MATIEE 'BƆGƲ 16
16
Sa Zezwi gba-a nɩkpa -wa 'jɩbha-a jɩblɩnaa de
1'Ylɩ -bhlʋ, 'zwiföaa -zakpa wa la-a sadwisɩɛ -yɛ falizɩɛ 'sɔ mʋa-a ghlɩ-ɛ -bha Zezwi wa 'kɔ 'mö jɩlaa yɛ. Wa nɛ -bha ɔ de naa: “Jɩblɩna -a 'bhö-a -Lagɔ 'wʋ, -tuluanɩya 'ji -a 'ka yɩlɩ.” 2Zezwi nɛ -bha wa de naa: “'Ylʋzalʋ -yɛ bhli 'le -wʋ, -ma ghayɩ -yɛ -za, 'n a nʋ-a, zlɩɛ -zlɩ ji-a zɩɛ. 3Zlɩgömö -yɛ ji -ma ghayɩ -yɛ julu-o, 'n a nʋ-a, 'nyizako ji-a -zɩnɩ'ɩ lɩbha. 'Kwlɩsɔkangwayi, -ɩ plɩ-ɛ -ma ghayɩ 'mɩ a -ji -bha, -ɩ -wʋ-a -zɩnɩ'ɩ 'plɩ 'le a'a ɩ zɔmö -ji. 4-Sɩka'aa nɩkpa -wa glɩnɩ-a nyanɩklangwa -yɛ gbɩyɩlɩngwa sɔ, mʋa-a 'jɩbha-a jɩblɩnaa? N 'na 'kʋa kaböjɩblɩna 'ji tuluanɩ, 'n ɛ nɩ -Lagɔɔ 'mögbanɩnyɔ Zonasɩɛ -la glɩnɩ.” Zezwi gba-a sa'a, ɔ panʋa-a -gömö, 'n ɔ ji-a mö.
Zezwi yɛ 'zwiföaa 'kadɩɛ nglipalɩ 'fʋloplungakpɩ 'wʋ palɩ
5Zezwi -yɛ ɔ 'wʋbhlinɩngwa 'sɔ -gbla-a 'gɔlʋ 'mö wa 'yɛ -ma 'nyie kïkë -mabha -gömö möö ji-e, 'fʋlo ɔ 'wʋbhlinɩngwa dlʋnʋ-a 'wʋ. 6Ɔ nɛ -bha wa de naa: “A möna falizɩɛ -yɛ sadwisɩɛ 'sɔɔ 'fʋloplungakpɩɛ de 'mö.” 7Zezwi gba-a sa'a, wa nɛ -ma wa dlɩa zɔmö naa: “-Aa 'fʋlo -suo yɛ ɔ gba-a -sɩbha.” 8Zezwi jɩblɩnɩ-a wa dlɩpapɩɛ, ɔ nɛ naa: “Nɩkpa -wa 'nɩ 'jinanɩswɩ'ɩ -Lagɔ dlɩ 'wʋ -ka, 'manɩɛ yɛ a pa bhe dlɩ naa: A'a -lɛ 'fʋlo 'wʋ 'libhïë yɛ n gba-a -sɩbha 'nɩ? 9A'a-a bhe -bhla 'nagö 'pa? 'Fʋloku -ngbï n dlinɩ-a nɩkpaa 'wli -ngbï cɛ 'n wa jiɩ-a li, ɩ kïbhï -ɩ tʋ-a 'wʋ, a 'libhiɩ-a -köka ɩ yena a dlɩ 'nɩ ɩ de pö 'nɩ-ɩ? 10La n dlinɩ 'yɛ-a 'fʋloku -ngbisɔ nɩkpaa 'wli -mʋna cɛ, wa li-a ɩ kïbhï -ɩ tʋ-a 'wʋ, a 'libhiɩ-a -köka ya ɩ yena 'nɩ? 11-Ma ɩ 'mö, n -yɛ nʋ naa a möna falizɩɛ -yɛ sadwisɩɛ 'sɔɔ 'fʋloplungakpɩɛ de 'mö nʋ-ɔ, 'manɩɛ yɛ a'a-a bhɛlɩ a 'yɛ sɛ jɩblɩnɩ naa, n'n-n 'fʋloplungakpɩɛ gbʋ gba 'nɩ?” 12Zezwi gba-a -sɩbha, 'n wa jie 'mö-a sɛ jɩblɩnɩ naa: Ɔ'ɔ -lɛ 'dɛdɛ'ɛ 'fʋloplungakpɩɛ gbʋ gba, falizɩɛ -yɛ sadwisɩɛ 'sɔɔ nglipapɩɛ de ɔ nʋ-a wa möna 'mö.
Piɛlɩ nɛ: Puanyɔ -ɔ -Lagɔ -sa-a -bha 'mɔ Zezwi glɩnɩ -bha
13Zezwi -yɛ ɔ 'wʋbhlinɩngwa 'sɔ 'tʋ-a 'nyi wa nyini-e -ma Filipöö Sezalee -gwlɩ yawʋ-ɔ, 'n ɔ jua-a ngli 'jɩbha naa: “Nɩkpaa de, -mɔ Nɩkpɛɛ 'Gu glɩnɩ bhe 'nɩ?” 14Wa nɛ: “-Mʋmʋaa de, Za Badizɩ -n glɩnɩ -bha, -mʋmʋa nɛ naa: Eli -n glɩnɩ -bha, -mʋmʋa nɛ 'yɛ naa: Zelemi -n glɩnɩ -bha, -mʋmʋa nɛ 'yɛ -Lagɔɔ 'mögbanɩngwaa gla'aa -bhlʋ -n glɩnɩ -bha.” 15Wa gba-a -sɩbha, Zezwi nɛ naa: “Abhaa -nɩ 'na-a, -mɔ n glɩnɩ-a a de 'nɩ?” 16'N Simo Piɛlɩ ji-a gbʋ -dɩ, ɔ nɛ naa: “Puanyɔ -ɔ -Lagɔ -sa-a -bha, 'kɔgwlɛ -Lagɔɔ Gu -n glɩnɩ -bha.” 17Zezwi nɛ naa: “Zonasɩɛ 'gu Simo, 'mʋna -lɩbhamö. -Wʋʋ yɛ-a, 'pɩnɩkpa -nɩmö-ö -ɩ -la dlɩ zɔmö 'pa, na -Tɩbha -ɔ -wʋ-ɔ -ma -Lagɔtapɛ'ɛ, mɔ-ɔ -pamɩ-a dlɩ zɔmö. 18Sa'a n gba-a -na de naa, -na Pɩɛlɩnglɩɛ zɔmö yɛ-a kpɩ. -Bha 'mɛ kpɩ la'aa 'klʋ n ji-e na -zakpa 'wlu 'titanɩɛ, -gbabuoo klanɩɛ 'bhï 'na 'ka 'ji 'nɩgbönɩ. 19-Lagɔɔ nyininyinipɩɛ 'kwleneyia n -jimö-a 'ye 'nyɛɛ. -Ɩ -n ji-e ma'a dʋdʋkpata -gömö sɛ gwa, sɛ ɩ ji-e -ma -Lagɔtapɛ'ɛ 'gɔɔ. -Ɩ -n ji 'yɛ-ɛ ma'a dʋdʋkpata -gömö bulonʋɔ, 'bulonʋɔ ɩ 'jio-o -ma -Lagɔtapɛ'ɛ.”
20Zezwi gba-a sa'a 'bhë, ɔ nɛ -bha ɔ 'wʋbhlinɩngwaa de naa: Wa 'na-a -sanɩ -bɛ 'dɩ -nɩ naa mɔ-ɔ -yɛ-a Puanyɔ -ɔ -Lagɔ -sa-a -bha.
Zezwi yɛ ɔ ghlɩghlɩgbɩɛ gbʋ -bha ɔ 'wʋbhlinɩngwaa de gba
21Tɛnɩ-a 'mö -bha, 'n Zezwi slɛmanɩ-a ɔ 'wʋbhlinɩngwa dlɩ 'mö naa, -ma Zelwizalɛmö ɔ ji-a möö tɛnyɩ 'zwiföa nɩkpazɔgblʋɩ-ɛ, -Lagɔbʋbɔngwaa 'bhitɩbhangwa -yɛ -Lagɔɔ gböö nglipangwa 'sɔ 'kɔ 'zwɩ zia, wa 'kɔ 'lɩbha, 'bhë ɔ 'yɛ 'ylɩ taa zlɩ glu 'wlʋ. 22Zezwi gba-a -sɩbha, Piɛlɩ -nyɔɔ wla-a go 'n ɔ jio-a 'lʋnʋ. Ɔ nɛ: “Nyininyɔ, -Lagɔ 'na -kamö 'ji yawʋ -sa -ɩ -la -kamö ghlɩ.” 23Piɛlɩ gba-a -sɩbha 'n Zezwi ji-a 'mö 'bhɩlɔ, ɔ nɛ: “'Jinylozuzukuo 'bhitɩbha Sata, 'pa -najɩ nimï, -nn -lɛ 'jɩbha n 'yɛ -bha -Lagɔwɛlɩ zʋ, -ɩ -Lagɔ 'jɩbha-aa gbʋ 'nɩ -plamö, -ɩ nɩkpa 'jɩbha-aa gbʋ-ʋ -plamö -bha.”
Sa wa ji-a Zezwi 'mö -gaganɩɛ
24'N ɔ ji-a ɔ 'wʋbhlinɩngwa 'bhuo 'dɩ 'nyɛ naa: “Nɩkpɛ -yɛ nʋ ɔ ka'a -ganɩ nʋ-ɔ, ɔ -sa ɔjɩ dlɩ, ɔ nglu ɔ 'klʋkʋnʋsuo -susugbʋ, 'bhë ɔ ka'a -ganɩ. 25-Wʋʋ yɛ-a, -ɔ la'a -ɔ gwɩ-a ɔ 'pɩ 'wʋ ɔ 'yɛ 'pʋɔ yɛ, cɛ'ɛ ɛ jio-a 'bhö-öö. -Ɔ la'a -ɔ tati-a na yɛ ɔ 'pɩ 'ji-e, mɔ-ɔ jiɛ-a ghlɩɛ. 26Sa'a n gba-a naa: Nɩkpɛ 'yɛ ma'a 'pɩ 'wʋɔ -li 'bhuo ghlɩ 'bhë ɔ -yɛ tlɩ ɔ 'yɛ 'wlumö tʋ-ʋ, 'manɩ ɔ -sa-a 'mö-ö -bha 'mɩ -li la'aa de 'nɩ? 'Manɩ nɩkpɛ bhɛlɩ-a ɔ 'yɛ 'yɛ ɔjɩɛ -bhlɩbhlɩɛ 'mö zigbanɩ 'nɩ? 27-Wʋʋ -yɛ-a, 'ylɩ -bhlʋ, Nɩkpɛɛ 'Gu -ma ɔ -Tɩbha -Lagɔɔ 'ghlinɔ 'mö ɔ ji-a jinɩɛ, ɔ -yɛ -Lagɔzuzuku 'sɔ. -Bhaa do'o, -ɩ la'a nɩkpa nʋ-a -bhlʋ -bhlʋ 'n ɔ 'kʋa-a ɩ yɛ plʋnʋ. 28'Dɩɛ -dɩ n nyɛya 'mö-ö sa'a naa: A gla'aa nɩkpa -mʋmʋa 'na tlɩ 'n wa nɩ -lɛ Nɩkpɛɛ 'Guo nyininyinie yɩlɩ 'bhë.”
Currently Selected:
MATIEE 'BƆGƲ 16: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
