LWIKÖÖ 'BƆGƲ 16
16
Zezwi yɛ -lie 'jizʋnyɔ -ɔ ghli-a 'wie 'nine 'pa
1Zezwi nɛ -bha ɔ 'wʋbhlinɩngwaa de naa: “Wʋlʋwʋlʋnyɔ -bhlʋ, mɔ-ɔ -sa-a -ma ɔ lɩ 'bhuo 'n ɔ jiɩ-a ɔ libhonʋnyɔ 'kadɔ -bhlʋ 'mö palɩ, ɔ 'kɩ 'ji zʋɔ yɛ. 'Ylɩ -bhlʋ, 'n nɩkpa jio-a 'dɩ -la, wa nɛ naa: -Na libhonʋnyɔ -la, -na lɩ ɔ -wʋ-a 'ji nyimanɩ 'le. 2'N wʋlʋwʋlʋnyɔ ji-a ɔ libhonʋnyɔ la'a wɔzɩ, ɔ nɛ -bha ɔ de naa: -Na 'jinylɔdɩ n -wʋ-a 'nʋ 'le, sa -n nʋnʋ-a libho 'mö ji -n -kamɩ'ɩ -sanɩ. -Wʋʋ yɛ-a, -n 'na-a 'mö na -li 'ji zʋ 'sɔ. 3Ɔ 'bhitɩbha gba-a sa'a ɔ de-e, -ma ɔ dlɩ zɔmö ɔ nɛ naa: Na 'bhitɩbha ka'a libho 'mö -sa, sa n ji-a 'mö zʋzʋnʋɔ n 'yɛ li 'nɩ? N'n 'mö 'tɛ-ɛ 'bhë n 'yɛ 'kwlalibho nʋ. N 'yɛ 'yɛ 'jɩbhaa do'o, zʋ 'wʋ ɩ bhï'ï -bha. 4Ɔ 'pa-a dlɩ -daan, ɔ nɛ naa: N yɛ 'nagö ghlɩ 'bhë, sa n 'yɛ-a zʋ na 'bhitɩbha ka'a libho 'mö -sa, nɩkpa -mʋmʋa ka'a -ma wa 'ligbï'ï 'bhle 'nyɛ, -sɩbha n ji-a zʋɔ. 5Nɩkpa -wa ka la-a ɔ 'bhitɩbhaa gagbɩ 'n ɔ jua-a -bhlʋ -bhlʋ wɔzɩ. Taka -lɔ ji-a, 'n ɔ jio-a ngli 'jɩbha, ɔ nɛ naa: Na 'bhitɩbhaa 'manɩlu -n ka-a gagbʋ 'mö 'nɩ? 6Nɩkpɛ nɛ naa: Ɔ 'kpölakëë gwlɩ -ngbï n ka-a gagbʋ 'mö. Ɔ nɛ: Ɩ 'bɔgʋ mʋ-ɔ la'a, ghlaghlanʋʋ 'mö, glɩ yɛ -n 'yɛ -sɩka'a 'kpölakëë gwlɩ 'sɔ 'kpölakë kugbïaa -lu 'cɛlɩ. 7'N ɔ ji-a 'sɔ -lɔ ngli 'jɩbha ɔ nɛ naa: -Nmöö -nɩ 'na-a? Ɔ 'manɩ -n ka-a -na gagbʋ 'mö 'nɩ? Nɩkpɛ nɛ: Lilie -lɛjɩɛ gwlɩ -ngbï -bha. Ɔ nɛ: Ɩ 'bɔgʋ-ɔ la'a, ghlaghlanʋʋ 'mö, glɩ yɛ -n 'yɛ -sɩka'a -lɛjɩɛ gwlɩ -mʋnaa -lu 'cɛlɩ.
8Ɔ 'bhitɩbha 'nʋ-a -ɩ la'a, ɔ nɛ: 'Wuë! Nɩkpɛ -la mɔ-ɔ ka-a 'mö-a 'nagö.” Zezwi gba-a sa'a, 'n ɔ jiɩ-a 'wlu 'kla, ɔ nɛ: “A yie nɩkpa -wa 'nɩ-a -Lagɔ -ji, sa wa -kakanɩ-a 'nagö cɛ 'n wa zi-a -Lagɔɔ -lʋa 'wʋ.
9-Amöö -nɩ, 'dɩ n zʋya-a 'mö mɩ-ɩ yɛ-a naa: Ma'a 'pɩ 'wʋɔ wʋlʋwʋlʋɛ -ɛɛ yɛ nɩkpa nʋ-a 'kɔmʋʋ 'jinyloli-e, abhaa -nɩ a 'libhie 'wʋ a 'yɛ a linɩkpa -lie -li 'kikie 'ji nʋ, -zlɩ ɛ 'nɩ-a 'mö -bhlɩ -Lagɔ 'kaya -ma ʋ yawʋ 'bhle 'nyɛ. 10Nɩkpɛ -ɔ -ji-a 'jinanɩswɩ'ɩ -li 'kikiee 'ji -zʋɔ, mɔ-ɔ bhɛlɩ-a ɔ 'yɛ -li 'kadɩ 'ji zʋ. -Ɔ 'nɩ-a -li 'kikiee 'ji -zʋɔ -ji, ɔ'ɔ bhɛlɩ ɔ 'yɛ -li 'kadɩ 'ji zʋ. 11Sa'a n gba-a naa: Ma'a 'pɩ 'wʋɔ wʋlʋwʋlʋɛ -ɛ -yɛ-a sɛyɩlaleyi a'a la'a ɛ 'ji -zʋɔ -ji-e, -mɔ jiya 'mö-a lɩɛ lɩ 'mö palɩɛ 'nɩ? 12Wa -kamö kabönɩkpɛɛ -li 'mö palɩ, -nn la'a ɩ 'ji -zʋɔ -ji-e, lɩ -bebe -Lagɔ -jimö la-a nyɛɛ, ʋ 'na -kamɩ 'nyɛ. 13Nɩkpɛ 'nɩ bhɛlɩ ɔ 'yɛ 'bhitɩbhangwa 'sɔ -ka 'bhë ɔ 'yɛ wa 'sɔ -kpɔ -bha -zʋ. -Bhlʋ ɔ ji-a 'jɩbhaa ɔ 'yɛ-a -mɔbha 'jɛbhɛlɩ. -Ɩ la'aa yɛ a'a-a bhɛlɩ a 'yɛ -Lagɔ a dlɩa 'ye 'nyɛ 'bhë a 'yɛ 'yɛ a dlɩa mëni 'ye 'nyɛ.”
Zezwi yɛ falizɩɛ 'lʋnʋ
14Zezwi gba-a sa'a, falizɩɛ -wa -wʋ la-a 'yukwli pönɩ 'le mëni wa 'jɩbha-aa yɛ, gla wa palɩɔ -bha. 15Zezwi nɛ -bha wa de naa: “Abha falizɩɛ -nɩ-ɛ, -bha nɩkpaa 'jie 'klʋ 'möslɛnɩngwaa swɩ'ɩ a libhï-a ajɩ 'wʋ 'bhë, -Lagɔ -ji a 'mlɩɛ dlɩa. -Ɩ ka-a -bha nɩkpaa de 'nglɩ -gömö, -nyanɩ 'wʋ ɩ -bhï-a -Lagɔ.
16-Benyido'oo -Lagɔɔ gbö -yɛ ʋ 'mögbanɩngwaa nglipawɛlɩ 'sɔ mɩ-ɩ -bhlɩ la -bha, 'mɩ wa slʋnʋ-a nɩkpa -daan 'n Zaa nɩkpaa badizee de ji-a nyini. -Lagɔɔ nɩkpanyinigbʋ, sa wa ji-a 'mö zʋzʋnʋɔ wa 'yɛ ʋ nyininyinipɩ 'wʋ mö, tɛnɩ-a 'mö -bha, -Lagɔɔ nyininyinipɩɛ 'tɩtɩɛ -tɩtɩ-ɛ 'sɔɔ 'le, 'n nɩkpaa -bɛ köbhanɩ-a wajɩ -gla wa 'yɛ -ma 'möö yɛ. 17Sa'a n gba-a sa'a a de naa, -Lagɔtapɛ -yɛ dʋdʋkpata 'sɔɔ sɛyɩlayɩlɩɛ jɔnʋ-a 'wʋ -Lagɔɔ gböö gla'a 'kikeyi -bhlʋ 'yɛ sɛ yɩlaa do'o.
18Nɩkpɛ -mɔ -yɛ ɔ 'nglɔ 'kwla -sa ɔ -yɛ nglɔ -mʋmɔ kwa, gbʋ ɔ yɩlɩ -bha. Nglɔ -mɔ ɔ 'luwli -yɛ 'kwla -sa, nɩkpɛ -mɔ -kɔɔ 'yɛ -nɩ kwa, gbʋ ɔ yɩlɩ -bha.”
Wʋlʋwʋlʋnyɔ -yɛ 'pʋanyɔ Lazalɩ 'sɔɔ 'nine
19'Ylɩ -bhlʋ, 'n Zezwi ji-a nine la'a 'pa, ɔ nɛ naa: “Nɩkpɛ -bhlʋ wʋlʋ ɔ wʋlʋ la-a tenyi. 'Nglɩmöbanɩ -ɩɩ pɛlʋ-ʋ 'tɛɛ-a ɩ 'nyize ɔ pa-a 'mö. Sa zlɩ zɩ-a 'mʋna ɔ li -bha 'n ɔ li-a lilie lili. 20'Pʋanyɔ -bhlʋ -wʋ 'yɛ la-a -bha, ɔ nglɩ-ɩ -yɛ-a Lazalɩ, ɔ ku 'bhuo gbɩ-ɩ bhɩʋ-a 'ji, 'n ɔ pö-ö -bha wʋlʋwʋlʋnyɔ la'aa -budu ngo'o. 21Ngɔmʋ-ʋ -wʋɔ-a 'lɩbha 'lee yɛ, wʋlʋwʋlʋnyɔ -yɛ li 'le -wʋ, lili -ɩ bhli-a dʋdʋ'ʋ, ɔ 'jɩbha ɔ 'kɩ la li 'bhë ɔ'ɔ ghlɩɩ 'yɛ. 'N gɔ ji-a ɔ 'gbɩ 'ji -mɛnɩ kwla'a.
22'Pʋanyɔ la'a pla-a -ma 'n ɔ ji-a tlɩ. -Lagɔzuzuku ji-a, 'n ɩ ji-a ɔ zuzuko 'wʋ 'libhï, 'n ɩ jia-a -ma Ablaamö yawʋ kwa. 'N wʋlʋwʋlʋnyɔ la'a ji 'yɛ-a -nɩ tlɩ, 'n wa jio-a zʋ. 23Ɔ nyini-e -ma 'kudungwaa glɩglɩbhɛyɩ, -ma ɔ ghlɩnɩ-a yʋlɔyʋlʋ 'kadʋ. Ɔ-ɔ -sɩbha yʋlɔ 'le, ɔ yɩlɩ-a ghayɩ-ɛ, 'n ɔ ji-e -ma 'yu Ablaamö yɩlɩ, Lazalɩ glɩ -bha ɔ yawʋ. 24Ɔ yɩlɩɔ-a, 'n ɔ ji-a 'mö 'kpö, ɔ nɛ: -Atʋ Ablaamö, n -bhiamö yawʋ 'pa na de ngazɩdlɩ! Tia Lazalɩ ɔ 'yɛ ɔ wlijeyi -ma 'nyu 'mö 'ngwa, ɔ 'yɛ ji ɔ 'kʋ -bha na mɩɔ 'wʋ twiena, na mɩɔ 'yɛ -pɛpɛ yawʋ jinɩ, -kosu -ʋʋ 'mö n glɩ-ɛ la'a yʋlɔ 'le n -wʋ-a tenyi tenyi. 25Ɔ gba-a sa'a, Ablaamö nɛ naa: Na 'gu, -na dlɩ bhlinɩ -bha dʋdʋkpata'aa -lie de. -Lie -li -bebe -n ghlɩ la-a -na, 'n 'zwɩ ji-a -nɩ Lazalɩ zi. -Sɩka'a-a 'mö, ɔ -nɩ 'jiyawʋsɔde nyini-e la'a, -nmöö -nɩ-ɛ, -na yʋlɔyʋlɔde yɛ nyini 'bhë. 26-A nyɛya 'sɔɔ nyɩdɩɛ 'bhë 'gamö, -gbi 'kadɛ -wʋ-ɔ -bha. Ɩ yɛ nɩkpɛ -yɛ la nʋ ɔ 'yɛ ma'a -aa ma'a 'bhö-ö, ɔ 'yɛ ma a -wʋ-ɔ -la mö nʋ-ɔ, ɔ'ɔ 'plɩnɩde -ka. Ma -a -wʋ-ɔ la'a nɩkpɛ -yɛ 'yɛ nʋ ɔ 'yɛ -ma ji nʋ-ɔ, ɔ'ɔ 'plɩnɩde -ka. 27Ɔ gba-a sa'a, wʋlʋwʋlʋnyɔ nɛ naa: -Atʋ, ɩ -yɛ -sɩbha 'mö -wʋ-ɔ, n -bhiamö yawʋ, tia Lazalɩ ɔ 'yɛ -ma dʋdʋkpata'a nimï mö, ɔ 'yɛ -ma na -tɩbhaa -kosu 'ji mö, 28na -dagwie -ngbï -wa -wʋ-ɔ -ma, ɔ 'kʋa 'dɩ kwa wa 'yɛ 'jinylolie nʋnʋgbʋ 'wʋ -gɔ, -ɩɩ -zlɩ wa -yɛ tlɩ, ma n -wʋ-ɔ la'a yʋlɔnʋ 'le, wa ji-e 'yɛ -ma -nɩ ji. 29Ablaamö nɛ -bha ɔ de naa: Ɛ -yɛ -na -dagwiee 'dɩmözʋ yɛ glɩnɩ-ɛ, wa ka Moyizɩ -yɛ -Lagɔɔ 'mögbanɩngwa 'sɔɔ -Lagɔbɔgʋɩ, wa pönɩ -ma ɩ 'möö wɛlɩ 'yukwli, -ɩ 'cɛlɩɔ-ɔ -ma wa 'kɩ -bha zʋ. 30Ɔ nɛ: -Atʋ Ablaamö, mɩ-ɩ la-a 'bhë-ë, nɩkpɛ -yɛ glu 'wlʋ, ɔ -kʋa 'dɩ kwa, 'mɩ wa ji-a wa 'jinyloli cɛ 'mö -saa. 31Ablaamö nɛ naa: Moyizɩ -yɛ -Lagɔɔ 'mögbanɩgwa 'sɔɔ -Lagɔbɔgʋɩ 'möö wɛlɩ -ɩ 'cɛlɩɔ-ɔ -ma wa nɩ 'jɩbha wa 'kɩ -bha zʋ-ɔ, nɩkpɛɛ 'bhë -yɛ glu 'wlʋ ɔ -kʋa 'dɩ kwa, 'yukwli 'mö wa ji-e -bhla 'tamanɩɛ 'kɔmʋʋ.”
Currently Selected:
LWIKÖÖ 'BƆGƲ 16: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
