë 'mö -nganɩ. 50A'a jɩblɩnɩ 'kikie 'wʋ sɛ naa, nɩkpɛ -bhlʋ 'yɛ -gwlɩ 'bhuoo yɛ tlɩ, mɩ-ɩ -ga-a cɛ dʋdʋ 'bhuoo sɛsasɩɛ bhla.” 51'Mɩ wɛlɩ la'a 'nɩ-ɛ la -ma ɔ 'bhëë 'mö 'bhönɩ, -Lagɔbʋbɔnyɔ 'kadɔ ɔ glɩnɩ la-a 'ma 'ylʋba la'aa 'mö, 'n -Lagɔ jio-a 'mö gbanɩ 'n ɔ jiɩ-a ngli -sa naa, wa dʋdʋɔ yɛ Zezwi ji la-a tlɩɛ. 52Ɛ'ɛ -lɛ 'yɛ wa dʋdʋɔ 'bhëë 'nyizee yɛ, ɔ 'yɛ 'yɛ -Lagɔɔ gwie -wa ba-a 'wlu 'titanɩ, ɔ 'kʋa 'gblʋ -bhlʋ 'mö pla-aa yɛ -bha. 53Tɛnɩ-a 'mö zlɩ la'a 'wʋ, Zezwie 'lɩbhalɩbhadɩ wa zʋ -bha. 54Ɩ yɛ Zezwi 'nɩ tulua la-a 'mö ɔjɩ -ma 'zwiföaa nyɩdɩ. Ɔ -sɔ-a 'wʋ, 'n ɔ ji-e -bha yawʋɔ dʋdʋ -ʋ glɩ-ɛ -ma 'mïsekpa 'klʋɔ 'gbë wa la-a Eflayimöö 'mö mö, -ma ɔ -yɛ ɔ 'wʋbhlinɩngwa 'sɔ glɩ-a yɛ.
55'Zwiföaa 'pɩpɩ wa la-a gïyikwlaa 'möwlʋpɩpɩ, ɛ de-e -wʋ la-a nyini 'le, ɛ-ɛ -bhla -ma 'yu 'n 'kwlagwlɩ'ɩɛ nɩkpaa -bebe ji-e -ma Zelwizalɛmö mö wa 'yɛ -bha -Lagɔ 'ji 'klʋ 'wlawla zʋɔ yɛ. 56Wa-a la'a Zezwi 'nama 'le -ma -Lagɔbudu 'kadʋ 'mö, 'n wa 'jɩbhajɩbhanɩ-a ngli naa: “Sa a yɩlɩyɩlɩnɩɩ bhe -nɩ 'mö 'nɩ? Ɔ 'na 'pɩpɩ 'wʋ ji 'nɩ-ɩ?” 57-Lagɔbʋbɔngwaa 'bhitɩbhangwa -yɛ falizɩɛ 'sɔ, mʋa-a 'nyɛ la-a nɩkpa 'dɩ naa, nɩkpɛ -mɔ -kɔɔ de -ji ɔ -sa 'dɩ wa 'kɔ köbha.
Currently Selected:
ZAA 'BƆGƲ 11: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
