MATIEE 'BƆGƲ 11
11
Za Badizɩ yɛ -ma Zezwie 'bhɛyɩ nɩkpa tia
1Zezwi zʋ-a ɔ 'wʋbhlinɩngwa kugbïa 'sɔ -kpɔ 'dɩ 'mö 'bhë, 'n ɔ ji-a 'wʋ -sɔ, -ma dʋdʋ la'a -gömöö -gwlɩ 'bhuo 'mö, 'n ɔ ji-e -maa nɩkpa -Lagɔwɛlɩ ngli -paa mö.
2Ma Za Badizɩ -wʋ la-a -die 'mö ɔ 'nʋ-ɔ -ma Zezwi 'Klie nʋnʋlie 'dɩ-ɛ, 'n ɔ ji-e -ma ɔ 'bhɛyɩ ɔ 'wʋbhlinɩngwa gla'aa nɩkpa tia. 3Ɔ nɛ: “A -yɛ mö, a 'jɩbhɔ ngli naa: Puanyɔ -a -wʋ la-a -kʋnʋ 'le mɔ -n glɩnɩ-a 'nɩɩ, bhlɩ'ɩ -a -kʋnʋ -mʋmɔ-a?” 4Wa mö-a, wa 'jɩbhɔ-ɔ -sɩbha ngli-e, Zezwi nɛ naa: “-Ɩ a -nganɩ-ɛ la'a 'bhë a jɩnɩ-ɛ la'a 'wʋ, a mö a 'yɛ ɩ 'dɩ Za -sanɩ. 5'Lɔkpɔlɔkpɔngwaa 'jie-e 'kaluo 'le, bhɩgbökangwa-a 'jinanɩswɩ'ɩ namö 'le, 'lalʋlɩbhangwa-a 'pʋ 'le, 'yukwliagbʋgbɔkangwa-a 'nʋ 'le, tlɩtlɩngwa-a galɔ 'le, -Lagɔɔ 'tɩtɩɛ -tɩtɩ-ɛ ngazɩngwa ghlɩ 'le. 6-Ɔ nɩ na yɛ -Lagɔyuogblʋ'ʋ 'bhö-ö 'mʋna 'lɩbhɔ.”
7Zezwi 'nyɛ-ɛ -sɩbha Za Badizɩɛ tiatiangwa 'dɩ, wa-a nimï mö 'le, nɩkpa -wa su la-a -bha, 'n ɔ jua-a Za Badizɩɛ yawʋdɩ -sanɩ. Ɔ nɛ naa: “'Manɩ a 'bhö-ö bhe -ma 'mïsekpa 'klʋ jɩla kwla'a 'nɩ? 'Gakokwa nyɔmʋ -wʋ-a 'mö zika 'le ma-a 'nɩ-ɩ? 8'Manɩ a 'bhö-ö -ma yɩlɩ kwla'a 'nɩ? Nɩkpɛ -ɔ ka-a wʋlʋwʋlʋbanɩ 'mö mɔ-a 'nɩ-ɩ? A -ji sɛ naa, -wa la'a -wa ka-a wʋlʋwʋlʋbanɩ 'mö, -ma wʋlʋwʋlʋbudi'i wa glɩ -bha. 9A -sanɩ'ɩ 'dɩ, 'manɩ a 'bhö-ö -ma jɩlaa 'nɩ? -Lagɔɔ 'mögbanɩnyɔ-a 'nɩ-ɩ? Köön sa'a n gba-a sa'a naa: Ɔ zi -Lagɔɔ 'mögbanɩnyɔɔ 'bhë 'wʋ. 10Za a jɩnɩ-ɛ -la 'wʋ-ɔ, ɔ yɛ wa 'cɛlɩ-ɛ -ma -Lagɔwɛlɩɛ 'bɔgʋ 'mö naa:
-Lagɔ nɛ, na 'dɩkwanyɔ n tia-a -ma -na 'yu,
ɔ 'yɛ -na 'yuogblʋ -sa.
11Sa'a n gba-a sa'a a de naa: Ma'a 'pɩnɩkpa 'bhuo gla'a, -ɔ 'yɛ 'ghli-i -ɔ 'yɛ Za Badizɩ 'wʋ zi ɔ'ɔ -bhlɩ. -Sɩbha ɩ -wʋ -bha 'bhë-ë, -ɔ glɩnɩ-ɛ -ma -Lagɔɔ nyininyinipɩ 'wʋɔ 'kikeyi ɔ 'ghli-i ɔ zi Za Badizɩ 'wʋ. 12Tɛnɩ Za Badizɩɛ de -n 'yɛ -zɩnɩ'ɩ 'wʋ nyini-e, -Lagɔɔ nyininyinipɩ 'wʋɔ mömɩɛ, 'mö ɛ 'tɛ-ɛ -bha. Nɩkpa la'a -wa nyʋnanɩ-ɛ -ma dlɩ mʋa-a mö-ö -ma. 13Moyizɩ -yɛ -Lagɔɔ 'mögbanɩngwa -mʋabha 'bhuo 'sɔ yɛ -Lagɔɔ nyininyinipɩɛ gbʋ gba 'bhë, 'n Za Badizɩ ji-a ji. 14'N abha -yɛ na wɛlɩ 'dɛdɛ'ɛ laa ji-e, a jɩblɩnɩ sɛ naa -Lagɔɔ 'mögbanɩnyɔ Elie swɩ'ɩɛ nɩkpɛ -ɔɔ gbʋ -Lagɔwɛlɩɛ 'bɔgʋ gba la-a naa -ɔ ji ji-e, 'mɔ Za Badizɩ glɩnɩ -bha. 15-Ɔ -yɛ 'yukwlie 'wlu -ka, ɔ 'nʋ.
16Abha -sɩka'aa nɩkpa, -mʋa n 'kaya bhe 'wʋ palɩ 'nɩ? -Mʋa a -nyʋa 'wlʋnʋ-a 'nɩ? E -bhlee gwie -wa -wʋ 'du 'mö 'bhli 'le 'mʋa a glɩnɩ, mʋa-a nʋ wa ligwiee de naa: 17A yɛ -a bhlɩ-a -klɩmö 'bhë a'a -lɛ jɩ, -a -dɩ-a wijogo, a'a -lɛ 'yɛ wi. 18Za Badizɩ ji-a, ɔ'ɔ li lilie -lili, ɔ'ɔ 'nɩma nʋ, a nɛ naa: Nɩkpɛ -la 'jinylozuzuko ɔ ka-a -gömö. 19Nɩkpɛɛ 'Gu ji-a, ɔ li lilie -lili, ɔ nɩma nʋ, a nɛ 'yɛ naa: Nɩkpɛ -la lililibho -yɛ nʋnɩmalibho 'sɔ ɔ ka -bha. Lepoo mëniköbhangwa -yɛ 'jinylolie nʋngwa 'sɔɔ 'tʋalɩbha -bha. -Sɩbha ɩ -wʋ-a 'bhë, -Lagɔ tua -bha. Wa nʋnʋli mɩ-ɩ tulua-a naa -Lagɔɔ gbajinɔ 'mö wa wɛlɩ 'bhönɩ -bha.”
Zezwi yɛ -gwlɩ -ɩ 'nɩɔ-a dlɩ 'wʋ -kaa gbʋ gba
20Zezwi gba-a sa'a 'bhë, -gwlɩ -ɩɩ -gömö ɔ nʋnʋ-a bhatɩɛ -bɛ 'bhë -ɩɩ 'möö nɩkpa 'nɩ-a ligba wa 'yɛ wa 'jinyloli cɛ 'mö -sa, 'n ɔ jiɩ-a 'lʋnʋ. Ɔ nɛ naa: 21“Kolazɩɛɛ nɩkpayi, a -yɛ Bɛtɩsayidaa nɩkpa 'sɔ a nʋ ngazɩli. -Wʋʋ yɛ-a, bhatɩ la'a n nʋnʋ-ɔ -ma a 'bhigwlɩ'ɩ, n -kɩɩ la -ma Tilɩ -yɛ Sidɔ 'sɔɔ -gwlɩ -gömö nʋnʋ-ɔ, -maa nɩkpa yɛ la -papa ligba, wa yɛ la 'tʋtɔ bhli, wa yɛ la nyɩnglɛli 'mö 'pa 'bhë, nɩkpa 'bhuo 'yɛ sɛ jɩblɩnɩ naa, wa yɛ wa 'jinyloli 'ji 'tati 'bhë. 22Ɩ yɛ n gba-a naa, -Lagɔɔ -zijlee zlɩ -yɛ ji-e, Tilɩ -yɛ Sidɔ 'sɔɔ nɩkpaa gbʋ -ʋ jua-a ghlɩɛ mʋ-ʋ ji-a -sɛ -wʋɔ a -luo bhla. 23-Nmö Kapɛnaɔmöö -nɩ-ɛ, -n -tɔnʋ naa -Lagɔ -jimö -ma ghayɩɛ 'bhlee bhle 'wʋ sɛ zʋɔ, ɛ'ɛ -lɛ mɩ-ɩ, jɩblɩnɩ sɛ naa sɛ ʋ -jimö-a nyinia tenyi tenyi -n 'yɛ -ma 'kudu'u pla. Bhatɩ la'a n nʋnʋ-ɔ -ma -na 'mö, ɩ -yɛ la -ma Sodɔmöö gbë 'mö 'nʋnʋɔ, -Lagɔ 'na 'ka la sɛ -sa, a -bhlɩ la -bhla -zɩnɩ'ɩ. 24Ɩ yɛ n gba-a naa, -Lagɔɔ -zijlee zlɩ -yɛ ji-e, gbʋ -ʋ ji-a Sodɔmö ghlɩɛ mʋ-ʋ ji-a -sɛ -wʋɔ -na -luo bhla.”
-Wa 'nɩ-a -lu 'ji -ka 'mʋa -Lagɔ nyɛ-a ʋ 'tɩtɩɛ -tɩtɩ
25-Bha de la'a -bhlʋ, 'n Zezwi ji-a -Lagɔ bhalɩ, ɔ nɛ naa: “-Atʋ -Lagɔ, dʋdʋkpata -yɛ -Lagɔtapɛ 'sɔɔ -lowli, n -bhalɩmö. Wɛlɩ -ɩ 'zuzo-o la-a, -ɩ 'nagökangwa -yɛ gbɩjinɩngwa 'sɔ 'nɩ-a jɩblɩnɩ, nɩkpa la'a -wa 'nɩ-a -lu 'ji -ka, sa -n 'pui-a wa de -gbakakaa yɛ. 26Nn -Atʋ, -sɩbha -na 'bhë 'jɩbhɩ la -bhaa yɛ n -bhalɩmö. 27-Amö na -Tɩbha -Lagɔ 'nyɛ-a ʋ wɛlɩ 'bhuo 'ye, sa -Lagɔɔ 'Gu -wʋnʋ-a 'mö 'sɩkö 'sɩkö, ɔ -Tɩbha -Lagɔɔ 'nyize -jiɩ -bha. Sa ɔ -Tɩbha -Lagɔɔ 'bhë -wʋnʋ 'yɛ-a 'mö -bɛ 'nɩ bhɛlɩ ɔ 'kɩ jɩblɩnɩ 'n ɛ nɩ ʋ 'Gu glɩnɩ. Nɩkpa -wa ɔ -slʋnʋɔ-a, wa 'nyize mʋa-a bhɛlɩ 'yɛ-a wa 'kɔ jɩblɩnɩ.
28Ɩ yɛ abha -su-a yʋlɔyʋlʋɔ 'gbluku-o, a ji ma'a na 'bhɛyɩ n 'kaya 'wlu -sa, a 'yɛ nyɛpɛ. 29-Amöö -nɩ-ɛ, dlɩwɔtɛ n ka -bha, n'n 'libhï najɩ 'kadɔɔ swɩ'ɩ 'wʋ, a nglu n 'kaya nyini, a pönɩ na wɛlɩ 'yukwli 'mɩ a ji-a 'jinanɩswɩ'ɩ nyɛpɛɛ. 30Na nyininyinie 'nɩ ngli -nyu, 'mʋna 'wʋ ɛ -bhï -bha, ɛ'ɛ 'gbluko 'kadaa swɩ'ɩ 'wʋ 'wɔlʋ.”
Currently Selected:
MATIEE 'BƆGƲ 11: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
