ZAA 'BƆGƲ 13
13
Zezwi yɛ ɔ 'wʋbhlinɩngwaa kpli 'nyu yawʋ 'pa
1Zlɩ 'yɛ zɩ gïyikwlaa 'möwlʋpɩpɩ 'yɛ bhɩa, Zezwi -ji sɛ naa ɔ de yɛ nyini 'bhë, la ɔ ji-e ma'a 'pɩ 'wʋ 'bhö-ö ɔ 'yɛ -ma ɔ -Tɩbha yawʋ mö. Sa 'bhë ɔ 'jɩbha la-a ɔ -lʋa -wa -wʋ-ɔ ma'a 'pɩ 'wʋ, 'n ɔ jiɩ-a 'ji bhɩa. 2Wa-a li 'le, 'Jinylozuzuko yɛ la -ma Simo Isɩkaliɔtɩɛ 'gu Zwidaa dlɩ zɔmö pla 'bhë ɔ 'yɛ Zezwi 'pɛlʋ 'paa yɛ. 3Zezwi -ji la sɛ naa ɔ -Tɩbha -Lagɔ kɔ la -li 'bhuo 'ye 'nyɛ 'bhë, -ma -Lagɔ yawʋ ɔ 'bhö-ö la -bha, -ma -Lagɔ yawʋ ɔ ji la-a nimï möö. 4Ɔ -sɔ-ɔ -bha lili go 'wʋ, 'n ɔ ji-a -bana 'mö -sa. Ɔ 'libhï-a 'tabhë 'kada 'wʋ, 'n ɔ jia-a 'mlɩ gwanɩ. 5Ɔ palɩ-ɛ -ma 'bëë 'mö 'nyu, 'n ɔ ji-a ɔ 'wʋbhlinɩngwaa kpli 'nyuo yawʋpapɩɛ tɛ-ɛ, ɔ -kɩɩ 'nyu yawʋ 'pa 'bhë, 'n ɔ sɔnʋɩ-a 'tabhë ɔ gwanɩ la-a 'mlɩ yawʋ.
6Ɔ nyini-e -bha Simo Piɛlɩɛ de, -mɔ la'a nɛ: “Nyininyɔ, -na 'bhë nya, -nmö ji-e na kpli 'nyu yawʋ 'paa?” 7Ɔ gba-a -sɩbha, Zezwi nɛ -bha ɔ de: “-Ɩ n -wʋ-ɔ la'a nʋ 'le, -n 'nɩɩ -bhla -sɩka'a 'mö -nganɩ, zʋma -yɛ ji -n jiɩ 'mö 'nʋ.” 8Piɛlɩ nɛ: “'Bhëbhë, -n 'na na -nɩ kpli 'nyu yawʋ 'pa 'lɩlɩlɩ.” Zezwi nɛ -bha ɔ de: “N nɩ -na kpli 'nyu yawʋ 'pa-a, -n 'na na de -lu ghlɩ.” 9Ɔ gba-a sa'a, Simo Piɛlɩ nɛ -bha ɔ de: “Nyininyɔ, ɛ -yɛ -sɩbha glɩnɩ, -nn wɔlʋ na kplie 'nyize yawʋ -nɩ, wɔlʋ na -kɔtɩ -yɛ na 'wlukple 'sɔ yawʋ 'gamö.” 10Zezwi nɛ: “-Ɔ la'a -ɔ budo-a, ɔ'ɔ-a 'mö -bha budobudo yɛ glɩ 'sɔ, kplie 'nyize ɔ ji-a 'nyu yawʋ 'paa, -wʋʋ yɛ-a, ɔ ku 'bhuo 'wlʋɔ-ɔ -ma. Abhaa -nɩ 'yɛ 'gamö, a 'wlʋɔ-ɔ -ma 'bhë, ɛ'ɛ -lɛ-a 'mö a 'bhuo -kpö.” 11-Ma ɩ 'mö, Zezwi -ji la nɩkpɛ -ɔ jio la-a 'pɛlʋ 'paa yɛ ɔ nʋ-a: “A 'bhuo -kpö 'nɩ-ɛ -sɩbha -ma 'wlʋ.”
12Zezwi bhɩa-a wa kplie yawʋwɔlʋwɔlʋɛ 'ji-e, ɔ 'pa-a ɔ -banɩ 'mö, 'n ɔ ji-e -bha lili go sɛ glɩ-ɩ. 'N ɔ jua-a ngli 'jɩbha, ɔ nɛ: “-Ɩ n nʋya-a la'a 'ji, a kɩ 'mö 'nʋ 'bhë 'nɩ-ɩ? 13-Amö a la-a -Abhitɩbha -yɛ Nyininyɔ 'sɔ, a ka'a -sɩbha la 'le -wʋ, ɩ bhle wʋ -bha, -wʋʋ yɛ-a, 'mɔ n glɩnɩ -bha. 14-Ma ɩ 'mö, -amö Nyininyɔ, -amö 'Bhitɩbha, n -yɛ a kpli yawʋ wɔlʋ-ɔ, a wɔlʋwɔlʋnʋ 'yɛ -nɩ kpli yawʋ. 15-Wʋʋ yɛ-a, -slʋnʋ n slʋnʋya-a la'a, -ɩ la'a n nʋya-a la'a 'ji a 'kɩ 'yɛ -nɩ nʋ. 16'Dɩɛ -dɩ n nyɛya -bha naa: Nyɩgbajʋlʋ 'nɩ 'ghli-i ɔ 'yɛ ɔ 'bhitɩbha 'wʋ zi, tiatianyɔ 'nɩ 'yɛ 'ghli-i ɔ 'yɛ -ɔ tio-a 'wʋ zi. 17A -yɛ 'mɩ -ɩ la'a -ji, 'n a -kɩɩ -gömö namönɩ, 'mʋna 'lɩbhaya. 18A 'bhuo -kpöö yɛ n 'nɩɩ-ɩ gba, -wa n -sa-a -bha n -jua. Wɛlɩköbhë la'a -a 'cɛlɩɔ-ɔ -ma -Lagɔwɛlɩɛ 'bɔgʋ 'mö, ma-a ji-e 'mö-a 'wʋ 'wlenɩɛ. 'Ma wɛlɩköbhë ma -yɛ-a naa:
-Ɔ -wʋ la-a na lili li 'le,
ɔ ka'a 'wʋ -sɔnʋ 'bhë.
19-Sɩka'aa 'bhë, 'mɩ -ɩ la'a 'nɩ-ɛ -bhla ji, 'n n wʋya-a la'a 'dɩ 'nyɛ 'le, la ɩ -yɛ jinɩ-ɛ, a 'kɩ dlɩ 'wʋ -ka naa -ɔ n glɩnɩ-a, 'mɔ n glɩnɩ -bha. 20'Dɩɛ -dɩ n nyɛya -bha naa: -Ɔ -yɛ na tiatianyɔ 'jinanɩswɩ'ɩ köbha, -amö ɔ köbha-a 'jinanɩswɩ'ɩ. -Ɔ ka'a 'jinanɩswɩ'ɩ köbha, -ɔ tia'a-a 'mɔ ɔ köbha-a 'jinanɩswɩ'ɩ.”
Zezwi nɛ Zwida jio-a 'pɛlʋ 'paa
21Zezwi gba-a -ɩ la'a 'bhë, 'n dlɩ jio-a ngo ye. Ɔ nɛ: “'Dɩɛ -dɩ n nyɛya -bha naa, a gla'aa nɩkpɛ -bhlʋ ji'i-a 'pɛlʋ 'paa.” 22'N ɔ 'wʋbhlinɩngwa ji-a 'wʋ yɩlɩyɩlɩnɩ, -mɔ Zezwi sa wa 'nɩɔ -jie yɛ. 23Ɔ 'wʋbhlinɩngwa gla'aa -bhlʋ -ɔ Zezwie 'bhë 'jɩbha-a tenyi tenyi, ɔ glɩ -bha Zezwi yawʋ. 24'N Simo Piɛlɩ jio-a 'jie 'kapönɩ naa: “'Jɩbhɔ ngli -mɔ ɔ sa-a 'nɩ?” 25-Mɔ la'a pita-a -bha Zezwie 'köklɩ 'ji 'wlukple yɛ, 'n ɔ jio-a ngli 'jɩbha: Ɔ nɛ: “Nyininyɔ, a'a -mɔ-a 'nɩ?” 26Zezwi nɛ naa: “'Fʋlokoköbhë n ji-e la'a 'ngwaa, -ɔ n jia-a 'ye 'nyɛɛ mɔ -bha.” Zezwi 'ngwa-a 'fʋlokoköbhë, ɔ 'libhïa-a 'wʋ, 'n ɔ jia-a Simo Isɩkaliɔtɩɛ 'gu Zwida 'ye 'nyɛ. 27Zwida 'libhï-a 'fʋlokoköbhë 'wʋ, 'n Sata jio-a dlɩ zɔmö pla. Zezwi nɛ -bha ɔ de: “-Ɩ -n ji-a nʋɔ, nʋɩ 'ghlɩghlɩ.” 28Nɩkpa -wa -wʋ la-a li 'le, köbhë la'a, 'manɩɛ yɛ ɔ gba-a Zwidaa de, wa gla'aa -bɛ 'nɩa-a 'mö 'nʋ. 29Zwida ka la-a mëni yɛɛ yɛ, -mʋmʋa -yɛ dlɩ 'pa wa nɛ sa'a Zezwi gba-a naa: “Mö -n 'yɛ 'pɩpɩɛ -li pɩa, mö 'yɛ -n 'yɛ 'pʋangwa -lu 'nyɛ.” 30Zwida li-a 'fʋlokoköbhë la'a 'gamö, 'n ɔ ji-a 'pɩ 'wlʋ. Dʋdʋ la-a -sɩbha.
Zezwie gba -lile
31Zwida 'wlʋ-a 'pɩ-ɛ, Zezwi nɛ: “-Sɩka'a-a 'mö Nɩkpɛɛ 'Gu yɛ 'ghlimanɩɔ 'bhë, 'n -Lagɔ ji 'yɛ-ɛ -ma ɔ 'mö 'ghlimanɩɔ. 32'N -Lagɔ -yɛ -ma ɔ 'mö 'ghlimanɩɔ, -Lagɔɔ bhë-ë jio 'yɛ-a -nɩ -ma ʋ 'mö 'ghlimanɩɛ, -bha tʋ-ʋ 'wʋ -sɛ ʋ 'kɔ 'ghlimanɩ. 33Na 'gwieyi, n nyɛya 'sɔɔ -laaglɩbɩ 'na 'mö gwlɛ. 'Nama a ji'i -bha, wɛlɩköbhë n gba la-a 'zwiföaa de naa: La n -wʋ-a mö 'le a'a bhɛlɩ a 'yɛ -bha mö, 'ma n gba 'yɛ-ɛ la'a a de 'gamö. 34Gba -lile n 'paya -bha: A 'jɩbhajɩbhanɩ. Sa n 'jɩbhaya-a, a 'jɩbhajɩbhanɩ -sɩbha. 35'N a -yɛ 'jɩbhajɩbhanɩ-ɛ, -ma ɩ 'mö nɩkpa 'bhuo ji-a sɛ jɩblɩnɩɛ naa na 'wʋbhlinɩngwa a glɩnɩ -bha.”
Zezwi nɛ Piɛlɩ ji-a ɔ -jijigbʋ 'mö kpɛnɩɛ
36Simo Piɛlɩ nɛ -bha Zezwie de naa: “Nyininyɔ, ma -n -wʋ-a mö 'le 'nɩ?” Zezwi nɛ: “La n -wʋ-a mö 'le, -nn bhɛlɩ -n ka'a -bha -sɩka'a 'bɩ mönɩ, zʋma -yɛ ji -n ji'i 'bɩ mö.” 37Ɔ gba-a -sɩbha, Piɛlɩ nɛ -bha ɔ de: “Nyininyɔ, 'manɩɛ yɛ n'n -lɛ-a bhɛlɩ n -kamö -sɩka'a 'bɩ mö 'nɩ? -Na yɛ n ji na -nɩ jɩ zʋ.” 38Zezwi nɛ -bha ɔ de: “Na yɛ -n ji-e -najɩ zʋɔ? 'Dɩɛ -dɩ n -nyɛmö -bha naa, bhla -kɔkɔbhɛlʋ 'yɛ gbʋɔ mö, -n yɛ 'wʋ ta na -jijigbʋ 'mö kpɛnɩ.”
Currently Selected:
ZAA 'BƆGƲ 13: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
