MATIEE 'BƆGƲ 18
18
-Ɔ 'ghli-a -ɔ zi-a -mʋabha 'bhuo 'wʋ 'nɩ?
1-Bha de la'a -bhlʋ, Zezwie 'wʋbhlinɩngwa nyinio-a yawʋ 'n wa jio-a ngli 'jɩbha, wa nɛ naa: “-Ma -Lagɔɔ nyininyinipɩ 'wʋ -ɔ 'ghli-a -ɔ zi-a -mʋabha 'bhuo 'wʋ nɩ?” 2Wa gba-a -sɩbha, Zezwi wɔzɩ-a 'gwikikeyi, 'n ɔ jio-o -bha wa nyɩdɩ'ɩ 'nɩgbanɩ. 3Ɔ nɛ naa: “'Dɩɛ -dɩ n nyɛya -bha naa, a nɩ a dlɩa 'mö 'bhɩla, a 'yɛ 'gwikikeyie swɩ'ɩ zʋ-ɔ, a 'na -ma -Lagɔɔ nyininyinipɩ 'wʋ mö. 4Ɩ yɛ n gba-a naa -ɔ ji-a 'gwikikeyi la'aa swɩ'ɩ ɔjɩ sɛ nyina-a mɔ-ɔ ji-e -ma -Lagɔɔ nyininyinipɩ 'wʋ 'bhle ghlɩɛ ɔ 'yɛ -mʋabha 'bhuo 'wʋ zi. 5Sa'a n gba 'yɛ-a naa, -ɔ -yɛ na 'nglɩ 'mö 'gwileyi -lɛ la'a 'jinanɩswɩ'ɩ köbha, -amöö 'bhë ɔ köbha-a 'jinanɩswɩ'ɩ.
Sa Zezwi gba-a -wa pa-a nɩkpa 'jinyloli 'möö gbʋ
6Na -lʋa -wa ka'a-a dlɩ 'wʋ, nɩkpɛ -mɔ -yɛ wa gla'aa 'kikeyi -bhlʋɔ 'bhë dlʋa, ɔ -kɔɔ na dlɩwʋkakʋ dlɩ zɔmö -sa, 'mɔ nɩkpɛ la'a, wa -kɔɔ kpiyi -blʋ'ʋ gwanɩ, wa -kɔɔ -ma gïnyi 'mö 'pa, mɩ-ɩ -bhlee-a -fɛ ɔ de. 7Ma'a dʋdʋkpata -gömöö nɩkpa -wa pa-a -mʋmʋa 'jinyloli 'mö nʋ ngazɩli. -Ɩɩ yɛ -Lagɔɔ dlɩwʋkakɩɛ bhö-a nɩkpa dlɩ zɔmö 'nɩ-ɛ sɛyɩlali. -Ma ɩ 'mö, -ɔɔ 'mö ɩ 'bhönɩ-a nʋ ngazɩli.
8-Na kɔtɩkpa, -na kple -kamö 'jinyloli 'mö kwa 'le -wʋ-ɔ, -dɩɩ -bha -n 'kɩ 'kwla 'pa, -n -yɛ sɔköbhë -yɛ bhʋköbhë 'sɔ 'yɛ -ma 'kɔgwlɛpɩ 'wʋ mö, -mɩzlɩ -n 'yɛ kɔtɩkpö 'sɔ -yɛ kpli 'sɔ -ka 'bhë -n -nyɩɩ 'yɛ -ma 'kɔgwlɛkosu'u mö. 9-Na 'ji -kamö 'jinyloli 'mö kwa 'le -wʋ-ɔ, -sɛɛ -ma -n 'kɛ 'kwla 'pa, -n -yɛ 'yɩfa 'yɛ -ma 'kɔgwlɛpɩ 'wʋ mö, -mɩzlɩ -n 'yɛ -na 'jie 'sɔ -kpɔ 'wlumö -ka 'bhë, -kosu wa la-a Zeɛnɩ -n 'yɛ -ma ʋ 'mö mö.
10Sa'a n gba 'yɛ-a naa: Na -lʋa -wa 'nɩ-ɛ -bha nɩkpa 'ji 'klʋ -lu 'ji -ka, a möna wa de 'mö a 'na-a fɩnʋa 'wʋ -nɩ. -Wʋʋ yɛ-a, wa -Lagɔzuzuku -ɩ -wʋʋa-a 'wʋ yɩlɩ 'le, -bha na -Tɩbha -Lagɔ dlɩ'ɩ ɩ mö-a 'kɔmʋʋ. [ 11Nɩkpɛɛ 'Gu ji-e ma'a dʋdʋkpata'a, nɩkpa la'a -wa panɩ-a -Lagɔ -gömö -wa 'mʋnɔ-a, ɔ 'kʋa 'kwla 'mö -sa ɔ 'kʋa puaa yɛ -bha.]
Nɩkpa 'bhuo dlɩ wa ka-a yɛ -bhlʋ -bhlʋ -bha -Lagɔɔ de
12A de, nɩkpɛ -bhlʋ -yɛ -sɩka'a wliaa gwlɩ -ngbï -ka, ɩ gla'aa wli -bhlʋ -yɛ 'mʋnɔ, n -tɔnʋ -bha ɔ ji -mɩbhaa gwlɩ -mʋna kugbïa -ngbïmʋna 'wʋlilɩ'ɩ tɩ, -mɛ -bhlʋ tɩ-ɩ 'mʋnɔ-a, ɔ 'kɛ sɛ yɩlɩ kwla'a mö 'nɩ-ɩ? 13'Dɩɛ -dɩ n nyɛya -bha naa: Ɔ -yɛ wli la'a yɩlɩ-ɛ, 'mʋna -a jio-a ɛ -bhlʋ 'tɩɛ yɛ 'lɩbhaa, ma-a -zu-a ma-a zi-a wlia -mɩbhaa gwlɩ -mʋna wlia kugbïa -ngbïmʋnaa -la 'wʋ. 14-Sɩbha a -Tɩbha -Lagɔ -ʋ -wʋ-ɔ -ma -Lagɔtapɛ'ɛ 'nɩ-a 'jɩbha naa ʋ -lʋaa gla'aa -bhlʋɔ bhë-ë 'nɩ-a -lu 'ji -ka 'yɛ 'mʋnɔ.
-Na -Lagɔdagu -yɛ 'jinyloli nʋ
15-Na -Lagɔdagu -kamö 'jinyloli 'ji nʋ-ɔ, ghlɩɔ -bha, a 'sɔ -kpɔɔ nyɩdɩ -n 'yɛ ɔ de gba. Ɔ -kamö 'yukwli pönɩ ɔ -kɩɩ 'wʋ 'bhönɩ, -n kɔ 'kwla 'mö -sa 'bhë. 16Mɔ-ɔ -nɩmö 'yukwli pönɩ-ɛ, 'libhï nɩkpɛ -bhlʋ 'wʋ, nɩkpa 'sɔ 'yɛ, a 'kɔ -ma ghlɩ, wa 'yɛ -bhayɩlɩngwa glɩnɩ, 'mɩ wɛlɩ 'yɛ -bha nɩkpa 'sɔ, nɩkpa taa 'ji 'klʋ bhɩanɩ. 17Nɩkpa la'a -n -nyʋa mö-a ɔ nʋa 'yɛ 'yukwli pönɩ-ɛ, -sanɩ -Lagɔzakpa 'dɩ. 'Ma ɔ nɩ-a 'mö 'yukwli pönɩ-ɛ, 'libhïo lepoo mëniköbhanyɔ -yɛ -ɔ 'nɩ-a -Lagɔ -jie swɩ'ɩ 'wʋ. 18'Dɩɛ -dɩ n nyɛya -bha naa, -ɩ la'a 'bhuo a ji-e ma'a dʋdʋkpata -gömö sɛ gwa, sɛ ɩ ji-e -ma -Lagɔ 'wʋ 'gɔɔ. -Ɩ a ji 'yɛ-ɛ ma'a dʋdʋkpata -gömö bulonʋ-ɔ, 'bulonʋɔ ɩ 'jio-o -ma -Lagɔ 'wʋ.
19Sa'a n gba 'yɛ-a a de naa: A gla'aa nɩkpa 'sɔ, -lu -mʋɔ 'bhë wa -yɛ -Lagɔ 'jɩbhanɩɛ ji, ma'a dʋdʋkpata'a wa -yɛ dlɩ -bhlʋ -ka, -ʋ la'a wa 'jɩbha-a, na -Tɩbha -Lagɔ -ʋ -wʋ-ɔ -ma -Lagɔtapɛ'ɛ jua 'nyɛ. 20-Wʋʋ yɛ-a, la nɩkpa 'sɔ nɩkpa ta 'titanɩ-a na 'nglɩ 'mö 'wlu-o, n-n -bha wa nyɩdɩ.”
Zezwi nɛ nɩkpɛ -kamö 'jinyloli 'ji nʋ 'tatinɩ ɩ gbʋ 'ji
21Zezwi gba-a sa'a wa de, 'n Piɛlɩ jio-a yawʋ nyini, ɔ nɛ naa: “Nyininyɔ, na linɩkpɛ ka'a 'jinyloli 'ji nʋ, 'wʋ ya n ji-a ɩ gbʋ 'ji 'tatinɩɛ 'nɩ? 'Wʋ -ngbisɔ-a 'nɩ-ɩ?” 22Zezwi nɛ naa: “N'n -lɛ 'wʋ -ngbisɔ nʋ, 'wʋ gwlɩ ta kugbïaa dikpïa -ngbisɔ n nʋ -bha.
Nyɩgbajʋlʋ -ɔ 'nɩ-a ngazɩdlɩ -kaa 'nine
23Ɩ yɛ -Lagɔɔ nyininyinipɩ 'wʋɔ wɛlɩ-ɛ, sa dʋdʋnyininyɔ 'nɩ-ɛ la'a ɔ lɩɛ 'jizʋngwa wɔzɩ ɔ 'kʋa ɔ lɩ ngli 'jɩbhanɩ-ɛ, -sɩbha ɩ -wʋ -bha. 24Ɔ tɛ-a, 'n wa jio-a nyɩgbajʋlʋ -ɔ ka la-a mininywɩɛ kugbïtaa gagbʋ -la. 25Ɔ'ɔ ɩ 'kwlasalu -kaa yɛ, ɔ 'bhitɩbha nɛ wa 'pɔ 'pɛlʋ, ɔ 'nglɔ -yɛ ɔ 'gwie 'sɔ, ɔ -li 'bhuo 'gamö, ɩ mëni 'yɛ ɔ gagbʋ -sa. 26Ɔ 'bhitɩbha gba-a sa'a, 'n nyɩgbajʋlʋ la'a ji-e -bha ɔ dlɩ'ɩ -kokomunigbö glu 'pa, ɔ nɛ naa: -Abhitɩbha, n -bhiamö yawʋ, -kʋnʋ 'mö, n ji -na gagbʋ 'bhuo -sa. 27Ɔ nʋ-ɔ -sɩbha, 'n ɔ 'bhitɩbha ji-a ɔ de ngazɩdlɩ 'pa, 'n ɔ jio-a ɔ gagbʋ 'wlumö tɩ, 'n ɔ jio-a 'ji 'tati 'n ɔ ji-a mö.
28Ɔ 'wlʋ-a 'pɩ, ɔ-ɔ mö 'le 'n ɔ -yɛ ɔ linyɩgbajʋlʋ ka la-a ɔ 'wli -ngbisɔɔ gagbʋ ji-a gbënɩ. Ɔ köbhanɩɔ-a -blʋ, ɔ nɛ: Na gagbʋ -n ka-a, -sʋʋ. 29Ɔ linɩkpɛ la'a 'pa-a -bha ɔ dlɩ'ɩ -kokomunigbö glu-o, 'n ɔ jio-a -bɛlɩ 'pa. Ɔ nɛ naa: N -bhiamö yawʋ -kʋnʋ 'mö, n ji -na gagbʋ -sa. 30Ɔ linɩkpɛ 'pɔ-ɔ -sɩbha -bɛlɩ, ɔ'ɔ -lɛ nglu, 'n ɔ jio-a -die 'mö 'pa, ɔ -yɛ gagbʋ -sa 'bhë ɔ 'yɛ -ma 'wlʋ. 31Ɔ linyɩgbajʋlʋɩ yɩlɩ-a -ɩ 'plɩ-a, 'kalɛ ɩ palʋa-a 'mlɩ tenyi, 'n wa ji-a wa 'bhitɩbha 'dɩ kwa. 32'N wa 'bhitɩbha ji-a nyɩgbajʋlʋ la'a wɔzɩ, ɔ nɛ -bha ɔ de naa: Nyanɩklanyɔ, n -tɔnʋ -n pa'a-a -bɛlɩ gagbʋ 'bhuo n nʋ ʋ -tʋmö 'wlumö? 33Sa n 'pa-a -na de ngazɩdlɩ, -nn la 'yɛ -na bhɛlɩ -n 'yɛ -sɩbha -na linɩkpɛɛ de ngazɩdlɩ 'pa? 34Ɔ 'bhitɩbha 'pa-a yʋlʋ 'n ɔ jio-a -die 'mö 'pa, wa 'kɔ -ma 'zwɩ zianɩ, ɔ -yɛ gagbʋ 'bhuo -sa 'bhë ɔ 'yɛ -ma 'wlʋ. 35A linɩkpa kaya 'jinyloli 'ji nʋ a nɩ -ma a dlɩa zɔmö ɩ 'bhuoo gbʋ 'ji 'tatinɩ-ɛ, -sɩbha na -Tɩbha -Lagɔ -Ʋ -wʋ-ɔ -ma -Lagɔtapɛ'ɛ jiya-a köbha.”
Currently Selected:
MATIEE 'BƆGƲ 18: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
