LWIKÖÖ 'BƆGƲ 19
19
Zezwi yɛ -ma lepoo mëniköbhanyɔ Zasee 'ligbë'ë mö
1Zezwi pla-a -ma Zelikoo 'gbë 'mö, ɔ-ɔ 'gbë 'mö -dɩ 'le, 2wʋlʋwʋlʋnyɔ -bhlʋ wa la-a Zase, -ɔ -yɛ-a lepoo mëniköbhangwaa 'bhitɩbha, 3ɔ 'jɩbha la ɔ 'yɛ Zezwi yɩlɩ 'bhë-ë, ɔ'ɔ 'wʋ 'bhʋa, nɩkpaa -zunʋ yɛ, ɔ'ɔ la bhɛlɩ ɔ 'kɔ yɩlɩ. 4'N ɔ ji-a sɛcɛ 'wʋ 'libhï, 'yuogblʋ Zezwi -wʋ la-a bhli 'le, 'n ɔ ji-e -ma ʋ 'yu 'wʋ 'tʋnʋ, su -ʋ 'nɩgbö-ö -bha 'yuogblʋɔ -kʋkʋngoyawʋ, 'n ɔ ji-e -ma ʋ 'wlu -gbla, Zezwi -yɛ 'plɩ 'le -wʋ, ɔ 'kɔ yɩlɩɛ yɛ. 5Zezwi nyini-e -bha su la'aa zɔmö 'n ɔ ji-a ghayɩ yɩlɩ, ɔ nɛ: “Zase, -gaganɩ 'wʋ -n 'yɛ sɛ 'sibhë, -ma -na 'ligbë'ë n ji-a -zɩnɩ'ɩ gʋ-ʋɔ.” 6Ɔ gba-a sa'a, Zase -gaganɩ-a 'wʋ, 'n ɔ ji-a sɛ 'sibhë, 'mʋna -wʋɔ 'lɩbha 'le, 'n ɔ -yɛ Zezwi 'sɔ ji-e -ma ɔ 'ligbë'ë mö. 7Nɩkpa 'bhuo yɩlɩ-a -ɩ la'a 'wʋ, dlɩ yawʋ ɩ -nyua-aa yɛ, wa nɛ naa: “Nɩkpɛ -la -ma 'jinylolie nʋnʋnyɔɔ 'bhɛyɩ ɔ mö-a gʋ-ʋ kwla'a.” 8Zase -yɛ Zezwi 'sɔ nyini-e -ma ɔ 'ligbë'ë, ɔ 'nɩgbö-ö -bha ɔ 'ji 'klʋ ɔ nɛ: “Nyininyɔ, yie, na lɩ 'bhuo 'kïbhï 'sɔ n jiɩ-a 'mö -dlinɩɛ n 'yɛ ɩ 'köbhë 'pʋangwa cɛ dlinɩ. Nɩkpɛ -mɔ n -yɛ la yʋlʋ nʋ n -yɛ ɔ mëni 'wʋ 'libhï, n -kɛɛ 'kwla -saa ji-e, -gɔpö -mʋna n jiɛ-a nyinianɩɛ n 'kɔ 'ye 'nyɛ.” 9Zezwi nɛ: “'Pʋpʋɛ yɛ -zɩkazɩnɩ'ɩ ma'a 'ligbë la'a 'wʋ pla 'bhë. -Wʋʋ yɛ-a, nɩkpɛ la'a Ablaamöö ngëyi ɔ glɩnɩ 'yɛ-a -nɩ. 10Nɩkpɛɛ 'Gu ji-e ma'a dʋdʋkpata -gömö, ɔ 'yɛ -wa panɩ-a -Lagɔ -gömö -wa 'mʋnɔ-a 'nama, ɔ 'kʋa puaa yɛ -bha.”
Nɩkpa wa palɩ-a mëni 'mö wa 'kɛ libho nʋnʋɔ 'nine
11Nɩkpa-a Zezwi 'yukwli pönɩ 'le, 'n wa ji-a Zelwizalɛmöö 'gbë yawʋ nyini. Wa -tɔnʋ la -bha -gaganɩlɩ'ɩ -Lagɔɔ nyininyinipɩ ji la -bha wa 'ji 'klʋ ghlanɩɛ gbaa. Ɩ yɛ Zezwi 'pa-a nine la'a.
12Ɔ nɛ naa: “'Nglɩmönyɔ 'kadɔ -bhlʋ 'mɔ wa wɔzɩ-a 'ylɩ -bhlʋ -ma dʋdʋ -mʋmʋɔ -gömö wa 'kɔ dʋdʋnyininyɔ 'kadɔ 'wʋ zʋa 'bhë, ɔ 'yɛ -ma ɔ 'bhɛyɩ nyini kwla'a ji. 13Ɔ nʋ-a ɔ 'yɛ mö-ö, 'n ɔ ji-a ɔ nyɩgbajʋlʋɩ gla'aa nɩkpa kugbïa wɔzɩ, 'n ɔ jua-a mëni 'ye 'nyɛ -bhlʋ -bhlʋ, wa 'bhuo mlinɩ mëni 'mö. Ɔ nɛ -bha wa de: A 'libhï mëni la'a 'wʋ, a -wʋɩɛ libho nʋnʋ 'le n 'yɛ nimï ji. 14Ɔ 'nyʋa-a sa'a 'dɩ, 'n ɔ ji-a mö. Ɔ 'bhɩa 'nɩɔ-ɔ 'jɩbhaa yɛ, ma wa wɔzɩɔ la-a, 'n wa ji-e -ma nɩkpa tia. Wa nɛ: Nɩkpɛ a wɔzɩ-ɛ -la-a -ma, -aa -lɛ -nɩ 'jɩbha ɔ -kaya nyini. 15Nɩkpɛ la'a nyini-e -ma, 'n wa jio-a dʋdʋnyininyɔ 'kadɔ 'wʋ zʋa. Ɔ mö-ö -ma ɔ 'bhɛyɩ nimï-ë, ɔ nyɩgbajʋlʋɩ ɔ 'nyɛ la-a mëni 'ye wa 'kɛ libho nʋnʋɔ yɛ, 'n ɔ jua-a wɔzɩ, sa wa köbhaköbhanɩɛ-a 'mö, wa 'kɩ -sa. 16Taka -lɔ ji-a, ɔ nɛ naa: Nyininyɔ, mëni -n nyɛ'ɛ la-a 'ye, ɛ bhlinɩ 'wʋ kugbïa -gömö. 17'Bhitɩbha nɛ: 'Ji ɩ nanɩ -bha! Nyɩgbajʋlʋɔ -nyɩgbajʋlʋ -n glɩnɩ -bha. -Li 'kikie n -nyɛmö la-a 'ye, 'jinanɩswɩɩ -n zʋɩ-a 'jie yɛ, 'libhï -gwlɩ kugbïa 'wʋ -n 'kɩ nyini. 18'Sɔ -lɔ ji-a, ɔ nɛ: Nyininyɔ, -na mëni bhlinɩ 'wʋ -ngbï -gömö. 19Ɔ nɛ: -Nmöö -nɩ-ɛ 'libhï 'yɛ -na -gwlɩ -ngbï 'wʋ -n 'kɩ nyini. 20'N -mʋmɔ ji-a ji, ɔ nɛ: Nyininyɔ, -na mëni -n nyɛ'ɛ la-a 'ye, mɛ-ɛ la'a, -ma -yʋkʋpɩa 'mö n gwanɩɛ-a yɛ, 'n n jiɛ-a sɛ zʋ. 21-Wʋʋ yɛ n nʋ-ɔ -sɩbha, gwlanyɔ -n glɩnɩ-aa yɛ, -na nganɔ n ka-a -gömö. N -ji sɛ naa, la -nn -lɛ-a kwa, -bha -n sa -bha. La -nn -lɛ-a glʋ, -bha n dɩ -bha. 22Ɔ 'bhitɩbha nɛ: Nyɩgbajʋlʋ -zoko, -najɩɛ nglie wɛlɩ nya n -jimö-a gbʋ köbhanɩɛ. -N -ji sɛ naa, gwlanyɔ n glɩnɩ -bha, la n'n -lɛ-a kwa -bha n sa -bha, la n'n -lɛ-a glʋ -bha n dɩ -bha 'bhë-ë, 23'manɩɛ yɛ -nn -lɛ-a 'mö-a na mëni mënie sɛzʋngwa 'ye 'nyɛ wa 'kɛ libho nʋnʋ 'nɩ? N ji-e la'a, n -kɛɛ la -ma -sa kwla'a mö wa jie la -gömö 'pa wa -jimɩ'ɩɛ la 'ye 'nyɛ. 24Nɩkpa -wa glɩ la-a -bha ɔ yawʋ 'n ɔ jua-a 'dɩ 'nyɛ naa: Mëni ɔ -su-o -la, a -sɔɔ cɛ'ɛ -ɔɔ -leyi bhlinɩ-ɛ -la 'wʋ kugbïa -gömö, a 'kɔ 'ye 'nyɛ. 25Wa nɛ: 'Wuë! Nyininyɔ, ɔ -leyi -zu-a 'mö la'a -nɩ 'bhë! 26'Bhitɩbha nɛ: Sa'a n gba-a sa'a a de naa: -Ɔ ka-a -bɛ 'mɔ wa ji-a 'nyɛɛ, -ɔ ka-a 'kikie wa 'na 'kɔ -lu 'nyɛ, 'kikiee 'bhë ɔ ka-a, cɛ'ɛ wa jio-a -saa. 27-Sɩka'a-a 'mö, na tʋngwa -wa 'nɩ la-a 'jɩbha n 'kʋa nyini-e, a -nyʋa ji a 'kʋa la'a na 'ji 'klʋ 'wlu 'wʋ -dɩnɩ.”
Zezwi yɛ -ma Zelwizalɛmö nyini
28Zezwi gba-a sa'a wa de 'bhë-ë, 'n ɔ ji-a 'wʋ -sɔ 'n ɔ ji-a nɩkpaa -zakpa 'yu 'plɩnɩ ɔ 'yɛ -ma Zelwizalɛmö möö yɛ.
29-N -yɛ nʋ -n 'yɛ Zelwizalɛmö nyini nʋ-ɔ, -gwlɩ sɔ -n bhlɩ-a ya'a. -Mʋmʋɔ nglɩ-ɩ -yɛ-a Bɛtɩfaze, -mʋbhaa nglɩ-ɩ -yɛ-a Betani, -gɔgɔgbʋ wa la-a olivieswie -gɔgɔgbʋ -bha ʋ zɔmö -gwlɩ la'a 'sɔ glɩ -bha. Zezwi -yɛ ɔ 'wʋbhlinɩngwa 'sɔ nʋ-a wa 'kɩ ghlɩ, 'n ɔ ji-a wa gla'aa nɩkpa 'sɔ tia, ɔ nɛ naa: 30“Gbë-ë glɩ-ɛ -la 'yude a mö -ma, a -yɛ -ma nyini-e, -sʋkʋfalʋgu -ʋ nɩkpɛ 'nɩ-ɛ -bhla takaswɩ'ɩ -gömö -gbla, ʋ 'glɔ-ɔ. A -kʋʋ -bha ghlɩ-ɛ, a bulonʋʋ a -kamʋ'ʋ -la. 31Wa kaya ngli 'jɩbha naa, 'manɩɛ yɛ a -wʋʋ-a bulonʋ 'le 'nɩ-ɛ, a nʋ: Nyininyɔ 'jɩbhʋ -bha, ɔ nɛ -a -nyʋʋ mö.”
32Nɩkpa la'a 'sɔ Zezwi tia la-a wa mö-a, sa 'bhë ɔ gbɩ la-a 'tɩ, -sɩbha wa ghlɩɩ -bha. 33Wa-a -sʋkʋfalʋgu bulonʋ 'le 'n ʋ -lowlengwa jua-a ngli 'jɩbha naa: “'Manɩɛ yɛ a -wʋʋ-a bulonʋ 'le 'nɩ?” 34Wa nɛ: “Nyininyɔ 'jɩbhʋ -bha, ɔ nɛ -a -nyʋʋ mö.”
35'N wa ji-a -sʋkʋfalʋgu la'a bulonʋ, 'n wa jiʋ-a Zezwi kwa. Wa -nyʋʋ nyini-e -bha ɔ yawʋ-ɔ, 'n wa jiʋ-a wa -banɩ -gömö lʋlʋ, 'n wa ji-e -bha Zezwi ʋ -gömö sɛ zʋ. 36Zezwi glɩ -sʋkʋfalʋgu la'a -gömö, nɩkpa-a -bha 'yuogblʋ'ʋ -banɩ lʋlʋ 'le, 'n wa ji-a mö. 37'Yuogblʋ -ʋ 'bhönɩ-ɛ -ma olivieswie -gɔgɔgbʋ 'klʋ wa namö -bha ʋ 'wʋ, wa 'yɛ Zelwizalɛmö plaa mö, wa 'bhuo 'mʋna -wʋ-a 'lɩbha 'le, 'n wa ji-a -Lagɔɔ 'nglɩ 'ghlimanɩ, Zezwie bhatɩ la'a 'bhuo wa yɩlɩ-aa yɛ. 38'N wa nʋ-a: “Dʋdʋnyininyɔ -ɔ jinɩ-ɛ la'a -aa Nyininyɔ -Lagɔɔ 'bhëë 'nglɩ 'mö, -Lagɔ 'pɔ 'nyupalɩ! -Lagɔ -ʋ -wʋ-ɔ -ma -Lagɔtapɛ'ɛɛ 'pʋpʋɛ -kaya 'wʋ jinɩ 'bhë, ʋ 'nglɩ 'ghlimanɩ!”
39-Ma nɩkpaa -zakpa la'a gla'aa falizɩɛ nɩkpa -ja -wʋ-ɔ -ma, 'n wa ji-a Zezwi yawʋ nyini, wa nɛ naa: “-Abhitɩbha, köbha yɩ -na 'wʋbhlinɩngwa 'wʋ wa 'yɛ ngu sɛ zʋ.” 40Zezwi nɛ -bha wa de naa: “'Dɩɛ -dɩ n 'nyɛya-a sa'a naa, wa -yɛ ngu sɛ zʋɔ 'bhë oo, tɩkpakuo 'bhï mɩ-ɩ ji-a nyla.”
Zezwi yɛ Zelwizalɛmöö gbʋ 'mö wi
41Zezwi nyini-e -bha Zelwizalɛmöö 'gbë yawʋ, ɔ yɩlɩa-a -gömö 'n ɔ ji-a a gbʋ 'mö wi. 42Ɔ nɛ: “'Wuë! Zelwizalɛmö, -n -yɛ la bhɛlɩ -n 'yɛ -zɩkazɩnɩ'ɩ -ɩ -kamö-a -gömöwlonɔ 'nyɛɛ zɔmö -ji-e, ɩ ji la -na de cɛ -ga. -Sɩka'a-a 'mö, -nmö ɩ 'zuzonʋɔ 'mö-ö -la 'ji. 43-Wʋʋ yɛ-a, zlɩa-a -jimö-a 'ji zɩɛ, la -na tʋngwa ji-a tʋgwɩnɩli 'kadɩ -suo, wa -kamö -di 'mö palɩ, wa -kamö de 'bhuo 'mö nyɔnʋ. 44-Na -budi wla wa jiɩ -bha, ɩ kpiyi -bhlʋɔ 'bhë 'na glu tʋ-ʋ, wa 'yɛ-a -na 'gbë 'möö nɩkpa 'bhuo sɛ -sa. -Wʋʋ yɛ-a, zlɩ -ɛɛ 'mö -Lagɔ 'pa-a -na de ngazɩdlɩ 'n ʋ jimö-a 'wʋ ji, -n 'nɩɛ-ɛ jɩblɩnɩ.”
Zezwi yɛ -lie 'pɛlʋpangwa -ma -Lagɔbudu 'kadʋ 'mö kpëti
45Zezwi pla-a -ma -Lagɔbudu 'kadʋ 'mö, nɩkpa -wa -wʋ-ɔ -ma 'pɛlʋ 'panɩ 'le, 'n ɔ jua-a kpëti. 46Ɔ nɛ -bha wa de: “-Ma -Lagɔwɛlɩɛ 'bɔgʋ 'mö sa'a ɩ 'cɛlɩɔ-ɔ -ma naa:
-Lagɔ nɛ: Na -budu
-bɛlɩɛ 'möpanɩbudu -bha.
'Mʋ -budu la'a, 'mʋ a zʋa 'wingwaa -gbʋ 'wʋɔ?” 47Sa zlɩ zɩ-a, -sɩbha Zezwi mö la-a -ma -Lagɔbudu 'kadʋ 'mö 'n ɔ pa-a nɩkpa -Lagɔwɛlɩ ngli. -Lagɔbʋbɔngwaa 'bhitɩbhangwa-a, -Lagɔɔ gböö nglipangwa -yɛ 'zwiföaa nɩkpazɔgblʋɩ 'sɔ 'jɩbha la wa 'kɔ 'lɩbha. 48Sa wa 'yɛ 'mö zʋzʋnʋ wa 'kɔ ghlɩ wa 'nɩɩ la -ji, -wʋʋ yɛ-a, nɩkpaa -bɛ ɔ nglie wɛlɩ nanɩ la-a dlɩ yawʋ, 'n wa su-o -bha ɔ yawʋ 'n wa pönɩɔ-a 'yukwli.
Currently Selected:
LWIKÖÖ 'BƆGƲ 19: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
