LWIKÖÖ 'BƆGƲ 10
10
Zezwi yɛ ɔ 'wʋbhlinɩngwa -mʋmʋa tia
1-Mɩ la'a 'plɩ-a 'bhë, 'n Zezwi ji-e -bha ɔ 'wʋbhlinɩngwa -mʋmʋaa gwlɩ ta kugbïa 'sɔ -sa. -Ma 'bhugugwlɩ -yɛ pɩ -mɩɛ 'bɩ ɔ 'bhë ji la-a möö 'sɔ, 'n ɔ jua-a -sɩbha -ma 'sɔ 'sɔ 'sɔ tia. 2Wa 'yɛ möö ji-e, ɔ nɛ -bha wa de naa: “'Sɩkalagblɛɛ 'kadɛ -bha, 'n ɛ ji-a zalɩ 'bhë ɛ 'wʋɔ libhonʋngwa 'nɩ -zu. Ɩ yɛ a 'pa 'lagblɛlowli -bɛlɩ ɔ 'yɛ libhonʋngwa -mʋmʋa -ma ɔ 'lagblɛ'ɛ kwa. 3A mö, sa wa'a la'a -ma gbïa gla'a wliagwie tia, -sɩbha n tiaya -bha. 4A -yɛ mö 'le -wʋ, a'a -su mëni -nɩ, a'a -su -kputi -nɩ, a'a -su -gbabɔ -nɩ, a'a bhalɩ -bha 'yuogblʋ'ʋ nɩkpɛ -nɩ. 5'Ligbë -aa 'wʋ a -yɛ pla, a nʋ: A 'ligbë -wlonʋ -gömö. 6-Bha 'ma 'ligbë la'a 'wʋ -ɔ 'jɩbha-a -gömöwlonɔ -yɛ -bha -wʋ a ji -gömö -wlonʋ. Ɛ nɩ -sɩbha glɩnɩ-ɛ, a -gömöwlonɔ cɛ'ɛ ʋ jiya-a nimï jie. 7'Ligbë -aa 'wʋ a -yɛ gʋ-ʋ a glɩ -bha a 'wʋ yɛ, -mɩ wa kaya 'nyɛ, a li a nɩma, nɩkpɛ ɔ nʋ-a libho 'pɛnɩ wa 'pɛnɩɔ -bha. A 'na-a -sasanɩ 'ligbï -nɩ. 8-Glɔ -mʋɔ 'mö a -yɛ pla, wa kaya 'wʋ nglu, lili la'a bhuo wa jiya-a 'nyɛɛ, a liɩ. 9Guzungwa -wʋ-ɔ -ma a göpʋa, a 'nyɛ -maa nɩkpa 'dɩ naa: -Lagɔɔ nyininyinipɩ kaya yawʋ nyini 'bhë. 10'N a -yɛ -glɔ -mʋmʋɔ 'mö pla, wa nɩya 'wʋ nglu, a 'wlʋ -ma ʋ 'mö. A -yɛ -bha -kpongu 'klʋ nyini-e, a nʋ: 11A 'gbëë bhuku -ʋ köbha la-a -bha -aa kpli yawʋ, mʋ -a wʋya-a la'a cɛ gbɔtɔnʋ 'le. A jɩblɩnɩ-a 'mö sɛ naa: -Lagɔɔ nyininyinipɩ yɛ -kɔnyɩ nyininɩ 'bhë. 12Sa'a n gba-a sa'a a de naa: Sodɔmöö -glɔ -ʋ glɩnɩ la-a 'jinylolie nʋngwaa -glɔ, -Lagɔɔ -zijlee zlɩ -yɛ nyini, ʋ gbʋ-ʋ ji-a -sɛ -wʋɔ -glɔ la'a -ʋ 'nɩya-a 'wʋ ngluo bhla.
-Gwlɩ -ɩ 'nɩ-a Zezwie dlɩwʋkagbʋ nglu
13Kolazɛ -yɛ Bɛtɩsayida 'sɔ, a nʋ ngazɩli. -Wʋʋ yɛ-a, bhatɩ la'a -ɩ 'nʋnʋɔ-ɔ -ma a nyɩdɩ nɛ ɩ -yɛ la -ma Tilɩ -yɛ Sidɔ 'sɔ nɛ 'nʋnʋɔ-ɔ wa yɛ la -nɩ ligba pepe, wa yɛ la wa 'jinyloli cɛ 'mö -sa, wa yɛ la 'tʋtɔ bhli, wa yɛ la wa nyɩnglɛli yawʋ -gba 'bhë. 14Ɩ yɛ n gba-a naa: -Lagɔɔ -zijlee zlɩ -yɛ ji-e, Tilɩ -yɛ Sidɔ 'sɔɔ gbʋ-ʋ ji-a -sɛ -wʋɔ a -luo bhla. 15-Nmö Kapɛnaɔmöö -nɩ-ɛ, -n -tɔnʋ -Lagɔ -jimö -ma -Lagɔtapɛ'ɛ 'bhlee bhle 'wʋ sɛ zʋɔ, ɛ'ɛ -lɛ mɩ-ɩ, jɩblɩnɩ sɛ naa: Sɛ ʋ -jimö-a nyiniaa tenyi tenyi -n 'yɛ -ma 'kudu'u pla.
16Nɩkpɛ kaya 'yukwli pönɩ, -amöö 'bhë ɔ pönɩ-a 'yukwli, -ɔ kaya -ma 'sunʋ -amö ɔ 'sunʋ-ɔ -ma, -ɔ ka'a 'yɛ -ma 'sunʋ, ɔ jɩblɩnɩ sɛ naa, na -Tɩbha -Lagɔ -ʋ tia'a-a, 'mʋ ɔ 'sunʋ-ɔ -ma.”
Nɩkpa Zezwi tia la-a wa yɛ ji
17'Ylɩ -bhlʋ, ma Zezwi tia la-a ɔ 'wʋbhlinɩngwa -mʋmʋaa gwlɩ ta 'wʋbhlinɩngwa kugbïa 'sɔ, wa 'bhönɩ-ɛ -ma 'n wa ji-a ji. 'Mʋna -wʋʋa 'lɩbha 'le, 'n wa ji-e -bha Zezwi ghlɩ, ma wa 'bhö-a 'n wa jio-o -maa 'tɩtɩ -sanɩ. Wa nɛ naa: “Nyininyɔ, -a -yɛ -na 'nglɩ 'mö 'jinylozuzuku 'dɩ 'nyɛ naa ɩ 'bhö-ö nɩkpa -gömö nʋ-ɔ, -bha ɩ -zʋya -bha.” 18Wa gba-a sa'a, Zezwi nɛ naa: “N jɩnɩ 'jinylozuzukuo 'bhitɩbha Sata 'wʋ, 'n a ji-e -ma ghayɩ 'bhönɩ 'n a ji-a -dɛkpiyie swɩ bhli. 19A yie, n kaya 'mötɛnɔ 'nyɛ 'bhë, a 'yɛ tɩma -yɛ -lagɔgbiti 'sɔ -gömö namönɩ, a 'yɛ Sataa 'mötɛnɔ 'bhuo sɛ -sa, ɩ 'na 'kaya -lu -bhlʋ 'tɩɛ 'bhë nʋ. 20-Ma ɩ 'mö, 'mʋna la'a -a a 'yɛ-a li tenyi, ɛ'ɛ -lɛ naa sa 'jinylozuzuku zʋya-a -bhaa yɛ, sa a 'nglɩ 'cɛlɩɔ-ɔ -ma -Lagɔ 'wʋ, mɩ-ɩ -yɛ-a 'mʋna 'kada 'ma a 'yɛ-a li.”
-Wa -Lagɔ -slʋnʋ-a ʋ 'Gu
21-Bha -gbabhlʋ -gbabhlʋ'ʋ, 'n Zuzu 'Wlawla ji-a Zezwi 'mʋna 'kada dlɩ zɔmö 'pa, 'n ɔ ji-a -Lagɔ bhalɩ, ɔ nɛ naa: “-Atʋ, -Lagɔtapɛ -yɛ dʋdʋkpata 'sɔɔ -lowli, -na 'nglɩ 'ghlimanɩ. Wɛlɩ -ɩ 'zuzo-o la-a, -ɩ gbʋjingwa -yɛ 'nagökangwa 'sɔ 'nɩ-a jɩblɩnɩ, nɩkpa la'a -wa 'nɩ-a -lu 'ji -ka, sa -n 'pui-a wa de -gbakakaa yɛ. -Atʋ, -sɩbha -na 'bhë 'jɩbhɩ la -bhaa yɛ n -bhalɩmö.” 22Ɔ bhalɩ-ɛ sa'a -Lagɔ 'bhë-ë, ɔ nɛ naa: “-Amö na -Tɩbha -Lagɔ palɩnɩ-a wɛlɩ 'bhuo -gbakaka cɛ n 'kɩ nɩkpa -sanɩ. Sa -Lagɔɔ 'Gu -wʋnʋ-a 'mö 'sɩkösɩkö, ɔ -Tɩbha -Lagɔɔ 'nyize -jiɩ -bha. Sa -Tɩbha -Lagɔɔ 'bhë -wʋnʋ 'yɛ-a -nɩ 'mö, -bɛ 'nɩ bhɛlɩ ɔ 'kɩ -jɩblɩnɩ 'n ɛ nɩ ʋ 'Gu glɩnɩ, 'n ɛ nɩ 'yɛ nɩkpa -wa ɔ -slʋnʋɩ-a glɩnɩ, -bɛ 'nɩ bhɛlɩ ɔ 'kɩ jɩblɩnɩ.”
23'N Zezwi ji-a ɔ 'wʋbhlinɩngwa 'ji gö, ɔ nɛ naa: “-Ɩ la'a a jɩblɩnɩ-ɛ la'aa yɛ, 'mʋna 'kada 'lɩbhaya. 24-Wʋʋ yɛ-a, 'dɩɛ -dɩ n nyɛya-a naa: -Lagɔɔ 'mögbanɩngwa -yɛ dʋdʋnyiningwaa -bɛ 'sɔ, -ɩ a -wʋ-ɔ la'a yɩlɩ 'le, wa 'jɩbha la wa 'kɩ yɩlɩ 'bhë, wa 'nɩɩ-ɩ yɩlɩ. -Ɩ a -wʋ-ɔ la'a 'nʋ 'le, wa 'jɩbha la 'yɛ wa 'kɩ 'nʋ 'bhë, wa 'nɩɩ-ɩ 'nʋ.”
Sa -n 'jɩbha-a -najɩ, 'jɩbha -sɩbha -na linɩkpɛ
25'Ylɩ -bhlʋ, 'n -Lagɔɔ gböö nglipanyɔ -bhlʋ ji-a 'wʋ -sɔ, 'n ɔ ji-a Zezwi -mapaswɩ'ɩ ngli 'jɩbha, ɔ nɛ naa: “-Abhitɩbha, sa n ji-a 'mö zʋzʋnʋɔ n 'yɛ 'kɔgwlɛpɩ ghlɩ 'nɩ?” 26Ɔ gba-a sa'a, Zezwi nɛ -bha ɔ de naa: “-N zɛlɩ-ɛ -ma -aa gböö 'bɔgʋ 'mö, -mɩ -n ghlɩ-ɛ -ma 'nɩ?” 27Nɩkpɛ nɛ naa: “Sa'a ɩ 'cɛlɩɔ-ɔ -ma naa:
'Jɩbha -na Nyininyɔ -Lagɔ -na dlɩ 'bhuo nya,
'jɩbhʋ -ma -na 'pɩ 'bhuo 'mö,
'jɩbhʋ -ma -na dlɩpapʋ 'mö.
'Bhë sa -n 'jɩbha-a -najɩ
'jɩbha 'yɛ -sɩbha -na linɩkpɛ.”
28Zezwi nɛ: “-Ɩ bhuo -n gba-a -la mɩ -bha. Nʋ -sɩbha, -n ji 'kɔgwlɛpɩ ghlɩ.”
Samalie nɩkpɛ -ɔ jɔnʋ-aa 'nine
29Zezwi gba-a sa'a, nɩkpɛ la'a 'jɩbha ɔ 'yɛ ɔjɩ gbʋ -gömö -saa yɛ ɔ nɛ naa: “-Mɔ -yɛ 'mö-a na linɩkpɛ 'nɩ?” 30Ɔ gba-a sa'a, Zezwi nɛ naa: “'Ylɩ -bhlʋ, nɩkpɛ -bhlʋ 'bhönɩ Zelwizalɛmö, ɔ-ɔ -ma Zeliko mö 'le, 'n 'wingwa jio-a köbha, wa -dɩɔ-a wlu, wa bhɔtɔɔ-a tlɩtlɩswɩ'ɩ, 'n wa jio-o -bha sɛ bhlɩ, 'n wa ji-a fito.
31Nɩkpɛ la'a pö -bha, -Lagɔbʋbɔnyɔ -bhlʋ -wʋ la-a 'yuogblʋ la'a bhli 'le, 'n ɔ ji-a 'plɩ kwla'a ji. Ɔ yɩlɩ-a nɩkpɛ la'a, yawʋ ɔ tɩtlɩnɩɔ -bha 'n ɔ ji-a 'plɩ.
32'N nɩkpɛ -mʋmɔ ji-a 'plɩ kwla'a ji. 'Mɔ nɩkpɛ la'a, nɩkpa -wa nʋ-ɔ -ma -Lagɔbudu 'kadʋɔ -kʋkwa 'mö libho wa la-a Levia, wa gla'aa nɩkpɛ la-a -sɩbha. Ɔ nyini-e -bha, ɔ yɩlɩ 'yɛ-a -nɩ nɩkpɛ la'a, yawʋ ɔ tɩtlɩnɩɔ -bha 'n ɔ ji 'yɛ-a -nɩ 'plɩ.
33Wa 'sɔ -kpɔ 'plɩ-a 'bhë, 'n nɩkpɛ -bhlʋ ji-a 'plɩ kwla'a ji. 'Mɔ nɩkpɛ la'a, Samalie dʋdʋ -gömöö nɩkpɛ -bha, 'n ɔ -wʋ la-a -nɩ lowlu'u mö 'le. Ɔ nyini-e -bha, ɔ yɩlɩ-a nɩkpɛ la'a, ngazɩ 'lɩbhɔ-a ɔ 'bɩ 'mö tenyi. 34'N ɔ jio-a yawʋ nyini, 'n ɔ jio-a yawʋ glʋ. Ɔ palɩ-ɛ -bha ɔ 'gbɩ 'ji ngakpɩ 'bhë, 'n ɔ jiɩ-a sɛ gwa. Ɔ 'libhïɔ-a 'wʋ, ɔ zʋɔ-ɔ -bha ɔ -sʋkʋ -gömö, 'n ɔ -nyɔɔ ji-a mö. 'N ɔ jio-o -ma lagangwaa 'mögʋbudu'u kwa, 'n ɔ jio-a 'jinanɩswɩ'ɩ 'ji zʋ. 35Zlɩ zɩ-a, ɔ -sa-a -ma mënie 'wlu -bhlʋ, 'n ɔ jiʋ-a -budulowli 'ye 'nyɛ, ɔ nɛ: Gblo mëni la'a 'wʋ, zʋ na nɩkpɛ 'ji, lowlu'u n -wʋ-a mö 'le. N -yɛ nimï ji 'bhë, mëni -mɛ -n -yɛ -bha ɔ -gömö 'ji nyimanɩ, n jie 'kwla -sa.”
36'N Zezwi ji-a -Lagɔɔ gböö nglipanyɔ la'a ngli 'jɩbha naa: “-Na -nɩ de nɩkpɛ -ɔ 'wingwa 'lɩbha-a la'a tlɩtlɩswɩ'ɩ, -bha nɩkpa la'a taa gla'a, -mɔ nʋɔ-a ɔ linɩkpɛɛ 'jɩbhajɩbhali 'ji 'nɩ?” 37Ɔ nɛ: “Nɩkpɛ la'a -ɔ yɩlɩ-a ɔ ngazɩklʋ mɔ -bha.” Zezwi nɛ -bha ɔ de: “-Ɩ -n gba-a, mɩ -bha. -N -yɛ mö-ö, nʋ 'yɛ -na -sɩbha.”
Zezwie wɛlɩɛ 'yukwlipönɩpönɩɛ-ɛ ka-a dlɩ yɛ tenyi
38Zezwi -yɛ ɔ 'wʋbhlinɩngwa 'sɔ-ɔ -ma Zelwizalɛmö mö 'le 'n wa ji-e -ma 'gbë -bhlʋ 'mö nyini. -Ma gbë la'a 'möö 'nglɔ -bhlʋ wa la-a Malɩtɩ, 'n ɔ jio-o -ma ɔ 'ligbë'ë wɔzɩ. 39Malɩtɩɛ -dagunglugu -bhlʋ wa la-a Mali, ɔ glɩ-ɛ -bha Nyininyɔ yawʋ yɛ, ɔ-ɔ la'a ɔ wɛlɩ 'yukwli pönɩ 'le. 40Malɩtɩɛ -nɩ-ɛ, 'ligbëlibho -zinɩɔ-a ngoo yɛ, ɔ'ɔ la cɛ'ɛ -wlonʋ. Ɔ ghlɩ-ɛ -bha Zezwi, ɔ nɛ: “Nyininyɔ, sa n -wʋ-ɔ la'a yʋlɔ 'le 'bhë 'n na -dagu glɩ-ɛ -bha, ɩ -nɩmö 'kalɛ 'wʋ -bhï 'nɩ-ɩ? 'Nyɔ yɩ 'dɩ ɔ ka'a kwanɩ.” 41Malɩtɩ gba-a sa'a, Zezwi nɛ: “Malɩtɩ, -li -bebee gbʋ-ʋ -plamö-a wʋ yɛ -n -wʋ-a yʋlɔ 'le. 42-Lu -bhlʋ 'tɩɩ -ʋ ka-a dlɩ yɛ tenyi 'mʋ Mali -sa la'a -bha. Mʋ-ʋ -yɛ-a -luo -lu, -bɛ 'na 'kɔ cɛ'ɛ -sa 'lɩlɩlɩ.”
Currently Selected:
LWIKÖÖ 'BƆGƲ 10: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
